نادي الهلال السعودي - شبكة الزعيم - الموقع الرسمي - مشاهدة مشاركة بصفحة مستقلة - رســالــة جــوال ّّّّّ خــلــتــهــا تــمــســك مــعــي صــح...(محتوى الرساله)

صـمـت · #1 17/07/2010, 06:18 AM

السلام عليكم ورحمة الله وبركاته

يوم الخميس الموافق 1431/8/3 هـ
الساعه (6:15 صـ) السادسه و الربع صباحا تقريبا

وانا فاضي جالس ادوج على السياره ...ومشغل المكيف حق السياره وحاطه على اربعه...

طبعا اكيد من الحر..<<يعني فيه احد يشغل المكيف عشانه برد مثلا؟؟

والشله الفاسده ادقق عليهم جوال اللي مقفل جواله
و اللي يرد علي وصوته تقول ددسن اربعه وثمانين مفقوعه كنداسته لانه راد وهو نايم واللي اصلا موب في الرياض
وانا منفقعه مرارتي النت خربان (يقطع) لانكم تعرفون اس تي سي حياة اسهل لا خلا ولا عدم

وانا جالس افرفر في شوارع الرياض في ذالحر و في ذالشموس الا و الجوال يرن

دن دن دن دن<<يبي يكتب نغمة نوكيا

المتصل: محمد الـفلاني
* * * * * * *055
انا: هلا والله بالخوي<<<ماصدق يلقى احد صاحي في ذالصبح

محمد: هلابك انت كيف حالك شخبارك عساك طيب

انا: والله بخير وسلامه انت اللي عطنا اخبارك وعلومك وش مسوي في ذالعطله

محمد: والله فيما يسرك مع الاهل والاقارب

انا: الحمدلله ... الا اقول وش مسوي مع ذالحر..؟؟ ما اقول الا نعنبوها حاله بس

محمد: اي حر..؟؟ ليه كم درجة الحراره..؟؟

انا: حلوه ذي اي حر.. ليه ماتحس..؟؟ انت ضب.. درجة الحراره من الاربعين لفوق

محمد: الضب انت وخشتك ... الا ولله الحمد براد وامطار وفله ما بعدها فله

انا: يامريض شفيك ... انهبلت ... الظاهر ضربت فيوزاتك من ذالحر..؟!!

محمد: انا مريض..؟؟ ثواني بدزلك رساله وعطني رايك..!!

انا: وشي رسالته.؟؟ الامطار و البراد هههههههه

محمد: تضحك..؟؟ برسلك صوره ... اقول الوسائط عندك مضبوطه..؟؟

انا: لا موب مضبوطه بس عادي ارسل وانا اشوفها على النت من موقع الاتصالات

محمد: خلاص انا بسكر الحين وبرسلك اربع صور للجو..!!

انا: الله عاد يذالجو كله شموس وحدب و قوايل .. يلا ارسل خل نشوف اخرتها معك

محمد: بس اذا جتك الصور دق علي وعطني رايك ... يلا مع السلامه

انا: مع السلامه

طبعا انا جالس انتظر الصور و انا ميت من الضحك اقول وش بيرسل ذالمهبول..

وافكر هو من جده امطار و براد في الرياض..؟؟

عاد مثل ماتعرفون رسالة الوسائط تاخر شوي... بعد ساعتين تقريبا

الجوال
(ديد ديد) جت الصور اللي هو مرسلها انا على طول رحت فتحت اللاب توب عشان اشوفها
على موقع الاتصالات

شووي اشوف الصوره وانا مفتح عيوني شوي وتطلع من مكانها
v

v

v

أبــهــا الــبــهــيــا

الله يالامطار و الجو بس اه بس ماشاء تبارك الله

انا اول شي ما دريت وين الصوره فيه يعني وين ملتقطها فيه لكن اتصلت عليه وفهمت الموضوع منه

اثر الولد فالها في البراد و الجو و الامطار و حنا هنا في ذالحر و الشموس تقول ضبان

عاد المقصد من عنوان الموضوع (رسالة جوال خلتها تمسك صح)

ان حنا و الاهل كنا ناوين نطلع لجده بعد ثلاث ايام يعني ناخذ لنا اسبوعين نتونس هناك

بس بعد الصوره هذي تغيرت الوجهه من الغرب الى الجنوب من جده الى ابها

وان شاء الله بنكون بعد ثلاث ايام في ابها البهيا باذن الله الله لا يعوق بشر

طبعا ندور الامطار و الاجواء الاوروبيه وان شاء الله ان قدرنا الله بلتقط لكم كم صوره وراح اوافيكم بها في المنتدى

ولو اني مالي في التصوير لكن تكرم عيونكم ...

وفي الختام اتمنى الموضوع يكون عجبكم ويكون خفيف على قلوبكم

وان شاء الله تكون الصوره عجبتكم

محبكم ّّّ{ صــمــت }ّّّّّ ّّّ