اهلييين ( عبده ) 
قصتك ذكرتني بسالفة عمي ( ابو احمد ) الله يطول بعمره مع الامريكان.. وهي باختصار :
عمي الله يحفظه كان يشتغل بالبنك الامريكي في بداية حياته
وكان فيه وفد من كبار مسؤولي البنك في زيارة مفاجئة للرياض.. ووقتها كان المدير مسافر
ويوم درى عن هالضيوف اللي طبوا فجأه.. ارسل لعمي وقال له استقبلهم ولاتقصر معهم بالحفاوة
المهم عمي تدبس فيهم
عزمهم ابو احمد وفل لهم الحجاج واغرق الطاولة بما لذ وطاب من ذبيحة وما يتبعها من محدثات الامور 
طبعاً غير المفطح حط اسماك ودجاج ومقبلات وسلطات وكل ابو الحركتات اللي تخلي ابو الهول ينطق ويقول ( امسحوا سعابيلي ) العلوج يوم قلطوا وشافوا الخيرات جحظت عيونهم وارتعدت فرائصهم... ويشهد الله انهم دغوا دغاً مبرحاً ولهطوا الاخضر واليابس 
المهم
بعد سنة ونص من هالمأدبة السلطانية ... راح ابو احمد لأمريكا في رحلة عمل وزار ادارة البنك وراح للمسؤول الامريكي اللي تعشى عنده هذيك الليلة
الامريكي فز من مكانه وقام يرحب ويهلّي... وقال لعمي :
انا وزملائي لن ننسى عشاء تلك الليلة... كانت مائدة رائعة بكل معنى الكلمة.. ونحن عقدنا العزم على ان نرد لك الجميل
يعني بالعربي قصده ( انت الحين ضيفنا وتهبى تصير اطيب مننا ) 
وعزم عمي على العشاء في بيته !! وعمي طبعاً استغرب انه في بيته لأنهم في العادة عزايمهم بالمطاعم والفنادق !!
المهم راح له عمي وهو مشمر عن ساعديه ومغسل بصابون لوكس يوم قلطهم العلج على العشاء.. كانت المفاجأة تخيلوا وش كانت مراجل ابن الكلب الامريكي ؟؟؟
7
7
ملاحظة : للامانة.. كل واحد كانت له 2 توست مع شوية سلطة ملفوف وبيضة مقلية نص استواء 
وعلى قولة الأبضاي ابو العز : يـا بـاطـل ..!!
