إطبق محرقة هتلر على شعب (ن) عزل معزول
عن العالم وغزه في مهب الريح معزوله
هذا شعب (ن) دعا الله فيه لا القاتل ولا المقتول
ضعوف (ن) تحت ضغط النار بالغارات مسحوله
ولا حول (ن) ولاقوة على ما صابهم لاحول
قضية بركت في منحرالتهويد مقتوله
كلام بلا سلام ولا احترام وكلمة المعقول
عليه اقرو سلام وفارس القسام قولوا له
يواصل في كفاحه بس لا يذبح همم وعقول
حرام ودبرة (ن) ماهيب في الإسلام معقوله
يقولون الكريم إليا نزل صكت عليه نزول
تشوف الخير فيه وجرته بالخيرمدهوله
واليا مريت لك قاع (ن) قحط عج ودهر ومحول
تعده وانص دار (ن) من صدوق الغير مسيوله
ولا نفلس من العاقل ولا نسمع من المهبول
ولا ناخذ مشورة جاهل (ن) ما بان مفعوله
ولا يختل ذكي والا الغبي مع غاربه مختول
ولا توخذ عرب بعد النذر بالغدر مختوله
أوادم مالها صرفه ولا حرفه ولا مدلول
تعالي يا جزور ولحمة الجزار ماكوله
نصحناهم فلاكن ما يفيد النصح ويش نقول
فرق متفرقة واحزاب منفله ومفلوله
أيادي تشتغل وتحط من خلف الروؤس ذيول
شتات ومشكلة متمشكلة بالطبع مفعوله
مصيبتنا عروبتنا تراوح في وحل وغيول
تخلت عن مباديها ونارالحرب مشعوله
ولا نعلم ولا ندري عن المستقبل المجهول
تمر أحداث مشحونة بعلم الغيب مجهوله
جرايم محزنة سودا تثبتها الرجال عدول
تصرف مجرم (ن) خلى كبود الناس معلوله
يهددهم شبح موت (ن) تمثل في وصايف غول
حيوان (ن) مفترس جاهم يشيل الموت بحثوله
على غزه دمار وعار شعب (ن) بالشرك محبول
عسى رجل (ن) سعت في شقت الصفين مشلوله
عليها الطايرالمشؤوم بانواع العذاب يجول
بلاد (ن) واقع الشرقي رفح بالجن منزوله
ياربي تنقذ الغبراء ولا يبقى عليها زول
من أم العنصرية والخبر عاجل لها زوله
ولا يكسر خشوم القوم غير المدفع المكيول
وقوم (ن) ماتخاف عقابنا خسرى ومخذوله
بزند بواردي (ن) فاسر (ن) عن ساعد (ن) مفتول
الى منه ثنى الركبه يحشر الجمع بفعوله
فتحنا القدس من بطن الجزيرة في سروج خيول
تهاذى بالعيال اللي لنصرالدين مرسوله
هبطنا الأودية غازين واجتزنا وعر وسهول
وحررنا البلاد وراية التوحيد محموله
فرشنا الارض بالدم الحمر فالفجر فرش زلول
وصلينا جماعة وايدي العدوان مغلوله
هذا قول (ن) عليه ثبوت بعصور (ن) مضت مقيول
وإلى قالوا من قايله قلناه ونقوله