باقول لكم موقف صار لي قبل فترة... والله على ما اقول شهيد


كنت اسوق سيارتي بشارع الاحساء بالملز... الساعة 1,30 منتصف الليل... رايح اتعشى

وقفت عند اشارة هرفي اللي بوسط الشارع... تقاطع الاحساء مع الاربعين.. كانت الاشارة حمراء

صارت خضراء ومشيت بكل هدوء

مادريت الا سيارة المرور وراي ومشغل السيفتي و ( على جنب يا راعي السيارة )

وقفت ونزلت له وقلت : خير ان شاء الله ؟؟

قال : رخصتك واستمارة السيارة

قلت : وش سويت ؟؟؟؟

قال : ليش تقطع الاشارة !!!!

قلت له : انا قطعت الاشارة ؟؟؟!!!!!!! انت من جدك والا تستخف دمك ؟؟؟

قال : انت قطعت الاشارة وانا شايفك.. ومايحتاج تكثر كلام منت قده

قلت له : انا ماقطعتها وانت كذاب بعينك !!!

تدرون وش صار بعدين ؟؟

سحب رخصتي واستمارتي وركبني معه بسيارته واخذني من شارع الاحساء وحطني بالغرابي عند البطحاء

فيه باص هناك كله باكستانيين وهنود... وقعدت بالباص من الساعة 2 الى قبل اذان الفجر

ومن حسن حظي جاء عسكري ملتزم وملتحي وسألني وش السالفة ؟

وعلمته بكل اللي صار... والرجال يسمعني اتكلم ويشوفني متأثر

راح ( الله يجزاه خير ) وجاب لي رخصتي واستمارتي ونزلني من الباص وقال توكل على الله

وحاولت فيه يعلمني باسم الحيوان اللي تبلاني لكنه رفض... وقال احتسب الاجر ويا بخت من نام مظلوم

سألته : ليش طيب يسوي كذا ؟؟

قال : تلاقيه خلاص ورديته انتهت ويبي يسلّم ولازم يحرر مخالفة وطاح فيك ولصقها بظهرك

سألته وانا مذهول : يصير هالكلام ؟؟؟

جاوبني : كثييييييير وخلها على ربك بس ولا تدقق بالحيل !!!!!!

وش رايكم بالهمجية ؟؟

......................

موقف ثاني... صار قدامي والله على ما اقول شهيد

هندي مسكين يشتغل في محطة بنزين ( الدريس ) بحارتنا

لقيته هذاك اليوم يبكي والهنود مجتمعين حواليه... وقفت وناديته وسألته وش فيه ؟؟

قال لي : اثنين رجال شرطة بالدورية وقفوا عنده بالمحطه.. قالوا له هات اقامتك

وبعد ما عطاهم الاقامة قالوا له اركب

وركب معهم ومغطوا فيه الى اقرب برحه... ونزل واحد منهم وقال للهندي انزل

ويوم نزل قام العسكري وسطره بكف وقال له هات الفلوس اللي معك كلها

الهندي خاف وعطاه اللي بمخباته.. تقريباً 1800 ريال

واخذ منه الفلوس ورمى الاقامه بوجهه وتركه بالبرحه وركب الدوريه وراح

وش رايكم بالهمجية ؟؟

.........................

تحياتي