قصه مؤثرة لأحد المشجعين النصراويين .. للعبرة ..
قصه مؤثره
********
وانا صغير مثل كل المراهقين كان يجذبني اللون البراق ..
نسي والدي ان يخبرني ان ليس كل ما يلمع ذهباً ..
إنشغال والدي بتجارته ووالدتي بتربية اخواني جعلني فريسه سهله لكل من في نفسه مرض ..
هكذا عرفت النصر ..
أصدقاء السوء لم يتركوا لي مجالاً للتفكير...
شف اللعب ..
ماجد .. محيسن .. الهريفي ..
شوف الكوبري يا روحي يا بو عبدالله اييييه ..
إعتقدت أن هذه هي الكوره وهذا منتهى الفن ..
عشر سنوات من الضياع والتعب النفسي ..
الناس تأخذ بطولات وأنا أمدح ماجد ومحيسن ..
يقولون لي فريقك ما جاب الدوري اقول ايه بس ماجد جاب كوبري ..
يقولون فريقك مهدد بالهبوط أقول إيه .. بس ماجد لاعب القرن ..
اشوف النصر ينهزم وأردد ما يقوله الريس عن التحكيم ..
عشر سنوات ..
وانا اذا دخلت مجلس أتحاشا أقول إني نصراوي .. 
تعبت نفسياً واصدقاء السوء راحوا مع اللي راح بعد ما زرعوا في نفسي كوره غلط في غلط ..
وكالعاده بعد ما غادرت مدرجات ملعب الملز منكس الراس وفريقي مهزوم ..
خذت السياره ورحت امشي حول الملعب اخفف من الوجع ..
من الطفش وقفت سيارتي وأنا افكر في نفسي ..
وصدفه قابلت زميل كان معانا في الحاره ماشفته من 10 سنوات ..
كنت اكرهه لسبب واحد كان هـلالي ..
لأنه دائما ( فرحـان )
شافني وسلم علي والسعاده واضحه في ملامحه عرف قصتي يوم شافني ماسك العلم النصراوي ..
كان مؤدب ولا حارشني قال بأدب الله يعينك الى هالحين نصراوي ..
بغيت أبكي وخفت يعلم العيال عني ..
ماقدرت اطالع عينه .. عرف جوابي ..
مشى جنبي ساكت يوم وصلنا السياره عطاني شريطين فيديو للهلال وقال اذا شفت نفسك فاضي طالع هالشريطين ..
وعطاني رقم جواله ..
وصلت البيت ..
رميت الاشرطه وقلت ما ناقص الا اطالع مباريات الهلال ..
حاولت انام وكل ما تذكرت ترتيب النصر في الدوري طار النوم ..
رحت امشي في الحوش وانا اقول الدخان والنصر واحد منهم راح يقضي عليَ ..
رجعت الملحق اقلب في الدش ملل..
وشفت الاشرطه اللي اعطاني صديقي الهلالي ..
قلت وش أنا خسران بدال هالطفش خلني أشوف الهلال واضحك عليهم .. ولا أحد يدري عني ..
بديت أطالع الاشرطه ..
شي من الهدوء والسكينة بدأ يتسلل إلى نفسي ..
شفت شي عكس اللي كانوا أصدقائي يقولونه ..
شفت فن .. شفت كوره حقيقية ..
شفت بطولات من كل شكل ونوع ..
الحين عرفت ليش جمهور الهلال أكثر سكينه وهدوء ضاع مني..
عشر سنوات من التخبط والضياع ..
توني أشوف الكوره الصح ..
كل ما خلص الشريط رجعته من الأول الى أن نمت ..
صحيت الصبح وكلمت صديقي الهلالي طلبت منه أشرطه ثانيه وثالثه ورابعه ..
ما هو عيب إني عشت ضايع .. العيب استمر ضايع ..
عرفت الفن ..عرفت الكوره ..
عمري اللي راح في القهر والتعب والمجادلة الكذابة ..
انضميت لشباب هلاليين علمتهم بقصتي ..
اخذوا بيدي ساعدوني ..
خفت أضعف وارجع لاصدقاء السوء ..
كل ما ضعفت رجعت شغلت واحد من الاشرطه وهدأت نفسي واطمأنت ..
لي سنتين من يوم اهتديت ..
أهلي فرحانين بالتغير اللي طرأ على شخصيتي صرت أكثر هدوء وأكثر روقان ..
تحسنت إنتاجيتي في عملي وهذا شئ طبيعي ..
صرت إذا جلست في مجلس وقلت إني هلالي ما عاد احد يتجرأ يتحرش فيني ..
الأرقام تتكلم .. والمنصات تشهد ..
هذي قصتي .. اهديها لكل نصراوي في غفلة ..
الأيام تمضي والسنين تركض ..
العمر واحد حرام نقضيه في ذل وتعب وقهر..
سعادتي اكبر من إني أحطها رهينة أقدام حلوي وجهوي ..
إلى كل نصراوي اهدي قصتي لتكن عبره وعضه ..
لعل الله ينفع بها احدالتائهين .. ا.هـ
اللهم أهدهم أجمعين آمين