هارد لك ياشباب المباراة انتهت بخيرها وشرها برشلونة الحين يمر بأفضل فترة قد يعيشها اي فريق كان , مااتكلم عن الموسم هذا بالذات , من الموسم السابق او نهاية اللي قبله , الفريق مستقر جداً , يملك فلسفة معينة في طريقة اللعب والتكتيك , اللاعبين متشربين الطريقة وحافظينها , بدون أي توجيهات ..تلقى اللاعبين عارفين اماكنهم , انتشارهم , كل تصرفاتهم . وفوق كذا عندهم مدرب من ربعهم , عارف الطريقة وفاهمها , وهذا اللي ساعده بانه يقود هالمجموعة الكبيرة اللي عنده والعكس صحيح , بحيث وجود بويول , الفيس , تشافي  , ميسي او حتى بيدرو اللي يعتبر من اللاماسيا وملقّن تلقيّن كامل وحافظ طريقة لعب برشلونة من قبل لايصعّد للفريق الاول مو استنقاص من بيب , لكن لو تجيب داسيلفا مدرب النصر كـ مدرب لبرشلونة , تبي تشوف طقطقة ومتعة واكتساح , لان اللاعبين ماشين على خطى معينة مااحد قدر يكسرها من المدربين الآخرين الى الحين .. واللي يسويه بيب مجرد لمسات تعطي طعم للعب برشلونة وتخليه ألذ بلاش التمجيد الفاضي لفريقنا واننا الكويسين والفريق اللي جايب 9 ابطال , و31 ليقا , وديستيفانو وبوشكاش وطقتهم والتاريخ ومدري ايش تاريخي وش نفعي فيه ؟ , لقمت 6 بأرضي وبين جماهيري , لقمت الحين 2 مع الرأفة , وبأقل مجهود من برشلونة , ولي 5 مدري 6 سنين اطلع من روما وليون وغيرهم من دور الـ 16 الى درجة اني نزلت تصنيف ثاني والله يستر لاننزل تصنيف ثالث انا لازم عشان اصلح فريقي اعترف اني اخطأت وسياستي خطأ واشوف اخطائي الفريق بشكل كامل يبي له عدة شغلات عشان ينجح من وجهة نظري كـ مدرب , انا اشوف بلقريني جيد ويصل لدرجة ممتاز بشكل عام , صحيح انه خذلنا في أهم المباريات , لكن برضو مانحمله فوق طاقته , الفريق مفتقد 2 من اهم عناصره , وهي اللي فرقت معانا في مباراة البارح مثلا " كاكا , بيبي " مااقول انهم هم سبب الهزيمة , لكن للأسف البديل مثلا لبيبي ماهو في قيمة اللاعب الأساسي للأسف , وكاكا كلنا نعرف قيمته وكيف كان التركيز بشكل كامل البارح على كريس واللي مايعدي من الفيس الا ويلقى بويول واذا عداه لقى بيكيه قدامه !! لو تواجد كاكا البارح كان اعطى خيارات عديدة للمدرب اعتب عليه في بعض التغييرات , عدم قراءة المباراة بشكل سليم في بعض الاحيان لكن بشكل كامل , مدرب كبير وقدير وممتع الدفاع : من متى وحنا نقول ونصيح ونصايح الدفاع يبي له قائد , مش بيبي ولاراموس ولاغيرهم يبي له من طقة بويول , نيستا , تيري بيكيه يعتبر من افضل مدافعين العالم بالنسبة للكثير الا انا , انا مااقتنعت فيه لكن وجوده بجنب مدافع قائد زي بويول خلاه مميز تخيل ألبيول او حتى بيبي جنب تيري , نيستا , او حتى فريديناند لاعب يعرف يقود خط دفاعه , يكون مدربهم جوات الملعب , يقودهم لتطبيق مصيدة التسلل , يوجههم , يحمسهم , يهاوشهم على اخطائهم البارح الأهداف كلها جت بتطبيق غلط لمصيدة التسلل من الدفاع خصوصاً الهدف الثاني لو كان عندنا احد ينظّم هالخط , ماشفنا ع الاقل هدف بيدرو بإستثناء انو يكون عندهم لاعب إستثنائي زي تشافي البرشا , هذا شي آخر يكسر ظهور مو عاد مصايد تسلل غير اننا نحتاج ظهير ايسر بطل وعليه العلم والكلام , ملينا من مارسيلو , ودرينثي اللي مصاب له اكثر من 600 يوم هههه صدق وش قصته هالخال؟ وترقيع أربيلوا في اليسار اللي يصير كويس دفاعياً ويموت هجوميا وحنا مرات كثير نحتاج مساندة الأظهرة في الهجوم في كثير من الخطط التكتيكة المحاور , بطله , ولايبي لها لاتعديل ولاشي , ابداً بس يبي لها شوي تغيير قناعات لبلقريني يبي احد يعطيه سي دي فيه مباريات المنتخب الأسباني ويخليه يشوف تشابي الونسو لما يكون محور هجومي ايش يسوي .. ويخليه يثمل على الطرب اللي يسويه اوكي انا فاهم ان بيلي يبي تشابي هو اللي يبدأ الهجمة نظراً لان عنده نظرة اوسع للملعب من قاقو او حتى الديارتين , بس لما يكون عندك لاعب يؤدي بشكل افضل في المحور الهجومي , ليش تكبحه؟ , ليش تضيع على فريقك ثروة زي كذا ؟ ديارا الكبير شي مو طبيعي دفاعياً , مايمنع يلعب هو وتشابي مع بعض , هنا بتكون أمنت دفاعياً وصار عندك قوة اضافية في التمويل للوسط والهجوم صدق هاللاعب ثروة كبيرة بس يبي لها احد يعرف يستفيد منها صح الوسط : كلام كبير عليه , كاكا خذلنا وخذل العالم كله , مش هذا كاكا ابداً بغض النظر عن اصاباته , لكن حتى الآن ماشفت منه مباراة تقول ايه يسوى 64 مليون فارت في المباريات القليلة اللي شارك فيها , اشوفه قدم أكثر بكثير من كاكا قوتي , شي طبيعي بيطلع مع اني اشوفه افضل بديل في العالم لما يكون مروّق الكلب مارسيلو كويس , صح انه يجي منه بعض الدباشة هو وشعره اليابس , بس مع ذلك يسوي اضافه هجومية بطلة ولابأس فيها دفاعياً نحتاج لاعب يعرف يتحكم برتم المباراة , يهدي لما تحتاج تهدي , يسرّع لما تحتاج السرعة , ومااشوف لاعب في العالم يطربّني ويمتّعني لما تكون الكورة بين رجليه زي 3 لاعبين .. اثنين بعد عن اشنابنا نجيبهم " تشافي هرنانديز , انييستا" الثالث اتوقع انه ماراح يجلس في فريقه " سيسك فابريقاس " لبى خشيشته , يسوى ميتين ريبري و13 سيلفا , بس يجي لااحد يكلمني بقرانيرو الزلابة الهجوم : هنا الكلام كله عليه كريس مايختلف عليه اثنين مهابيل , عاد كيف اثنين عقّال راؤول  هيجواين .. هذا المصيبة الكبرى كأرقام الظاهر انه افضل مهاجم في اوروبا بالنسبة لدقايق اللي لعبها والأهداف اللي سجلها بس بمين ؟ , خيريز , خيخون , ملقا والطقه ذي وينه له موسمين في المباريات الكبيرة واللي نحتاجه فيها ؟ ينكتم كتمة بّس , ولاعاد يصير له كلمه , ويضيع لما تجيه فرصة وحدة قدام فريق كبير , وهنا عامل الخبرة يسوي سواته اوكي لاعب موهبة , يتطور , بيصير من افضل مهاجمين العالم لكن مهوب الحين , يمكن بعد 3 سنوات او حواليها , لكن الحين لا روني , فيا , دروغبا هذولا المهاجمين اللي فعلاً تقول عنهم سوبر ستار , وكلنا نذكر وش سوى روني في السانسيرو وكلنا نعرف فيا ودروغبا ومايحتاج نتكلم عنهم لكن وين هيجوين في المباريات اللي نحتاجه فيها البارح جاته كوره قدام الباب ولحقّها كورة برناوي !! قدام فرق كبيرة زي برشلونة وغيره , مو كل الكور بتجيك زي كذا , فرصة وحدة وبس , تسجل تفتح المجال لنفسك ولفريقك انك تسجل اكثر او حتى تقمط وتفوز لكن تضيّع ؟ , تضيّع ثقة فريقك فيك وتضيع مجهوداتهم وثقتهم بأنفسهم هم , شخصاً مااعتمد عليه كـ سوبر نقدر نحط امال الفريق عليه بنزيما , مااخذ الثقة كاملة وأول موسم له في دوري جديد واعلام وصحافة حقيرة بنت كلب , ماتقدر تحكم عليه ابداً , تعطيه موسم ثاني , وتحكم بعدها , لكن لو خيروني بقول عطوه فينقر لأنه يبي له مهاجم غير البعير بندتر مدري وش اسم امه , وداقشوه بسيسك وافرقوا السعر < وين يالاخو بحراج الشفاء انت ؟  بس الأهم من كل العناصر والخطوط , الإستقرار بداية الصيف مهم جداً يجتمع زيزو , فالدانو, بيريز , وبلقريني لو قرروا انه يبقى ويؤخذ راي بلقريني باللاعبين اللي يحتاجهم واللي مايبيهم ووش المناطق اللي يحتاجها وبالضبط مين اللاعبين اللي يبيهم انت عشان تنجز شغلة معيّنة , يبي لك عدة ادوات انت محددها عشان تقوم بالشغل اللي انت تبيه وتقدر تنجز اللي انت تبيه احتياجاتك لازم توفرها , بعدين تبدأ مشروعك اللي انت راسمه في مخك لذلك لازم يعطى بلقريني الثقة كاملة أولاً , والصبر عليه ثانياً , والدعم من الإدارة ثالثاً , ثم يختار اللعبية اللي يبيهم ويطرد اللي مايبيهم بغض النظر عن رغبات الجماهير او الأس او الماركا لأن أهم شي نحتاجه احنا الإستقرار قبل كل شي ثم من المهم اننا مانستعجل النتايج , اوكي هالسنة احتمال كبير نطلع بلوشّي السنة الجاية مهم جداً اننا نكون رقم قوي في التشامبيونز ونوصل الثمانية او حتى الأربعة ونطلع مو مشكلة لو حتى مانفوز الا بالليقا السنة الجاية أو حتى الكأس اللي كرشنا منه الكركون بأربعه بتكون كافية جداً في السنة الثالثة بيكون الفريق عرف مدربه , عرف طريقه مدربه ومخه , اللاعبين عرفوا طريقه لعب زملاهم , تفاهموا اكثر مع بعضهم , في ذاك الوقت تبي تقدر تكوّش على البطولات اللي تلعب فيها بشكل كامل وتمتع وتستمتع بس لازم الإلتزام بالصبر < تذكرت الإلتزام بالاخلاق السعودية ههههههه تمسّون على خير |
