الجمهور !

بكل اختصار .. وأمقت إني أقولها

نعم ، هُم الجمهور !

للأسف جمهور الهلال على أرضه ظاهرة سلبية .. وايجابية للفريق المنافس

بكل بساطة لما الجمهور ما يقدّر حجم المباراة وأهميتها ..ويتصرف معها وكأنها ودية .. ويظل جالس لي طول الـ 90 دقيقة صامت وكأنه يشاهد المباراة من خلف شاشة تلفزيون .. لا صوت ولا تشجيع مستمر !

وان شجع وهتف.. سمعناه دقيقتين .. ثم يعم الصمت

ميزة اللعب بالأرض هو "الجمهور" ، لأنه هو اللي له القدرة الخارقة بـ خربطة أوراق المنافس وفقدانهم للتركيز ..
غير انه يُعتبر الشاحن الأول لمعنويات الفريق

سكوته وتفرجه وكأن المباراة لا تعنيه .. يعطي الفريق المنافس فرصة التركيز والتقاط الأنفاس ..
بينما يرجع عكسي و "سلبي" .. على فريقه

ان كنت بتجلس صامت !!.. حضرت للملعب ليه ؟؟
وش فايدة تواجدك.. كان جلست في بيتكم أحسن لك ؟؟

الجمهور للأسف أفقد الهلال ميزة اللعب على أرضه وشاهدناها في كثير من المباريات.. وآخرها أم صلال..
والفرق المنافسة كثير ما تحرج الهلال في أرضه لسبب إنها ما تلاقي اللي يهز معنوياتها ويربكها .. بل تلاقي الملعب هااادئ وبيئة صالحة للتركيز التام والانضباط وقلة الأخطاء

شاهدوا جمهور ايران كيف تشجيعه مستمر من أول المباراة لآخرها
شاهدوا جماهير اوزباكستان .. كيف هي الداعم الأول لفرقها بالبطولة الآسيوية

وأتمنى تشاهدون كيف هو فن التشجيع الجماعي لفرق اليابان !

احنا للأسف نفتقد ثقافة التشجيع المستمر ..
غير ان جمهور الهلال خذل الفريق بحضوره اليوم..

لكنه كملها للأسف باتخاذ موقف المتفرج بأغلب فترات المباراة

رغم ان الفريق خارج من خسارة ومفتقد لأهم مفتاح بالفريق وهو ويلي ..

وين موقف الجمهور مع هالظروف ..

كثير من الجماهير ما نسمع صوتها إلا وقت الهدف.. ثم تسكن وتختفي !
الجمهور اليوم كان المفروض يكون الداعم الأول ..

بالنسبة لي إن كان الجمهور بيظل على هالحال.. اتمنى من الهلال يتنازل عن البطاقة الأولى لأن اللعب على الأرض ما عاد صار له أي ايجابية وأي ميزة عندنا..والسبب جمهورنا العزيز !!
والهلال أثبت انه قادر على الابداع خارج أرضه

وبالنسبة للأهلي..

أحييهم يستاهلون التعادل.. إن لم يكن الفوز
قدموا مستوى
واثبتوا للاعبين الهلال .. إن حتى أضعف الفرق .. قادره على احراجك والفوز عليك .. اذا ما احترمتها

والهلال اليوم لم يعطِ الأهلي احترامه الذي يستحق
ونستحق التعادل

والخطأ بآخر المباراة من أسامة هوساوي يتكرر !

وبنفس التوقيت ! عندما أدركت المباراة على النهاية !

هل اسامة هوساوي اصابته الثقة الزائدة .. ولم يتعلم من خطأ مس كرمان

أتمنى يراجع نفسه لأن خطأه تكرر.. وبنفس التوقيت الحساس

أتمنى تكون هالمباراة صحوة .. درس الاهلي مفيد بالنظر لحالته الفنية الضعيفة اللي سبقت المباراة .. شكرا يا أهلي وان شاء الله نتعلم الدرس

عذرا على الإطالة لكنها نقاط حبيت أذكرها ..وانت اثرت نقطة بغاية الاهمية