"الاعتقادات عند الناس كثييره ومعظم الناس يظل
متعقد من شيء معين ويبني عليه اعتقادات خاطئه !! "

" هالادمي موجود ؟! اجل اليوم باين من اوله ! ماشفنا خير "


" من جدك أنت تبيني اشتري سياره لونها ابيض ! نسيت سيارتي الاخيره يوم صدمت فيها "



" لا مابي هالفستان .. اخاف يصير لي مثل ماصار يوم لبسته اخر مره "

اعرف وحده صارلها حادث يوم الاربعاء وبعد اسبوع صارلها حادث ثاني يوم الاربعاء بعد ..
طبعا هو إرادة الله ولكن هي تقول توبه اطلع يوم الاربعاء صار يوم نحس لي ..!!
نقولها هذا قضاء الله وقدره ولكنها مو راضيه تقتنع وتغير رايها ..

مره عمي كان بسلطنة عمان .. يقول كنه داخلين سوق شعبي وكل واحد حاط له طاوله ويبيع اللي عنده يترزق يعني .

يقول وقفت عند وحده تبيع اشياء بايخه ومااعجبتني هي دهن عود وبخور بس مو حلو .. يقول بغيت امشي قلتلها مشكووره قالتلي والله تشتري مني قالها ماعجبني شي قالت طيب لاتشتري بس ان مشيت من هنا يصير خير والله انك ماراح تعدي طاولتي

يقول والله ان ربعي مشوا وانا واقف مكاني مدري شصارلي احاول امشي ماني قادر .. يقولون ربعي تعوذ من ابليس وامش يقول والله اني ماقدر ورجعت شريت منها وبعدها كملت طريقي..!!

هنا مدري هي سحرته ؟ او انه حط في باله انها بتنفذ اللي براسها وبإعتقاده ماقدر يكمل مشيته !!

عن عبدالله بن مسعود رضي الله عنه قال سمعت النبي صلى الله عليه وسلم يقول : (( ان الرقى والتمائم والتولة شرك)).


كما في صحيح مسلم (( لابأس بالرقى مالم يكن شركا)) وثبت بان النبي صلى الله عليه وسلم رقى ورُقى فليس كل انواع الرقى شرك
بل بعضها وهي تلك التي اشتملت على شرك واستغاثه بغير الله , اما الرقيه التي ذكر فيها ذكر الله سبحانه فجائزه بل مستحبه.


التمائم .. سميت تميمه لاعتقاد من يعلقها فيها انه بها يتم له الامر الذي اراد.

التمائم : جمع تميمه وهي التعويذه التيتعلق بالعنق او العضد, وكانت العرب تعلق على الصبي خرزات او حلقه مستديره من حديد او ذهب ونحوه, لدفع العين والحسد واثر الشياطين بزعمهم او دفع الضرر عامه.


نلاحظ عندنا الكثير وخاصه عند النساء من يعلق التمائم او القلادات او الخرز اللي يعتقدون انه
يبعد عنهم الشر او العين والحسد ..وهذا طبعا قبل لايكون ضعف بإيمانهم فهو تخلف .. فكيف لشي مصنووع ان يوقف ارادة الخالق ؟!!

...مخرج

كثير منه يظل يعتقد اشياء ويصدقها ومرات يوسوس ويقول هالشي هو السبب .!!
وينسى ان الله هو اللي يفعل كل شيء وبيده كل امورنا سيئه او جيده .

نسأل الله السلامه من الفتن , ماظهر منها وما بطن , وخاصة فتنة الشرك, ونسأل الله ان يختم لنا ولكم بالتوحيد