βąřςєļớŋă
البطاقة الشخصية

من متى وانت برشلوني وتشلساوي ؟

برشلوني من أول ماقالوا لي ان ريفالدو في برشلونة , وتشيلساوي أكيد من جية رومان يعني في 2003

عطـنا نسبت حبك لـ البرشا والهلال والبلوز ؟

نسبة ! كلهم 100 % , لكن مع ذلك في تفاوت وبالذات بالنسبة للهلال , لأني من دون شك أحب البلوز وبرشلونة أكثر

بصرآحة مين تشجع أكثر البرشا ولا البلوز ؟

لو قلت برشلونة بينقال مهوب تشيلساوي صميم , ونفس الحال لو قلت العكس
بس بحكم إني شجعت البارسا قبل أكيد راح أشجعه أكثر

هل انت شخص عصبي هادي ...... ؟

هـادئ جداً , وإذا عصبت أهدأ بسرعة .. بمعنى نادر ماأعصب بقوة

عندك سيارة ؟ وإذا عندك وش نوعها ووش لونها ؟!

إي عندي ولله الحمد

عطني رأيك في هذولا الأعضاء .

BARCELONISTA بندر

يكفيني ان غيبته تكدر

GeRaRd أسامة

مدري صراحة مالي معرفة فيه أبداً حتى من خلال ردوده ماتهيأ أي انطباع ناحيته

F-C-Barca عبدالله

حبوب حييل

Lionel Messi يوسف

أكبر نشبه لا أمزح , يوسف ينحط على الجرح يبرى

Visca El Barca نواف

أكثر عضو مروق ومعطي الدنيا أشكل , عامل جو حلو جداً في الرابطة

وش رايك فيني ؟!

أنا متأكد لو سألتك هالسؤال تبي تقول ماتدري ! ونفس الحال أنا



GeRaRd


س - البطآقــــة الشخصيـة / , وبــدون أي اختصآرآت / ,

جاوبت , وعذراً لأني اختصرت

س - تلعب كـورة ؟ وآذآ تلعب ويـش ّ تلعـب في مركزك ّ [. وسط , جهوم , دفآع , حآرس .] ؟ وهل آنت فنـآن لدرجة عآليــة ؟

أي ألعب في أكثر من مركز لكن الأطراف الأنسب لي سواءً ظهير أو جناح ... لا منيب فنان , لاعب عادي حالي من حال غيري , لكني برضو منيب سيء ولي دور في الملعب

س - ويشش ّ تسـوي أكثر وقتـكّ [.نــوم , نت , درآســة ّ , تلفزيون .]

أكثر وقتي أكيد في شغلي , وحتى لو ماكان عندي شغل أقضي وقتي بحاجة تخص شغلي برضو أو أقرأ كم كتاب أو أي حاجة أستفيد منها وبالذات البحوث القديمة اللي كنت أسويها

س- تـــدرسّ ولـ " ا موظـف ؟

موظف

س- أفضل تشكلية للبرشا ؟ من وجهة نظرك ّ ؟

فالديز , ألفيس , بويول , بيكي , أبيدال , يايا ( بوسكيتس ) , كيتا , تشافي , إنييستا , ميسي , إبرا

س- عمـرك سآفرة خآرج المملكة ؟ وأذآ سآفرة وين ّ ؟

أي سافرت

س- متى بدآت تشجع الهلال ّ ؟ وبتآريخ كم ؟ ومع مبآرآة مين ؟

زماااان , قد مايكون التشجيع بمتابعة , لكني أقول إني أشجع الهلال وخصوصاً لما يكون في أحد حولك يحب الهلال بشكل غير طبيعي , حتى أذكر واحنا بزورة كان واحد من الأهل هلالي يجي لنا اسبوعياً و يسألنا كلنا " أنت هلالي ؟ " واللي يقول " أي" يعطيه ريال والل يقول " لا " على طول كف , وكان أخوي أهلاوي ويتردد كثير يقوله الصدق أو لا

س- أفضل عندك الهلال آم برشلونــه ّ وجهة نظرك ّ ؟

ماأدري هل هالشيء يستوجب وجهة نظر أو لا , لأن الواقع يقول ان برشلونة أفضل وبفروقات كبيرة لكن إذا قصدك من ناحية الميول بعد أبي أقول برشلونة أفضل


س- ويـش ّ رآيـك في ملعب برشلونـه الكآمب نو ّ ؟ وهل عمرك دخلتـه ّ ؟

مايبيله كلام من أفضل الملاعب في جميع النواحي ! أي دخلته في مباراة الكلاسيكو الموسم الماضي 2 / 0 ! تطمن حبيبي لو دخلته الرابطة كلها تبي تدري إن شاء الله

س- ويش ّ رآيك بآلأسآلة ؟ وكييف ّ آسلوبي معك كآن ؟

حلوو




The Rocket

سـ/ وين ساكن فيه ؟

بالجبيل

سـ/ وش نوع جهازك ؟ .. لاب توب ولا مكتبي ؟

الاثنين

سـ/ معك جوال ؟ .. واذا معك وش هو ؟

5800 Xpressmusic


سـ/ معك سيارة ؟ .. واذا معك وش هي ؟

أي معي

سـ/ كم تدخل من منتدى في اليوم ؟

على حسب أصلاً اذا دخلت النت أو لا , معظم وقتي يكون ضيق فمايصير عندي وقت الا أدخل هنا أو مواقع الأخبار من الديلي أو السبورت واذا صار عندي وقت أكثر أدخل منتدى للتنس

سـ/ تحب تشوف أفلام ؟

يعني

سـ،/ من ودك يجي للبرشا ؟

مش فابري , أكيد روبينيهو, وودي في سيرنا

سـ/ وش هو الفريق اللي تميل له بعد البلوجرانا والبلوز ؟

ماعندي حاجة اسمها بعد وتصنيف نسب التشجيع غير ان برشلونة أولهم ... وأحب الميلان من أيام أبو ظبي

سـ/ كم تعطي النت من وقتك اليومي ؟

أنا ماأجلس على النت يومياً ولو جلست ماتتعدى الساعتين غالباً

سـ/ تدرس ؟ .. ولاموظف ؟

موظف



F-C-Barca

س// شخبـآرك

الحمد لله

س// محمد وش مدى استفادتك من الشبكه يعني وش تستفيد منها ؟

قد ماتكون الاستفادة كبيرة , لكن أهم شيء اني أخذت هالفائدة شيء ينفعني

س// وش رآيك بالعالميه واللي قاعد يصير فيها من تعصب اعمى .!؟

قبل كنت أقول شيء يجيب المغص وعلى قولت السلمي " حموضة " بس بعدين لما أفكر فيها أبي أقول الشيء عادي جداً وصعب ان نمحيه أو حتى نقلل منه لدرجة كبيرة وبلعكس أحسه يضحك ! لكن برضو كل شيء له حدود وبشكل عام أنا ماأدخل العالمية إلا بالغلط , حتى الأستوديهات ماأدخلها الا نادر .

س// رآيك في المونديآل القادم يعني تتوقع انه بيكون مشعلل وحمآسي ولا بيكون بآآيخ زي مونديآل 2002 ؟؟

مونديال 02 مافي حاجة بيخته كثر كوريا والعمايل الوسخة اللي كانت في مصلحتها وهالعمايل قلت بشكل كبير في 06 اللي ظهر بمستوى ممتاز , فنتمنى ان هالعمايل تنعدم وإن شاء الله نبي نشوف مونديال حماسي .

س// التانغو مع مارادونا بتسوي شي في المونديآل من وجهة نظرك ولا انها بتكون عاجزه في منافسة الكبآر !؟

مافيها حيل تسوي شيء دام محد يسندها

س// التشامبينز ليج السنه هذي ممتع بصراحه من خلال المجموعات شفنا اشياء صعبه خروج اليوفي والليفر وبرضو صعوبة التاهل لاكثر من فريق من تتوقع اللي بيصمد الى النهاية مع اني انا ارشح تشلسي للقب !

تشيلسي إلى الآن ماشي صح إذا مااستثنينا الدجة الأخيرة بالدوري , وإذا ظل الفريق يمشي على هالمستوى والظروف ماعاندته سواءً من حظ أو تحكيم , بإذن الله اللقب مايبي يتعداه
لكن برضو الريال مايبي هالسنة يطلع من الحسبة , وفي عندك بعد المانيو وبرشلونة .. هالموسم حتى بوردو وسيفيا لا يمكن استبعادهم

س// افضل عضو من كل رابطه غير رابطتنا ؟

والله أنا ماأدخل روابط كثير , لكن في عندك في البلوز الريس نواف دنيدل وأيوب فيلسوف وبعد عندك في القنرز عبود , وفي التنس بعد عندك النائب حازم النينو وفي الإنتر عبد الهادي لوفر سامي , وكثييير المميزين لكن ماأنتبه لهم لعدم استمرار دخولي النت .

س// برشـلونه في الميركآتو الشتوي من يحتآج اي لاعب ؟

بديل ألفيس + جناح يسار

س// عام 2009 انتهى بتفوق كبير للبارسا يعني عام 2009 اخذنا كل البطولات اللي شاركنا فيها عام 2010 عام مختلف تماماً البارسا وش له من بطولات في العالم هذا بوجهة نظرك ؟

شوف حتى لو نطلع واحنا ماعندنا شيء , اهم حاجة عندي ان الفريق يكون في سعي دايم لتعديل أي خطأ طارئ , لكن بإذن الله اللا ليغا ماتبي غيرنا , واللي يجي من الله حياه الله

س// البارسا يبغا فابري وفابري صعب قدومه اذا كنت تعرف جوركوف وانا اجزم انك تعرفه ليه البارسا مايهتم فيه لاعب موهبه كبييره جدا وانا اضمن انه لو استمر على نفس المستوى موب جالس في بوردو الموسم القادم ويصلح لطريقة البارسا وانا اشوف ان قدومه مكسب للفريق ؟؟ رآيك في قدوم جوركوف للفريق ؟؟

جوركوف موهبة متميزة وأكيد راح يكون مكسب لأي فريق يروح له , لكن مهوب من نصيبنا

س// لو قالولك اختر منصب جديد للروابط وش تختآر ؟؟

كفاية علينا الموجودين

س// اقول ديكوفيتش اهو اللي يلبس اطقم اديدآس ولالا

تصدق ماقط انتبهت بس أتوقع اي هو لأني على ماأذكر ان المضرب أديداس



محب الذئب9

س - من اطلق لاعب عندك (محلي وعالمي) والاسوء ( محلي وعالمي) .. ؟

الأطلق , محلي / هوساوي .. عالمي / تشافي

والله صعب أحدد لك لاعب سيء بعينه لأن في أحيان تجي للاعب فترات يا إما يشطح يا إما يدحدر وهكذا , لكن أبحدد ع الطاير ..
محلي / الزوري ... عالمي / بوسينجوا

س - وش رايك با الاغاني والمسلسلات التركية .. ؟

ماأتابعها فما يحق لي أحكم عليها .. لكن الأغاني أكيد حرام ومايحق لأي واحد فينا سواءً يسمع او لا ان يبدي وجهة نظره فيها

س - تلعب ( كورة - بلوت - بلاي ستيشن - شطرنج - العاب اونلاين ) .. ؟

بس كورة

س - من ودك يجي للبرسا في الانتقالات الشتوية .. ؟

لو يجي لاعب واحد " محتاجه " الفريق يكون حقق أفضل شيء , لكن سبق وقلت أبي روبينيهو

س - من ودك يجي يلعب للهلال في الانتقالات القادمة وهل تؤيد فكرة الاستغناء عن احد الاجانب الحاليين وجلب مهاجم .. ! مع ان المهاجمين في الهلال يا كثرهم الحين .. ؟

أنس , من قاص عليك بهالفكرة قد يكون المهاجمين المتواجدين حالياً عليهم بعض النكبات مثل ياسر اللي مهوب قادر يثبت على مستوى معين رغم تألق الفريق ككل .. إعطاء الفرص للجميع والصبر عليهم أكثر حاجة إيجابية لازم إدارة الفريق يلتزم فيها .. وإذا بيحصل إستغناء لازم الفريدي يكون أولهم , لكن قبل كل شيء ضروري الفريق يمسك لعيبته قد مايقدر ورادوي أهمهم .. وإذا الفريق يبي يجيب لاعب خل يفكر يبيع الزوري أبرك , صبرنا يبي يخلص وهو مافي حاجة تشفع له , اجتهاداته في الملعب تبي تجيب لي المـرض وبالذات آخر مباراة مع النصر .. خلن ساكت أحسن

س - قد قابلت لاعبين للهلال .. ووش سويت يوم شفتهم .. ؟! بس نظرة ولا صورة ولا سلام ولا سواليف .. ?

يعني متوقع أروح أتلزق لا بس شفتهم

س - وين ترتاح اكثر اذا زرت مكة ولا المدينة المنورة .. ؟

امممم أكيد الحرم المكي , وبعدين من قالك ان الحرم المدني فيه راحة ! تكفيني التفرقات الطائفية والعنصرية بين المصلين ! يعني من يصدق ان في ناس ترفض الصلاة بجنب أشخاص معينين فقط لإختلاف المذاهب !! التخلف الطائفي يبي يذبحنا واحنا ساكتين .. نتمنى من مشايخنا الله يحفظهم وغيرهم الإلتزام بالمخالفات فقط من دون التدخل في المعتقدات بعينها

س - مدينة ودك تسافر لها ومدينة تكرها .. .. ?

ودي أروح لندن , وأكره أمريكا بمدنها رغم إني ما طبيتها

س - وش تحب السفر جو ولا بر ولا بحر .. ! وهل سافرت بجميع الطرق .. !؟

جو أريح شيء , وبحر ماجربت

س - اذا انت تسوق في خط السفر راعي 120 ولا 180 .. .. ?

120

س - يومك مشابهة لامسك ولا كل يوم عندك شي جديد .. ؟!

المعهود ان متشابه

س - النوم كم ساعة تكفيك .. ؟ ثقيل ولا خفيف نومك .. ؟

5 ساعات زينة

س - كيف تشوف نفسك بعد 5 سنوات .. ؟

إن شاء الله محقق ولو نصف اللي أسعى له

س - وش موترك .. ؟ واذا ما عندك وش تبي يكون موترك .. ؟ وش اطلق موتر عندك .. ؟

لا الحمد لله عندي كابريس 06 , وأطلق موتر , الموتر الزين
مالي بالمواتر , أهم شيء عندي موتر قليلة خراباته

س - كيف تابعت وشدتك لعبت التنس .. ! وكيف حبيت لاعبك جوكوفيتش .. ؟

التنس بالأول كان مسكات فقط , لكن بعدين خلاص القنوات صارت تلتزم بِـ برامجها , يعني بعكس قبل كانت تجيب مباراة وحده من الدور الثاني مثلاً في جراند سلام , وماكان هالعيب موجود في أبو ظبي ودبي و ART فقط , حتى الجزيرة على ماأذكر في أستراليا 2005 ما كانت ملتزمة بالمباريات في الأدوار الأولى مثل ماتسوي أحين في الرولان .. أما بالنسبة للنول , أنا بشكل عام أتتبع أخبار اللاعبين المبزرة وخصوصاً لما يكون اللاعب عليه بعض اللمحات المتميزة والنول كان من هالنوع وخصوصاً ان النول كان يتطور ويلعب بحمـاس وهالشيء كان يذكرني بِـ سافين وبالذات لما قابله في أستراليا وهزأه بذيك النتيجة اللي ماتنذكر بس حزتها كنت أكيد أبي سافين لكن برضو أحب النول

س - جوكوفيتش بطولة فوووق بطولة تححت لية ووش سبب هذا التذبذب الغريب في مستواة .. ؟

طبعاً أكيد تقصد موسم 2009 , المهم لا تذبذب ولا غيره , عوامل كثيرة تسببت في هالاعتقادات وأنا أول من كنت أقول هالكلام عن النول , لكن بعدين لما أتذكر مشواره عدل ماأشوف هالشيء .. النول الكل يشهد له أن أول المتألقين في الماسترز هالموسم , أما الجراند سلام مستواه كان أقل لكن سبب هالمستوى يرجع لظروف كثيرة فمثلاً في أستراليا السبب كان الطقس وبرضو هو كان مرهق , والرولان الإرهاق كان لاعب بحسبته وبالذات ان بطولات الماسترز اللي قبلها كانت متتابعة وهو متألق فيها جميعها ومتأهل إلى أدور متقدمة , أما ويمبلدون كان مستواه جداً ممتاز مقارنةً ان النول سيء على العشبية من أول ماطلع والكل عارف ان يعاني منها , وأمريكا مستواه كان جيد والدليل ان رغم تألق المايسترو قدامه في سيمي فاينل المتعة إلا ان قدر يقارعه بقد مايقدر وتكفينا كثرة الوينرز وحلاوتها .. اووف تعبت

س - نهائي الابطال بين البلوز و البرسا .. من تتمنى يفوز .. ؟

والله شوف أنا إلى الآن ماجات المباراة اللي تمنيت البلوز يفوز فيها على البارسا , يعني مثلاً الموسم الماضي تمنيت البارسا لأني كنت أشوفه أحق بالتأهل لمستوياته المتميزة , لكن هالسنة مدري صرحة وخصوصاً لما أتذكر ان الفاينل في السانتياغو

س - شرايك بمباراة الهلال والنصر الاخيرة .. ! ؟ ووش رايك بمستوى الهلال الى ظهر فية وخصوصاً يعني ان ماحد كان يتوقع انه يظهر بهذا المستوى .. ؟

الله يعفي ويتوب .. مافيني حيل أتكلم



S U L A I M A N

1- تقرى جريدة الوسيله ؟

لا , ولا أعرفها بعد

2- وش آخر نكته جتك بجوالك ؟

الهلال طالبوا بتأجيل مباراة اعتزال نواف لأنها تصادف يوم 2 / 1
< يقلع أم السخافة

3- وش آخر رساله ارسلتها من جوالك؟

آخر رسالة رسلتها للجزيرة جواب سؤال بس مااذكره , المهم الرسالة مضمونها [ B1 ]

4- وش نوع المناديل اللي ببيتكم؟ فاين سمايل كلينيكس ... الخ ؟

المنديل الذهبي

5- وش جهازك من لحيه ؟

أهم شيء ان عندي جهاز

6- وش من سوبر ماركت بالرياض تحبه اكثر .. بنده تميمي سدحان كارفور .. الخ ؟

ماشاء الله عليك واثق اني من الرياض .. المهم كلهم متشابهين والاختلافات بينهم لا تذكر , لكن مع ذلك أفضل بنده

7- ماشي في شارع 30 وقابلك مطب قوي شوي ماله دخل بالدنيا زي ثلاث ارباع مطباتنا الكريمه .. وش بتقول اول ماتوصل الارض سالم غانم؟

تطمن منيب ساب أبي أقول الحمد لله عدّت

8- لو معك مليار ريال .. وش بتسويبهن؟

أبعطيك إياهن

9- انت تدري ان الفلوس وصخ دنيا؟ طيب عطن هالمليار اللي فوق!

سبحان الله ! ترى من الله عطيتك إياهن
بس شالقصة , الفلوس توصخني وماتوصخك

10- وش تحب اكثر .. Long man ولا Oxford ؟

ولا واحـد



Lionel Messi

ســــ 1 / رأيك بصراحه في البوندز ليغا ؟ وهل يقارن ويشدك بالدوريات الكبيره كمتعه وحضور جماهيري ؟

لو تسأل أي واحد عن المميزات المطلوبة في الدوري السنع , راح تلقى البونديز فيها كل شيء
البونديز فيها مميزات كثيرة وأولها الحضور الجماهيري , والمنافسة الحماسية بين أنديتها , يعني عادي جداً تلقى البطل منهزم 8 أو 9 مباريات , وعادي البطل تشوفه منصك بالأربعة , فعلاً دوري حمـاسي , لكن رغم تعدد مميزاته إلا ان ينقصه شيء هام وبارز اللي هو قلة النجوم فيه , لكن ماأظن ان هالسبب هو اللي قلل من نسبة المشاهدين لأني أعتقد ان السبب هو تعود العالم على دوريات محددة " الإسباني , الإنجليزي , الإيطالي " ! وإلا أنا متأكد مليونين بالمية ان البونديز دوري ممتع بكل المقاييس

ســــ 2 / لو اعطيت كامل الصلاحيات في شبكه الزعيم بكآمل الاقسام .. وش بتسوي اول شي ؟

منيب مسوي شيء , لكن أبي أمنع السب وكل الألفاظ القذرة اللي مايقبلها أي شخص على نفسه , وطبعاً غير الكلمات اللي مالها معنى مثل " خال , عبد " وغيره وغيره .

ســــ 3 / فكر شوي وارجع معي بالذاكرة وعطني اسماء تتمنى رجوعهم للرابطة ؟

تكفى بس لا يطق لي عرق يعني من زود ماأدخل وإلا اللي يسمعك يقول إني قديم في الرابطة
لكن مع ذلك أبي مبارك ويزيد يرجعون

ســــ 4 / شي تتمناه يصير في الفريق ؟ وشي كان موجود وراح وودك يرجع ؟ وشي ما تتمناه يكون ؟

شيء أتمناه يصير .. والله الفريق ماخلى لنا شيء نتمناه , حقق كل شيء نبيه
شيء كان موجود , اممم والله ماكنت أتمنى طلعة زامبروتا لكن خيرة ان شاء الله
وشيء ماأتمناه , ان يلعب الفريق بدون روح

ســــ 5 / اذا ماصار فيه فريق اسمه برشلونه .. وش تتوقع اي فريق يمكن تميل له ؟ وعطني ميولك بالدوريات عموما ؟

أنا متعدد الميول " البلوز , الميلان "
على طاري تعدد الميول , تراها خيرة للي ينتقدها , لأن جد مهوب حلو انك تتابع دوري بدون ماتشجع أحد فيه , أجل كيف تتحمس له وتنتظر مبارياته ! والتشجيع راح يخليك تكسب ثقافة عن هالفريق وعن الدوري اللي فيه لأن يبي يكون من اهتماماتك

ســــ 6 / هلاليتك كم تعطيها من 100 ؟

ماأظن كاملة

ســــ 7 / رتب افضل 10 لاعبين بالعالم قديم او جديد .. يشدك مهما كانت جنسيته او مركزه ؟

بيليه , مارادونا , زيدان , فان باستن , رونالدينهو , ريفالدو , رونالدو , تشافي , ميسي , يوسف .

ســــ 8 / هل تتعمد انك انك تحط بينك وبين العضو حاجز بالكلام والا لا ؟ والا من النوع اللي يفك المونه ؟

اي أتعمد , لكن مو دايم .. لأن مع الوقت هالحاجز يطيح .

ســــ 9 / لو اعطيت الفرصه للتحدث لاعبين سابقين .. بحيث يرجع الزمن وتلحق عليهم وعلى ايامهم .. من هم اللي بيجون ببالك ؟

روماريو , يوسف

ســــ 10 / بسطرين تكلم عن نفسك .. ايجابيات - سلبيات ؟

إيجابيات / ماعندي
سلبيات / ان ماعندي إيجابيات

هالشيء مو أنا اللي أحدده , وإلا انت شتقول ؟

ســــ 11 / ميسي خليفة مارادونا .. شرايك فيها والي يقول انه فرق كبيير بين ماردونا وميسي .. انا اقول هي قصة الزمن وتطور الكرة ايام 6 هجوم ... لو ميسي كان بوقت مارادونا اتوقع راح يسوي الضجة اللي كان مسويها مارادونا .. والعكس صحيح .. هل توافقني ؟

لا تستعجل , انت أول من بتذكر عيالك يعمايل ميسي

ســــ 12 / مطعمين تعتبر من الــ TOP عندك ؟

كلهم تحت الصفر

ســــ 13 / تحب قدات الرصيف ؟

أبداً

ســــ 14 / سملي لاعبين تتمناهم يجون للبرشا من البوندز ليغا ؟

أوزيل , جرافيتي , دزيكو , أوليتش

ســــ 15 / لو جتك سفريه للنوكامب .. تاخذ معك 5 من عيال الرابطه .. من بتاخذ وهل ممكن تسحب عمرك وماتروح مقابل انه يروح واحد غالي عليك ؟

أباخذك أنت عشان تختار الثلاثة الباقين

ســــ 16 / بدايتك الفعيله بالشبكه كيف ومتى ووين ومتى تنتهي .. ووش تفكر لبعدين بالشبكة لك طموح اوشيء .. مثلا نشوف يوزرك اخضر بعدين ؟

الفعلية الفعلية من يوم تاريخ التسجيل تقريباً
طموح ! أخضر !! لو تجي بعد عشرين وشفت مشاركاتي وصلوا ألف , اعرف اني حققت إنجاز

ســــ 17/ انس شرايك فيه هل تحس انه نائب رئيس رابطة برشلونه ؟>> سوري انس ..

ماعليك منه , ترى كلها كلمات خربطة تحت اليوزر لا تودي ولا تجيب

ســــ 19 / ليه الموز لونه اصفر والتفاح احمر واخضر واصفر ميب عنصريه ؟

ياليتها والله عنصرية , على الأقل ربي يفكنا من العنصرية اللي عندنا ويخليها للفاكهة

ســ 20 / رايك بمحدثك الكريم بصراحه ؟؟

مافي أشين منك < والعكس صحيح

ســ 21 / من وين بالسعوديه ؟

متأخر السؤال جاوبت فوق

ســــ 22 / كلمة اخيره توجهها للرابطة ؟؟

تكفون , مانبي طاري التميز موجود ثاني , و " كل شيء يزيد عن حده ينقلب ضده "
وبس كلكم على بعضكم عسل