نادي الهلال السعودي - شبكة الزعيم - الموقع الرسمي - مشاهدة مشاركة بصفحة مستقلة - مستقبـلك بعد الثآنوي ... ( دكتور ) لا محآآله ..

R D H · #1 08/01/2010, 05:19 AM

السلام عليكم ورحمة الله وبركاته

محمد كيف حالك ؟! ياخي ما تلاحظ انه مافي شي عاجبك بالدنيا ؟! وش تبي انت ياخي

لا تنبرش ترا دعابه .

قبل أي شي .. نتفق على شيء واحد وهو .. أن وزارة التربيه خططها أي كلام بصراحه .

يطلعون بأنظمه .. لكن للأسف ما يتم تطبيق 5 % منها .

سمعت أن النظام الجديد بالمدرسه .. أنهم قسموا ( أعمال السنه ) الـ ( 20 ) درجه على حاجات كثير مابين واجبات وحضور ودفتر واختبارات قصيره ومشاركه ومدري ايش .

من جدك أنت أنه تم تطبيق هالنظام في كل المدارس ؟

أغلبهم .. يعطون ( 20 ) علطول .. وأقل طالب ماينزل تحت الـ ( 15 من عشرين ) .

أوك كان عاجبني الوضع لما كنت بالمدرسه .. بس ماننكر أنه خطأ .

هذه نقطه ..

النقطه الثانيه اللي ودي أتكلم عنهـا .. أنه فيه مدرسين يبيعون الأسئله للطلاب ..

لما كنت بثالث ثانوي ( بمدرسه حكوميه ) .. كان أحد اخوياي بمدرسه ثانيه اهليه .. مرني البيت ليلة اختبار الفيزياء النهائي .

قلتله : بشر كيف الفيزيا معك ؟!

راح عطاني ورقه وقالي : شف .

شفت الورقه .. تخيل وش مكتوب فيها

مكتوب أجوبة الاسئلة حقت الاختبار النهائي للفيزيا .. لا وليته كاتب الجواب كامل .. لا لا .

يعني مثلاً سؤال صح وخطأ ..

موجود كذا : 1 - صح .. 2 - خطأ .... الخ

تخيل حتى الأجوبه بس يحفظها حفظ .. بدون اسئله ..

اصبر مابعد شفت شي

قلتله : طيب حفظتها ؟

قال : لا .. بروح الحين ابرشمها

تخيل رغم كل هذا .. يبي يبرشمها ..

سلم لي على وزراتك يالحبيب

ومثل ماقلت انت .. المدرس يروح له يدرسه درس خصوصي بالبيت ويعطيه ( حقه ) .. وطبعا ( حقه ) مب مقابل أنها يفهمه المنهج .. بل مقابل انه يدحش ورقة الاختبار بفمه

لكن وش مصيره ؟!

راح وطي ( بإختبار التحصيلي ) .

الإختبار التحصيلي كشف كل الطلاب .. كشف من اللي كان يجيب نسبه يستحقها .. ومن اللي ( طووووط )

..

بالنسبه لإختبار القدرات .. أنا معك أنه ماله لازمه .. لنكن منطقيين .. وش الفايده منه ..

لا تقول لي : يختبروا قدرات الطالب ..

وش القدرات وجايب لك أسئله على وزن ( العلاقه بين المزرعه و الشجره ) .. انت بتختار وبتقول هي نفس ( العلاقه اللي بين صحن الفول .. والفول نفسه

) ..

شيء كبير .. يوجد بداخله شي معين

التحصيلي مهم .. لكن القدرات ماله لازمه ..

قبل لا أختم .. انت ما عليك من قرارات الوزاره .. انت خلك بنفسك وبس .

اتمنى لك كل خير يامحمد .. شد حيلك بالدراسه وسوي اللي عليك والباقي على ربك ..

لمحه : في الازمه الماليه الاخيره يامحمد .. فيه كثير من شركات اوروبا فصلوا جزء كبير من موظفينهم ..

هل تعرف فصلوا من وخلوا من ؟!

خلوا اللي يستحق انه يبقى واللي يشوفوه مميز في عمله وشهادته ..

السوق شرس .. والشركات ماترحم ..

لازم تكون معك شي عليه القيمه .. علشان تعرف تثبت نفسك ..

لكن بتقعد تعترض وتعترض .. مابتستفيد شي . ولا حد بيسمعك ..

اتكل على الله و شد حيلك انت بس والله بيوفقك ..

الله يوفقك يا ابو حميد .. انتبه على حالك ..

فمان الله