هذا الله يسلمكم موضوع فحمت وانا اكتب فيه اذا تقدرون تنشرونه ياليت اكون لكم من الشاكرين ماقدرتوا الشكوى على الله



عندما تمتلى من المفاطيح البطون يطيحون اللاعبين ويالله يقومون



هذا حال لاعبين الهلال بمباراة النصر انواع التسدح بس العذر لهم يمكن من قصة الملعب ايه ايه قصة الملعب لاتستغربون لان قصة الملعب افقدت اللاعبين التركيز على الكورة كلن قاعد يتأمل في قصة الملعب كيف كانت وايش صارت وصاروا مثل قصة الملعب ثابتين بأماكنهم والنصرواويين متحركين



حسيت اللاعبين على ثقلهم والله متغدين مفطح وملحقينها بكاسين لبن مع قليل من الزبد وقالوا لهم يالله هذي ملابسكم وابواتكم والميدان ياشبعان ماكأنهم متحضرين للمباراة قلها قبل بـ24 ساعه



بالنسبة للي يتكلم عن ابو خيرات وانه هو احد الاسباب اقوله يعني مثلا الفريق كان كله بيومه الا ابو خيرات اذا بنتكلم لازم نكون حقانيين ونقول الفريق من الدعيع حتى القحطاني ماكانوا بيومهم ولكم بالكورة اللي انقطعت من لي يونق اكبر دليل بغى يجي العيد منها بعد ماعيدو النصراويين اصلا فينا لا ولاننسى التمريرات المقطوعه اللي يشوف الفريق يقول اقل لاعب فيهم منقطع عن ممارسة الكورة تقريبا سنه



حتى ابو جريتس مدري وش فيه حسيت انه ماخش جو مع المباراة حتى بالتغييرات المفروض طلق المحيا نازل من الشوط الاول عشان يحلمون جد لاعب من دخل وهو متحرك وسبب البلنتي

الاعذار ماتفيد لازم نكون صريحين ونعترف ان النصر بروح لاعبينه واصرارهم تفوقوا على الهلال وكأنهم هم من بالصدارة ويريدون المحافظه عليها



انا دائما وابدا اطالب بالنقد الهادف واطالب بالحياديه مو لازم اذا لم تكن معي فأنت ضدي هذي للاسف هي اللي ماشي سوقها كثير الايام هذي



ودي والله نسوي زي ماسوى مانشستر يونايتد مع فان دير سار يوم قاله خلك بجنب زوجتك لاسباب مرضها اننا نقول لياسر خلك بجانب زوجتك بمناسبة المولود وبعدها يريحونه بالدكه لين يرجع ياسر الاولي





وبرضوا ياليت لو بس يعطون الذياب فرصة بدل الزوري او على الاقل يرجعون لي يونق يسار اذا قال ماعاد اتعود لها مرة ثانيه وبلعب للشعار اللي انا لابسه حتى لو يرجع ابو نامي يمين والله اشتقنا له بس مباراة او مباراتين عشان يحسون بعض الاساسيين انه اذا مالعب عشان الفريق الاحتياط ينادي وبس



بعد والله ماودي انسى الغنام تراه احيانا له هفوات وهو من اللاعبين اللي ماله شعبيه بين نجوم الزعيم عشان كذا هفواته تصير جرم

ياليت لو جيرتس يتعوذ من ابليس ويرجع لو الغامدي للمحور بجانب رادوي ويكون احتياطيهم الغنام اذا كان مصر انه عزيز متكي بجنبه متكي



عبدالعزيز الكلثم وعبدالعزيز الدوسري ونواف العابد ابرز النجوم الهلالية مع ان العابد ماشاء الله عليه آخذ فرصته بس العزيزان عبدالعزيز احس انهم مو مرة خاصه الكلثم ماأخذ فرصته وبيصير خراشي ثاني اذا انقتلت موهبته

-----------------



اتمنى ان نرى تسطير الابداعات الهلالية في ليلة توديع النجم الخلوق نواف التمياط وكم نحن متشوقون لرؤية الجيل لهلالي السابق مع الجيل الحالي في تكريم نجم الاخلاق نواف التمياط

-----------------

ختاما اتمنى اني يكون الله وفقني على اجتهادي تمنياتي لكم بالتوفيق