---------------------
يا هلا والله ومسهلا بالجميع .. مبطين عنكم
من عرفت نفسي وانا في نيتي أكمل نصف دنياي
وأروح لمانشستر ..
والحمد لله اللي يسر لي الامور ورحت لها .. وكانت من جد أحلى أيام العمر ..
البداية كانت من الرياض ، مريت مكتب استخراج الفيزا بحي السليمانية وسألتهم عن الشروط .. وقالوا لي كشف حساب لاخر 3 شهور + تعريف بالعمل + حجز السفر
ضبطت اموري وطلعت كشف حساب + تعريف من الجامعة بالانجليزي اني طالب + مريت مكتب خطوط وحجزت حجز وهمي
مريت عليهم وقدمت لهم اوراقي .. وبعدها بيومين ارسلوا لي رسالة قالوا تعال استلم جوازك ..
استلمت الجواز وضبطت اموري .. وسافرت بعد ما استلمت الجواز بيومين ..
قيمة التذكرة ذهاب وعودة من طيران الاتحاد بقيمة 2700 ريال ..
مسار الرحلة كان :
1 - الرياض - أبو ظبي
2 - أبو ظبي - مانشستر
اقلعت من الرياض 4 الفجر وصلت لابوظبي مع فجة الضو
في مطار ابو ظبي انتظرت 4 ساعات وبعدين ركبت الطيارة
وهذي صورة للطيارة قبل ما اركب ..
اول ما طرت من ابو ظبي شفت جزيرة في البحر ياهي تهببببببببل
نويت اذا فتح الله علي كنوز الارض اشتريها
ومن الحين سميتها جزيرة الدمعه
مسار الرحلة كان يمر من فوق ( قطر - الكويت - " بعقوبة " العراق - " انقره " تركيا - "بوخارست " رومانيا - " بودابست " المجر - " براغ" التشيك - " بروكسل " بلجيكا - " لندن " إنجلترا ) ومحطة الوصول هي مطار مانشستر الدولي ..
قبل الوصول بساعة اعطوني كرت اكتب فيه الاسم وعنوان السكن .. انا كتبت السكن فندق هوليدي ان مانشستر .. ولا سكنت فيه .. يعني الاجراء هذا روتيني فقط
مطار مانشستر
وصلت لمطار مانشستر ومشيت مع اللي يمشون
حتى وصلت لكاونتر الجوازات ..
لما جاء دوري اخذ الموظف لجواز والكرت اللي عطوني اياه بالطياره وعمل معي مقابله بسيطة وين رايح وليه جيت وين بتسكن ..
انا قلت له جاي ابي احضر مباراة مانشستر قال التذاكر تقول انك بتجلس اسبوع وش بتسوي خلال هالاسبوع ؟ قلت له بزور المتاحف والاسواق وبزور ساحة تدريب مانشستر ..
سألني قال من وين لك التذاكر ؟ قلت التذاكر مع صديقي في مانشستر ..
لما ختم لنا ع الجواز سألته انه تشجع اليونايتد ولا سيتي ؟ قال طبعا يونايتد
ومشيت شوي جاء واحد من الشرطة قال عطني الجواز .. عطيته الجواز وقال ابروح ابشيك تشييك بسيط وراجع لك ..
غاب عني 5 دقايق ورجع قال تفضل جوازك .. واستمتع بالمباراة ..
طلعت برا منطقة الجوازات وحصلت عبدالرحمن man11utd ركبت القطار انا وياه وراكان وكان الجو حكاية ثانيه مطر وبرد بس موب زي بردنا يكسر العظم ..
رحنا انا وعبدالرحمن وراكان للسكن ونزلنا العفش وريحنا شوي .. بعدها اخذنا تاكسي ورحنا لـ اولد ترافورد ..
