نادي الهلال السعودي - شبكة الزعيم - الموقع الرسمي - مشاهدة مشاركة بصفحة مستقلة - ياشين المهايط لاصار كذا.._6 نفرات على واحد_ وودي انتقم بس مدري وشلون..!

بريماكس · #47 27/11/2009, 10:59 PM

وعليكم السلام ورحمة الله وبركاته

هلا وغلا
وانت بخير وصحه وعافيه اخوي.
الشئ بالشئ يذكر .
انا من القصيم طبعاً كنت مسافر للرياض لوحدي وكنت متواعد مع واحد بالرياض اول ما اصل الرياض ابدق عليه ونتقابل. وصلت الرياض دقيت عليه قال نص ساعه وانا مخلص عنده ظروف اعتقد . المهم انا قلت خلني افرفر بالرياض لحد مايخلص ويدق علي مابي اواعد احد وانا مرتبط مع هذا

كنت امشي بطريق انكاس خالد بن الوليد جاني مخرج 10 اخذته ويجين مطعم ماما نوره على اليمين بعده دخلت يمين للحاره وانا اتمشى يعني ما اسرعت
شفت شباب عددهم تقريباً 7 مريت من عندهم والله ما بقى الا يركبون معاي من قوة نظرهم

عاد انا انقهرت وازعق ذيك الزعقه اللي طيرت القار من قوته هع

الا اناظر بالمرآيه يشرون يبوني ارجعلهم .. انا طولت وجاني حرف T ..
قلت خلني ارجعلهم ووش يبون

؟ بيني وبينك انا فاااضي بقوه وتعبان توني واصل من السفر

رجعت والبق عندهم لو تشوفني تقول واحد مضيع يبي توصيف على البراءه

انا سلام .
ردوا علي قالوا خير وش قاعد تزاعق بوجيهنا ..انا قعدت اصرفه قلت مدري وش تبون تطالعون فيني اول مره تشوفون مزيون

واحد واثق خخخ

هم سبعه وانا لوحدي وفيهم واحد محترم جداً بعكس ثاني مهايطي وبقوه احس شوي ويصفقني

المهم انتهى الأمر بالصلح واعترفت اني اخطيت بس قلت انتوا اكلتوني بعد

مدري الا تجي قدامي دوريه لومينا قلت يالله فمان الله ومشيت شكله صديق احدهم

وانا بالطريق يوم مشيت منهم قلت بيني وبين نفسي والله اني مهايطي وبزوع

عاد كلمت خويي قلت بغيت اطلبك فزعه تو بس ربك ستر

قال خير وش؟ قلت بغيت اتطاق مع شباب قلتله السالفه كامله قعد يضحك قال يلعن ام الجزامه فيك

قال احمد ربك ولا هنا على طول دبج مافيه تفاهم

نجي لموضوعك يالبريداوي يالمهايطي

شف لاصرت بالرياض هايط وانبسط واذا قالولك شئ قلهم اعرف ( اسمي اقوله لك ) وبينحاشون

نجي للصدق يابعدي.
هواش وأمور زي هذي صكر الباب ..
لاتفتح باب لمشاكل . خاصه ان مثل هالأشكال الله يعافيهم ولايبلانا شغلتهم الهواش والمشاكل وانت مالك فيها ..
لو كلمت احد يفزعلك . بيجي يفزعلك طيب وبعدين ..؟
هاللي بيفزعلك اذا ماهو قريب لك ما اعتقد فزعه بدون مقابل وخاصه المشاكل الشبابيه!!هذا يفزع لهذا كله لقصد الله اعلم به يعني مافيه شئ لله

كل شخص عنده معزه ومايبي لنفسه الاهانه بس مثل هالأشكال والله قهر تضيع من وقتك معاهم
انا اقول .. خلك هادئ واذا شفتهم خلك ماسك طريقك واذا تعرضوك حاول تهدئ
الوضع بنفسك.. يعني مممكن تتكلم مع هالشخص وتقوله ياخي انا اخطيت ومعاليش وزي كذا عاد كل شخص وله طريقته الخاصه ... يعني انه السالفه بتفاهم .
اللي ابوصله حاول تخلص السالفه بدون تدخلات وفزعات لانه والله ماراح تنتهي لو جبت فزعه وظربتوهم بيجي يوم ويغدربك .
فانت قفل الباب وريح بالك ومثل هالأشكال لو صار ماصار مافيه شئ يخسره بعكسك انت. بمعنى " لاتتحدى انسان ليس لديه مايخسره " ناس فاضيه وعاطله الله يعافيهم ولايبلانا ..
واذا طولها معاك مباشره بلغ عليه وماعليك ان شاء الله ..
اهم شئ فزعات ومظارب ابعد عنها لانه ماله تالي ..
الله يكون بعونك ووسع صدرك السالفه اقل مما تتصور ..

إقتباس


	((أولا أنا شاب جامعي من مدينة القصيم وبالتحديد بريده العزيزه

هذي قويه اخوي وبحق الصراحه ههههههه اجل القصيم مدينه الله يسامحك