بسم الله الرحمن الرحيم

اول شيء كل عام ونتم بألف خير جميعا

ما ابي أراسل أحد على الخاص عشان ما أكون ناسي احد وانا مو داري

راح أبدأ في موضوع غاراي وألبيول

اول شي بذكرك ياعبود عن محادثتنا بعد مباراة الديبور

وقتها أنت فضلت ألبيول لأنه راكد على قولتك ، ووقتها قلت ان الركود مو بكل شيء
خصوصا اذا صار على فهاوة وعدم تركيز ، واعجبني تركيز غاراي ، تركيزه على
حركة المهاجم وتوقعها وسبقه على الكورة وتخليصها ، من بعدها ما عاد دخلت في أي
نقاش يخص الاعبين ، وقلت لازم اعطي كل واحد منهم وقته ، واقرر في النهاية او
على الأقل اكون شفت الاعبين زين وكونت نظرة كاملة عنهم وما يكون حكمي متسرع .

ألبيول من ملاحظتي انه جيد في تخليص الكورة ، وصعب تجره ، صعب تجري معاه
ثم بحركة كذا تجيبه على وجهه ، ودققوا في مباراة ميلان و الريال وكم مرة غطى مكان
مارسيلو ومع ذلك ما تغلب عليه باتو في المواجهات، إضافة الى ما يتفلسف ، تجيه
الكورة خلاص ترجع دربها وهالأمور بديهية ومهمة جدا في المدافع وممتاز جدا
توفرها في ألبيول ، ولكن ، فيه عيبين مهمين انت ذكرت احدها ، وهو انه يخلي
المدافع في ظهره ، والثاني ، ان ما عنده الجرأة في الدخول على المهاجم ، يعني لو
نلاحظ يشوف المهاجم بيمرر او يحاول يمر تلقاه يخليه يبادر وبعدين يلحقه رغم ان
كان بإمكانه يضايقه ، لكن اللي يغطي شيء من هالعيب هو انه سريع بالنسبة لقلب دفاع .

ألبيول عجبني إختيار الإدارة له عدة اسباب : صغير + عنده امكانية يصير أفضل
بمراحل + إسباني دولي . لكن كنت اتمنى ينباع ميتزلدر ونشتري لاعب زي كارفاليو او نيستا

انا عندي وجهة نظر خاصة في ألبيول ، البعض شبهه بهلجيرا بعد مباراة ميلان ،
واللي انا ابصم بالمليون لولا الله ثم هو كان لقمنا 4 - 5 اهداف في ذيك المباراة لانه
غطى مكانين ، مركزه ومركز مارسيلو ، في ظل تهور غبي من بيبي ، البيول الى
الان ما جاب العيد يمكن في طرده في مباراة خيتافي واللي انا اشوف فيها انه انذار
كان كافي ، ويمكن كورة ميلان اللي انت ذكرتها يابو عابد ، ألبيول انا اعتقد انه ظلم
في الريال ظلم في مسأله معينة ، انه شاب و طاح في مطفوق بيبي اقصد ، يعني
بيبي اول ما جانا داج وشفنا وش سوا في السوبر وما بعدها ، ولكن استفاد بشكل
خرافي من تواجد الخبير + الرائع كانافارو ، صحيح كانافارو ما تألق بشكل كبير معنا
ما عدى موسم شوستر الأول ، ولكن استفدنا منه ، ربى لنا راموس في الموسم الاول
مع كابيللو وربى لنا بيبي في موسم شوستر الاول ، البيول جاء في مدافع ممتاز
ولكن مطفوق + ما عنده اي ذرة قيادية ، والمدافع الشاب يحتاج الى قائد معه مثل بيكي
في البرسا مع بويول ، ومثل فيديتش مع فيردناند ، ومثل تياغو سيلفا حاليا مع
نيستا يعني لو شفنا تياغو مثلا ، لما يلعب مع نيستا يكون لاعب رائع وتقول هذا امل
ميلان ولما يلعب مع غيره تحسه حواق لا ما ندر

جت في بالي انه يلعب مع ميتزلدر شوي ، لكن ميتزلدر لاعب بارد مافيه هيبة
الكبير ، وما يوجه كثير ، وهذا اللي خلاني استبعد انهم يلعبون مع بعض كثير ،
وخصوصا ان ميتزلدر اصيب مع ايقاف بيبي والان ماله امل .

نجي لغاراي ، اللي الاحظه في غاراي واللي يخلينا لوهلة نفضله على ألبيول حماسه
وتركيزه ، تلقاه لم يتكفل بمنطقه يحارب عشان يغطيها ، يتابع لهجمة ويحاول قد ما
يقدر انه يسبق المهاجم على الكورة حتى يسوي البريسينغ المطلوب ، هالامر ممتاز
جدا لكن لو كان مع سرعة او مع مدافع بعده ، هالحركة ممتازة جدا لما يكون دفاع
الريال متأخر زي ما ذكر عبدالاله لكن في ظل وجود الدفاع المتقدم واللعب الجريء
جدا من قبلنا ما ينفع هالامر ، راجعوا مباراة أتلتيكو مدريد وتعرفون ليه ما ينفع
هالشيء ،




أبدوا من الدقيقة 3.40 للاسف ما لقيت الأهداف ، لاحظوا حركة غاراي هنا ، كما احتاج عشان يتحرك ويوصل ، هالشيء انا اعتبره عادي مع فرق الليغا ، ولكن صعب في الكلاسيكو بما اننا بندخل الا لو لعب مامادو ومشت فرضية عبدالاله والخطة اللي انا تناقشت فيها بشكل مفصل في منتدى ثاني تعرفونه اغلبكم .

مسألة من نفضل يا عبود امر صعب ، اثنينهم جيدين ، ولكن المستوى متقارب ، لكن انا
أفضل غاراي في الكلاسيكو اذا بنقمط العافية اما اذا بنهايط يا ويلنا

لكن بجد مقارنة البيول بهلجيرا مدري وش المنطقي فيها .

برجع اتكلم عن محاور مهمة في غاراي والبيول اذا تذكرت او اذا لقيت احد ناقشني في
كلامي

..........................................................

حياك عبدالاله

والله اني اسأل عنك وفاقدك واسأل الخسيس برهوم

إقتباس وهي ان لاس يترك مساحه بينه وبين اقرب لاعب له "اللي المفروض انه يراقبه" وبعد ماتوصل له الكوره يبدا لاس يلحقه و يحاول يضغط عليه ويفتك الكوره منه ! بعكس ممادو اللي عنده قراءه افضل ويضغط على اقرب لاعب له حتى من قبل مايستلم الكوره مشكلة لاس ممكن تسلك ضد وسط ضعيف لكن مع تشافي و انييستا ؟ مايحتاج اكمل لانهم بيركضونه مثل مايشتهون , لكن اذا ضغطنا عليهم قبل مايستلمون بنقدر نوقف اكثر من 80% من خطورتهم

نقطة حلوة مررررة ملاحظها من زمن بس ما جاء في بالي اني اناقشها ، بزيد عليها
امر مهم جدا ، لاس لما يستلم ما يحاول يقرأ الملعب ويرفع راسه كويس ، اضافة لما
يستلم ووجهه لمرمانا ما ينتبه للي وراه ، ولاحظوا هدف اتلتيكو الاول ، وهدف تشافي
في كلاسيكو العار ، يستلم ويلف بعدين يرفع راسه ، ولو انتبه للي وراه ما يدور
مخرج سريع ...لا .. يحاول يلف وهو يجري لأحد الخطوط ، هالشيء بيمشي معك
كثير وامام اغلب الاندية ولكن ما راح يمشي معك امام البرسا لأن خطتهم تمشي على
بريسينغ عالي طوال المباراة ، كنت اتمنى يغيب الونسو ويكون غاغو مصاب
تدرون ليه ، ابي اشوف لاس مع مامادو ، لاس هالسنة اذهلنا بقدراته الهجومية
الممتازة ، تمريره صار دقيق ، و عنده قدره كبيرة في التحرك والتسديد ، وان كان
يعيب عليه قليلا من التكرنة يعني لما يقرر يشوت خلاص الا ينفذ ، في كورة مو
فاكر في اي مباراة كان كاكا فاتح زاوية بنت كلب وبتخليه ينفرد ، لكن لاس قرر
يشوت واضطر انه يتجاوز لاعب ويشوت رغم تواجد كاكا ، طبعا ما نقدر نستغني
عن الونسو ابد لذلك لجأت الى خطة عبدالاله وعبود اللي طرحها من يومين

وهي

محمد
لاس - الونسو

كاكا - كريس

لكن لفت انتباهي شي معين ، بكذا بتصير عندنا مساحة كبيرة بين الجناح والظهير ،
واذا عرفنا ان راموس يحب يتقدم اوكي ، ما علينا ، لكن لو لعبنا بمارسيلو ، بنرجع
لنفس المشكلة ، ظهيرين يتقدمون دفعة وحدة وما يفهمون انه اذا تقدم واحد الثاني لازم
ينثبر ، اضافة الى انه ما ندري عن الادوار اللي بيسندها مانو ، جربها مرة بأدوار
غبيه وبلاعبين الله بالخير ، اضافة الى امر مهم وانت غافلينه ، مامادو مو خوينا الاول
، ابد تحسه مغصوب على اللعب ، في مباراة اشبيلية قدم مباراة حلوة ، لكن ماش ما
حسيت فيه ذاك القوي صاحبنا ، يمكن الغياب مأثر فيه حبتين ، اضافة ان مانو ما
جربه كثير ، فكيف بنلعبه في كلاسيكو خطير ويعتبر مفترق طرق هام جدا و للحين ما
جربه ، يعني حتى في مباراة زيورخ ما لعبه ، حتى في مباراة راسينغ مالعبه ، ولعب
بمحور واحد وهذا الشيء اللي مجنني .

فوق هذا يا عيال ، اننا لو تعودنا ونجحنا على هالخطة ، ابدا ما عندنا بديل لو اصيب
او ارهق احدهم ، فجاجو ليس مثل ديارا الدفاعي ، وليس مثل لاس هجوميا خصوصا
هالموسم ، اضافة وهو امر مهم جدا ان محمد بيروح يلعب افريقيا 2010 ، وهالشيء
بيخلينا نفقده شهر تقريبا زد عليها اسبوع - 2 راحة .

اتمنى للفريق التوفيق في الكلاسيكو .

وراح ارجع بكرى بعد ما تكتمل المجموعة وتعلن القائمة واكتب رايي بالكامل عن
وش لازم نسوي .




اسف على الاطالة