أصبحنا وأصبح الملك لله ..!
الناس تتسحر وأنتوا هنا صراخكم واصل لبيتنا .. ودي أفهم الحين وش جاب اسم سلطان عندكم؟ قلّت الأسامي عشان تحطونهم في أمثلة؟ بغيت أغص باللقمة بسبّتكم ..!

وليد .. يخرب بيت بيتك .. فيه أحد يدق على واحد بنصّ الليل ويقول له عن هالمشروع؟ والله أني ما طلعت من الغرفة وقمت من النوم وقتها إلا أحسب صاير فيك شي
بس الحمد لله قمت اليوم الثاني وأنا ناسي مدري وش أنت قلت لي والا كان لعنت جدفك
المهم .. أنا قريت الموضوع وأعجبني رد مرسال الحب .. ويلوموني فيه

عيال خلونا نجرب مثال أبسط عشان نفهم وليد .. لأن حساباتكم ما ظنيته فهمها
افرض يا وليد أن النسبة 5% من كل عميل .. الحين أنا اشتركت معهم عن طريقك وبتحصل 5% من اللي أنا اشتريته .. وبرضه بتاخذ 5% من اللي اشتركوا عن طريقي ..!

الحين مثلاً أنا خليت رده يشترك .. ورده خلى هلالي15 يشترك .. وهلالي 15 خلى الصخرة يشترك .. والصخرة خلّى متابعة بصمت تشترك .. ومتابعة بصمت خلّت هلاليه محترفة تشترك .. إلخ

صار عندنا بالترتيب الشجري :
وليد
^
سلطان
^
رده
^
هلالي 15
^
الصخرة
^
متابعة بصمت
^
هلاليه محترفه

يعني الحين لو اشترت بنت النعمة هلاليه محترفه ساعة بقيمة 1000 ريال بنحسب النسب كذا:
متابعة بصمت بتاخذ 5% = 50 ريال
الصخرة بياخذ 5% = 50 ريال
وكل من : هلالي 15 .. رده .. سلطان .. وليد : 5% = 50 ريال لكل واحد ..
يعني المجموع بيكون = 300 ريال وقيمة الساعة 1000 ريال !!
هذا وحنا بس سبعة .. وشلون لو كنا 100 عميل جبتهم أنت يا وليد وكل واحد من هالعملاء أخذ نفس النسبة؟ كذا بيصيرون مديونين

زبدة الموضوع ورأيي فيه .. أن الشركة مثل ما قال وليد غير معروفة ولا لها زباين .. فهي بهالطريقة تبي تكسب عملاء .. وبعد ما تكسب عدد معين من العملاء
راح توقّف النسب ..!
والأرباح الحاصلة الآن طبيعية .. لأن دائماً بداية الأعمال الاحتيالية مثل سوا وغيرها تبدأ بتوزيع الأرباح على المشتركين الأوائل .. وما تطيح إلا في روس التالين

وليد .. أنا مستعد أساعدك باسمي وبأشترك معهم ولا أبي أي أرباح نهائياً بأتنازل بها لك لأنك عزيز وغالي
الشيء الوحيد اللي أبغاه أنك تتكفل برسوم الاشتراك .. يعني تدفع لي قيمة الساعة أو القلادة اللي تخليني أشترك معهم عن طريقك عشان أنت تستفيد

برايفيت وليد :
وراك داق علي الحين؟ ترى توي تسحّرت لا تخليني أفطر عليك من الحين
أمزح معك ياغالي

برايفيت للمطاوعة وأهل العلم :
هل يحق للزوج أن يمنع زوجته من صيام التطوع؟
تكفون قولوا إيه وعطوني الرابط ما مدانا نفرح بالإجازة إلا والصيام في وجيهنا