السلام عليكم

يا مال العافية جميعاً على الردود , اللي تخلي والواحد يتحمس ويبثركم كل يوم بموضوع جديد

شكر للجميع


أبوميار

إقتباس إذا استمر بيرلسكوني فأعتقد ميلان مختلف سنراه الموسم القادم وميلان يخوّف ..

والله يا بو ميار هذا اللي مخوفنا , لانه من وجهة نظري الرجال مابه رجا

يعني الاهداف اللي يبيهن سواهن وخلص , وش باقي زود .. و اذا استمر هالعلة على راس النادي فترة ثانية اكيد انه بيستغل هالشي للمصالح الشخصية وخصوصاً في ظل ازماته الخاصة .. فهو حتى وان تفرغ من العمل السياسي الحكومي راح ينشغل بالعمل الحزبي اليميني وراح يدعم شركاته واملاكه على حساب الميلان , وكل هالشي في غير صالحنا ابد .. عموماً ما اقول الا الله يكتب اللي فيه الخير ..


الرعبوب

إقتباس بداء واضح بأنه يريد التخلص من الفريق بأي وسيله ولكن بعد أن يسترد ما قـام بدفعه للميلان ببيع النجوم

ليته يريد التخلص من الفريق كان ارتحنا منه ومن شرهـ

واللي يبون الميلان واجد من داخل وخارج ايطاليا .. حتى اذكر ان القذافي - الابن - بغى يشتري نصف النادي قبل خمس سنوات تقريباً , ورفض بيرلسكوني هالشي تماما , والسبب انه يبي يستغل النادي لمصالح سياسية وحزبية وتجارية خاصة ونجح بهالشي بجدارة ..


اليوفي وبس

إقتباس مرورا بقالياني الغبي و الذي لا يجيد التفاوض مع أحد سوى برفع الراتب فقط لدرجة أن الفريق يعاني من الرواتب

يبن الحلال قالياني ذا فسحة هالمسيكين مابيده حل ولا ربط الا بعد مشورة بيرلسكوني هو دوره فقط انه ينقل المفاوضات للرئيس ويتلقى الاوامر فقط , لكن الحل والربط بيد بيرلسكوني فقط .. خل ابقول لك سالفة يوم تعاقد الميلان مع رونالدينو , قالياني كان على طاولة المفاوضات مع لابورتا وقاعد يكاسر الرجال , المهم يوم اتفقوا على حل وسط وقيمة معينة قال دقيقة ابجري اتصال مهم << يقصد بيتصل على بيرلسكوني طلع بيرلسكوني نايم او في اجتماع او مدري وش عنده المهم انه عطاه اشكل توهق قالياني ولا قدر يعطيهم كلمة .. واستعجله لابورتا يقول عجلوا تبونه ولا نمشي .. قالياني قال امهلني ساعه بس وطلع من الاجتماع وراح غرفته في نفس الفندق وهو بالطريق سأله صحفي من الكالشيو مريكاتو قال هاه بشر حسمتوها .. رد عليه وهو قافلة معه يقول : بيرلسكوني مارد علي طيب انت وش موديك انت ووجهك لاصار مابيدك شي بس اشوا انه رد عليه بعدها بشوي وقال ابد توكلوا على الله

حتى قاتوزو , يوم بغى يطلع بداية هالموسم يقالك احتجاجا على بيع النجوم جلس معه قالياني يمكن ثلاث جلسات وما اقتنع الين قال له بيرلسكوني اقضب ارضك قال سم

إقتباس و المؤسف أن أسرته ترى أن الفريق يستهلك ميزانية أكثر مما يجب و عليه الإعتماد على نفسه

تصدق عاد ان ولده هاللي شابن عليه ويقول لا تصرف بغى يستلم النادي قبل العام او ما صار بيرلسكوني رئيس وزرا مرة ثانية بغى يمسكها ولده .. بس ربك ستر , اذا صار المسرف هذا صرفه اجل البخيل وش بيسوي

إقتباس بالنسبة للمدرب " انشلوتي " في 8 سنوات مع الميلان هنالك دوري واحد فقط !!

اسمح لي هنا فيه دقة على كارليتو

ابو ثامر لاتحسب لي وش قدم كارليتو في 8 سنوات .. لانه وببساطة الاربع سنوات الاخيرة النادي مولي وماهوب يم لعب ابد .. والسبب سياسة هالداشر اللي حاست فريقنا الله يكرهه في حياته ..

انت احسب له اول اربع سنوات نافس على الدوري ثلاث مرات مرتين مركز ثاني ومرة اول وبطل .. اضافة الى وصوله لنهائي الشامب مرتين وحصوله على احداها .. من وجهة نظري هالشي يحسب لصالح كارليتو مو ضده


الهلال وصل

إقتباس أما بخصوص المستثمر الاجنبي أعتقد أنه حل مستحيل برلسكوني أكد أكثر من مرهـ أنه ضد المستثمرين الاجآنب

قد يكون كلامك صحيح بالنسبة للمستثمرين الاماراتيين , بحكم انهم عرب ومسلمين وتيار بيرلسكوني يميني متطرف ضد المسلمين والعرب بشكل عام

لكن المستثمر الالباني تاكي , هو بالاصل صديق وشريك لبيرلسكوني في عدد من المشاريع الخاصة , والظاهر من الاخبار ان المفاوضات بدت اصلن ولا اتوقع انه بيخالف شي ينافي مصلحته الشخصية حتى لو على حساب الوطنية .. << اقول زارفن ام الدولة ذا ما تبيه يعطي مستثمر اجنبي


ماجد مقبل

بيرلسكوني ميلاني صميم محد ينكر هالشي .. لكن اللي غابنا هالحين هو استغلال هالحب للمصالح الشخصية والخاصة , وسحب على ابو عشقـ ن يعرفه


عواافي للجميع .. وشكر مرة اخرى