نادي الهلال السعودي - شبكة الزعيم - الموقع الرسمي - مشاهدة مشاركة بصفحة مستقلة - (( يوميات رمضانية " 3" )) الاستشارية: شـذى " وتفاصيل اصابتها بـ انفلونزا الخنازير وأبلا عصويدة " ! ‏

المنتدى الاستشاري · #1 25/08/2009, 04:34 AM

فكرة - سندريلا الهلال
اعداد ومتابعة - الهنوووف
تصميم - عسيريه

لنا من كل عام شهر فضيل ..
أعاده الله علينا وعليكم وجميع المسلمين بالخير واليمن والبركات
وكل عام وانتم بخير

**][يوميات رمضانية 1430 هـ ♥][ **
لقد عدنا اليكم .. تحملنا الاشواق للقياكم .. ونسعد ان نعيش معكم .
. في سلسلة تحمل بين طياتها يوميات الأعضاء الرمضانية من كل عام ،
هذه السلسلة أنتم أهل بيتها ونحن ضيوفا في حضرتكم ،،،
+
+.........+
+
أهلا وسهلا بكم أحبتنا ..
ودعونا نرحب سوية بالمضيف "الثالث"
الاستشارية المتميزة " شـذى ."
لكي تحكي لنا احداث يومها مع شهر رمضان المبارك ..

السلام عليكم ورحمة الله وبركاته

كل عام وأنتم إلى الله أقرب

وأسأل الله لي ولكم في هذا الشهر الفضيل أن نكون ممن تفضل الله عليهم بالرحمة
والمغفرة والعتق من النار وأن يرزقنا فيه قيام ليلة هي خير من ألف شهر .
واتقدم بجزيل الشكر للغالية الهنووف اللي اتاحت لي الفرصة إني أغثكم شوي بذكر أحد أيامي الرمضانية .

راح أبدأ من أمس بعد صلاة التراويح طبعاً رحنا لصلاة التراويح وانا بنص
الصلاة حسيت إن الحمى بدأت تشوف شغلها معي طبعاً ما أعطيت الموضوع
أي اهتمام حتى ركبنا السيارة إلا أختي تقول ياشذى خلينا نروح المستشفى قلت لها
مو لازم خلاص اروح البيت واخذ مسكنات سكتت وبعدها بشوي إلا تقول بالله
افتحي الشباك وطلعي راسك برى عشان تاخذين راحتك في التنفس بدون مايصيبنا
أي ضرر وتصكها ضحكة

( تعرف إني من أشد الناس وسوسة )
قلت وليش ان شاء الله قالت مدري خلينا نروح المستشفى يمكن يكون معك
انفلونزا الخنازير بصراحة أنا بدأت اهوجس خصوصاً إن فيه إثنين من قرابتنا
جاتهم هالنفلونزا وقفنا عند البيت بقت اختي وامي بالسيارة ورحت أنا جبت
بطاقتي حقت المستشفى العسكري بصراحة كان زحمة بعد الكشف قالوا لي
لا مافيك شيء بس نزلة برد
( من أول ايام رمضان والمطر ماتوقف
والشمس ما لها لا حس ولا خبر والجو مرة بارد )
رجعنا اخذت علاجي بعدها فتحت جوالي لقيت 3 اتصالات من الهنوووف

قلت
خليني اتصل وأول ماكلمتها قالت وش فيك قلت لها اني تعبانة الا وتسألني هنووو
عن الأعراض ويوم قلت لها على الاعراض وترجع هي الثانية وتقول لا يكون
معك انفلونزا الخنازير

جلست اضحك وفي نفسي أقول فال الله ولا فالكم
( أقصد الهنوووف وأريج وسمية خواتي ) بوقتها اتصل علي الوالد لقى جوال
مشغول رجع اتصل على البيت وترد عليه اريج قال وش قالوا لشذى قالت أبد
لقيوا خونيزير صغير ينطنط على راسها والحمد لله ذبحوه الدكاترة وافتكينا
ما أخفيكم إن الفار بدأ يلعب في عبي والوساوس بدأت تاخذ مجراها وانا اجاهد
واطمن نفسي مرات اقول لها لو حصل فهذا مقدر ومكتوب والله يكتب لي الأجر
ويرحمني بواسع رحمته لو مت ومرات اقول لها هذا ( فلان وفلان ) جاتهم
والحمد لله هم بخير .
المهم وأنا أكلم الهنوووف سمعت صوت الأذان عندهم وارتبكت إني ما تسحرت
ولا شربت موية ناسية إن توقيتهم غير توقيتنا قفلت من عند الهنوووف ورحت
تسحرت وكان سحوري أنا وأختي هذا الشيء

الماثل أمامكم .

صليت ودخلت ع المجلس دقايق وطلعت وبعدها قريت اللي ربي يسره لي إلا
الحرارة كل مالها تزيد ومن شدة الحمى ماجاني نوم دخلت الصالة لقيت قناة العربية
فيها الأخبار ومن ضمنها فقرة صحتك في رمضان ومن المصادفات العجيبة إن الفقرة
تتكلم عن اعرض وطرق الوقاية من انفلونزا الخنازير

وارفع الصوت واقرب من
الشاشة وكل ما قلوا شيء من الاعراض بدأت اشوف هي عندي أو لا .!

ماحسيت بنفسي الا وأنا نايمة وصحيت الساعة 10 ونص رحت اخذت لي
دش بارد كود الحرارة تخف ,, مسكت المصحف وجلست اقرأ إلا جدي جاي يبي
يطمن عليّ وتفاجأت إنه يقول لي إنه عازم ناس قلت احسن شيء اروح المطبخ
ومن الأن اجهز اطباقي الساحقة الماحقة ومنها اشغل نفسي عن التفكير ويمكن
مع الحركة تخف الحرارة إستناداً لمقولة جدي ( الحمى مايبي لها واحد يطيح

)
صليت الظهر ودخلت المطبخ ويوم حسيت إن المطبخ صار زحمة قلت مالها إلا
إني أهج للمطبخ اللي فوق أخلص شغلي على رواقة وبدون زحمة طبعاً سويت
( منافيخ الدونات + رولات اللزانيا + تبولة + سمبوسة خضار )
خلصت شغلي قبل أهلي وقلت أجل اصلي العصر وارتب السفرة ويوم رتبت السفرة
في شقة الضيوف إلا وجدي يقول معصي

حطيها في شقتي , ياجدي غير بدل
قال والله ثم والله ما تحطينها غير في شقتي شياب الله يستحي منها تبيني اطلعهم
وانزلهم وارجع اجمع قشي وانزلهم أنا والشغالة لشقة جدي

قبل الصلاة .

( قهوة + عصير فراولة + مانجو + اصابع جبنة الكيري + سمبوسة المكسرات
+ رطب + تمرة + تمرة بالمكسرات + قشطة + طحينة + زبادي + زمزم )

وبعد الصلاة .

سمبوسة خضار + سمبوسة جبنة + بف + ورق عنب + كبه + منتو كذاب +
رولات اللزانيا + حلى الكاسات + بيتزا + فطاير + تبولة + سلطة الطبقات بالتريتز
+ ايدام هندي باخضار + محشي + شوربة + منافيخ الدونات + قرصان .

السفرة بعد

وقبل أن أختم اليوم المخصص لي

إليكم قصة عصويدة

أنا قبل سنتين كنت اطلب من أهل يجيبون لي زير خصوصاً إن فيه وحدة من
صحباتي كانت تصور لي ماء الزير شيء لا يمكن وصفه لشدة لذتها لكن
ما أحد أعطاني وجه بس بأول أيام رمضان فاجأني جدي بزير وحفيده
( الأوله على قولة المصارية

) الصرحة إني فرحت واهتميت فيهم
وخصصت لهم مكان في بلكونة المطبخ عشان اكون قريبة منهم لكن ربي
ابتلاني ببنت اخت وبنت اخ قد بعض (

3 سنوات

)
إذا اجتمعوا قول يارحمان يارحيم على دماغك

الله يحفظهم من جا الزير
وهم مايفارقون البلكونة أنا خفت يكسرونه هو وحفيدة المهم جمعتهم واعطيتهم
قصة من نسج الخيال قلت لهم مادريتوا اليوم وش صار قالوا وش صار قلت :
الصباح دخلت البلكونة ولقيت ابلا سمية تتضارب مع وحدة سودا لها عين وحدة
حمرا واسنانها طويلة وشعرها ابيض منفوش

واسمها عصويدة قالوا طيب
عصويدة اكلت ابلا سمية قلت لا ابلا سمية كانت قوية

ضربتها وحبستها في
الزير

طبعاً لو احكي عن تعابير الفزع اللي شفتها فيهم ماراح اوصف
ولا جزء بسيط كان ودي اضمهم

واقول لهم امزح معكم بس قلت لا
رب ضارة نافعة

يوم جا الوالد وهم يحكون له السالفة يا أبويا عصويدة في
الزير مافهم منهم قمت فهمته السالفة طبعا الوالد حب يكذب السالفة ويطمنهم بس
أنا اعطيته بعض الإشارات رجع قال لهم لا عصويدة ما تجي في النهار
عصويدة تجي بعد المغرب .
اليوم قبل المغرب جيت اعبي زمزم من الزير ويوم فتحته عينكم ما تشوف إلا
النور صاير في الزير طبق الاسبوع

( لقيت فيه عنب ورمان ورطب ) تأكدت إنهم ورا السالفة رحت اشوفهم واسألهم
ويوم قلت لهم ليش حاطين أكل في الزير

قالوا يا أبلا شــذى
عصويدة مسكينة حطينا لها أكل عشان إذا جات المغرب تقدر تاكل

طبعا
يقولونها وأنواع الحماس

أنا كنت معصبة وزود على كذا مريضة لكن يوم
شفت تبريرهم لفعلتهم الشنيعة

جلست اضحك وادعي ربي يحفظهم
وناوية إذا ربي اراد ليلة العيد

وأنا اعطيهم عيديتهم أكذب سالفة عصويدة
حتى لو راح مية زير مو زير واحد

والحين استودعكم الله واعذروني على إني ما كملت اليوم
وإن كان بوه اطالة

عاد سامحونا كان ودي يكون يومي أفضل
من كذا بس هذا اللي قدرني ربي عليه

في أمان الله

كل الشكر
للمتميزة **][ "شــذى"♥][ **
ولأباس ان شاء الله

وانتظرونا غداَ
مع الاستشاري المتألق -الصخــرة

.-

أرق التحايا وأطيبها من
مشرفي واستشاري
المجلس العام