نادي الهلال السعودي - شبكة الزعيم - الموقع الرسمي - مشاهدة مشاركة بصفحة مستقلة - ✰¤¶` العضو المتميز مواصل من عام 1413هـ ( ضيف المجلس العام )`¶¤✰

Hictar · #10 28/07/2009, 09:36 PM

رائدة الزعيم

تمتلك تنسيق جميل بالخط الكوفي المتميز واللون الكحلي والزاوية اليمنى ما سر هذا التنسيق؟؟

مثل ما قلت برد لي سابق - أنا أنسب هالتنسيق لماهيتاب

وماهيتاب هي ماهينور ، لكن الإسم ثقيل وإخترت لها ( ما هيتاب ) لأنه خفيف على اللسان

كأني وحدهٍ من العِجز أول ما تجيها شغاله - تسألها عن إسمها
إن ما جاز لهالعجيز الإسم - أو لاحظت إنه ثقيل على اللسان أو طويل
لفقت لها إسم

وأقرب مثال : شغالتنا الضعيفة - صار لها عندنا سنة وثلاث شهور - لها خمس أسامي

الأول : هو إسمها الحقيقي اللي ما أحد يعرفه إلا هي

والأربعة الباقية كلها تلفيق

وهي الضعيفة : أيه أسم تناديها ( تقولك هاااه - خلاص إستسلمت )
صدقيني لو بناديها وأقولها ( أبو علي ) ما عندها مشكلة

أدري شطحت وأعود للرد :
أنا أول ما شفت الخط الكوفي عند ماهيتاب ( أعجبني ) - وإستخدمته لفترة بالوسط
وبعدين تطورت وخليته على اليمين ( لأني أعتبره شكله أجمل ).
صدقيني ما كان قصدي البحث عن ( التميز بالخط عن الآخرين ) سواء بالخط أو اللون أو طريقة التنسيق.
أنا إتخذت هالتنسيق والخط إرضاء لنفسي فقط.

النصيحة أستاذي كيف ممكن أن تقدم لشخص ما ولماذا البعض يتفقون على الإساءة لشخص ما حتى ولو لم يضرهم فقط لأن صديق ما لايعجبة العضو فلان فيجتمعون لتخريب الموضوع حتى لو ما يدرون وش السالفة؟
بسؤالك هذا نضيف مسمى جديد لأصحاب اليوزرات المكررة - برد لي سابق.
وهاليوزرات ما تتحرك من تلقاء أنفسها إلا بتوجيه وطلب ( للفزعة ).
وثقي تماماً إن أساس المشكلة أو نقطة الخلاف بين العضوين ( تافهه ) -
بتسأليني ليه تافهه :
لو كان الخلاف بوجهات النظر - ما راح يفصل بينها إلا الحجة ، وما إحتاج أحد العضوين - فزعة ربعه !!.

مجلسنا إدمان على حد تعبيرك وتعبير الكثير حاولت إيقاف نفسك بتغيير الإيميل لكن عدت أثناء فترة التوقف ماذا وجد مواصل في المجلس من سلبيات وإيجابيات ، أقصد أن المتابعه تختلف عن الدخول عن قرب وأيضا تبين لك معادن الكثير فماذا قدمت لك المتابعه؟
بالنسبة لي- فمعاملة جميع الأعضاء بدون إستثناء ( ما تغيرت ) سواء بتواجدي أو فترة التوقف.
وبالعكس زاد الإهتمام - بطلب رجوعي من جديد

أما بخصوص نظرتي للمجلس : فوقتها ما كان فيه مواضيع تحتاج للتداخل - كنت أوافق الطرح ( وهذي النقطة اللي بتكلم عنها بالتفصيل بسؤال وجدان )
والأجواء هادية جداً - وهذا اللي ساعدني بالتقليل من تواجدي بالمجلس.
وكنت أتوقع إني نجحت بالفكرة - وبإمكاني أحدد ساعات دخولي للمجلس حسب مزاجي!!.
وبعد ما رجع اليوزر - عادت الأجواء للسخونة

وهذا اللي خلاني أتواجد كالسابق.

مواصل كاتب مميز سؤالي هو لماذا لم ترى خواطرك النور بالرغم من أني متأكدة أنها ستلقى صدى مميز ليس لأن الكاتب معروف لكن لأن الأسلوب متميز فمتى سنرى خاطرة تحت معرفك؟
لو تدرين إن فيه بعض الأعضاء ينتظرون إجابتي على هالسؤال - على أحر من الجمر

والسبب : إن وحده من أخواتنا الخواطرجيات - أمون عليها بزيادة - لدرجة الشرشحة

وكانت بدايه تعاملها معي - كأي عضوه - تهاب التعامل معي !!.

لكني من كثر ما ( غسلتها ) - إنكسر هالحاجز وصارت ترد على شرشحتي بشرشحة

من طبعي معها على سبيل المزح ( أرسلها خواطر ) - وطبعاً هي مو خواطر - خواطر أسميها ( خرابيط )

فإذا حبيت أرسلها من ( هالخرابيط ) أفكر فيها بأسرع ما يمكن - وإذا توقف تفكيري - أتلفت يمين ويسار أدور شئ أضيفه على ( هالخاطرة )

رسيفر - تلفزيون - فديو ( ما يهم - أهم شئ تكمل الخاطرة )

كل هالخواطر والحوارات والشرشحة : لأن نقطة الخلاف بينا إني أثبت لها ( إني إنسان عندي أحاسيس ومشاعر فياضة )

اللي حصل :
لما شافت أختنا الخواطرجية سؤالك - أرسلت لي وكأن لسان حالها يقول ( مقلق راسي بخرابيطك - ورنا نشاطك وإكتب خاطرة للكل )!!.

فأنا أخذت السؤال على إنه تحدي

وقلت لها أنا بتكتك لخاطرة وبنزلها للجميع - أمام الملأ

ولو جاني رد واحد بس ولو كان على سبيل المجاملة بأن ( خاطرتي حلوه )
راح أصور الرد وأرفعه بأحد المواقع وأصكه بجبهتس

ويكون دليل حيّ على شاعريتي ورقه مشاعري

للأسف : هالأسبوع كنت جداً مشغول - بالعمل وبالبيت - وزين إني أرد عليكم.
فراح أترك كتابة هالخاطرة بعدين إن شاء الله

رائدة الزعيم إيجابيات وسلبيات "أتمنى أن تكون إجابتك صريحة "
أبزر الإيجابيات اللي لاحظتها :
إنتي تحاولين قد ما تقدرين تقربين بين وجهات النظر - والأهم عندك ما يوصل الإختلاف إلى مشكلة.
ولو حصلت المشكلة تسعين للإصلاح.
السلبيات :
إنتي تتوسعين بالردود - توسع كبير ( وما أقصد إن ردودك طويلة لا )
أقصد :
إنتي تفتحين ثغرات بالردود ( وبإمكان أيه إنسان يستقعد لك )

وهالتوسع مو من صالح الموضوع - لأن النقاش بيخرج عن مساره.
بعطيك مثال :
لو بناقشك بأحد المواضيع عن ( الصحة كمثال ) وبنجرف معك بالتوسع بنلقى أنفسنا نناقش ( أسعار البترول )!!.

إنتي حاول تحصرين الفكرة بالرد.

فتاة هلالية

1 // الكل عرف مواصل هنا بإنه إنسان صريح .. واللي بقلبه على لسانه ماعنده حركات المجاملة .. صراحتك ماقد سببت لك مشاكل ؟
ولاعادي تعوّدوا عليك العالم وصاروا يعرفون طبعك ؟
بالعكس - هالصراحة ما سببت لي مشاكل أبداً.
وأكرر ما قاله الكاتب فهد الأحمدي - فالصراحة أكسبتني الإحترام - والإحترام الزائد عن حده.
كأن الشخص المقابل يقول بنفسه ( إنت أحسن واحد - وإنت الأفضل بس فكنا من شرك )

ما أخفيك إني بجيمع القطاعات اللي عملت فيها سابقاً وحالياً - لي معاملة خاصة عن باقي الموظفين!!.

2 // كل شخص له طقوس وأشياء مايرتاح إلا لما يسويها .. مثلاً يعني ..
أنا ما أحب أكل إلا والتلفزيون مشغّل .. ما أحب أنام إلا والنور طافي .. لازم بطانية صيف شتاء بطانية لازم
ممكن نعرف وش هي طقوس مواصل اللي يمارسها ومتعوّد عليها ؟
" إذا كان عنده طقوس " ..
لي طقوس وطقوس غريبه

لكن صعب أقولها - مو خوف على نظرتكم لي - لا!!.
لأنها ما تصلح تكتب بالمنتدى.

3 // متى تنزل دموع مواصل ؟ ووش رايك بدمعة الرجال وهل تدل على الضعف ؟
أعتقد إن السؤال الأمثل :
في أي حال تكون دمعة الرجل دليل ضعفه؟
لأن الرجل يبكي إما :
1- إنكساراً لله سبحانه وتعالى.
2- لوفاة إنسان عزيز.
3- ندم على خطأ.
ولأسباب أخرى ، وما أشوف إن نزول دمعة الرجل دليل على الضعف إلا لفراق حبيب.

البرنس كاكا
أعجبتني كلمه الخال الحنون للعضوات

س2/بما إنني شفت أحد ردودك اللي ذكرت فيها إنك كنت من سكان السويدي يعني تعرف مطعم وضـّاح اللي يرأسه ذاك الدب اللي 24 ساعة معصّب المهم كانك تعرفه وش رايك فيه ؟؟ وماصحة مايشاع إنك الآن تقطن في حي المروج يعني حولنا ؟؟
ياخوك ما أذكر مطعم وضّاح
حاولت أتذكر إسمه - وأعتقد إذا ما خانتني الذاكرة
إن المطعم يا قبل مخرج شبرا أو مخرج عائشة بنت أبي بكر
لكني ما زرته.
أما بالنسبة لمكان السكن فأنا بحي غرناطة.

س3/ (( القاضي .. سهـل .. الكلاسيكي .. ابو مقبل ))
وش رايك في كل واحد وياليت تمحط السلبيات هنا الله لايهينك وهل تطمح في يوم ان تتوشح باللون الأخضر وتصف معهم؟؟
ما أسميها سلبيات - أنا برد باللي لاحظته :
سهل : صعب أحد يحلل شخصيته - لأن ردوده قليله جداً ، لكني ألاحظ إنه شديد.
القاضي : إنسان جدّي للغاية - والمفروض يعطي نفسه مجال للفرفشه شوي

ماجد مقبل : يحاول قد ما يقدر ما يزعل أحد - حتى لو كان على حساب نفسه.
الكلاسيكي : ما لاحظت على عادل سلبيات - طبعاً لكل إنسان سلبيات ، لكن عادل قدر يخفيها عن الكل

أما بالنسبة لطموحي بأني أكون مشرف :
أنا قلتها لك قبل - ما أسعى لشئ أبداً
ولو بحاول أسعى لأيه أمر - راح تكون وظيفتي أولى بهالسعي.

_____________
للإخوان جميعاً - إعذروني إذا بختار الأسئلة
لأن الوقت ضيق وضيق جداً
فلو شاف العضو إن فيه سؤال ما رديت عليه - لا يزعل رجاءاً.
فأكون تركت الرد - يا جاوبت عليه سابقاً - أو للضغط ومحاولة الإنتهاء.