السلام عليكم ورحمة الله وبركاته
حياك الله أبو صالح
بدون ما أطول عليك .. هذه سالفه بقولها وهي جزء بسيط من اجزاء اخرى كثيره عن نصب بعض المستوصفات والمستشفيات ..
تتألم بأصبع رجلك الصغير .. يروحون يسوون لك تحاليل وأشعات لها أول .. وأتحداك لو لها " أخر " ..
هذا ياطويل العمر سالفه صارت مع أخوي الكبير .. في قسم العظام بأحد مستشفيات الرياض ( الحكوميه ) .. لما جت فتاة أصبع رجلها " الكبير " مكسور . 
أخوي عالجها وربط أصبعها .. وراحت البنت وكل شيء تمام ..
بعد كم يوم .. رجعت البنت مره ثانيه علشان تراجع ..
أخوي يوم شافها انذهل .. تخيل وش مسويه ..
البنت راحت عند مستوصف ثاني .. وقالت لهم أنه اصبعها منكسر .. راحوا عيال المنب قايل جبسوا رجلها .. 
والله يقولي أنه التجبيس من عند الركبه .. حتى القدم .. والأصبع اللي هو أصلا فيه البلا .. قاعد يتفسح في الفضاء ..
تخيل النصب والحقاره .. الكسر بأصبع رجلها .. راحوا علشان يدفعوها فلوس ، سووا لها جبس لرجلها كلها . ومو بعيد يكونوا سووا لها تحاليل بعد .. والموضوع تافه جداً ..
عاد اصلا من الخطأ أنه لما ينكسر أصبع .. انك تجبسه .. لأنك رح تشل حركة المفصل ..
لا هم جبسوا لها الرجل كلها حسبي الله عليهم .. 
الزبده اخوي فك لها الجبس اللي ماله أي لازمه .. وقالها ياتتابعين معنا يا تتابعين معهم .. واقتنعت بالكلام لما لاحظت انو هالجبس كله بعد مهب مغطي أصبعها المكسور ..
هذه قصه من قصص كثيره .. وهي مشكلة كبيره لطالما تحدث الناس عنها ..
أن الطب أصبح مهنه ماديه بحته .. وليست أنسانيه فقط !. 
وأضف على ذلك أنهم يستغلوا الجهل اللي في كثير من الناس .. وماغير يسحبون منهم فلوس .
قليل من الوعي .. سيوفر الجهد والمال على المريض .
فيه بعض الأمراض الواحد ماهو مستاهل انه يروح للمستشفى ..
الحمدلله على كل حال ، أنا ماطبيت المستشفى الا قليل في حياتي .
الله يخلي الوالد واخوي بس .
يعطيك العافيه أبو صالح ..  
فمان الله
اخر تعديل كان بواسطة » R D H في يوم » 24/07/2009 عند الساعة » 11:49 PM | 