نادي الهلال السعودي - شبكة الزعيم - الموقع الرسمي - مشاهدة مشاركة بصفحة مستقلة - قانون نيوتن الرابع : هلالي وثق هلاليتك بستكر على سيارتك

IBRAHIM7 · #1 24/07/2009, 12:53 AM

بسم الله الرحمن الرحيم
السلام عليكم ورحمة الله وبركاته

ياهلا ياهلا بالهلاليين ..
شخباركم .. كيفكم ..

صباح / مساء النمسا .. واللي ساكن النمسا ..

ياصباح / يامساء زعامة آسيا ..

ياصباح / يامساء طلة الشعار الهلالي ..

ياصباح / يامساء المحياني ونيفيز بالفانيلة الهلالية ..

ياصباح / يامساء أديداس كل أبووووووووها ..

طبعاً الكل منا يجزم ويؤمن ويعتقد أن الهلال صاحب الشعبية الأولى في المملكة .. وهذي ماعليها كلام ..

خصوصاً بعد إستفتاء زغبي وتصريح المشرف على قنوات ART

طيب ليش مانستغل نفوذنا وشعبيتنا الجارفة في كل مكان ..

لو كل واحد منا يلحط ستكر في موتره هلال ..

تخيلوا وشلون شكل الشوارع عندنا ..

تبي تشوف شعار الهلال في كل مكان ... مع إعلانات موبايلي .. ياسلآآآآآآآم آخر روقان

تبي تصير المملكة كل أبوها هلالية ..

أدري ان البعض يقول ان الآدمي هذا يبالغ .. ويرسم صورة مستحيلة ..

بس ليش لا ؟؟

انا قبل أيام كنت في المنطقة الشرقية ( الدمام - الخبر )

وربي شفت سيارات كثيييير فيها ستكر هلال ..

وواضح ان شعبية الهلال هناك طاغيه .. والدليل مباريات الهلال في المنطقة الشرقية دائماً تظهر بشكل ممتاز جماهيرياً ..

أيضاً في منطقة القصيم عندنا وتحديداً في مدينتي بريدة .. عدد لا بأس به من السيارات فيها ستكر هلال ..

فـ يا جمهور الهلال ..

ياأيها الرقم الصعب ..

يالجمهور اللي حيرت وعقدت كل الرياضيين في المملكة ..

ستكر الهلال ورا في السيارة .. ماهوب ضارك شي ..

وكله تراه في 3 ريال أو 4 ريال ..

يعني رخيصة وتاثيرها كبير ..

وهذه سيارتي من زمان من أول ماطقيتها والستكرات الهلالية تتوالى

مرة كبير ومره صغير .. مره ورا ومره من جنب في القزازه ..

هذه سابقاً .. قبل دوري المحترفين ..

وهذه حالياً ..بعد دوري المحترفين وبعد تجديد الإستمارة .. قبل شوي ماخذها لعيونكم ..

فأتمنى أتمنى انكم تنجرفون وراء حملتي .. حملة الستكرات ..

لان الستكر والله يحمل الشعار .. والشعار غالي ومكانه القلب ..

وصدقوني عن نفسي شخصياً .. اذا شفت ستكر هلالي في الشارع على السيارة تنفتح نفسي وتشقق خشتي وينتابني شعور عظيم بالسعادة

وودي أوقف الرجال اللي يسوق السيارة واجغفه جغفه محترمة

عموماً .. لا تبخل على الهلال بستكر مايكلف عليك .. ولا حتى ياثر في شكل سيارتك

بالعكس يزيدها جمال ورونق خاص ..

وتزيد وتؤكد وتوثق ان الهلال نمبر 1 في السعودية ..

علشان خاطري ياجماعة نبي الشوارع تكون مجنونة ..

نبي ستكر وشعار الهلال في كل مكان ..

نبي نلون السعودية أزرق وأبيض ..

ووش رايكم بعد تزيدونها بشال على المرتبة ..

وعلم يصير ورا المرتبة الخلفية وعلى القزازة ..

<< -- طماع ..

عشان الزعيم الآسيوي .. يؤبر قلبي والله ..

ويالله أتمنى لكم موسم جميل مع نيفيز وخوياه .. وربعنا عزيز وياسر والشلهوب وابو عبدالعزيز والزوري خلفهم والجيش أسامة وووووو..........

وان شاء الله جيرتس مايخيب الظن .. ويكون مثل ماعشمنا فيه ..

والله يوفق الزعيم .. ويوفق ابن مساعد في كل خطوة يقدم عليها ..

والله يوفقكم كلكم يازعماء ..

وياهلا ..

بس أبختم برسالة للجمهور الهلالي في القصيم

9/11 لاتنسون مباراة الهلال والرائد في بريدة .. الله الله كونوا في الموعد .. نبي حضور أقوى من الموسم الماضي ..

29/1 مباراة الهلال والحزم في الرس .. لا أوصييييييكم مايحتاج .. نبي الرس زرقاء ..

وكلمة أخيرة بقولها لجمهور الرياض ..

ياخي أحمدوا ربكم ان الهلال جنبكم .. أحضروا عساكم اللي منيب قايل ..