السلام عليكم ورحمة الله وبركاته << عدد الكلمات خمس بعدد أهداف المباراة ذيك

يا شباب العالمية .. والله أني أحبكم لكن والله ما فيه فقش ولا فقس ..
تبون تشوفون من اللي يكسر أكثر .. شوفوا عدد الفاولات اللي لنا واللي عليكم ..
وشوفوا عدد الانذارات .. مع أن الحكم تغاضى عن انذارات وكروت حمراء مستحقة لكم بعد ما تحسبون بالحاسبة بتشوفون من اللي فقش ومن اللي ما فقششي

بصراحة .. تقرير المباراة ما عجبني .. وغريبة أن جرح يشكي قصر في وصف اللقاء ..
كان من المفترض على الأقل وصف الأهداف كيف جات .. هذا غير الهجمات اللي لنا واللي علينا .. وكذلك الفاولات والإنذارات ..!!

على العموم .. كان باين على العالمية التجانس والانسجام .. وباين أكثر اصرارهم على الفوز وكان حماسهم طاغي وهذا ما سبب لنا الإصابات ..!

حضور شرفي وجماهيري كبير لصالح العالمية .. الله يقول الحق أنهم مثل النصر إذا جات مباراة الهلال يجتمعون وينسون كل خلافاتهم .. وبعدها يحلها ألف حلال

الصراحة وللأسف وأقولها من قلب .. أن أخواننا بالمجلس خذلونا ..!!!
حتى الحضور الجماهيري لفريقنا كان قليل .. وأعضاء الشرف غابوا ولا سألوا عن الفريق .. عاد كان لهم ظروف أو ما لهم .. الله أعلم
المشكلة ما وقفت لهالحد .. بالعكس ,, يجيك بعض الأشخاص حتى قبل المباراة يقول أن الفريق بينهزم بالسبعة وبالثمانية .. وبعد الخسارة أحط علامة استفهام وبعدها تعجب ..؟!

طبعاً هذي مو أعذار .. لكن بصراحة الفريق ما قصر .. وكان هناك أخطاء في الفريق .. داخل الملعب وخارجه ..!
أهدافهم من أخطاء دفاعية بحتة لو لا القدر ثم هالأخطاء ما كان جات أهداف .. لو الدفاع ما كان يعدّي وشات ما كان جاء الهدف الأول والثاني ..!

بعد .. المدرب اللي جابه ماجد مقبل باجتهاد منه كان وجوده وضرره أكثر من نفعه ..!
المدرب محترف وغلط أنه يتعامل مع هواة أكثرهم أول مرة يلعب مع بعض ..
بين الشوطين يقول لنا المدرب .. هذا مو لعب محترفين هذا لعب حواري
ردينا عليه .. بأننا فعلاً مو محترفين وأننا نلعب حواري ... وبعدها غسل يده مننا
مدرب ما يعرف فريقه .. كيف تجيبه يجبرنا على تكتيكه؟ ..

عن نفسي .. والله لياقتي معدومة وأعترف أني سيء .. لكن كم كورة وصلتني؟
عشان أوصل للكورة لازم أرجع للنص .. ولما أرجع يصيح المدرب بأن أتقدم .. ولما أتقدم ما توصل ولا كورة صح ..!
تلعب يا مدرب بمهاجم واحد ليش؟؟! والله لو أنه ريان بلال ما أكل معهم عيش هالجزارين ..
الكورة اللي لامني المدرب فيها هي يوم أني رجعت وراء شوي وأخذت الكورة بعد ما تجاوزت الكرة مدافعهم , تقدم طارق قدام وكنت بأعطيه إياها ..
كنت أنتظره يدخل العمق الفاضي واعطيه اياها من فوق .. لكنه جنّح يمين؟!!! ولحقوه الثلاثة يغطون .. ما لقيت غير أعكسها من فوقهم لي للعمق لأن لو عطيتها طارق
بتضيع في الجناح مع هالثلاثة خصوصاً أن الكرة مرتفعة .. الثلاثة فعلاً انسحبوا مع طارق وغيرت الكرة لي من فوق وحاولت أستغل سرعتي لكن دفاعهم المتراجع
كان أسرع ..!! طيب يا مدرب اذا اجتهادي ما أعجبك علمني وش رجعني أصلاً وراء وأنا المفروض أكون المهاجم اللي توصلني الكرة ؟!! مدرب الغفلة عامل فيها باكيتا وكوزمين بالمهاجم الوحيد
الكورة الوحيدة اللي وصلتني كانت من أفضل لاعبي المجلس في المباراة ( هلالي الشماسية ) في الشوط الثاني وكانت الكورة الوحيدة الصحيحة والخطيرة
الفريق ككل ما قصر .. لعبوا مباراة حلوة وما خسرنا غير من أخطاءنا .. وكنا بالشوط الثاني أفضل من الأول ..
رغم كل الكدمات في أغلب اللاعبين إلا أنهم واصلوا اللعب عشان المجلس بس
كنت أتمنى لاعب يغيره المدرب لأنه رفع ضغطي بصراحة وكنت قالبها في الملعب مناحة بسببه
كل اللاعبين ما عليهم قصور ولا ينلامون ما عدا هاللاعب لأنه هو اللي وراي والكور المفروض توصلني عن طريقه .. لكن إن شاء الله كل شي بأجره
المهم لما بغى المدرب يغيره ويفكنا منه ويدخل ماجد مكانه .. طلب ماجد أن اللاعب يستمر ( لسبب معين أحتفظ به ) وطلب أنه يغيرني ويدخل مكاني << لعاد تمون ثاني مرة يا ماجد
بأمانة .. والله العظيم كانت لياقتي زفت وكنت أكابر وأركض مع أن ودي أرتاح كله عشان ما يغيرني المدرب ويخلي هالعاهة المستديمة في الملعب
وربي لو كان واحد غير ماجد اللي بيدخل مكاني كان رفضت التغيير لأن فيه لاعب أسوأ أغلب كوره مقطوعة وما يناول لكن للأسف .. حبيبنا ماجد ما نقدر نقول له لا

المهم .. المباراة انتهت بخيرها وشرها .. وكلنا ندري أن المجلساويين كل قلوبهم معنا وأن كلامهم مزح لكن قبل المباراة كنا نحتاج الدعم المعنوي أقل شي ..!
لو شفتوا اللي شفناه وحضور كل مشرفي العالمية واستشاريهم وجماهيرهم ما لمتونا

نسيت أشكر كل من دعمنا وشجعنا .. وبإذن الله معوضين في الكأس الجاي