السلام عليكم

يالله صباح خير .

وقف المشجع الهلالي (أبو فهد) .... مثل عادته كل يوم بالصبح .... وهو رايح لمشواره اليومي المعتاد .... عند السوبرماركت ..... يشوف (رصة الجرايد) ..... أخذ الرياض والجزيره ... مثل عادته .... ويطالع بعيونه ..... العناوين (المثيره) .... في الجرايد الرياضيه ... المتخصصه .... إذا كان فيها شيء يسوى ... يشتري الجريدة .

قبل كم يوم ... طاحت عينه على خبر يقول ..... جابيليو الياباني .... يطلب التمياط بخمسة ملايين دولار ... ويوهانج الكوري ينافسه على ذلك .... ما بعنا بالكوم الا اليوم .. فريقين دفعه وحده .

المهم (رفيقنا) صار يفكر بهالخبر ... ويقول بينه وبين نفسه ... والله التمياط ما ينتعوض ...

لكنه يحب التمياط ...... مثل ما يحب كل لاعب هلالي ....ويقول في نفسه .... خمسة ملايين دولار يعني حوالي 18 مليون ريال ..... ماهيب بسيطه ..... والله يستاهل كل خير .... صحيح ودي يبقى التمياط .... لكن العرض كبير..... وما ينتفوت .... وودي له بالخير بعد .... الله يوفقه ويرزقه ويبارك له .

أمس ما شرى الجريده ... لأن ما فيها خبر يهمه ... إذا الأخبار مالها علاقه بالهلال .... ماهيب مهمه...

ومن أسبوعين ... وهو يقرأ بالجرايد .... ان الدوخي يبي يروح عن الهلال ... وأن النصر يفاوضه بمبلغ كبير ... وضاق صدره ... ليش الهلال ما يعوضه ويخلونه يجلس ... والله لو عندي فلوس كان عطيته ...

قام (صاحبنا) ... وحط (الرياض – الجزيرة ) تحت ابطه .... وفتح جريده ثانيه هذي دايم فيها أخبار عن الهلال ... وبعدين باقي الجرايد .. يمكن فيها خبر جديد) ..... ولو يعرف إنجليزي أو أوردو .... كان تصفح جرايدهم بعد .... يبحث عن خبر ... أو أي موضوع عن الهلال ...... يمكن فيه شيء مكتوب ما هو في جرايدنا ...

وجلس يتصفح الجرايد ... ويقول بينه وبين نفسه ... الثنيان والجابر وأبو اثنين والتيماوي بيعتزلون ... والجرايد تقول ... التمياط بيروح لليابان ... والدوخي للنصر ... والغامدي للأهلي ... والشريده للامارات ... والكاتو موقف ... والجمعان يهدد ... ويقولون الناس ... أحمد خليل بيروح الاتفاق ... والرشيد ولطف والسلومي والمسعري والشهراني والقحطاني والشايع وضاري ... بينسقون .

أجل من بقي في الهلال ... وراء هالملاقيف ... ما يخلون لعيبتنا لنا .

ومشكلته ... إن الهلال ... وكل شيء يتعلق بالهلال ... صار جزء من حياته ... وأخذ تفكيره ... ما يقدر يصبر عنه ... يبغى يطمئن ... كل يوم عنه وأخباره.... والصراحة تراه ما ينلام .... الهلال شاغل العالم كلهم .

وبعدين وصل (أبو فهد) مكانه ..... وهو مستعجل .... يبي يتأكد من صحة هالمعلومات ... ويقرأ عن آخر التطورات ... فتح جهاز الكمبيوتر حقه ... وبسرعه فتح على المنتدى الهلالي ... أصلا هو ما اشترك في الإنترنت ... إلا علشان المنتدى الهلالي ..... الله يلوم اللي يلومه .

هذيك اليومين ... يوم فيه مشكلة ... ولا قدر يدخل المنتدى ... كان يحس ... إن فيه شيء ناقص ... ولا يعرف وش يسوي ... وكانت هاليومين ثقيله ... وكئيبه .

المنتدى الهلالي ... دايم أخباره جديده .... أسبق من الجرايد .... والزين فيه ... إن كل اللي فيه عن الهلال ... والربع حطهم على يمناك .... هلاليين .

دخل المنتدى ... وصار يقرأ العناوين بسرعة ... ويقرأ أسامي الكتاب ... صار يعرفهم ... هذا كاتب زين ... وهذا كتاباته مميزه ... وهذا دايم يجيب الأخبار ... يحبهم كلهم ... وهو ما شافهم ولا يعرفهم ... إيه هذا موضوع عن الدوخي ... وهذا عن التمياط ... وهذا عن يوسف ... وهذا عن سامي ... وهذا عن المدرب الجديد ... وهذا عن الإدارة ... يا سلام ... هذي المواضيع اللي توسع الصدر .

بس بصراحة ... فيه مواضيع ما تعجبه ... من هو أحسن لاعب ... فلان ماهوب كفو يلعب ... عنده قناعة ... إن كل من لبس فنيله زرقاء ... يحبه ... ولا يبي يقرأ عنه ... أي شيء ... ماهوب زين ...

(أبو فهد) ما لقى اللي يبي ... بخصوص اللاعبين ... اللي تكتب عنهم الجرايد ... بيروحون والا لا .

صار يفكر بينه وبين نفسه ... ويقول ... اكثر كلام الجرايد ... صفقات وهميه ...

ويقولون ... كلام الليل يمحوه النهار

ويقولون بعد ... وإن غدا لناظره قريب

لكن مع هذا كله ... (أبو فهد) ماهو مرتاح .

وده الكلام اللي يعجبه ... يصير صدق ... واللي ما يعجبه ... يصير كذب .

اللاعبين اللي بيجون للهلال ... الله يحييهم ... واللي بيروحون ... انشاء الله الخبر كذب .

وبعدين جلس (أبو فهد) يفكر ... وشلون عرف الهلال ... وشلون صار كذا ... مايصبر عن الهلال ... وهالحين المنتدى بعد ... وراح في نومه



البقية كيف عشق (أبو فهد) الهلال في الجزء الثاني ؟؟؟؟؟؟؟