نادي الهلال السعودي - شبكة الزعيم - الموقع الرسمي - مشاهدة مشاركة بصفحة مستقلة - بـثوب دوبليـن.. وغتـرة ملمـل.. وشطفـه.. ( بترجع ذيك الايام ياهلال )

Fahad Al Sudais · #1 02/02/2009, 05:55 PM

حيـــــــــــــاكم

آآآآآآآآآآهـ بس

يا تل قلبي على رجعة الزمان كم سنة

ياويل قلبي على مباراة الهلال والعربي الكويتي عام 1406 هـ

نهائي كأس الخليج للاندية

قبل 27 سنة

كنت بزر << اوووم الرقة والنعومة... ورى ماتقول طفل ياجفس

رحت مع ابوي للملعب

اول مرة ادخل ملعب بحياتي

زحمة موووت... فل اوبشن... المدرجات مليانة جماهير 12 سلندر

مهوب جماهير هالايام 4 سلندر

حماس... تشجيع... وجيه تحمر وتصفر والعيون تتطاير

وازيدكم من الشعر بيت... كان الجو مطر

ومع ذلك المدرجات ( مالك ماطى رجل )

قسم بالله ان الوضع اللي عشته في ذيك المباراة وانا توّي صغير

كان سبب مؤثر في حياتي كلها

سجل سعد مبارك الهدف الوحيد في تلك المباراة

وماعاد اشوف الا هالدنيا قامت وماقعدت

اقول للوالد : وش جاهم هالمهابيل ؟؟

يقول لي : اجل لو لحقت على جمهور ( شق الفنيله يامبارك ) وش تقول ؟؟

هبال مابعده هبال

ناس تعشق الهلال من جد

والحين كلّهم شيبان الله يمد باعمارهم ويرحم اللي توفى منهم

فيهم اللي ورّث رجال

وفيهم اللي ورّث رخوم

اجل بالله عليكم هذا تسمونه جمهور ؟؟؟

كلمة تودّيه وكلمة تجيبه

واللي يقول برد ... واللي يقول مشوار

واللي ماعنده استعداد يترك الماسنجر وقت المباراة << آبوك يالحب

واللي يقول مايسمحون لي ادخّل معي كاس الشاهي

<< منتب عاقل يالخرمان

ترى على فكرة

اقدر افتح موضوع طويل عريض واقول ورى مانصير مثل جماهيرالريال او البرشا او ارسنال او مانشستر او او..... الخ

بس انا حبيت اوضح لكم ان للهلال جماهير كانوا قبلكم

منكم وفيكم

اطلق من جماهير اوروبا كلها من ناحية الحضور والمؤازرة

كانوا يحترقون ويزبدون ويرعدون بالمدرجات

وخارج المدرج ماكانوا يكثرون الخرط اللي مايودي ولايجيب

على ايام رئاسة عبدالله بن سعد الله يغفر له ويرحمه

اتحداك تسمع هلالي ينتقد الادارة ويثير الجماهير

الكل كان مشغول بالتشجيع والدعم

وطبعا كلكم عارفين هلال عبدالله بن سعد... وعارفين وش سوّى

انا الحين بديت افكر قبل اروح مباراة باكر

اني اروح للمعيقلية واشوف لي ثوب دوبلين وغترة ململ وعقال شطفه مقصّب مثل حق الملك فيصل الله يرحمه

والبسهن واحس اني من ذاك الجيل

على فكرة

تراي هنا مانيب قاعد انظّر وانتقد الجماهير وارمي الكلام

انا واحد منكم وفيكم

... ومن محبتكم اقول هالكلام

نبي بياض الوجه باكر الله لايهينكم