| أبشر يالقاضي ..
هذه قصيدة قديمة وفيها يقول الشاعر :
هبت هبوب النود والقلب مجحود ... والكبد عاصوف الطواري لطمها
قلب به الهاجوس ما يكسب الزود ... واليا بغى له حاجة ما لزمها
راعي مجاديل على المتن مرجود ... أرخى على قلبي رهايف سهمها
دقيق المثناة وصغير نهود .... ياليت ربي من نصيبي قسمها
نورات واجد بس في نورها زود .... أمر من الرحمن حتى قدمها
وجدي عليها وجد من ضيع الذود .. حشوان نوقاته غدت ما وسمها
أخذ أسبوع ما تحلى ولا رود ... والعج طاروق العشاير دهمها
أو وجد من ملكه على سبعة جدود ... جاه الخصيم وحجته ما فهمها
...
وفيه قصيدة للشاعر فيصل المجفل
ليه يانوره ما أحبك واعشقك واقول نوره .. شي حلو وشي غير وحب مكتوب بجبيني
المشاعر ما تطيع أحيان عاشق في شعوره .. بس هالمره طلبتك اسمعيني وافهميني
قربك اللي ما لمسته غيبته خانت حضوره .. ضاعت أيامي وأنا ارجي حبك وراحة يميني
ذي حروفه ذي دموعه ذي طعونه ذي كسوره .. ذي ملاماته وشوقه ذي دروبه في سنيني
للضرورة حكم والمحظور جايز للضرورة .. وانتي يانورة ضرورة وإن فضحتك سامحيني
بين سطر وسطر قامت صورته تحكي سطوره .. وان قرى وإن شاف حبك بين رفة ناظريني
احسبيها طيش وألا ذنب وألا كشف عورة .. احسبيها بسمة ما بين ضحكة حاجبيني
احسبيها شاعر وهمه يبي يرضي غرورة .. احسبيها شوق حرك كل ذرة من حنيني
احسبيها مندفع طالع عن أفكاره وطوره .. احسبيها فاتنة وأعمت فؤادي قبل عيني
زينك وقدك وعقلك من سحابة لي جذوره .. ممتكلني مختلجني مهتويني محتويني
فيك كل اللي أحبه واشتهي نشوة عطوره .. فيك كل اللي أبيه وهو بعد مثلي يبيني
فيك ظلم وفيك حلم وفيك سلم وفيك ثورة .. فيك شي ما أعرفه كيف ؟ لا لا تسأليني
فيك صبر طال ميعاده وتعشيمه وجوره .. فيك وصل ما ومره الله على الغاية يجيني
انتظاري مل وقت تسبق أيامه شهوره .. كن كل اللي جرالي من عذابي يحتريني
ليت عندي ما يجمل واحفظ الوعد وزهوره .. ما بقى بيدي شي اقول هذا في يديني
وانتي مهما قيل حره ومحشومة ومعذوره .. كان به حكي وتجني الحكي مني وفيني
كل كلمة كل همسة كل ذكرى كل صورة .. باقية ما دمت عايش بيني وبينك وبيني
افترقنا والزمان اللي جمعنا راح دوره .. إذكريني واستري شيني وقولي بعض زيني
ايا نوره ايا نوره ايا نوره ايا نوره .. يا أغلى ما لمست عيوني واحلى ما شافت يديني
تحياتي لك وأتمنى أن تحوز إعجابك ...
وإن حبيت أن تضع القصيدة الثانية في موضوع مستقل فأفعل مشكورا ..  | 