( عن جد .. مديرنا بـ يهددنا من اول يوم ) .. روايــة مدرسيـة .. !!
بســم اللــه الرحمــن الرحيــم
يالله حيهم .. يالله حي كل(ن) باسمه ..
عموما هذي رواية لها مغزى .. واتمنى انها تكون واضحة ..
أترككم مع :
شخصيات الروايــة
** ( سرور ) مدير مدرسة ( احمد بن حنبل الثانوية ) .. مدرسة حكومية .. شخصيته قوية بالحيل .. عمره في بداية الثلاثين .. نحيف .. طويل .. ملامحة تدل على أنه أقشر لكن عادل ومستحيل أنه يتحّيز لـ أحد ..
** ( صالح ) .. وكيل مدرسة ( احمد بن حنبل ) .. شخصية مرحة .. عملي بشكل خيالي .. طاقة ( إدارية ) ما عليها كلام .. يحب يستحدث أشياء جديدة دايم .. وهو اللي استحدث ( لجنة النظام ) وراح تعرفون وش سالفتها ..
** ( مشرّف ) مدرس سعودي في مدرسة ( احمد بن حنبل ) .. يدرّس مادة الاحياء .. إنسان نظامي .. ويأدي عمله مثل ماهو مطلوب منه .. لا له ولا عليه .. الطلاب يحبونه لانه معطيهم وجه لكن بحدود .. يعجبني هالادمي ..
** ( مساوى ) مدرس سعودي في مدرسة ( احمد بن حنبل ) .. يدرس ( عربي ) .. ساحب على الطلاب .. مهمل .. دايم يتأخر .. شرحه زي وجهه .. واذا جا الاختبار يحط أسئلة ( نار ) ولا هي في مستوى شرحه ..
** ( خلدون ) مدرس اردني في نفس المدرسة .. طويل .. مسوي نفسه فاهم .. ويدخل عصه في شي ما يخصه .. يدرس فيزياء .. يدرس الطلاب خصوصي ويعطيهم الاسئلة .. طماع ولاعب(ن) على الطلاب ..
** ( محمد ) .. طالب في مدرسة ( احمد بن حنبل ) .. عريف فصل ( ثالث طبيعي ج ) .. طالب مجتهد .. وعاقل وعارف وشلون يتعامل مع اخوياه الزاحفين .. المدرّسين يحترمونه .. وهو فارض احترامه على اخوياه ..
** ( أشرف ) مدرس مصري في مدرسة يقالها ( مدرسة النوابغ الثانوية الاهلية ) .. رائد فصل ( ثالث طبيعي أ ) .. مدرس متمكن .. شرحه مسكّت .. يدرّس ( رياضيات ) .. برضوه يدرّس خصوصي .. لكن مستحيل يعطي احد الاسئلة ..
** ( معتصم ) طالب في مدرسة ( النوابغ الأهلية ) .. طالع من المتوسط ولا عطوه شهادة ( حسن سيرة وسلوك ) لانه انسان زاحف .. درس اولى ثانوي وسقط .. لكن بعد سقوطه الرجال انتبه لعمره وهذا هو ألحين شاد(ن) حيله .. وألحين هو في فصل ( 3 ط أ ) ..
.... .... .... ....
مدرسة أحمد بن حنبل الثانوية .. !!
مدرسة زي أي مدرسة .. مزحومة بالطلاب .. مديرها واحد يقال له ( سرور ) .. سعودي طبعاً .. بدا العام الدراسي وكالعادة الطلاب مالهم خلق للدراسة .. وفي الساعة سبع ألا ربع بدا طابور اول يوم .. طبعاً ما فيه إذاعة .. مسك المدير المايك ( السلام عليكم ورحمة الله وبركاته .. بـ إسمي و بـ اسم جميع منسوبي مدرسة أحمد بن حنبل نرحب بالطلاب الجدد و نهنّئ بقية الطلاب بـ بداية العام الدراسي الجديد .. لا أريد الإطالة ولكن أحببت أن أنوّه عن التحصيل العلمي فهو اللبنة التي يقوّم الطالب عليها ويبني أساسات نجاحه .. وبالتوفيق للجميع ) .. خلّص المدير كلمته .. واللي طاق اللطمة ومدّنق راسه .. واللي يحكحك عيونه يطيّر النوم .. واللي فاكها سوالف مع خويه اللي جنبه .. المهم ويتفرقون الطلاب وكل واحد راح لفصله .. عاد مثل منتم عارفين طلاب أول ثانوي يدربون روسهم .. ولا يدرون من وين هي .. تفرقو على الفصول ثم جو المدرسين و وزعوهم مثل ماهو مسجل عندهم .. طبعاً ما يخفى عليكم .. توضح الوسايط في هالموقف ويجي كل مدرس ويحط الطلاب ( الاخويا ) مع بعض .. لان اولياء امورهم مكلمينهم .. بدت الحصة الاولى .. طلاب الاول ثانوي .. راحت حصصهم على التعارف مع المدرسين .. وطلاب الثاني و الثالث .. راح أول يوم إستلام كتب وسوالف مع المدرسين ..
(( سرور )) و التقييم .. !!
عاد أقولكم ( سرور ) هذا توّه جديد على الادارة .. وهذي أول سنة له وهو مدير .. وهذا الكلام ما يعني أنه غير مؤهل .. بالعكس هالانسان تعجبني صرامته .. وبرضوه يعجبني أنه ( غير متحيز ) وهذي ميزة قليل نلقاها في ( الإداريين ) في الوقت الحالي .. المهم .. ( سرور ) ذا جمع المدرسين أول يوم وقالهم ( حياكم الله .. عموما هذا اول اجتماع وعقبال الإجتماعات .. ما ودي أحرصكم على شغلكم لانكم حريصين .. لكن .. عندي لكم شي ودي أعلمكم عنه .. اللي هو .. انه راح يكون فيه تقييم شهري لـ اداء المدرسين .. وعلى ضوء هذا التقييم راح ترصد درجات التقييم السنوي وكذا راح احاول اني ما أظلم أحد في الدرجة ) وكمّل كلامه المدير وقال كل النقاط اللي عنده وثم تفرقو المدرسين .. ويوم راحو غرفة المدرسين .. ما أخفيكم أن ( مساوى ) مدرس العربي .. حامت كبده من كلام ( سرور ) وقال ( هذا اولها .. والله يعين على تاليها .. واضح ان مديرنا راعي فلسفة ) .. رد عليه ( خلدون ) .. ( عن جد .. المدير بـ يهددنا من اول يوم ) .. وتحريض من ( مساوى ) وتعزيز من ( خلدون ) .. ألين تكلم ( مشرف ) : ( يا اخوان .. المدير جديد .. ويبي يعلمنا ألية شغله .. وهذا الكلام مهوب عيب .. ولاهوب تهديد ولاهم يحزنون .. وبعدين روقونا .. شوفو لنا سوالف تفتح النفس على هالصبحية ) .. عاد ( خلدون ) و ( مساوى ) تقدرون تقولون أنهم سلّكوا لـ ( مشرف ) .. وللمعلومية ( مشرف ) و ( مساوى ) أخويا الروح بالروح برا المدرسة .. وهالصداقة .. الكل يدري عنها .. لكن سبحان الله .. الله خلق وفرق .. ( مشرف ) انسان شاد حيله وخويه عكسه .. عموماً .. و يمر أول شهر .. ويوم جا وقت ( عرض ) التقييم اللي تكلم عنه المدير ألا و ( مشرف ) ماخذ تقدير سيء .. مع العلم ان مشرف هو أفضل مدرس في المدرسة بشهادة كل المدرسين والطلاب .. ما أخفيكم أن مشرف ما كلم المدير عن ( التقدير ) السيء اللي خذه لكن ضايق صدره لانه حاس ان المدير شايف شي عليه وأكيد أنه فاهم غلط .. المهم .. مشرّف سكت .. وكمل على وضعه .. وجا الشهر الثاني .. وماش .. التقييم برضوه ما تحسن بشكل ملحوظ .. هو صح انه احسن من الشهر اللي قبله لكن يظل سيء التقدير .. في هاللحظة .. ضاق صدره من جد .. وفي غرفة المدرسين .. تكلم عن ( التقدير ) السيء اللي ياخذه من ( المدير ) .. المدرسين كلهم استغربوا من كلام ( مشرف ) لكن هذا الواقع .. جا ذاك اليوم ويروح واحد من المدرسين لـ ( المدير ) وسأله ( انت ليش معطي مشرف تقييم سيء .. مع العلم انه أفضل مدرس في المدرسة ) رد المدير ( مشرف صديق مساوى ؟ ) .. ( ايه .. صديق مساوى .. وأرجو أن تقييمك يكون عادل يا استاذ سرور ) ويطلع هالمدرس .. ويوم جا الشهر اللي بعده .. ألا ويصير تقييم مشرف مميز .. واتضح ان المدير أخطأ .. في حق مشرف .. عاد في هاللحظة .. أقدر أقول أن مصداقية المدير قلّت عند المدرسين وخصوصاً لما شافوا تصرفه مع مشرف وكيف قيّمه .. جا ذاك اليوم .. ويطلب المدير المدرسين في إجتماع .. ويجتمعون المدرسين .. ثم قال المدير ( انا جامعكم اليوم عشان أوضح لكم حاجة صارت وارجو أنها ما تتكرر .. في أول إجتماع قلت لكم انه راح يكون فيه تقييم شهري لكم .. وبالفعل .. تم هالشيء .. لكن أنا كنت متوقع أن هالتقييم حاجة سهلة لكن اللي صار أني ظلمت كذا شخص في هذا التقييم .. وانا جمعتكم عشان اعترف بالخطأ اللي صار وأول شخص اعتذر منه هو مشرف .. لانه بالفعل مميز .. لكن انا حكمت عليه لانه صديق مساوى وما أخفيكم أن مساوى وللامانة مهمل .. عموماً .. الانسان من طبيعته انه يخطي واللي ما يخطي من المؤكد انه ما يشتغل .. لذلك أتمنى ان هالخطأ هو بداية التصحيح ) عاد المدير قال كلام كثير .. لكن اللي ذكرت .. هو أهم شي .. ما أخفيكم أن المدرسين تفاعلو مع كلام المدير .. لانه الصراحة مقنع .. ويكفي انه اعترف علطول وما كابر .. وفعلاً الشهور اللي مرت .. كان التقييم عادل والكل مبسوط منه ..
لجنة النظام و صالح .. !!
صالح مثل ما قلت لكم وكيل مدرسة احمد بن حنبل .. هالانسان وش أقولكم بس .. عملي بشكل خيالي و يمشي الأمور ببساطة واحترام مهوب مثل البعض يستغل منصبه عشان يتبلى خلق الله .. المهم .. صالح ذا ساهم في أشياء كثيرة في المدرسة واستحدث أمور كثير .. من هالاشياء لجنة اسمها لجنة النظام .. طبعاً لجنة النظام معروفة من قبل .. لكن صالح كوّن هاللجنة وعاطها صلاحيات ومهمات تساعد الادارة في المقام الاول .. المهم ويختار له طلاب .. وحط ( محمد ) رئيس لـ هاللجنة .. وفعلاً تفعّلت هاللجنة في المدرسة .. وصار لها مردود إيجابي بحت .. بتسألوني وش شغلهم هاللجنة .. شغلهم الله يطول بـ اعماركم .. أي قرار يصدره مدير المدرسة عملية ( النشر ) من اختصاص لجنة النظام بحيث يكون لها ( لوحة ) ومهمتهم تنسيق هذي اللوحة ونشر القرارات عليها .. غير كذا .. اي شخص بـ يراجع ( قرارات ) سابقة للإداراة يراجع هاللجنة .. وهم صوت الطلاب عند الإدارة .. يعني أي مشكلة يعاني منها الطلاب هم المعنيين بـ توصيلها للادارة .. وفيه اشياء كثير لكن هذا الاهم .. طبعاً كل شي بـ حقه .. ولهم درجات هاللجنة تساعدهم في المستوى العام في نهاية السنة .. المهم وتمر الايام .. ويجي ذاك اليوم .. ويطيح طالب في الساحة واغمي عليه .. بعض الطلاب ما أخفيكم أن يعتقدون أنه يستهبل ويستخف دمه .. عشان يطلع بعذر من المدرسة .. وانتشرت هالاشاعة في المدرسة ان ذاك الطالب طابح إستذكاء .. طبعاً طلعوا الطالب .. و ودوه للمستشفى وصار مريض فعلاً .. لكن المؤسف في الامر .. ان مصدر الإشاعة ذيك .. هي لجنة النظام هذي لانه علقت الخبر في اللوحة اللي علمتكم عنها .. والطلاب اعتقدوا ان الأشاعة صدق وانها ( اي الاشاعة ) اشبه ما تكون ( تصريح ) من الادارة .. لانها طلعت من لجنة النظام .. و من بكرة .. جا سرور مدير المدرسة .. وتكلم في الطابور .. و وضح موقف الطالب اللي طاح امس و أكّد أنه مريض فعلاً لانه تابع حالته هو بنفسه .. وان لجنة النظام اجتهدت ( على حسن نية ) و روجت الخبر ( الغير صحيح ) .. ما أخفيكم ان بعض الطلاب تفاعلوا مع كلام ( سرور ) لكن البعض ضاقت صدروهم من تصرف ذيك اللجنة .. وانهم اخطو في حق ذاك الطالب ..
مدرسة النوابغ الاهلية .. !!
في الجهة الثانية .. فيه مدرسة أهلية يقالها ( النوابغ ) مديرها واحد يقاله ( سطام ) .. سطام هذا يصير ولد عم راعي المدرسة .. لكن والشهادة لله .. ولاهوب عشانه ولد عم راعي المدرسة .. ( سطام ) هذا فعلاً مدير عليه الكلام .. شخص كبير .. خبرة .. إداري وش أقولكم بس .. وراعي المدرسة تارك مهمة ( إختيار ) المدرسين الجدد لـ ( سطام ) .. يعني هو اللي يختار مدرسين لـ ( المدرسة ) .. عاد أقولكم هالمدرسة تعجبني لان مدرسينها مميزين والفضل راجع لـ الله ثم لـ ( سطام ) .. وما أخفيكم أن الناس ما يسمعون فيها هالمدرسة لـ كفاءة مدرسينها .. عاد هالمدرسة فيها مدرس يقال له ( أشرف ) .. هالمدرس ما شاء الله عليه بس .. فعلاً ( شرّيح ) بشكل خيالي وعلى قولة أخواننا الطلاب ( يفهّم البلكّة ) .. وأشرف هذا رائد فصل ( ثالث طبيعي أ ) .. الفصل اللي يدرس فيه ( معتصم ) .. عاد معتصم خلوني أقولكم سالفته .. هذا طول الله بـ اعماركم .. طلع من المتوسط ولا عطوه شهادة ( حسن سيرة وسلوك ) لانه انسان كان زاحف .. الله يصلحه .. وبالوسايط .. دخل مدرسة النوابغ .. درس أول ثانوي .. وسقط .. عاد هو من الابتدائي وأهله فاقدين الأمل فيه وكانوا مئّيسين منه .. لانه انسان ما له بالدراسة .. المهم ويعيد أول ثانوي .. و على انه ( رايح فيها ) ألا أنه أول مرة يسقط .. وسبحان الله هالسقوط .. أشبه ما يكون بـ ( القرصة ) على اذن معتصم لانه درس مع ناس اصغر منه وحس بالغبنة وهو يشوف اخوياه سابقينه .. غير ان اخوياه ما قصروا معه واسوه .. ودعموه .. المهم شد حيله .. ونجح في أول ثانوي بـ ( تفوّق ) ثم نجح في ثاني بـ تفوق وألحين يدرس في ثالث و من افضل الطلاب اللي يدرّسهم ( أشرف ) غير أن أشرف يقدّر ( معتصم ) لانه يعرف سالفته وكيف تحول من طالب ( اي كلام ) إلى ( متفوق ) .. المهم .. هالمدرسة تعجبني بداية من المدير مرورا بالمدرسين وانتهاء بالطلاب .. جا ذاك اليوم ويجي للمدرسة مدرس سعودي توّه متخرج من الجامعه ويدرس فيزياء اسمه ( عبدالله ) .. المهم ما امدا يمر شهر من تعيين ( عبدالله ) ألا ويجي مدرس ثاني برضوه يدرّس مادة ( الفيزياء ) .. اسمه ( صلاح ) .. بصراحة .. صلاح هذا مدرس مميز ولا فيه خلاف .. و ( سطام ) طبعاً هو اللي جايبه .. بـ تسألوني ليش جا ( صلاح ) .. السبب الله يطوّل بـ اعماركم .. ان ( سطام ) خاف على سمعة المدرسة ولان ( عبدالله ) توّه جديد .. وجاب ( صلاح ) يلّحق .. لكن .. اللي ما جا على البال .. ان ( عبدالله ) تميز في هالشهر والطلاب حبّوه بشكل غير طبيعي .. لكن هالكلام ما جا في بال سطام .. وحرصه هو اللي خلاه يجيب صلاح .. وألحين .. المدرسة ( مدرسين الفيزياء ) فيها كثير .. والمدرسة تدفع رواتب لهم على غير سنع .. وكان من المفترض ان سطام يتأكد من مستوى ( عبدالله ) قبل ما يجيب ( صلاح ) .. لكن ما عليه .. حتى وان تم هالكلام .. يبقى سطام له بصمة في تاريخ هالمدرسة ..
فصل ( ثالث طبيعي أ ) .. !!
هالفصل عشانه متميز .. جبت طاريه .. ومثل ما قلت لكم .. الاستاذ أشرف رائد هالفصل .. ومعتصم يدرس فيه .. العجيب في الامر .. ان الفصل هذا كل طلابه متميزين .. ذاك اليوم سألت ( اشرف ) وقلت له .. ( كيف الدوام معك ؟ ) رد علي ( ياخي .. فصل 3 ط أ .. هو اللي يخليني أجي للمدرسة والنفس مفتوحة ) قلت له ( ليش ؟ ) قال : ( ياخي يتفاعلون معي بشكل غير طبيعي .. وحتى الحظور مميز .. قليل أشوف غياب فيهم مع ان المدرسة ما تدقق في مسألة الحظور لان المدرسة أهلية طبعاً ) .. وانتهى كلامي معه .. الزبدة .. ان اشرف وعلى كلامه يقول أن عطاءه يزود في هالفصل .. أول شيء لانه رائد هالفصل وثاني شي لان الطلاب يساعدون .. المهم .. وتمر سنة ويتخرجون فصل ( 3 ط أ ) والله يستر عليهم .. و جو طلاب غير اللي قبل .. رجعت وسألت اشرف .. قلت له ( كيف طلابك السنة هذي ؟ ) قال ( ياخي فرق .. السنة اللي راحت كانوا متميزين .. لكن السنة هذي .. غياب .. وعدم تفاعل .. ولكن الغريب في الامر ان الفصول الثانية اللي ادرسها .. مميزين طلابها عكس السنة اللي راحت .. والله يعدّل الحال ) .. في الحقيقة ما أخفيكم انه منغبن .. لان فصله كان أفضل فصل .. وألحين تغير وضعه .. ويوم سألت طلابه وقلت لهم ( ليش ما تشاركون مع المدرس .. وتتفاعلون معه ) قالوا لي ( ياخي هذا مدرس يجيب النوم ) .. سبحان الله ألحين أشرف صار يجيب النوم .. وتمر الايام .. وكأن طلاب ( 3 ط أ ) تحسنوا شوي .. وأشرف أبشركم كأنه استانس .. لكنه إلى ألحين وهو يتذكر ( طلابه ) اللي قبل وكيف كان تفاعلهم وحظورهم .. ويوم جت الإختبارات النهائية .. ويسقط كم طالب في فصل أشرف .. وأول ما طلعت النتائج استغربوا الطلاب ألحين جايين في مدرسة أهلية ونسقط .. ويرفعون شكوى للمدرسة ضد ( اشرف ) وعلى كلامهم يقولون انه ( متخاذل ) هالاستاذ .. وقالوا كلام في أشرف ما ينقال .. والمدير وللأسف اضطر انه يعاقب أشرف عشان يكسب اولياء امور الطلاب .. لكن هاللي صار .. يعتبر نقطة سوداء في تاريخ ( سطام ) ولاهي من عادته .. يسوي هالامور ..
@@ بالملقـــاط @@
** التسرّع في الحكم على اللاعبين مسألة غير صحية .. ولنا في الوضع الحالي مع المحترف السويدي ( ويلي ) خير مثال .. ما أخفيكم اني حتى لحظة كتابة هذي العبارات ما اقنعني ولد السويد .. لكن أشوف التطور في مستواه .. وهذا اللي مريحني .. ولنا في تصرف ( سرور ) مع ( مشرّف ) خير مثال لمّا عطاه ( تقييم ) ما يسحتقه لأنه تسرّع في التقييم وكان المفترض انه يحط التقييم ( نصف سنوي ) مو ( شهري ) وغير كذا أنه حكم على ( مشرف ) من خويه ( مساوى ) و هذا اللي صار عندنا أول ما جا ولي .. علطول رحنا لـ ( اليو تيوب ) وبحثنا عن مقاطع ويلي .. و نبي ويلي اللي نشوفه ألحين .. مثل اللي نشوفه في المقاطع .. وهذا الكلام يبي له وقت ..
** الإعتراف بالأخطاء شي طيب .. واللي صار من إدارة سمو الامير عبدالرحمن بن مساعد شي طيب .. وانا اتكلم لما اعترف شبيه الريح بـ أخطاءه .. والوضع مشابه لـ سرور .. لما اعترف بـ خطأه .. لان الأعتراف بالخطأ يحسس البقية ان الشخص هذا يشتغل .. والتكتم اللي يصير في بعض ( إدارات ) الاندية سبب مشاكل .. وكلنا عارفينها .. لذلك حبيت أوضح هالنقطة الإيجابية في شبيه الريح واتمنى انه يواصل عليها .. وتكون سياسة الادارة على هالشكل .. عشان نرتاح احنا كـ ( جمهور ) على الزعيم ..
** إنخفاض مستوى اللاعب لا يعني السقوط .. وبرضوه وجود مشكلة ( فنية ) في لاعب ما يعني أن المشكلة هذي راح تستمر .. لان مع التطوير الذاتي .. راح يتغلب ذاك اللاعب على كل مشاكله .. وانا اتكلم محمد الشلهوب .. ابو بندر هالسنتين الاخيرة عاني من ظروف الله يعلم بها .. لكن نقول ان شاء الله انه تغلب عليها .. وألحين .. ننتظر محمد الشلهوب ( الحقيقي ) لان اللي شفناه في المباريات الاخيرة مو محمد الشلهوب .. ولنا في ( معتصم ) خير مثال .. فـ معتصم .. كان داج .. لكن يوم جرب طعم ( السقوط ) شد حيله وتميز فما بالكم بـ واحد كان مميز .. لكنه تعثر .. يعني يحق لنا ننتظر محمد الشلهوب .. ولكن ( هل سيأتي ؟ .. اتمنى ذلك ) ..
** التأكد من إختيار اللاعبين الأجانب مسألة مهمة .. وخصوصاَ في فريق يطمح أنه يحصل على الدوري .. عموماَ قصة رالديس انتهت .. لكن المهم الايام الجاية .. وفترة التسجيل ( الشتوية ) قريبة .. اتمنى من الادارة وعلى راسها شبيه الريح أنهم يدققون في إختيار اللاعبين الاجانب .. لان خسارة لاعب اجنبي واحد من الممكن انها تكلفنا الشي الكثير .. ولنا في ( سطام ) مدير مدرسة النوابغ خير مثال .. كان عنده عبدالله ( اللي توّه متخرج ) ثم جاب ( صلاح ) مع العلم ان عبدالله كان مميز .. ومسألة حظور ( صلاح ) كلفت المدرسة مبالغ .. وفي الهلال مسألة حظور ( رالديس ) كلفت الهلال ( خسارة لاعب أجنبي يستفاد منه ) ..
** الحظور الجماهيري في الرياض مطلب ضروري .. قبل فترة كنت اقول .. ان الجمهور الهلالي واحد .. سواء في الرياض او جدة او الشرقية او غيره .. لكن في الاونة الاخيرة وللأسف .. الجمهور الهلالي في العاصمة يبي دفعة بسيطة .. ولنا في فصل ( 3 ط أ ) اللي كان اشرف رائده خير مثال .. كان الفصل مميز .. بطلابه .. ويوم تميزوا الطلاب تميز المدرس ... ولما انخفض مستوى الطلاب انخفض مستوى المدرس والعملية مشتركة .. لذا .. الرقم الصعب لازم يعرف أنه هو ( الزعيم ) و هو اللي يجعل من الهلال ( زعيم ) ..
** في فصل ( 3 ط أ ) لما سقطوا الطلاب حطو المشكلة في أشرف المدرس .. وهذا الكلام مو صحيح والاسوء ان اولياء أمورهم دعموعم .. ورفعوا شكوى ضد أشرف .. والاسوء برضوه .. ان المدير سطام تفاعل معهم وعاقب اشرف .. والحالة هذي مشابهه لوضعنا لما نخلي التحكيم شماعة نعلق عليها ( اخطاءنا ) .. ما اقدر اخفي ان بعض المباريات .. يكون الفريق مميز .. وبـ غلطة حكم .. تنقلب الطاولة على الفريق المميز .. لكن هالكلام في حالات نادرة .. لكن ان حنا نسكت على اخطاءنا .. ونعترض على الحكم هذي مشكلة .. وفي هذا المقام احب اشكر ( ادارة ) شبيه الريح على ( إمتناعهم عن الاعترض على الحكام بأي شكل كان .. او تقييمهم ) وهذي إيجابية .. من بحر الإيجابيات اللي تتمتع بها الإدارة الحالية ..
** ذاك اليوم .. يوم طاح ذاك الطالب في المدرسة واغمي عليه .. و ودوه للمستشفى .. لجنة النظام اللي كوّنها ( صالح ) وكيل المدرسة .. روجت عن إشاعة مالها سنع الصراحة .. وهي ( ان الطالب كان يستذكي عشان يطلع من المدرسة ) وطبعاً هالكلام عبارة عن إجتهاد .. والمجتهد معرض للخطأ والصواب .. هذي الحالة تكررت معنا في ( المركز الإعلامي في الهلال ) لما تكلم عن التايب .. ألحين لازم يعرف المركز الإعلامي أنه هو ( صوت الإدارة الهلالية ) في الوقت الحالي .. وأي غلطة .. راح تكلف الكثير .. صحيح أن ابن مساعد ظهر و وضح الخطأ الحاصل ... لكن لما تتكرر الاخطاء ومن ثم الرئيس يظهر للملأ و يوضح اللبس .. في هالحالة راح نفتقد مصداقية ( المركز الاعلامي ) اللي يأدي شغل مو طبيعي .. لذلك اتمنى ان هالغلطة هي الغلطة الاولى والاخيرة .. ولا يستغربون منسوبين ( المركز ) من ردة الفعل الغريبة اللي صاحبت ( الخطأ ) اللي صار .. لان الناجح مراقب .. يمكن البعض يقول اني مكبر الموضوع .. شي طبيعي أني أكبر الموضوع لان الموضوع يخص جهة نتطلع أنها تغني الإدارة عن الظهور الإعلامي وهذا العشم .. وأرجو ان الاخطاء ما تتكرر .. مع كامل إحترامي لـ جهودهم فـ انا ما أقدر أخفي جهودهم لان جهودهم ظاهرة للكل .. ولما أنقد حاجة معينة فهذا مايعني أني معارض للمركز الأعلامي بشكل عام .. لا .. أنا أخالف الأخطاء .. فقط ..
.
.
.
همســة
بالأمس .. يتغنون بجمهورهم في القصيم ويأكدون بأنه الرقم الأصعب في هذا البلد ..
بل شككوا في ( جماهيرية ) زعيم نصف الأرض بمجرد أن توافدوا بشكل ملفت ( بالنسبة لهم ) ..
واليوم .. وعندما قطع ( الرقم الصعب ) الشك باليقين رفعوا راية الصمت ..
.
.
انتهـــــى
.
.
نيوتن
