حوار رومانسي بالمسن بين ( شاعر الحب وبنت نجد ) لااا يفوتك الحب الصادق .
بسم الله الرحمن الرحيم
السلام عليكم ورحمة الله وبركاته :::
مباركة عليكم العشر ( ولا تنسون سنة التكبير )
أنقل لكم الموضوع هذا ،،،
عبارة عن محاكاة لمحادثة بين شاب وفتاة في المسن ( ويقاس عليها جميع برامج المحادثة بالشبكة العنكبوتية )
الحوار بين ( شاعر الحب ،،، و ،،، بنت نجد ) .
شاعر الحب / هلا والله بنت نجد !!شخبارك إن شاء الله بخير ؟
بنت نجد / هلا فيك شاعر الحب انا تمااااااااامو .
شاعر الحب / البارح وينك ماحصلتك في المسن ؟ كنت مشتااااق لك !!!
بنت نجد / كنا أنا واهلي سهرانين بالاستراحة ( تكذب كانت مع أمها في المستوصف أخوها الصغير يطرش وعليه حرارة وحالته صعبة ) .
شاعر الحب / اهااا فعلا الجو اليومين هذي رهيب (اخس يابجاد يعنني رومانسي )!!
بنت نجد / ترى للحين ماتعرفت على اسمك ؟
شاعر الحب /خخخخخخخخخخخخ يهمك تعرفين ياعيوني ؟
بنت نجد / أكيد حياتي لو مو هامني ماسألت ؟
شاعر الحب / أنا اسمي ماجد !!! (يخسى ويعقب اسمه بجاد ) .
بنت نجد / يهبل اسمك بالمره حلو !!
شاعر الحب / وأنتي حياتي ممكن اعرف اسمك ؟
بنت نجد / ممممممممممم مابي أقول (تبيه يترجاها ) .
شاعر الحب / تكفين حياتي عمري قولي اسمك ؟
بنت نجد / اسمي الجوهرة !!(ياكبرها عند ربي يامويضي !!)
شاعر الحب / حياتي عن إذنك دقيقة وراجع لك ! (ماء خزانهم العلوي فايض وراح يطفي الدينمو العوامة خربانة )
بنت نجد / اوكي خذ راحتك .
شاعر الحب / آسف على التأخير كان معي مكالمة دولية !! (نعن ابو شكله ما أكذبه ) .
بنت نجد / اها أكيد واحد من خوياك خارج المملكة !!!
شاعر الحب / لاحياتي الوالد كان يكلمني من باريس !!(حسبنا الله على شيطانه ابوه نايم السطح مايحب المكيف )
بنت نجد / ماقلت لي أي مرحلة دراسية ؟
شاعر الحب / بالجامعة حياتي (يخسى جندي بالدفاع المدني ) .
بنت نجد / تحب الشعر ؟
شاعر الحب / أكيد حياتي أنا دايم أنظم قصايد خاصة الغزل ( عساك تعرف تهرج تبي تكتب قصيد بعد !!! )
بنت نجد / حياتي وش طموحك في الحياة ؟
بجاد / صدقيني أنا عندي طموح كثير بس ما أفكر فيه الا بعد تخرجي من الجامعة !! ( نعنبو شيطانه صار له خمس سنين يفحط وهو جندي !! وقال إيش ؟ قال جامعة ! )
*
*
*
وهكذا تستمر المحادثات عبر المسن حتى تنتهي بمأساة عظيمة للفتاة ،،،
إما بحصول الشاب على مراده ،،،
أو على الأقل صورة لكشرتها ،،،،،،
ومن بعدها :
يبدأ الابتزاز للفتاة كل هذا تحت غطاء الحب الوردي ووعود الزواج الكاذبة !!! .
***
سنة تكاد تنسى في هذه الأيام المباركة ( سنة التكبير ) :
الله أكبر الله أكبر لا إله إلا الله والله أكبر الله أكبر ولله الحمد . <!-- / message -->
