| والله مدري وش أقول لك يا أبو سليمان بس تبي الصدق ؟! فعلاً هذا هو المضحك المبكي !!
و عشان ما أجاملك و لا تزعل علي تكفا يا أبو سليمان ترى (((( بعض )))) أهل حايل فيهم شوي عجلة و زود حركة و يمكن عليها شوي رجة ، أنا أذكر معنا واحد من العيال الله يذكره بالخير في الجامعة حتى و حنا بالقاعة و عند أخس دكتور جالس على الكرسي و رجليه تهز و مغير يحركها يا مقدمها يا مرجعها و إذا سكن قام يهز رجوله ! الحين يقال لك ما يتحرك ؟!
والله يا أبو سليمان يعجبني الرجال اللي إذا بنشر موتره و البنشري قريب راح له و دفع له زود قرشين ثمن راحته ، بس ما يعجبني لو بنشر موتره و ما حوله أحد يجلس على الكبوت و خده على يده و زين كانه يعرف مكان العفريتة ؟!
يعجبني اللي يازن الأمور و يثبت إنه راعي مرجله لا جا وقت المرجله ، لكن ذاك اللي يحسب الناس تنقصهم علوم المراجل و تلقاه في كل صغيرة و كبيرة ما كن فيه رجال غيره اسمح لي أقول إنه ناقص رجولة و ما عنده ثقة في نفسه ، المراجل لها أوقاتها و بأوقاتها يعرفون رجالها و انا اعتقد إنك توافقني إن شاء الله ..
اللي أبي اقوله باختصار اللي يبي يظهر مرجلته في حين و حزة مثله مثل اللي ما يعرف من المرجلة إلا اسمها ..  | 