[عاشق روزيسكي]

السلام عليكم ورحمة الله وبركاته ..

مساكم الله بكل خير.

شخباركم ان شاء الله بخير ؟؟

المهم باخش بالموضوع دغري

الموضوع يخص اللاعب الجماهيري الأول بالمملكه العربيه السعودية

والكل عارف اني اقصد ياسر بن سعيد القحطاني << القناص

المهم

كلنا شفنا ياسر في الفتره الأخيره كيف نازل مستواه بشكل ملحووووظ

حتى عمر الغامدي قالها ببرنامج كل الرياضه

قال اول كنا مانفرح اذا سجل ياسر الهدف زي الحين

لاننا متعودين انه مو غريبه على ياسر

لكن الحين نبغى بس نشوف ياسر يسجل بس

انا بصراحه ودي اعرف وش السبب << مو معنى هذا السؤال انه يجيني كم واحد من الجمهور ويتكهن ويتوقع مابي توقعات

انا ابي اعرف السبب من ياسر شخصياً اتمنى انه يوضح الشئ هذا للجمهور

ياسر حنا كلنا نحب ونموت فيك

ولولا محبتك ماقسينا عليك بالشكل هذا

شوف نواف التمياط الله يذكره بالخير يوم نزل مستواه شسوينا فيه

شوف محمد الشلهوب نزل مستواه مع ان عنده اعذار اكبر من اعذارك يا ياسر مهما كانت

ومع ذلك قسينا على ابو بندر

وحنا قساوتنا ورب البيت طالعه من الحب الكبير اللي بالقلب

ياسر انا اذا جلست مع الشباب نجلس نناقش مستواك

فالاغلب اجمع على انك في الوقت هذا

ماتبحث عن الهدف مهما كان

ولكن تبحث عن اهداف استعراضيه جميله

ماعليه يا ياسر

كلنا نبغى نشوفك تسجل اجمل الاهداف بالدوري

ولكن ليس على حساب الهلال

انت كذا تضر بفريقك وتضر بـ 10 لاعبين جالسين يبذلون مجهود

وخاصه لاعبين المحاور والدفاع

يعني يشتغلون شغل بخاناتهم

ولما توصلك الكوره بكل استهتار تضيع منك الكوره

وايضا لاحظت عليك كثرة السقوط مع اي احتكاك وهذا اللي ماعهدناه عليك يا ياسر

في مباراة الشباب كان هناك تسرع واضح من ياسر في اغلب كراته

انا كنت بالمدرجات

وكنت اسمع الجمهور يصفق لك ويهتف باسمك << وش معناه الشئ هذا

اكيد انهم يحبونك

ولكن اتمنى انك ترد عليهم وتهدي لهم الاهداف

مع الصرخات اللي يطلقونها بالتحيه لك



** نقاط جماهيريه :

- اتمنى من جمهور مباراة الغد انه مايجلس ساكت طوال الوقت , اتمنى من نزول اللاعبين الى ارضية الملعب ان الجمهور يهز الملعب هز ومايسكت ابد

منها اننا نزرع الحماس في نفوس اللاعبين ومنها اننا نربك الخصم في اول الدقايق.

- جمهور مباراة الغد اتمنى من الجميع انه يتفاعل مع مجلس الجمهور لان هذا بالاول والاخير في مصلحة الفريق

- على كثر ماحضرت مباريات اجد اغلب الحضور يسب في محمد غندر كل ماشال اهزوجه ويقولون تراك صجيتنا ياخي .؟؟

طيب سؤال موجه للاشكال هذي :

انت ليه حاضر بالملعب ؟؟ عشان تسكت وتمخمخ على المباراة ؟

الله لايهينك اجلس في بيتكم ماعندنا جمهور يسكت نبي جمهور يهز الملعب هز

- محمد غندر كل الشكر على الجهود اللي تبذلها

ونعلم انك تقدم ماتستطيع لارضاء الجميع واصل وماعليك من احد ولكن اتمنى منك انه يكون فيه حماس شويه.

- بما ان المباراة القادمه ممنوعه فيها المايكات اتمنى من الرابطه عدم احضار الطيران والطبول

والتفرغ للتشجيع الاوربي والمعروف لدى الجميع

وهو افضل من تشجيع الطرب وحفلات الشكشكه .


** قفله **

اللي ما أعجبه كلامي والا موضوعي

رجاءاً لايرد عليه

واذا فيه احد بيناقش اتمنى انه يكون يعرف اسلوب الحوار زين عشان مايصير فيه سب زي ماحنا نشوفه بالمنتدى بكثره من صغار السن


إن أصبت فمن الله وإن أخطأت فمن نفسي والشيطان ..

بالتوفيق للزعيم الهلالي في كل المحافل