السلام عليكم ورحمة الله وبركاته

واخباركم ياحبايب عساكم فلة قشطة منورة تراني مااتابع هالبرنامج بس مرة واحد من اخوياي نشب بحلقي وخلاني اتابع حلقة وحدة بس ونشبت بحلقي هالكلمة

اي قبل لا انسى ع البركة رجعة بو متعب الله يطول بعمره مع اننا كنا نتوقع مفاجات احلى بكتيير من هيك

ع ذمة واحد من اخوياي يقول ان مجموع الفلوس الي صرفها الملك بالقرارات يوم الربوع بس كانت تكفي انه يوزع ع كل مواطن 7 مليون ريال ع كل مواطن سعودي بس
عاد انا ماحسبتها ولا شي بس والله انقهرت ليته معطيني سبع مية الف بس اطيرر من الفرحة ولا انساها له طول عمره
شفتوا اني مو طمااع وع قدي عقبال مايعنوني وزير والعب بالدراهم لعب واشتري افالون هاللي كل فترة اروح الوكالة ع طريق خريص عشان اركبها بس والله خوفي بعدين يقفلون سياراتهم ويخلوني اطالعها من برا

ع قولة الاستاذ جيرد يقول بالانقليزي سوف امزق جوازي الامريكي واطلب الحصول ع الجنسية الكويتية فهي دلع ورفاهية ووناسة محد لاقيها <<<<<كلمة محد لاقيها ذي من عندي انا هو ماقالها
ياحظك ياشوق الكويت بس

ايه ممكن الاغلبية تفاجا من عنوان الموضوع وماتوقع ان علاوي الانسان المؤدب الوسيم اللي يمشي جنب الجدار ومايحارش احد يصير في عنفوان شبابه نظول ع استحياء لا والقهر اني ماكنت ادري ولا كان استخدمه هالقوة الكامنه فيما يرضي غروري وضميري <<<<<<<وخروا عنه

لا جد بعلمكم السالفة من طق طق للسلام عليكم

هذا قبل هيك شهر كان مع واحد من اخوياي جوال الدمعه وكنت كل ماشفته قلت ذا للحين عاايش الين جاا يوووم وتطق بطاريته وينشب بحلقي انت نظول اعدمت بطاريتي خربت جوالي
ياولد اذلف بهالجوال ماباقي الا هالمخزن انظله العالم وصلوا للايفون والبي بي وانا انظل لي الدمعه والله كلام بعد

المهم مررت الايام وكنت جالس معه قال علاوي وش رايك نذلف للرياض ابي اشتري ذهب من فتيحي قلت مشينا هاذي سيارتي توديك وين ماتبي كم شهر وانا اتردد صد ورد يوميا بين الرياض والخرج ولا قالت لا الا كل مالها تقول مشينا لحايل يارجل تبي مشاوير بعيدة شووي
قال خويي يااخي سيارتك وسخة وحالة (ع ايام الامطار والتغبير) قلت ماتعوق مشينا المغسلة
رحنا لقينا المغسلة فل ورحنا بندور غيرها وتونا متعدين المغسلة الا والمكينة حقت السيارة فجاة تطيح الا شووي بالشارع متعلقة بالمووت وخويي يطالعني بحقد وانا اطالعه بخجل واقول والله مو انا

المهم ونجيب سطحة ونشيلها وع الصناعية وصلحنها وربطناها واكتشفنا ان الخلل مو من عيني المسكينة الوكالة الحقيرة ناسين مسمار مانسوا هالمسمار الا بسيارتي <<<<<صرف ياعم

من بعد هالسالفة وانا شاك بنفسي وش السالفة هل انا من صدق نظول وعيني تبرد القلب ولا اشاعة واتهامات لا اساس لها من الصحة تماما

عااد انا ناووي اسووي شي اشووف ابي اتاكد ان كانت عيني حارة صدق ولا
ناوي ع سيرفر الشبكة اصكه بحبة تضيع معلوماته
بس اللي قهرني ان السيرفر ع كلام واحد من المهمين ذولا بالشبكة انه بامريكا عشان الحماية
وانا مو خائف من الحماية انا همي المسافة تتوقعون اجيبه واصير نظول واقوى واحد بالدنيا ولا اثبت برائتي مع سابق الاصرار والترصد

يقولي خويي ذا ياعلاوي لازم نصي عليك صلاة الميت
قلت كيف
قال ابد نسدحك ونصلي عليك عشان عينك تصير باردة عااد ماادري هل صدق ان اللي يصلون عليه صلاة الميت يروح اذى عينه ولا معتقد باطل

يقولون في واحد كان دايم يطلع من ديرته مسافر للديار الثانية وكان دايم يمر بمحطة حولها مقبره ع طريقه
وبيوم من الايام وهو طالع وقف بيعبي بنزين بالمحطة الا ويشوف جماعة شايله لها جنازة رايحين به للمقبره وهو لا اراديا ترك السيارة وراح معهم يبي الاجر

ويوم راحوا المقبرة قالوا بنصلي عليه صلاة الميت
ويوم صفوا بيصلون خوينا كان يشوف الجنازة قدامه الا والميت يغمز له ويطلع لسانه

الرجال طاار قلبه من الروعة ويتركهم وينحااش والميت يلحقه ياولد وقف الرجال ركب سيارته ورجع لديرته
وماقال لاحد لان محد مصدقه
مرت الايام والشهور وشأت الاقدار انه بيوم من الايام نوى السفر وراح بيعبي بنزين
الا وفي يد تمسكه من وراه ويوم التفت الا والميت الرجال يبي ينحاش ماقدر

الا الميت يقول له يارجال لاتخااف السالفة ومافيها ان عيني حارة وجماعتي قالوا بنصلي عليك صلاة الميت عشان ماعاد تقدر تنضل احد وانا قلت لهم اللي تشوفونه سووه
ويوم ودوني المقبرة بيصلون علي انا جلست اناظر اللي يصلون علي لقيت كلهم اعرفهم الا انت مااعرفك فغمزت لك وطلعت لساني عشان اعلمك ان السالفة مو صدق بس انت انحشت وانا لحقتك خفت يطير قلبك من الروعة وماقدرت

اوما السالفة الثانية هذا امام جابو له جنازة يوم جاا بيصلي عليها الا وشاف الجنازة تتحرك
قال ياناس الميت عايش الجنازة تتحرك الا ويطلع الميت يقول اهب والله اللي انتبه لي الا الامام علطول جااه العمى

الله يستر علينا وع كل المسلمين من شر الحسد والحقد والحسد والعين الحارة
مو العين الحارة اللي بالحسا يا Meme

انتم تتوقعون اني نظول
وهل تايودوني ع مسالة تدمير سيرفر الشبكة او اطلب افالون من الشبكة مقبل غض نضري عن هالسيرفر
ولو انتوا نضولين وش اول شي بتسوونه <<<حشى من الحقد والله


انا اسف ع الاطالة يااخواني ولي عودة مع ردودكم واول رد له مني عين محترمة ع اتصاله اللي داخل منه <<<<<صجنا بعينه

طيب مو مشكله بس حاول تذكر الله على كل شيء بينك وبين نفسك

أكيد عينك حارة

بس بتأكد أكثر لما ارجع

صباااحك ورد

،،


طيب اذكر الله على كل شي

بالله اذا تأكدت ان عينك حااارة ارسلي خااااص ابيك تنضل بقالتنا اللي غااثتني ودااابلة كبدي

،،

مرحب فيك أخوي !

أبي أعلق على نقطتين بس :

( 1 )
الملك عبدالله صرف حوالي 120 مليار ريال و لو حسبناها بيجي كل واحد سعودي 7 آلاف ريال ماهو سبع ملايين !
أذكر مرة شفت واحد يقول بحسبة بسيطة يتبين أن الملك لو كان أعطى كل واحد ثلاثة مليون كان كفت الـ 120 مليار .. فبحسبة بسيطة ( 20000000 مليون سعودي ) × ( 7000 ريال ) = ( 140000000000 ريال ) يعني مئة و أربعين مليار ريال !

كلنا نكون واقعيين و قل لخويك يحسب زين قبل مايظلم الملك أو أي أحد ثاني !


( 2 )
الأمر الآخر .. الصلاة على ( النظول ) أو ( النحوت ) بطريقة الصلاة على الميت الأفضل أن تكون بدون علم ( النظول ) !


حفظك الله

هلا اخوى
راح انشوف انت نضول وإلا لا من شوق الكويت

إقتباس الرسالة الأصلية كتبت بواسطة يوجين. هلا اخوى راح انشوف انت نضول وإلا لا من شوق الكويت

ههههههههههههههههههههههههههههههههههههههههههههههههههههههههههههه

تحصل فلوسها طارت الضعيفه زرفوها البنك

إقتباس الرسالة الأصلية كتبت بواسطة ام متعب التميمي ههههههههههههههههههههههههههههههههههههههههههههههههههههههههههههه تحصل فلوسها طارت الضعيفه زرفوها البنك

من جدك انتي ولا تمزحين

ان كان صدق ترا مو قصدي شوق اللي انتي تقصدينها ممكن وحدة ثانية

أقسم بالله من يوم قريت موضوعك ما قدرت أدخل للمنتدى إلا قبل شوي و المواقع الثانية شغالة تمام

الله يستر منك

إقتباس الرسالة الأصلية كتبت بواسطة ولد الشيوخ ,,, أقسم بالله من يوم قريت موضوعك ما قدرت أدخل للمنتدى إلا قبل شوي و المواقع الثانية شغالة تمام الله يستر منك

لا لا ياحبيبي مااتفقنا كذا ياولد الهلال مهزوم قبل شوي والعالم كلها خاشة انا مالي ذنب

لاحول شكل من يوم ورايح بكون انا مضرب المثل

إقتباس الرسالة الأصلية كتبت بواسطة محب الجنه الخرج من جدك انتي ولا تمزحين ان كان صدق ترا مو قصدي شوق اللي انتي تقصدينها ممكن وحدة ثانية

لا يالمخفه مدري عنها والله

شسمه ............اتذكر هشام الهويش حق ستار اكادمي شككوه انه نظول
قال انا مانيب نظول انتم تغلطون وتحطونها فيني

يقول مثلا اقول يوووووووه كل هذا غداك وانا ماحطولي الا شوي

يقول يقوم صحنه ويطيح

موب مني منه هو جالس يتحرك وهو ياكل وطيحه

لو انه انتبه لآكله ماطاح

السراحه كلامه اقنعني فأضنك مثله

والله وطلعت نضول صددددددددددددق
اليوم الشبكة تعطلت وتذكرتك على طول
أقول خلهم يصلون عليك صلاة الميت بسرعه لا يتأخرون ض1

إقتباس الرسالة الأصلية كتبت بواسطة محب الجنه الخرج لا لا ياحبيبي مااتفقنا كذا ياولد الهلال مهزوم قبل شوي والعالم كلها خاشة انا مالي ذنب لاحول شكل من يوم ورايح بكون انا مضرب المثل

هههههههههههه لا تحاول داخل والله الظهر

نصيحة حط على عينك ثلج كودها تبرد شوي