مساء الخير ..
حياكم الله ... في البداية إنشاء الله يكون
هالمنتدى الخاص بالمجلس العام ... مكان مستمر
لتواجدنا ... نتسلى فيه ... ونسولف ... ونضحك
مع بعض ...
قبل ما أبدأ
موضوعي أحب أقولكم أي واحد عنده موقف طريف صار
عليه ينزله هنا ... نبي نشوف المواقف الجميلة
اللي صارت علينا ...
طبعاً أنا بيكون
موضوعي عن مواقف طريفة صارت لي وأنا في خارج
المملكة ... إنشاء الله توسعون صدوركم
وتنبسطون من هالمواقف ...
قبل ما أبدأ اللي
بيتريق علي لا يقرأ كلامي وبالذات ( --- ) ماني
قايل إسمه علشان ما ينبسط ..؟؟؟
-------------------------------------------
أحلى من كذا
بتلقون وبالألوان بعد ...
_____________________________
( الموقف الأول )
هذا الموقف
الأول كان حوالي الساعة الثالثة فجراً (
شياطين ماننام ..!! ) ... المهم طالعين نكمل
السهرة ... وكنا أربعة ... وجيناك ماشين طبعاً
محاكيكم هو اللي يسوق ... ونجي مع ذاك الشارع
المظلم ... لكن شارع وسيع ... قال صاحبي والله
يهالشارع شارع تفحيط ...!! قلت جعلهم يفحطون على
راسك ... أي تفحيط وأي خرطي ... ما أنهيت كلامي ...
إلا الثالث يصيح أنتتتتتتتتتتتتتتتتبه
الجسسسسسر .... ما أدري كيف إنقسم الشارع
وطلعنا هالجسر مع العلم أننا نعرف الطريق زين
لكن والله من الدلاخة في روسنا ...!! وأجيك أنا
ووجهي مسوي فيها سواق ...!! وأحاول أتجنب الجسر
...!! وأحسن ما أسمع وأشوف هي السيارة تنطل فينا
...!! والله تقول أحسن مفحطين بالعالم ...!! وشوية
من هالمسلسل المرعب وطع دب ...!! صدمنا في الجسر
من جهتين ... والحمد لله كنت رابط الحزام ...
وأكياس الهواء طلعتلنا ... المهم طاخ طيخ ...
وتوقف السيارة والبخار يطلع علينا ... انحش
انحش ... وزي الصواريخ كل واحد منا برى السيارة
... وخمس دقايق من الخوف واقفين مانا مصدقين
باللي حصل ...!! والله من أسؤا المواقف ...!! المهم
في هاللحظة أنا كنت واقف جنب السيارة ومعي
واحد ويدي على راسي( مسبوه ) ... واللي جنبي أخس
مني بعد ...!! وإثنين هناك يمسحون الدم اللي طلع
منهم ...!! ودقيقة ويجينا إبليس ... قال صاحبي يا
سفر الحادث وحصل والسيارة وراحت فيها وكل شيء
يتعدل نصلحها بكرة ما ورانا شيء ( مع العلم
أنه كان آخر يوم لنا وكنا راجعين بعد السهرة )
... قال عادي الحمد لله على السلامة خسرنا
السيارة لا نخسر السهرة ...!! ( والله صديقي طلع
شيطان ...!! ) وأنا التفتله قلت ... والله أنك صادق
( والله أني أخس منه) ... قلنا للشباب وقفوا
تاكسي بنروح نكمل السهرة ... ويطمر واحد منهم (
والله أنه ذيب ) قال أي سهرة وأي خرطي ...!! أنتم
مجانين ...!! قلنا والله ما مجنون إلا أنت ( ما
قلتلكم شياطين ...!! ) ... بتروح معنا يالله وإلا
رح نام في الفندق وريحنا ...!! قال أمري لله بروح
معكم ... وتروح شلة الأنس ... ولما خلصت السهرة
حوالي الساعة 6 الصباح ونرجع ندور السيارة ...
ولقيناه مشلحة من كل مكان مسجل ومكيف وكفرات
وبلاوي سوداء من جد ...!! وهو يطمر علينا خوينا
بكل صوته ... قايلكم يا حيوانات ...!! قلنا يارجال
لا تزعجنا نصلحها ( والله من الدلاخة في روسنا
لكن وش نسوي حصلت ...!! ) ونسحب سيارتنا وتجلس في
الورشة تسعة أيام وتكلفنا ستة آلاف ريال ...
ولما خلصت أخذناها وجلسنا بعد ثلاثة أيام
زيادة ( دلاخة من جد ...!! ) ورجعنا بعدها لديرتنا
________________________
( الموقف الثاني
)
هذا الموقف حصلي
في دولة غير الدولة السابقة ... الموقف الاول
كان في سوريا ... أما الثاني في مصر ... كنت ساكن
في فندق ... المهم كلمت الرسبشن قلت أبي خط
للسعودية قالي أوكي الدقيقة بستة جنية قلت
ماهي مشكلة ... المهم كلمت أربعة إتصالات
وللأسف كل واحد منها أكلم أسأل عن الشخص ما
أحصله يعني مجموع مايكمل دقيقة ...!! ولكن
المعروف كل فتحة خط بدقيقة ... أنا كذا أعرف قلت
أربع دقايق في ستة باربعة وعشرين ماهي مشكلة
...!! المهم لما جيت اسوي تشك آوت ... قالي الموظف
الحساب للمكالمات ستة وتسعين جنية ...!! قلت
لالالا أكيد غلطان تأكد ... قال أنت كلمت
السعودية اربع مرات قلت صح ... قال كل مكالمة
باربعة وعشرين جنية ...!! لأن كل فتحة خط نحسبها
بثلاث دقايق ...!! ( والله من النصب عندهم ) ... قلت
يارجال قل غير هالكلام ... والله ما تشم ستة
وتسعين لو تموت ... لو يجيني الرئيس ما عطيتة
ستة وتسعين ( شفتوا أني شديد ) ... قال المحاسب
ومن أنت حتى يجيك الرئيس هو فاضيلك ...!! ( والله
من التحطيم ) ... قلت لو تموت ما حاسبت ... قال طيب
لو تموت أنت ماعطيتك جوازك ...!! أفااااا مابقى
إلا هي ... قلت والله لأخذ جوازي غصب عنك ...!! قال
رح للبوليس ( يعني الشرطة ) ... وخلهم يعطونك
جوازك إذا يقدرون ... وترى البوليس قريب ووصفلي
المكان ...!! ( والله أنه قوي العين ..!! ) ... قلت
طيب أنا رايحلهم وبتشوف ... أنا كنت لحالي
مسافر ... ورحت وحصلت الضابط ... المهم كان قدامي
يصفقله واحد ... طاااااااااااااخ
وطييييييييييييييخ ...!! بيني وبينكم والله أني
خفت قلت لا والله اللي رحت فيها ...!! وانتظره
والرجال ماعنده إلا بالكفوف والشلوت ...!! وأنا
قمت أتراجف ...!! تقول بأدخل إختبار الثانوية
...!! المهم لما خلص طالع في وقال عاوز أيه أنت ...
ولما تكلمت عرف أني سعودي ... قال أهلاً وسهلاً
تفضل ... والله أني أرتحت قلت أشوى مافيه كفوف
...!! قال أيه المشكلة ... قلت المشكلة كذا وكذا
وكذا ... وهذا اللي حصل من الموظف ... قال طيب
معاه حق ...!! قلت أي حق ...!! هو ماقالي هالكلام ..!!
قال النظام عندنا كذا ... نظام وزارة السياحة
...!! قلت لالالالا مستحيل أنا ماني متنازل عنه
ولازم تاخذون حقي منه ... كيف يرهن جوازي هي على
كيفه ...!! أنا ماعندي مانع أعطية مليون جنية
لكن على حق ... لكن يستغفلني لا ومية لا ...!! قال
طيب نفتحلك محضر ...!! والله أني أول مرة أشوف
محضر ماعرفته إلا من المسلسلات وصار على
الطبيعة قدامي ...!! المهم سين وجيم وتحقيق ...!!
واللي يحقق معي أظنه وكيل رقيب عندنا طبعاً
لكن بلهجتهم والله ما أدري وش يقولون له ...!!
المهم طلع حبوب قال للضابط وش رايك أصلح بينهم
سلمياً الفندق قريب ... باروح معه واصلحهم ...
قال الضابط تمام ... والله كأني أشوى شوي لأن
المحضر بيطول يقولون يومين ... المهم طلع معي
قالي خليك مفتح معاي ... طبعاً أنا فهمت ...!! قلت
شف إذا قدرت تنزل من السعر لك عشرة جنية (
طبعاً مايحلم فيها ...!!) قالي خلاص يا بشمهندس
أنا حكون معاك وحبهدله ... قلت يالله على يدك
...!! ورحنا لصاحبنا ... المهم خذاه على جنب
وقاموي يبربرون وما أدري وش يقولون ..!! المهم
ناداني على جنب وقال خمسة وأربعين جنية كويس
...!! ( قلت في نفسي والله كويس المهم ما يمشون
كلامهم علي ...!! ) ... ويجي الموظف ويعتذر مني
ويعطيني جوازي ( في نفسي ودي أقول غصب عنك ...
لكن خفت ...!!! ) ... وقالوا إنشاء الله تشرفنا مرة
تانية ... قلت إنشاء الله ... ( وأنا في نفسي أقول
قابلني يا شيخ لو شفت وجهي ...!! )
______________________
( الموقف الثالث
)
هذا الموقف في
مصر بعد ... كان معي واحد من أصحابي ... طلعنا
نتمشى ونقابل تاكسي وهو يوقف ... حنا كنا
ساكنين في فندق هيلتون رمسيس ... قال راعي
التاكسي على وين إنشاء الله ... قلنا الإهرامات
... قال تفضلوا ...!! قلنا بكم قبل ( حريصين ..!! )
قال علشان خاطركم وأنتوا من بلدنا الثاني
السعودية حاخذ خمسة وتلاتين جنية ...!! قلت
لالالالا لاتحاول خمسة جنية بس تبي وإلا بلاش
..!! قال يا افندم الهرم بعيد طيب ولا تزعلوا
مني خمسة وعشرين ودا آخر كلام ..!! قلت لا تكثر
معنا تبي خمسة وإلا خلنا نشوف غيرك ( ودي أقول
أقلب وجهك وخايف ...!! ) قال مش معقول الكلام ده
..!! طيب عشرين ..!! قلنا خلاص بنشوف غيرك ... قال
عشرة ... قلنا لالالا لاتحاول ... قال خلاص يالله
اركبوا ... ( والله مانا سهلين ) ... ونركب معه
ونروح للهرم ... ونركب مع راعي عربة تسحبه خيول
... وندخل جوا ... قلت باركب حصان ( أخس يا الزير
سالم ...!! ) قال صاحبي يارجال أمسك أرضك ... قلت
لالالا لازم أركب حصان ... قال أركب أنت حر ...!!
وأنا أطير على هالحصان ... كأني في مسلسل بدوي
...!! وشوية طاااااااااخ طييييييييييخ من فوق
الحصان ...!! ( أفاااا وجهي راح فيها ...!! ) ...
وصاحبي ميت من الضحك ... ويقول تستاهل يا ملقوف
...!! قلت ما عليه ( والله كنت مقهور لكن وش أسوي
...!! ) المهم قال يالله مشينا ... قال راعي العربة
لا يا افندم فيه مجانا عشان خاطركم اعجوبة عين
خون تاموت ...!! والله ما أعرف أنطقة ولا فهمتها
بعد حتى الآن ...!! قلنا خلنا نشوف مادام بلاش
...!! ونروح معه ... ويدخلونا محل فيه مكيف ...!!
طبعاً هناك نادر تحصل مكيف إلا في الفنادق
الفخمة والشقق الفخمة ...!! وكان مليان المحل من
المعلمين والرجالة على قولتهم ... وفجأة كلهم
يطلعون مابقى إلا أنا وصاحبي ...!! وش السالفة
ياولد ... قال والله ما أدري ... ودقيقة وتدخل
علينا بنت مثل القمر ...!! ( عارفين نقطة ضعفنا
...!! ) قالت السلام وكل منا يرحب فيها بدون
مايدري ...!! ( مساطيل ..!! ) ... أثاريها تبيع في
المحل ... وقامت تعرض علينا الأطياب والعطورات
اللي عندها ... وحنا فاتحين أفواهنا ...!! قالت شم
الطيب ده ... قلت رهيييييييييب وهو أي كلام ...!!
وكل طيب نقول رهيب ترزه قدامنا على الطاولة ...
والله مابقى مكان في جسمي إلا طيبته من
هالأنواع ... وصرنا تقول كوكتيل أطياب ...!!
المهم والمجنونه هذي تجمع على الطاولة ...!!
ولما خلصت ... قالت أعجبتكم قلنا والله
حلووووووة ( والله من النصب في روسنا ...!! )
وقامت تجمع الحساب ...!! قالت الحساب اربعة آلاف
جنية ...!! أنا بغيت أنصرع ...!! قلنا لكن مامعنا
فلوس معنا بطاقة صراف ...!! ( قلنا يمكن نصرفها
..!! ) وهي تنادي المعلم ... وقالت له اللي صار قال
مش مشكلة عندنا مكان للبطاقة هنا ..!! والله
تورطنا قلنا العوض على الله في اربعة آلاف ...!!
المهم أخذ البطاقة وناظرها ... قال لا هذي تصرف
في بنك مصر ... والله انا أنبسطت ... قال لكن
ولايهمكم يطلع واحد منكم معي صاحبنا ويروح
ويصرف والاني معنا هنا معزز مكرم ...!! لحظتها
زعل صاحبي ...!! قال لا ماهي على كيفكم ... ليه
مافيه ثقة ...!! بنضحك عليك حنا ...!! ( تبون الصدق
ايه ...!! ) ... حنا بنروح ونصرف وبكرة نجيكم ...
المهم رضوا بالامر الواقع ... وحنا ما صدقنا
خبر طلعنا ... ولحقتنا البنت قالت يا فهد (
طبعاً هذا أنا مغير اسمي ... خطير صح ؟؟؟ ) ...
توعدني تجي ( أكيد أنها حست أني مخفة ...!! ) قلت
خلاص بكرة الساعة خمسة وأنا هنا ...!! وفركت أنا
وصاحبي ولاعدناها
--------------------------
شكراً لكم
وأنتظروا الجزء الثاني
ولا تنسون تحطون
المواقف اللي صارت عليكم
ولكم تحياتي
أخوكم
سفر المرزوقي
[عدلت بواسطة ســ9ــامــ9ــي التاريخ:20-02-2001 الساعة: 05:15 PM]
الوضع الشجري
