ولد عمي كافر ..وحلمي خلاني فاسق ...عز الله اني شطحت بقوه في ذا الموضوع ......صووور..... - نادي الهلال السعودي - شبكة الزعيم

( عبدالعزيز اليامي ) · #1 08/02/2011, 11:38 AM

بسم الله الرحمن الرحيم
سلام يالربع
ياني باشطح اليوم

وربي ادخلكم في بير واخرجكم من نخلة

رحلة بر ونذاله

أمس القريب قررنا حنا والشباب نطلع البر شوي لان جماعة الارصاد قالوا يوم الثلاثاء بيجي مطر زي منتو شايفين

لكذا قررنا نسابق المطر ونطلع المهم يالربع والله اللي نطلع وانا الطباخ حقهم وعندنا مشكله حقيقية يالسعودين في الطلعات للبر تحس نطلع عشان ناكل ونرجع

كل شي هناك يتمحور حول الاكل المهم

كنت ابي اغسل القدر قبل اكبس عليه وطلبت علبة التايد من الشباب وانا عند النار وما فيه نور كافي اشوف المهم كل ما غسلت القدر توسخ اكثر وانا اغسل واغسل واغسل والقدر عيا ينظف

واناظر في علبة التايد اثاري عيال الذين حاطين مع التايد تراب

ويناظرون هناك ويضحكون ويقولون غسل غسل ياصديق غسل كويس

قلت في خاطري هين اوريهم ولان الجزاء من جنس العمل والله اللي اكبسلهم ذيك الكبسة واملاها حصى وتراب

وافرشها لهم وهات يا اصوات

وربي تحس ضروسهم تنطحن طحن وانا اضحك بملء شدقي (شرايكم في ملء شدقي

) قالوا هين ياولد فلانه قلت بالله ياشباب وش هو شعوركم وانتو ماكلين تراب

المهم ما علينا قلت معاوضين خير وازبط لهم هذيك الصينية اللي يحبها قلبكم

وهذي خطوات العمل : اول شي اسرق اكبر صينية فرن في بيتكم ثم قطع بطاط وكوسه وباذجان وبصل واجد وفلفل احمر حق الهنود

وجزر وليمون وثوم اخلط ابوها واعفسها وسط الصينية قبل تحطها على النار ثم جب مكعبات ماجي تعرفونها على طاري مكعبات ماجي من اللي عمره كل مكعبات النيله ذيك وهو صغير

المهم خذ الصينيه وحطها على النار ولان نار الحطب عسره وتنضج بسرعه لا تخليها تطول وحرك المكونات المعفوسه كثيرا وراح تلاقي مشكله انك كل ما حركت زياده تتطايح المكونات يمينا ويسارا

لا تفتزع وكمل واللي طاح خله لحسه الشيطان

المهم بعد ما تسوي اللي قلت اضف الدجاج اذا كانك رخمة زينا او اضف اللحم اذا كانك ذيب وبعدها قصدر(فعل الامر من قصدير

) ابو الصينيه قصدير ابن كلب عشان ما تخلي الصينيه حتى تتنفس وضعها على الجمر وحط فوق القصدير جمر بعد عشان تضج بسرعه وتاكلون ربع ساعه كافيه اذا كان دجاج ونص ساعه اذا كان لحم واذا كان حاشي عطه عشر دقايق زياده ثم وخر القصدير واضربوا بالخمس حتى تشبعون بالهناء والمدري وش .

الصينية الان جاهزة للتحريك على النار

الصينية بعد وضع الدجاج وقصدرتها

هذي الصورة اللي لما قالوا بالهناء والمدري وش

ولد عمي كافر

على طاري البران والطلعات مره كنا في الديره وكنا اربعه ياللي طالعين ثلاثه هم عيال عمي وانا رابعهم وهم اخوان المهم ثنين من عيال عمي شعراء وانا ثالثهم في الشعر وولد عمي الثالث مطوع

وحنا ربك يخلف المهم قال ولد عمي الاكبر

(اكبرنا اخبلنا

) الشاعر عندي بيت في خاطري ومدري هو حرام والا عادي ودي اقوله واذا عادي كملوا عليه قلت له سم هات اشوف بيتك قال :

كفرت بكل العذرى وآمنت بك وحدك
اوحدك بالمحبه واصوم عن غيرك

فقلت له انا الا حلال وهذي تكملته :

ياسيدي امرى غدى بين يدك
امر تدلل وانا لك بالهوى طيرك

المهم الاخير الثالث تحمس جدا فقال :

ياقبلتي بالمحبه ارفق على عبدك
النار في بعدك والجنات في خيرك

عاد هو قالها والا ما قالها تبطحنا عليه ضحك والمطوع يقول عليك لعنه الله يافاسق وهو يقول شفيكم

وحنا نقول كفرت يادلخ قال هذاكم تقولون اخس منها قبل شوي قلنا حنا نحوم حول الحمى وعلينا ذنب الفسق والتشبيه والا اما انت كفرت باللي خلقك ياخبل قوم تقلع من عندنا ياجاهلي المهم هو مقهور وحنا نقول له يا قدوة ابو جهل يافاسق يا كافر وهو شوي بيبكي

فقال اخوهم المطوع والله انكم تحملون ذنبه زيه انتوا اللي حارشتوه والا هو جاهل وله عذر الجهل وتوه صغير اما انت وهو استغفروا لا يسخطكم الله

فعصب اخوه

وقال تعال انت ياللي مسوي فيها عايض القرني

وحنا لبراليين وش انت احسن منا فيه قال انا ماني احسن منكم لكن انا انصحكم اتقوا الله فينا ترونا في بر ومقطعه وربي لو رفع عنا رحمته الحين رحنا فيها قال اخوه ايه قل انك خواف يا دجاجه وفي خضم النقاش راح خوينا اللي توه كفر

ولبس فروه سوداء وجاء من ورى المطوع وتحظنه والمطوع ارتعب وقرأ القرآن كله وحنا نضحك عليه ونقول وين المسلم اللي لا يخاف الا من الله قال الله يلعن اللي يزيد يطلع معكم وربي شكله جني ساحر سيروا مشينا البيت الله يغفر بس لكم ....

حلم ابيض واسود

الا على طاري الاحلام يالربع في ذمتكم ما عمرها جاتكم احلام مدري وش تبي مدري وش تحس فيه بالضبط يعني مره من المرات حلمت اني في الحوش وجالس مع ابوي اشرب القهوه ونسولف طبعا قمت من النوم معصب

وفي خاطري اني جالس اضيع وقت نومي في حلم اقدر اسويه على الواقع يعني ما يحتاج حلم عشان اطلع الحوش واتقهوى مع ابوي المفروض ان الاحلام تكون شي غريب عجيب شي مستحيل اما هالاحلام لا والله ما يصير وانا ما اتكلم عن احلام كلاسيكيه هذيك اللي تجيك بعد كبسه والا مفطح

اللي تتحلم انك في الديره لكنك في الرياض وان ابوك يضربك لكنها ما توجعك ومن هالخرابيط انا اتكلم عن حلم حلم شي تقوم وتقول انا اليوم حلمت تحسك انك انجزت شي في نومك

زي كذا مره من المرات قريت كتاب اسمه " الابعاد السياسيه في صلح الحديبيه" المهم اني نمت بعد ما قريت الكتاب وحلمت اني في عهد الرسول وان اشوف الحديبيه والعرب متجمعين ولابسين زي الزير سالم

وحركات بس اللي قاهرني ان الحلم كان ابيض واسود

ونفسي اعرف عقلي الباطن وش يحس فيه يوم يخلي الحلم ابيض واسود

يعني مسوي فيها تاثيرات وزمان وحركات وربي قهرني المهم مالكم في الطويله قمت من الحلم ورحت لابوي وقلت له انا حلمت حلم وابيك تفسره قال ما ابي اسمعه

قالت امي قول ياولدي

قلت لا ابي ابوي يفسره انتي حرمه ما تعرفين شي

قال ابوي غصب هو لا ماني مفسره قلت طيب اقوله قال لا تقول شي انت ما تفشل

قلت والله اني لاقوله ووالله ان تفسره وش انت ابوي له قال ابوك اربيك ياحمار واصرف عليك مو افسر لك احلام غبيه

قلت اسمع الحلم طيب واعلمه بالحلم واستحيت اقول له انه ابيض واسود

وقلت له ان في نهايه الحلم شفت رجول رسول الله واني كل ما حاولت ارفع عيني اناظره تنكسر عيني لرجوله فقال شوف ماني ضليع في تفسير الاحلام لكن انت فاسق

والا كان شفت رسول الله قلت انت شفته قال لا قلت على الاقل شفت رجوله والا انت ما شميت حتى ريحة شوفته فاذا انا وانا فاسق على قولتك وشفت رجوله وانت ما شفت منه شي وش تصير

قال ما قلت لك من البدايه لا تقول الحلم لكن ما تسمع الكلام

الغريب في الموضوع ان امي كانت بتموت بس عشان تسمع الحلم ياحب النسوان للفضول ..

المهم اني خلصت يالربع حاولوا تربطون المواضيع ببعضها لاني وربي مدري وش انا اقول عموما استودعكم الله على امل اللقاء بكم غدا في اذاعة الصف الخامس ب

ملاحظة مانعه للانبراش

كل ما قرأتموه تحشيش وشطحات وكلام منثور ولا اعتقد فيه ابدا فلا يجيني واحد يقول حرام ومدري وش انا اسولف فقط .

ابو مقبل اذا ودك تعطيني انذار على ذا الموضوع بعد تراني اجمع انذارات زي صور سنتوب وباقي لي كذا صورة واربح دربيل سنتوب

هلالي معالي · #2 08/02/2011, 11:55 AM

هههههههههههههههههههه

الله يسعدك يا شيخ احلى ما في الموضوع

إقتباس


	قلت بالله ياشباب وش هو شعوركم وانتو ماكلين تراب

يانك اجرمت فيهم ههههههههه

و الله كفو نآس ما تجي الا بالعين الحمرا هاه

و ولد عمك سلملي عليه

اما سآلفة ابو مقبل سآلفة

شفه ممن المتواجدين في الموضوع و جنب اسمه علامة زآيد

يعطيك العافيه بصراحه رسمت البسمه على ضروسي المترآكمه

( عبدالعزيز اليامي ) · #3 08/02/2011, 12:05 PM

إقتباس

الرسالة الأصلية كتبت بواسطة هلالي معالي


	هههههههههههههههههههه الله يسعدك يا شيخ احلى ما في الموضوع يانك اجرمت فيهم ههههههههه و الله كفو نآس ما تجي الا بالعين الحمرا هاه و ولد عمك سلملي عليه اما سآلفة ابو مقبل سآلفة شفه ممن المتواجدين في الموضوع و جنب اسمه علامة زآيد يعطيك العافيه بصراحه رسمت البسمه على ضروسي المترآكمه

اوما ابو مقبل يشاهدنا الان

ياويلي ياويلي

بس شرايك في حركة التراب

وعلى طاري ولد عمي تراه وربي راح مكه يستغفر ومدري وش وقال توبه من ذا الشعر اللي يدخلني جهنم

الله يعافيك اخوي واسعدني رسم ابتسامه على هذه الضروس الجميله

قناص القرن · #4 08/02/2011, 12:18 PM

وعليكم السلام ورحمة الله وبركاته ...

اجل أبيض وأسود هاهـ هههههه

والله ضحكت بـكل ما أوتيت من قوة .,, !

عقلك الباطني ،، اكشف عليه تأكد خخخخخخخخخخخخخخخخخخخ

( عبدالعزيز اليامي ) · #5 08/02/2011, 12:20 PM

إقتباس

الرسالة الأصلية كتبت بواسطة قناص القرن


	وعليكم السلام ورحمة الله وبركاته ... اجل أبيض وأسود هاهـ هههههه والله ضحكت بـكل ما أوتيت من قوة .,, ! عقلك الباطني ،، اكشف عليه تأكد خخخخخخخخخخخخخخخخخخخ

ياخي خلها على الله والله ان بعض الاحلام ضررها اكثر من نفعها

وعقلي الباطن خايف اكشف عليه القى بلاوي

اسعدني اضحاكك بكل ما اتويته من قوة >>ياحبني لعيالنا اذا استخدموا اللغة العربية

لاعب الزلفي الواعد · #6 08/02/2011, 12:33 PM

^^^
ههههههه
والله يانت عذبتهم بالكشتهـ
طيب ليش ما حطيت بدال الحصى عراجين ولا فقع
وبدال التراب مرقوق
والبيبسي شوربهـ

ابو طـــــلال · #7 08/02/2011, 12:59 PM

والله إنك بطل على هالسوالف الخاثرة

منتب سهل لابداً منتب سهل

ننتظر مواضيعك الحلوه .. لاتبطي علينا

إحساسي إنك لو تكمل على هالوزنيه .. بس شهر .. بيجيك واحد يسويلك توقيع ..

بس عندي سؤال فاغر

أنت من أي منطقه !!

قل ليش سالتك ؟

لأن كلامك يبدولي إنك من نجد .. بس في موضوع سابق لك قلت كلمة شكلها جنوبيه محضه ...

تصدق إحترت .! ودي اعرف من وين إنت .. وفين تشتغل هاه

the king yasser · #8 08/02/2011, 01:08 PM

فك الحجز

والله ياموضوعك فله

كل جزء اطلق من الثاني

.......

والله أنك كفو زين سويت فيهم

بس خل عنك والله ياطعم التراب شي ثاني

< من الناس الي يبلعون طين دايم

بس تعال وش هالبربسه الي سويتها

والله يابطونهم راحت وطي ولا تهون الروائح الي بتطلع تالي الليل

بس ماتقصر

.......

والله ياولد عمك شطح شطحه اليمه

بس لسانه صح

.......

ههههههههههههههههههههه

والله ياحلمك بايخ

خل عنك والله ياحلومي صايرتن حلوه من تالي

شي ماتتخيله

الله يديمها علي من زمان ماحلمت شي يونس

الله يعطيك العافيه حبيبي وكل يوم نزل موضوع

دحوم القصيم · #9 08/02/2011, 01:40 PM

هلا وغلا اخوي
صراحه انك تحفه
الله يسعدك في حياتك الدنيويه والاخرويه
تقبل مروري
دحوم

الزعيم الازرق 1117 · #10 08/02/2011, 01:52 PM

حجز ولي عوده قريبــه
.........

الموسيقار المضياني · #11 08/02/2011, 02:04 PM

ههههههههههههههههههههههههههههه

مشكوور أخووي على الموضوع اللي يوسع الصدر

والله اني تفقعت من الضحك من سالفة التراب ههههههه والله انك نذل

تحيآتي

تركي السلماني · #12 08/02/2011, 02:19 PM

مرحبا أخوي

الله يسعدك على هالموضوع الخونفشاري

يستاهلون أخوياكـ ماجاهم على التراب و ( الرضم ) اللي جاهم

الوكــاد

التقديم على الساحر باقي قدامي 300 رقم مأدري متى ياصلن الدور

مشكور بس لا أحد يشوف التوقيع

جار الزعيم مميز · #13 08/02/2011, 03:46 PM

ههههههههههههههه حرام عليكـ يارجل
اجل حصاء خلهم يستـأهلون ليش يحطوون تاايد >>> تراني فازع معكـ

اجل ابو مقبل معااك بالحلمـ احلااام سعــيدهــ
وحرراام عليكـ ياهووهـ ارعبت الرجـال الكــافر ههههههههههههههههه والله تلقــاهـ يستغفر ويهلل
شووكرن الموهووب وربي تحفففه
على عجااالهـ شكرررالك

$قناصة الزعيم$ · #14 08/02/2011, 05:12 PM

خخخخخخخخخخ

آلحلم شئ ثآني لو ملون خخخخ يطلع اككشن

سوآلفكـ رآئعه

ننتظر مزيدآ من آبدآعكـ

يعطيكـ آلعآفيه

( عبدالعزيز اليامي ) · #15 08/02/2011, 06:09 PM

إقتباس

الرسالة الأصلية كتبت بواسطة لاعب الزلفي الواعد


	^^^ ههههههه والله يانت عذبتهم بالكشتهـ طيب ليش ما حطيت بدال الحصى عراجين ولا فقع وبدال التراب مرقوق والبيبسي شوربهـ

وش ذي الحركات

هذي نذاله على خفيف

لزوم النذاله تبقى ذكرى

حياك اخوي