الصاحب اللي مطني في الهوى مـط @@ مطت وارعين(ن) تمط النبابيط - نادي الهلال السعودي - شبكة الزعيم

قاسم البُر · #1 13/01/2011, 12:23 PM

.

سعودي عمرهـ 30 سنة موظف وراتبه 7 الآف ريال ما حوش مبلغ
لانه توهـ مخلص اقساط السيارة وغلاء المعيشة مايسمح له يحووش مبلغ
قرر قرار تاريخي وعظيم في حياته من يوم دخل الـ 30 سنة وهو مكلم امه
يمه ربي يحفظك لي انا بتزوج بتشوفيني عيالي يايمه بس ابيك تخطبين لي
الرجال خطب والحرمه وافقت وحددوا موعد كتب الكتاب لكن قبل هالموقع بأسبوع
ام العروس كلمت ام العريس وقالت لهم شروطهم وطلباتهم وكلها بسيطة جداً ;)
اول شرط : نبي بيت خاص للحرمه سواء شقه أو فيلا المهم بيت مستقل ..
ثاني شرط : البنت تبي تكمل تعليمها وبعد ما تتخرج من الجامعة تتوظف ما يمنعها ..
بس هذه شروطنا .. قالت ام العريس : ما طلبت إلا حقها .. لكن المهر كم ؟!!

ام العروس قالت حنا زوجنا خواتهم بـ 80 ألف ريال لكن عشان ظروف ولدكم
نبي منكم 60 ألف بس .. حاولت ام العريس تخليها 50 ألف لكن يقولون ما تكفي

العريس انبسط وفرح وتشقق من الفرحه راح البنك وطق له قرض بـ 100 ألف ريال
60 ألف مهر + 30 ألف شقه وأثاث + 25 ألف صالة افراح + 10 قيمة عشاء وطقاقات وغيرهـ
الرجال معه 100ألف ريال وهذه المصاريف = 125 ألف ريال والرجال ما يبي صباحية العرس وجيبه فاضي
وراهـ شهر عسل بيروح ماليزيا وأقل شيء 15 ألف في جيبه
المهم راح وطلع له ددسن اقساط من شايب في المعارض وجابت له 50 ألف عقب ما باعها
عشان يغطي كل احتياجاته وينبسط في زواجه ويدلع حرمته

راتبه 7 الآف يروح منه 1500 لـ البنك و2000 ريال لراعي المعارض صاحب الددسن
3500 تطير كل شهر من اتبه ويبقى 3500 ريال المهم تزوج الرجال ومرت شهرين كلها عسل

بعدها بدأ الرجال وضعه يتدهور نص الراتب يبقى له وهذا النص يروح نصه
في تسديد فاتورة تلفون ثابت وجوال + فاتورة كهرب + تحويش إيجار الشقه
غير مقاضي البيت وغير مصاريفه الشخصية هو وزوجته من لبس وعطور وغيرها

الرجال حبه حبه صارت نفسيته زفت الديانه في كل مكان ولو يجيه ضيف في البيت
وذبح له وعشاهـ اختلت ميزانية بيته فوق تحت ويمكن يسير على اهله كل يوم يتعشى عندهم
والديون همها كبير قالو من قبل هم العرس وهم العرس يعني هم الدين المغتني ما يهتم من العرس
المهم أن نفسية الرجال زفت ومتدهورهـ وهذه أثرت على علاقته مع زوجته
زوجته قالت ما يكفي اني صابرهـ عليه ما يطلعنا نتمشى وأحضر زواجات ( بسبب ما عندها فستان)
فوق هذا الصبر كله تصير نفسيته كذا في البيت .. وصارت زوجته نفسيه مثله
بدأت المشاكل في البيت على سبب كبير وعلى سبب تافه وبدون سبب
الحرمه كل فترهـ وهي عند اهلها زعلانه والرجال يروح يراضيها ويرجعها
خربتها مرهـ الحرمه وطلبت الطلاق من زوجها ولا تدري أن الزوج بلغ السيل الزبى عندهـ
هذه الحرمه هي سبب ديوني وهذه الحرمه هي سبب تعاستي تزوجت ابي ارتاح ولقيت هم وشقى
هذه الحرمه كرهتني في بيتي اكثر وقتي مشاكل في مشاكل ما شفت الراحه والسعادة إلا أول سنه زواج
واللحين تبي تطلق أنا وش مصبرني عليها .. راح للشيخ وطلقها ووصلت ورقة الطلاق للحرمه
الحرمه قعدت تبكي وتقول حسبي الله عليه ما صدق اني قلتها وطلقني .. انتهت القصة

كم شخص طلق حرمته بسبب مثل هالأمور ؟؟ ومثل هالتراكمات ؟؟
كم شخص مهوب مرتاح في بيته وصار جل وقته مع اهله مشاكل بسبب الديون ؟؟
كم شخص كرهـ زوجته بسبب أنها تطلب وتطلب وتطلب ولا تراعي ظروفه الماديه ؟؟
كرهها بسبب أنها تهتم في نفسها وفي شكلها ولبسها بدون ما تفكر زوجي يقدر ولا ما يقدر !!

ليش البنت لما يجيها شخص يخطبها ما تفكر في أنها تأخذ مهر معقول
30 ألف ريال معقول مهوب لازم تستعد بـ بذخ وطنخه وأنواع الذهب والعطورات
أنا اعرف أكثر من عائلة تزوج بناتهم بمهر 30 ألف ريال والله انها تكفيهم
ليش اطلب مهر كبير واحمل زوجي ديون ممكن تكون هالديون سبب تعاسة حياتي الزوجيه
ليش الحرمه ما تفكر أن الآن العقارات غاليه الشقه وارخص شقه تأخذها بـ 18 ألف
غير غلاء المعيشة وتتقضى لبيتك اللي تحتاجه في الشهر الواحد 2000 ريال وانت مقتصد بعد
ليش الحرمه ما تشتري راحة زوجها عشان هي ترتاح في بيتها
لانه متى ما كان الزوج سعيد الحرمه بيسعد الحرمه وبيكون الزواج سعادة وراحة
ليش يكون الزواج هم ديون وهم مقاضي وهم فواتير والحصيلة زواج تعيس قد ينتهي بـ طلاق

هذا كله وأنا اضرب مثال على شخص راتبه 7000 ريال وكم من شخص تزوج وراتبه 4000
وممكن أقل وممكن اكثر بألف أو ألفين .. ويحصل قدامه أنواع المصاريف اللي تكسر ظهرهـ
وفوق هذا كله زوجته ما تقتصد في طلباتها وتطلب منه مهر يكسر ظهرهـ ويهد حيله

نصيحه لكل بنت جايها خطيب لا تطلبي منه أكثر من 40 ألف وحتى هالمهر اشوفه كثير في هالوقت
الرجال وراءهـ بيت وأثاث وقاعة افراح وشهر عسل لك ثم بعدها فواتير كهرب ماء جوال ثابت مقاضي بيت
ساعدي زوجك على تخفيف هم الدين لانه لو كان مهموم ونفسيته تعيسه انتي بتكوني تعيسه في زواجك

باختصار لا تمطي زوجك مثل الوارعين اللي تمط النبابيط
لان المغاط ممكن ينقطع وتكوني تعيسه أو مطلقه ..
وما اعتقد أن هنالك بنت تريد التعاسه في بيتها أو الطلاق ..

.

هلالي من ارض اليمن · #2 13/01/2011, 01:13 PM

حياك الله اخوي : قاسم

كنت قريبا ذات يوم مع احدهم في قصة مشابهة لما تفضلت به

الالتزامات المالية التي تكبدها ذلك الشخص من اجل العروس واتمام زواجه اصبحت وبال عليه وعلى العروس .. فما كان منهما الا ان افترقا .. المؤسف في الأمر ان الفراق لم يكن لكره يكنه احدهما نحو الآخر .. ولكن ضعف ذات اليد .. وابسط الالتزامات والواجبات الاسرية لم يعد قادر عليها خاصة اذا ما تعرض هكذا رجل لظرف ما كخروج من العمل او ظرف طارئ يستلزم منه دفع مصروفات غير متوقعه كحالة علاجية طارئة داهمت احد والديه على سبيل المثال ،،،

هنالك جيل جديد من الشباب اصبحوا يفرون من الزواج لهذا الأمر .. خاصة مع توفر البدائل الغير شرعية .. والتشجيع عليها بطرق مباشرة او غير مباشرة ،،

تكاليف الحياة اصبحت باهظة .. يقابلها مستوى اجتماعي يرغب الكثيرون بالمحافظة عليه امام اقربائهم واصدقائهم .. مع ظروف اقتصادية غير مستقرة ،،،

جل ما اخشاه من كل هذه التغيرات والظروف التي تلقى على كواهلنا .. ان نجد انفسنا في المستقبل القريب نجيز ونبرر كثير من العلاقات الغير شرعية أو التي لم تكن مقبولة ومرفوضة جملة في الوقت القريب ،،،

نسأل الله ان يعافينا واياكم والمسلمين من البلاء والمحن ،،،

يعطيك العافية ،،،

!!هلالي الرس!! · #3 13/01/2011, 01:18 PM

فعلآ..آلموآضيع تكثر عن آلغلآء آلمعيشي..

عن غلآء آلمهور..آرتفآع آلأيجآرآت ,

لكن..لكل مششكله حل..

آلآ زي مآذكرت ..آتوقع مآندور لهآ حل..

ندور آفضل آلسيئ

FINAL10 · #4 13/01/2011, 01:32 PM

هالقصه ذكرتني بأحد اقاربي وتعرفون بالشمآل المهور غاليه

المهم الرجآل على قده يعني رآتبه 7 الالف ريال

اهله بحآيل او بالاصح بقريه قريبه من حآيل ، ولكن دوآمه بالرياض
فهو كل اسبوع تلقآه بشقه ؟ بسبب الاجآرآت الغاليه

المهم الرجآل قرر يعرس واظن كآن عمره 27 سنه او 28

ومصاريف المهر 90 الف اظن ، والكسوه 6 الاف يعني 96 الف من غير
صاله الافراح والشقه والاثاث والعسل وكل شي

واخذ قصر التآج الي بحآيل < من يعرفه

وجهز شقه بالرياض على انه بيسكن بالرياض بحكم عمله !

والتكآليف كلهآ صارت حدود الـ 140 الف من غير شهر عسل !!

المهم رآح للرياض مع المرأه الي مهرهآ حدود 90 الف الي يسمعه
يقول يبي يستثمر فيهآ على هالمبلغ !

المهم جآب منهآ بنت بعد سنه وصارت مشآكل لآن المرأه ما ترآعي ظروف زوجهآ
بتآتآ تشوف فلآنه وعلآنه وتبي مثلهم واخرتهآ طلقهآ بالثلآث !

وبعد فتره تزوج مره ثانيه بمهر 50 الف !!
وزوآج عائلي والحمد لله .. والرجآل ولله الحمد تيسرت اموره !

لذلك صدق الرسول صلى الله عليه وسلم عندمآ قال : " أكثرهن بركة أيسرهن مؤونه"

عالعموم الله يكون بعون الشعب العظيم والمكآفح

والذي لآ زآل صآمدآ حيآ الى الان

واي مكرمه من الملك اجآزه 3 ايام تنسيهم الهَم

بالتوفيق الك

كان هنا · #5 13/01/2011, 01:39 PM

من وجهة نظري، المشكـلة هي نتيجة ترسبات سابقة.

فـمثلاً، إذا كانت الظروف المادية غير سويّـة لماذا يلجأ الزوج إلى إقامة حفل زفاف بمبلغ وقدره و شهر عسل وغيره؟
عن نفسي، لا أقبل أن يكون المجتمع عذر لفعل كل هذا.
العواقف وخيمة والمجتمع لم يساعد في حل المعضلة! وهذا طبيعي فمن غير المعقول أن يكون سبب المشكلة هو من يحلها.

من جانب آخر، إذا وقع الفأس في الرأس، مالذي يمنع هذا الشاب حل هذه المشكلة وفعل ما يمكن أن يجعل حياته كريمة؟ الإجابة معروفة، ( المجتـمع ).

نصيحة للجميع. ( حط هالمجتمع ورا ظهرك ولا تحسب له حساب، ولا حياتك بـ توقــف! )

أنا طبعاً لا أعفي المرأة وأهلها من المشكلة. لكن دائماً نستطيع تغيير أنفسنا أكثر من أن نغير الآخرين.

آخر طموحآتي · #6 13/01/2011, 01:49 PM

والله ماأقول الا الله ييسر على المسلمين

شكرا لك قاسم

STS2005 · #7 13/01/2011, 04:09 PM

طيب قبل ما نطلب من البنت او اهلها ان يقللون قيمة المــهر ليه ما نطلب من المسئولين انهم يشوفون حل لارتفاع الاسعار ؟

البنت او اهل البنت قبل ما يطلبون قيمة محددة للمهر فهم عملوا حساباتهم لتكاليف التجهيز خاصه وانهم سيشترون بـعض تجهيزات البيت او الشقه وهذا يخضع للاسعار الموجوده في السوق وتغير الاسعار في كل موسم فسعر مثلا الادوات المنزلية الآن ليست هي نفس الاسعار في السابق وايضا اسعار الاقمشة التي تقوم البنت بتفصيلها من اجل ان تظهر بمظهر الزوجه الجميلة في نظر زوجها اسغارها في الاسواق التي تعتبر اسواق متوسطة غالية .

لما تعطي البنت مثلا 10000 ريال كمهر .
فأنها ستوزع هذا الملبغ ما بين الجهاز الخاص بالبيت والجهاز الخاص بالملابس وايضا ابوها سيخذ جزاءاً من المبلغ لحجز مكان لاقامة الزواج (لأن المعترف عليه ان اهل البنت هم من يقومون بتكاليف حفل الزواج) .
جميع الاسعار معروفه لدينا ونحن نعرف ان الاسعار الأن غالية . فمن الطبيعي ان يزيد المهر بشكل نسبة وتناسب .
وعندها سنجد ان هذا المبلغ وهو 10000 ريال لن يكفي .

الا اذا كان الزوج يرضى ان يعيش في شقه ليس فيها الا ( زولية وحده . وبريق شاهي واحد. وفرن قاز. ومفرش من كل شي بعشره .) وزوجته ما عندها الا فستان واحد تلبسه له كل يوم فجزاه الله خير .

طالبوا المسئولين بإيقاف الاسعار الخيالية للايجار و الفواتير والمواد الغذائية والمواد الاستهلاكية وهي اهم لأنها مستمره ام المهر سيدفع لمره واحدة فقط .

وهناك خطأ عند بعض الشباب ابحث عن العوائل التي تتناسب مع وضعك المادي والاجتماعي والثقافي فهم سيتفهمون وضعك وسيطلبون منك الامور التي هي في استطاعتك .

يعطيك العافية .

عسيريه · #8 13/01/2011, 06:40 PM

.

.

هلا بقاسم

طيب سؤال .. هل تتوقع الـ 30 أو الـ 40 ألف تكفي البنت ؟
والله ماتكفي , اذا الاجارات وتكاليف القصر والديون كلها ثقيله على الرجال
ترا حتى البنت , الأربعين ألف ماتكفيها هالأيام , ودائماً دائماً الاهل يزيدون من عندهم لبنتهم
وهذا شي ملاحظته انا من اللي حولي , أقل شي يزيدون 10 ألآف ..

كل شي مرتفع وكل شي غالي , روح اسأل عن مشاغل الحريم وأسعارها
شوف التفصيل كم ياخذ , شوف تجهيزات يوم الزواج كم تاخذ ..؟
هذا غير الملابس اللي سعر القطعه الوحده يوصل لمدري كم , والشوزات اللي أحياناً توصل لـ 400 وفوق
والمكياج والعطورات , أقل عطر بـ 300

, طبعاً غير الذهب اللي صاير هالأيام نار × نار

وبعدين انا بصراحه مع المهور المرتفعه

يعني تخيل واحد تزوج بـ 30 ألف , بيشوفها سهله لا ديون ولا مشاكل
وبتحلاله الشغله كل مره بياخذ حرمه بـ 30 الف ويمشي

طبعاً اقصد بالمهور المرتفعه , (90 , 80 , 70)

هذي وجهة نظري

وأحترم وجهة نظرك بالتأكيد
شكراً لك

-----------------

للأخ اللي تحت ,

إقتباس

الرسالة الأصلية كتبت بواسطة هلالي سديراوي1


	بعد اذنك ياصاحب الموضوع مفروض البنت تدور الستر ما تدور الفشخره .. الشباب وصلت اعمارهم الى 30 سنه وما تزوجو مو قادرين على مصاريف الزواج والمهر بـ50 الف كيف لو وصلت 80 او90 الف

ومين قالك اني ادور الفشخره على قولتك

؟
لا الله يسلمك قصدي واضح , انا قلت لو كانت المهور 30 الف بعض الرجال
بيشوفون الزواج رخيص وكل فتره يتزوج ولا همه لا مصاريف ولا شي
بعكس لو كان المهر 90 او 80 او 70 .. هذا قصدي طال عمرك

وبعدين المهور تختلف من عايله لعايله فيه عوائل تزوج بـ 50 وفيه بـ 70 وبعضهم
يوصلون للميه ألف , وهذا مو طمع أو استغلال هذا شي متعارف عليه بالعائله نفسها
وفيه عوائل العكس , انا بنفسي اعرف وحده زوّجها ابوها بـ 15 ألف

هلالي سديراوي1 · #9 13/01/2011, 07:21 PM

بعد اذنك ياصاحب الموضوع

إقتباس


	وبعدين انا بصراحه مع المهور المرتفعه يعني تخيل واحد تزوج بـ 30 ألف , بيشوفها سهله لا ديون ولا مشاكل وبتحلاله الشغله كل مره بياخذ حرمه بـ 30 الف ويمشي طبعاً اقصد بالمهور المرتفعه , (90 , 80 , 70)

مفروض البنت تدور الستر ما تدور الفشخره ..
الشباب وصلت اعمارهم الى 30 سنه وما تزوجو مو قادرين على مصاريف الزواج والمهر بـ50 الف
كيف لو وصلت 80 او90 الف

داق لطمة · #10 13/01/2011, 11:26 PM

ياااااا كثر الزواجات اللي تنتهي بطلاق بسبة الديون

ولله الحمد .. معروف ان مجتمعنا السعودي مجتمع قبلي ومن هذا العرف ان الزواجات دااخل قبيلتي المهر لا يتعدا 30 الف ريال وانا اعرف نااس تزوجوا باقل من هالقيمة هاااذي
لكن اللي تبي مهر اكثر من المعقول تنتظر الين ما يجيها عريس
... هااردلك لمنتخبنا اللعريق

¥ňơơỖỖό๏ · #11 14/01/2011, 12:19 AM

يوووووووووووووووووه قهر تطلقوا كان علمتني
اجي اسلفه<<<براااا
الله يعين ولله حتى انا بشتري جنوط تاهو قيمتها 6000
مالقيت هالدراهم<<برييييين

انفاس هلاليه · #12 14/01/2011, 03:57 AM

بعض الأسر تعتقد أن غلاء مهر ابنتهم سيجعل زوجها يهتم ويتمسك بها
بل ويحبها بجنون...
لكن الواقع عكس ذلك
فغلاء المهر قد يجعل الزوج يشعر بأن سبب شقاءه وغرقه في الديون هو زوجته مما يجعله يشعر بالنفور والبغض لها....
وقد يكون الطلاق هو النهاية....

الله يهدي الجميييييييع

ربي يعطيك العاافية على الموضوع
ماننحرم ابدااعك
تحيااتي