فيه موقف حبيبت اذكره لكم يوم كنا ندرس في تورنتو الكنديه , كنا مجموعه من الشباب خمس اشخاص وساكنين
بشقه مؤلفه من غرفتين وصاله وكنا مشتاقين لاي واحد يجي لنا من ارض الوطن , المهم اتصل علينا احد الشباب
وقال انا جايكم عاد حنا طرنا من الفرحه يعني بيجي من الوطن ويسولف لنا الله مشتاقين , الاخ حدد موعد وصوله
لمطار تورنتو ورحنا نستقبله اثر الاخ جايك وكاشخ بالثوب والغتره والعقال يعني بالزي السعودي استقبلناه في الصاله , خير يابو الشباب وين التطقيمه ياخوي انت منتب مطار الرياض , قال ياخواني والله مامداني البس بغت الرحله تروح علي وطلعت على طول , قلنا له وين العفش وانتظرنا ساعه في المطار اثر العفش راح في طائرة اللوفنتهازا الى فرانكفورت , قال الحين ماني رايح اطلع من المطار الا لما تجيبون لي تطقيمه , مستحيل اطلع شوارع تورنتو وانا لابس هاللبس , قلنا يابن الحلال الوضع عادي ورفض آخر شي اتصلنا على احد الزملاء حتى جابله بدله
وكان الوضع جدا مضحك حتى الكنديين والاجانب يطالعون عليه بشي من الفضول على لبسه . تقبلوا هالموقف بود
بارك الله فيكم