عجايزنا وش الدنيا بلاكم .. برضو ضحك وفرفشة يالربع... - نادي الهلال السعودي - شبكة الزعيم

الطعنة في الظهر توجع · #1 01/01/2011, 08:56 AM

سلام يالربع

شحالكم

اليوم راح نتكلم عن العجايز

لان حنا تكلمنا عن الشيبان

يعني من مبدأ المساواة بين الرجل والمرأة
وقولوا اللحين إن حنا ما نساوي بين حواء وآدم

العجايز

العجوز: إنسانه طيبه غمضت وفتحت لقت نفسها عجوز، والعجوز ليست كلمة اعتبارية أو شرفيه مثل الشيبة، العجوز مرحلة عمرية تطلق على كل حرمة تعدت الخمسون عاماَ.

والعجايز أنواع ما لها حصر يالربع

لكن ناخذهن نوع نوع

العجوز الرحالة : وتسمى أحيانا (عجوز الواجب) وهذا النوع من العجايز الله اشغلهن بالواجب وحقوق الخلق وتدخل الدين في العادات ، ما فيه بيت ما تزوره ، ولا ميت ما تعزي أهله ، ولا مولود ما تبارك لأهله به ، ولو بزر في أخر الدنيا قرصته نمله جرت تحمد لأهله بالسلامة ، تشتكي من هم وتعب الزيارات ، كأن ربي فارض عليها بها ، وحسها كلام الناس وش يقولون ، تحس خلق الله ما معهم إلا هي ، تمشور بعيالها لكل بيت ، راعيه شطحات

، ترامسها واجد ، شي للقهوة وشي للشاهي وشي للزنجبيل ، والمتحضرة منهن معها شاهي اخضر وكركاديه ، تعرف كل شي عن كل شي ، عندها علم ما مضى وما هو يمضي وتتوقع ما هو أتي ، وهم مراتب ادناها مرتبه (فريال خانو) وأعلاها مرتبة ( ابن بطوطة)، كشخه بالعادة ، عيالها شوي .

العجوز الديكورية: هذا النوع من العجايز ربي اشغله بأثاث البيت ومواقع الغرف ، كل يوم تنقل الدرج من مكان إلى مكان ، وتخلي المقلط مجلس شهر ثم غرفه شهر ثم تحوله صالة ثم ترده مقلط في اقل من سنه ، تهتم بالنباتات ، تزرع ريحان ونعناع في قواطي نيدو كبيره ، دروجها واجد (تقدر الدرج أبو فتحه للتلفزيون ولو ما عندها تلفزيون) ، تحفها جره بيضاء وسطها ورد صناعي في نصه ساعة ما جابت خبر الوقت ، فاهمه الأواني الكويسة إنها تحف وترصها في الدروج أبو قزاز ، هواياتها تجميع اريلات التلفزيون (والمعاليق لنفس الغرض) ولف أسلاك التلفون ، معها ثياب واجد بس موديل واحد ، تخبي فلوسها في علبه حليب نان .

العجوز المتفلسفة : وهذا نوع شائع جدا وهي تعتقد إن سنين الحياة علمتها الحياة وهي والله من جنبها ، دايما ما تستفتح كلامها بـ( شوف ياولدي) وبعدها تنطلق وابن أمه اللي يوقفها ، بالها طوييييييييل ، فاضيه بالعادة ، تقوم الصباح بدري جدا ، وتدور أطرف واحد تسولف وياه ، تقدر زوجها جدا ، لكن ما تستجري تفلسف عليه ، عيالها واجد وعيال عيالها أكثر ، عيالها يسمعونها مجامله وبناتها يهربون من تفلسافها ، وهم نوعين : الاميه وهي أهون شوي ، والمتعلمة : والله يعين أهلها . حكمتها دائما (علمتني الحياة).

العجوز الجاهلية : وتسمى (التراثية) ، هذا النوع من العجايز عايش لحاله في عصر وحقبه زمنيه غابرة (شرايكم في حقبه وغابرة يالربع من زمان ودي استخدمها في جملة) ، متمسكة بالعادات والتقاليد كأنها تعاليم دينية ، للحين مو مصدقه إن الملك فهد مات ، مو مقتنعة في أبو متعب ، عارفه قصص قديمه زي (الزير سالم وأبو زيد الهلالي ) ، دلة القهوة ما تفارقها ، معها قراط أظافر في جيبها على طول ، تموت في البخور ، فطورها بر وسمن وعسل كل صبح وإذا خربتها زودت حليب بقره جارتهم ، حافظه انساب الخلق كلهم ، تحب تنسب للام أكثر من الأب (ولد نوره وولد منيرة) ، تشوف زوجها أطلق واحد في العالم ، معها ثوب واحد تلبسه في كل المناسبات ، أمها للحين عايشه ، وعيالها يلبسون الغتره والعقال بدون طاقية ، حدودها الجغرافية ديرتهم.

العجوز الحنانة : وتسمى (ذات الحداد) وهذا النوع معه ولد ميت وإلا أرمله ، ما معها ذكر إلا هالولد أو الزوج لو له عشرين سنه ميت ، تحسسك انه ولد الرسول ، تعصب راسها على طول ، تميل لاغاني عبد الكريم عبد القادر خصوصا غنية (وداعية يا آخر ليله تجمعنا) ، الدمعة على الرمش دايما ، معها بسطه لبزران عيالها وبناتها ما تربح منها ريال ، تفكر الرياض دوله ثانية ، وتفكر البحرين تبع السعودية

، تقدر القناة الأولى الأرضية ، تتابع المسلسلات المصرية ، عيالها يتجنبون الجلسة وياها ، تجيب الهم ، لكن طيبه و مسكينة ، شعارها في الحياة (الله يرحمك يا بو فلان) ،راعية سهر بالليل ونوم الصباح ، حلمها تحرر فلسطين.

العجوز الشاطحة : وهذي تحفه ورهيبة

، عليها شطحات مدري وش تحس فيه ، فيها حركات ، ضحوكة ومزوحه وتعرف تذب ، ما تنسى ابد ، تقرأ العيون ، تدعي معرفة النجوم وهي ما تفرق سهيل عن الثريا ، سافرت مره للشرقية تعالج قبل سبع سنين وللحين تسولف عنها

، ما عمرها بكت قدام احد ، تقدر طاش ما طاش ، قصيرة ودحفوشه (دبدوبه)

، ودك تضمها على طول ، ترقد في مكان وعلى أي حال ، غير متطلبه ، نسلها نسل ادم مالهم عد ، دايما زوجها يفشلها قدام عيالها ودايما ترد عليه وتفشله ، متفائلة جدا ، ما تحب أهلها وتموت في عيالها ، وعيالها يموتون فيها ، شعارها في الحياة (مالها شعار )

، جربت التايور(بلوزه وتنوره يا شباب

) مره وضحكت على نفسها وتابت ، قدوتها في حياتها (خبلان).

هذي ستة أنواع وفيه واجد زي (العجوز الفاضيه ، وراعية الحش ، وراعية الدين ، والعجوز الأولى (تذكرت ديما الأولى –أنا ديما وديما الأولى >>احم احم ، وفيه أم البنات ، وراعية المباريات )

لكن ما حبيت أثقل عليكم فذا أعجبكم الموضوع نزلتها جزء ثاني

>>لا تكفى ارحمنا سماجة

الخلاصة :

اللهم اكسبنا رضاهن يا رب

ملاحظه: ياكثر من بيقول عيب تتكلم عليهن كذا ، الموضوع ضحك يالربع وبس .

أهزوجة هلالية · #2 01/01/2011, 10:38 AM

العجوز الرحالة : وتسمى أحيانا (عجوز الواجب) وهذا النوع من العجايز الله اشغلهن بالواجب وحقوق الخلق وتدخل الدين في العادات ، ما فيه بيت ما تزوره ، ولا ميت ما تعزي أهله ، ولا مولود ما تبارك لأهله به ، ولو بزر في أخر الدنيا قرصته نمله جرت تحمد لأهله بالسلامة ، تشتكي من هم وتعب الزيارات ، كأن ربي فارض عليها بها ، وحسها كلام الناس وش يقولون ، تحس خلق الله ما معهم إلا هي ، تمشور بعيالها لكل بيت ، راعيه شطحات ، ترامسها واجد ، شي للقهوة وشي للشاهي وشي للزنجبيل ، والمتحضرة منهن معها شاهي اخضر وكركاديه ، تعرف كل شي عن كل شي ، عندها علم ما مضى وما هو يمضي وتتوقع ما هو أتي ، وهم مراتب ادناها مرتبه (فريال خانو) وأعلاها مرتبة ( ابن بطوطة)، كشخه بالعادة ، عيالها شوي .

سبحان الله هذي الصفات لجدتي الله يحفظهااااااا
وتسلم عالموضوع التوووووووووحفه
وننتظر الجزء الثاني
وتقبل مروري

برشلوني هلالي ايطالي · #3 01/01/2011, 10:41 AM

مشكور اخوي وما قصرت

إقتباس


	العجوز الديكورية : فاهمه الأواني الكويسة إنها تحف وترصها في الدروج أبو قزاز

اللهم وفقنا جميعا لنرضي امهتنا

مَاهِينُورْ · #4 01/01/2011, 10:44 AM

*

وعليكم السلام ورحمة الله وبركاته

أهلاً وسهلاً بالنشيط " ما شاء الله ^_^ "

إقتباس

إنسانه طيبه غمضت وفتحت لقت نفسها عجوز

إي والله يا سـرع الدنيـا
ما يمدي الوحدة تتزوّج إلا وهي مزوّجه عيالها

/
العجوز الرحالة :
كأنهن بدن ينقرض هالنوع من العجايز , بعض العجايز من هالنوع إذا سيّرت على أحد تجلس بأي مكان بالبيت تاكل وتشرب مع أهل البيت حتى مع عييالهم لو ماهم محارم

,
وتستانس لا صار بالبيت كم طفل لأن معها شرط

حلآو غندور أبو علك

لكن عيبها الوحيد إنه تسأل عن كل شيّ وتزعل لو وصلتها اخبارهم من ناس أغراب

, مثل لوّ خطبوا لولدهم أو جاء بنتهم عريس تبي هي أوّل من يعرف

/

العجوز الديكورية:

إقتباس

كل يوم تنقل الدرج من مكان إلى مكان ، وتخلي المقلط مجلس شهر ثم غرفه شهر ثم تحوله صالة ثم ترده مقلط في اقل من سنه

ذكّرتني بوحده

الله يستر عليها ويخلّي لها عيالها

/

العجوز المتفلسفة :

إقتباس

عيالها يسمعونها مجامله وبناتها يهربون من تفلسافها

لا ليش ؟

أحد يعيف هالنعمة ! يازينهم ويازين فلسفتهم

هم لو يسألونهن ويفتحون سوالف معها ماتفلسفت

~> مصدّقه الموضوع

/
العجوز الجاهلية :

إقتباس

للحين مو مصدقه إن الملك فهد مات ، مو مقتنعة في أبو متعب

العجوز الحنانة :

إقتباس

وهذا النوع معه ولد ميت وإلا أرمله ، ما معها ذكر إلا هالولد أو الزوج لو له عشرين سنه ميت

الله يرحم ميتهم كثيييير هالنوع "(
لكن ماتسمع أغاني , هذي دائماً معها رادو تسمع إذاعة القرآن وبرنامج البادية على إذاعة الكويت

وان غنّت ردّدت أغاني حجاب

العجوز الشاطحة :
ليت كل العجايز مثلها تشرح الصدر

ــ

الله يحفظ عجايزنا ويمد بأعمارهن ويختم لهن بالجنة ويرحم الموتى منهم

الجلسة مع كبـيرات السن لها نكهة خاصّة و لا تملّ , أسلوب بسيط وسواليف لا تملّ حتى لو كرّروها مئات المرّات

أكثرهن يحبّن المزح ولا تزعل وتشيل بخاطرها , لكن مزح بأدب ولا يقلّل من إحترامك لها

تكفيك من الجلسة معها الدعوااااات الصادقة من قلب صادق ومحبّ

*
|| الطعنة في الظهر توجع||

الله يعطيك العافية موضوع جميل وبانتظار الجزء الثاني

الطعنة في الظهر توجع · #5 01/01/2011, 10:45 AM

إقتباس

الرسالة الأصلية كتبت بواسطة أهزوجة هلالية


	العجوز الرحالة : وتسمى أحيانا (عجوز الواجب) وهذا النوع من العجايز الله اشغلهن بالواجب وحقوق الخلق وتدخل الدين في العادات ، ما فيه بيت ما تزوره ، ولا ميت ما تعزي أهله ، ولا مولود ما تبارك لأهله به ، ولو بزر في أخر الدنيا قرصته نمله جرت تحمد لأهله بالسلامة ، تشتكي من هم وتعب الزيارات ، كأن ربي فارض عليها بها ، وحسها كلام الناس وش يقولون ، تحس خلق الله ما معهم إلا هي ، تمشور بعيالها لكل بيت ، راعيه شطحات ، ترامسها واجد ، شي للقهوة وشي للشاهي وشي للزنجبيل ، والمتحضرة منهن معها شاهي اخضر وكركاديه ، تعرف كل شي عن كل شي ، عندها علم ما مضى وما هو يمضي وتتوقع ما هو أتي ، وهم مراتب ادناها مرتبه (فريال خانو) وأعلاها مرتبة ( ابن بطوطة)، كشخه بالعادة ، عيالها شوي . سبحان الله هذي الصفات لجدتي الله يحفظهااااااا وتسلم عالموضوع التوووووووووحفه وننتظر الجزء الثاني وتقبل مروري

الله يحفظها انشالله

الله يسلمك

منور

الطعنة في الظهر توجع · #6 01/01/2011, 10:46 AM

إقتباس

الرسالة الأصلية كتبت بواسطة برشلوني هلالي ايطالي


	مشكور اخوي وما قصرت اللهم وفقنا جميعا لنرضي امهتنا

العفو اخوي

والله يكسبنا رضاهم امين

منور

الطعنة في الظهر توجع · #7 01/01/2011, 10:48 AM

إقتباس

الرسالة الأصلية كتبت بواسطة مَاهِينُورْ


	* وعليكم السلام ورحمة الله وبركاته أهلاً وسهلاً بالنشيط " ما شاء الله ^_^ "إي والله يا سـرع الدنيـا ما يمدي الوحدة تتزوّج إلا وهي مزوّجه عيالها / العجوز الرحالة : كأنهن بدن ينقرض هالنوع من العجايز , هذي إذا سيّرت تجلس بأي مكان بالبيت تاكل وتشرب مع أهل البيت حتى مع عييالهم لو ماهم محارم , وتستانس لا صار بالبيت كم طفل لأن معها شرط حلآو غندور أبو علك لكن عيبها الوحيد إنه تسأل عن كل شيّ وتزعل لو وصلتها اخبارهم من ناس أغراب , مثل لوّ خطبوا لودهم أو جاء بنتهم عريس تبي هي أوّل من يعرف / العجوز الديكورية: ذكّرتني بوحده الله يستر عليها ويخلّي لها عيالها / العجوز المتفلسفة : لا ليش ؟ أحد يعيف هالنعمة ! يازينهم ويازين فلسفتهم هم لو يسألونهن ويفتحون سوالف معها ماتفلسفت ~> مصدّقه الموضوع / العجوز الجاهلية : العجوز الحنانة : الله يرحم ميتهم كثيييير هالنوع "( لكن ماتسمع أغاني , هذي دائماً معها رادو تسمع إذاعة القرآن وإذاعة الكويت وان غنّت ردّدت أغاني حجاب العجوز الشاطحة : ليت كل العجايز مثلها تشرح الصدر ــ الله يحفظ عجايزنا ويمد بأعمارهن ويختم لهن بالجنة ويرحم الموتى منهم الجلسة مع كبـيرات السن لها نكهة خاصّة و لا تملّ , أسلوب بسيط وسواليف لا تملّ حتى لو كرّروها مئات المرّات أكثرهن يحبّن المزح ولا تزعل وتشيل بخاطرها , لكن مزح بأدب ولا يقلّل من إحترامك لها تكفيك من الجلسة معها الدعوااااات الصادقة من قلب صادق ومحبّ * \|\| الطعنة في الظهر توجع\|\| الله يعطيك العافية موضوع جميل وبانتظار الجزء الثاني

الله يبقيك ويخليك لعيون عجوز ترجيك

وربي ان عجايزنا عسل مصفى

ياحبني لهم

شاكر ردك

ومنور

وافي المالكي · #8 01/01/2011, 10:51 AM

العجوز المتفلسفة : وهذا نوع شائع جدا وهي تعتقد إن سنين الحياة علمتها الحياة وهي والله من جنبها ، دايما ما تستفتح كلامها بـ( شوف ياولدي) وبعدها تنطلق وابن أمه اللي يوقفها ، بالها طوييييييييل ، فاضيه بالعادة ، تقوم الصباح بدري جدا ، وتدور أطرف واحد تسولف وياه ، تقدر زوجها جدا ، لكن ما تستجري تفلسف عليه ، عيالها واجد وعيال عيالها أكثر ، عيالها يسمعونها مجامله وبناتها يهربون من تفلسافها ، وهم نوعين : الاميه وهي أهون شوي ، والمتعلمة : والله يعين أهلها . حكمتها دائما (علمتني الحياة).

زي جدتي الله يحفظهااااااااااااااااا

الطعنة في الظهر توجع · #9 01/01/2011, 11:28 AM

إقتباس

الرسالة الأصلية كتبت بواسطة وافي المالكي


	العجوز المتفلسفة : وهذا نوع شائع جدا وهي تعتقد إن سنين الحياة علمتها الحياة وهي والله من جنبها ، دايما ما تستفتح كلامها بـ( شوف ياولدي) وبعدها تنطلق وابن أمه اللي يوقفها ، بالها طوييييييييل ، فاضيه بالعادة ، تقوم الصباح بدري جدا ، وتدور أطرف واحد تسولف وياه ، تقدر زوجها جدا ، لكن ما تستجري تفلسف عليه ، عيالها واجد وعيال عيالها أكثر ، عيالها يسمعونها مجامله وبناتها يهربون من تفلسافها ، وهم نوعين : الاميه وهي أهون شوي ، والمتعلمة : والله يعين أهلها . حكمتها دائما (علمتني الحياة). زي جدتي الله يحفظهااااااااااااااااا

الله يخليها لك ويخليك لها اخوي وافي

منور ياشنب

تركي السلماني · #10 01/01/2011, 04:59 PM

الله يرحم جدتي و يسكنها الفردوس الأعلى من الجنة و يخلي جدتي من أبوي !

وهم مراتب ادناها مرتبه (فريال خانو) وأعلاها مرتبة ( ابن بطوطة)، كشخه بالعادة ، عيالها شوي .

ههههههههههههههههههه .. و لا تنسى مرتبة أم زكي لإن هالنوعية واااااجد !

تحب تنسب للام أكثر من الأب (ولد نوره وولد منيرة) ،

ههههههههه .. يا كثرهن و الله

بارك الله فيك يا خيي

الطعنة في الظهر توجع · #11 01/01/2011, 06:19 PM

إقتباس

الرسالة الأصلية كتبت بواسطة تركي السلماني


	الله يرحم جدتي و يسكنها الفردوس الأعلى من الجنة و يخلي جدتي من أبوي ! وهم مراتب ادناها مرتبه (فريال خانو) وأعلاها مرتبة ( ابن بطوطة)، كشخه بالعادة ، عيالها شوي . ههههههههههههههههههه .. و لا تنسى مرتبة أم زكي لإن هالنوعية واااااجد ! تحب تنسب للام أكثر من الأب (ولد نوره وولد منيرة) ، ههههههههه .. يا كثرهن و الله بارك الله فيك يا خيي

الله يرحمها برحمته ويجمعك وياها في داره وجنته

منور اخوي

الهنوووف · #12 01/01/2011, 07:03 PM

هلا بك اخوي

ماشاء الله استمعت لرغبه جمهورك

ونزلت على العجايز

الله يخليهم لنا ويخلينا لهم

فيه بعض الحريم ماذكرتهم الي تحب تتدخل بكل شي وتنقد عليه ومايهمها احد

وغالبا احفادها الضحيه

وفيه النوعيه الحريصه وتشيل هم لو يسافر ولدها او يتاخر
وحريصه بعد على نظافه البيت وياويلك لو رميت شي بالارض

ودائما في مصارعه مع احفادها

\

/
اسلوبك ماشاء الله فكاهي وبـ انتظار مواضيع قادمه

بما انك تطرقت للشياب والعجايز شرايك الحين بـ البنات والشباب

والاطفال

لك

الهنوووف
كانت
هنا
ورحلت

الطعنة في الظهر توجع · #13 01/01/2011, 07:19 PM

إقتباس

الرسالة الأصلية كتبت بواسطة الهنوووف


	هلا بك اخوي ماشاء الله استمعت لرغبه جمهورك ونزلت على العجايز الله يخليهم لنا ويخلينا لهم فيه بعض الحريم ماذكرتهم الي تحب تتدخل بكل شي وتنقد عليه ومايهمها احد وغالبا احفادها الضحيه وفيه النوعيه الحريصه وتشيل هم لو يسافر ولدها او يتاخر وحريصه بعد على نظافه البيت وياويلك لو رميت شي بالارض ودائما في مصارعه مع احفادها \ / اسلوبك ماشاء الله فكاهي وبـ انتظار مواضيع قادمه بما انك تطرقت للشياب والعجايز شرايك الحين بـ البنات والشباب والاطفال لك الهنوووف كانت هنا ورحلت

اخوص معي جمهور

بالنسبة للشباب والبنات والاطفال

امممممممممممم

لا عطيتكم وجه صراحه

ابي ارجع اكتب قصايد

تروني شاعر مو مهرج

منوره يالهنوف كانت هنا ورحلت

الطعنة في الظهر توجع · #14 02/01/2011, 08:23 AM

الحين سؤال بس

من اللي كانت تسير على كل بيت في باب الحاره وش اسمها ؟؟؟

الملقوفه؟؟؟

αlειη αlżαяqα · #15 02/01/2011, 11:36 AM

انت وشفيك على العجايز هاليومين ...

/
/

إقتباس


	العجوز الرحالة : وتسمى أحيانا (عجوز الواجب) وهذا النوع من العجايز الله اشغلهن بالواجب وحقوق الخلق وتدخل الدين في العادات ، ما فيه بيت ما تزوره ، ولا ميت ما تعزي أهله ، ولا مولود ما تبارك لأهله به ، ولو بزر في أخر الدنيا قرصته نمله جرت تحمد لأهله بالسلامة ، تشتكي من هم وتعب الزيارات ، كأن ربي فارض عليها بها ، وحسها كلام الناس وش يقولون ، تحس خلق الله ما معهم إلا هي ، تمشور بعيالها لكل بيت ، راعيه شطحات ، ترامسها واجد ، شي للقهوة وشي للشاهي وشي للزنجبيل ، والمتحضرة منهن معها شاهي اخضر وكركاديه ، تعرف كل شي عن كل شي ، عندها علم ما مضى وما هو يمضي وتتوقع ما هو أتي ، وهم مراتب ادناها مرتبه (فريال خانو) وأعلاها مرتبة ( ابن بطوطة)، كشخه بالعادة ، عيالها شوي

في الحقيقة هذا النوع من العجايز يعجبونني يالبى قلوووووبهم

اعرف الكثير من نفس النوعية هذه و فيه أنواع من العجايز ذكرتهم أنت و انواع اخرى لا حصر لها كما تفضلت أخي ..

موضوع جميل جداً ..

تشكراتي لك