المنتديات الموقع العربي الموقع الانجليزي الهلال تيوب بلوتوث صوتيات الهلال اهداف الهلال صور الهلال
العودة   نادي الهلال السعودي - شبكة الزعيم - الموقع الرسمي > المنتديات العامة > منتدى المجلس العام > صيـد الإنترنــت
   

صيـد الإنترنــت منتدى للمواضيع والمقالات المميزة والمفيدة المنقولة من المواقع الأخرى .

إضافة رد
   
 
LinkBack أدوات الموضوع طريقة عرض الموضوع
  #1  
قديم 29/12/2010, 12:41 PM
الصورة الرمزية الخاصة بـ Ahmed.S.Aljuhr
زعيــم نشيــط
تاريخ التسجيل: 03/03/2010
المكان: Jeddah, Saudi Arabia‏
مشاركات: 689
من آروع قصائد الأمير الشاعر عبدالرحمن بن مساعد [ قصآئد مكتوبة + تحميل + مشاهدة ] .

من آروع قــصآئـــد لـ ـ{ سمو الآمير الشاعر عبد الرحمن بن مساعد }


آلسّلآمـَ عِليْڪمـْ



يآصبآآح الخير : ومسآآء الإحسآآس والطيبه
يآحلوكم ويآزين طلتكم .....


كيفكم .. وكيف الشعر وقصاايد الادب
بماإاني من معجبيييييييين السمو الامير الشااعر عبدالرحمن بن مسااعد
حبيت يكون طرحي من مجهودي تجميعي الخااص
وان شااء تنآال اعجاابكم ومستماعاتكم..~



|| كلامـــآت القــصــآئـــد ||
+
|| تـحمـيل القـصـيـدة ||
+
|| مشاهدة القصيدة عبر YouTube ||



أجهلك

أجهلك ،، ولي سنين أتخيلك
أتمثــلك في كل طيف
والقاك في قسمات ضيف
كل المشاعر تقول له :
حنا هلك

أجهلك ولي سنين اتخيلك
القاك ،، في بعض الوجيه
ويمرني طيفك ،، وأجيه
يا باكر اللي أجهله ،، أرهقتني الأسئله
وأبطى العمر ،، يستعجلك
بالعيوب و بالمزايا ،، بالألم
لامن هجرتي
يجتاحبي ضلوعي وحنايا
أتخيل شكوكك وضنك
اتخيل التقصير منك
حتى الجفى ،، أتخيله
وكيف انا ما اتحمله ،، وأتحملك
وجهلك اللي قد حبسته داخلي ،، في غمضة عيوني
واللي ياما قد رسمته ،، من عبث طيشي وجنوني



وجهلك اللي دوم يظهر ،، !!
لما ألقى نشوة الفكره الجديده داهمتني
لما القى إنكساراتي قصيدة ،، واكبتني
وجهلك اللي دووم يظهر في أعاصيري وسكوني
في الجبال الشاهقه ،، في أجمل خيالي
في السفوح الخافقه بين نبضي وإنفعالي
وجهلك اللي قد نحتّّه في عظامي والجوارح
وجهلك اللي قد حفظته وبتفاصيل الملامح
بالنهار في بسمته
بالضيا اللي في وردوده ،، بالعبوس في غضبته
بالتضاريس وحدوده
من جنونه في البها ،، لين أقصى نقطه في كاسر جماله
للعذوبه ،، من شروق النور في ضيّه
للشعر في غروبه
من شطوط الكحل في عيونك ،،، لنحرك
من بياض الثلج في خدك
لجمرٍ قاد ،، في ثغرك
وجهلك اللي ما أبد يوم لمحته ،، أو عرفته
لي سنين أتخيله ،، وأتخيلك
ياللي كلي بك معرفه ،، وأجهلك
ما أصعبك ،، كيف الاقيك
ما اسهلك لو ألاقيك
ياللي دوم أتخيلك
مملكه حسن الزمن ،، وأنا الملك
____________________
لـ تحميل القصيدة :: أضعط هنا ::

لـ مشاهدة القصيدة عبر YouTube :: أضعط هنا ::

____________________



أخطيت

أنا ما أدري وش أحساسك

وما أدري وش تظنيني

أنا الصادق في عينك كنت

وصرت الكاذب الخوان

أنا أخطيت ما أنكر

ولا في عذر يكفيني

سوى أني احبك حيل

وأني دائما أنسان

انا أدري بمدى جرحك

و أدري الحظ جافيني

يطول الوقت ما أخطي

واذا أخطيت كل شيٍ بان

أنا شفت الزهر مايل

وظنيته يناديني

قطفته ... يوم ضميته لقيته للأسف ذبلان

عرفت أنك زهر عمري

عرفت انك بساتيني

وغيرك قيظ ما يروي

سراب يسقي العطشان

أنا لو ما حصل ما كان

وش اللي يدريني

بأنك ما سواك انتي

سكنتي القلب والوجدان؟

أنا آسف على أعذاري

عجزت القى عذر فيني

يليق بغلطتي في حقك

و يرجع كل شئ كان

أحبك كثر أخطائي

و أدري أنك تحبيني

و أدري لو تفارقنا

فلا نقدر على النسيان

اذا تقوي على فراقي وبعدي عنك

خليني

انا ملّيت من دور الكرامه و لعبة الغفران

قليل العمر ياللي انتي دموعك ماتساويني

حرام انه يضيع فراق

!!هي من قلها الأحزان
____________________

لـ تحميل القصيدة :: اضغط هنا ::

لـ مشاهدة القصيدة عبر YouTube :: اضغط هنا ::

____________________


الـبحـر

على مدي الأيام
كان البحر بالنسبة لي
هو البحر
رمل ،، ، أمواج ،، صخر
كان البحر بالنسبة لي،، بس البحر
وعلى مدى الأيام ماقد لمس فيني المشاعر
الا ذاك اليوم
يوم انك معي
يومها كان الوداع
وكان البحر،، دفتر
والموج بيت من شعر
وبيتٍ ورى بيت ،، موجه ورى موجه



تكتب قصيدة حبنا
وتمحي الجراح ،، بجراح
ومثل الفرح في دنيتي ،، كان الفجر
عمره قصير
وبكل حب اهدا نسيمه ،، وراح
وتشرق الشمس
لاجل الخلايق كلها تقرا ،، قصيدة حبنا

يومها ،، ماكان للشمس أي نور
وبعض السبب ،، كان الوداع
وباقي السبب ،، انتي
خذيتي من سماها النور
ولاجل الصدق يومها،، كنتي انتي الشمس
وكان البحر عينك
ودموعك امواج الشعر
وخدك الدفتر
آه يا اللقى ،، ماخذت من طبع البحر،،؟
ما للبحر آخر،،!!
آه يالفراق
ماخذت من ذوق الفجر ،،؟
يمرنا عابر
وآه يالعيون ،، اللى انا منها عرفت
ان البحر دفتر،،، وان القصيد امواج
وان الغرام ،، شاعر

____________________

لـ تحميل القصيدة :: اضغط هنا ::
____________________

البرواز

قلتيلي انسى
ومن يومها وانا كل ليلة .. قدامي البرواز
حبر العيون ودمع القلم .. في دفتري
وصورتك .. رغم الألم .. ورغم انها خذت من اطباعك كثير
وخانت البرواز .. اشوفها في خاطري
حبيبتي مابيدي حيلة
لاصرتي الصورة .. وعيوني البرواز
وشلون ابنسى
***********
اتعبتي الصورة مشاوير
وتعبت انا بلقى لغدرك معاذير
وصورتك اللي سجنت بروازها طول السنين ..
كانت جسد وبروازها الروح
ويوم انزعت منها الجسد .. تجرّحت اطرافها
وبجروحها راحت لمين ؟
لبروازها الثاني !!
مسكين .. بيسجنك ويبقى سجين
مسكين
تشبهلك اقداره .. خانته
وصورتك يجي يوم وتخونه
حبيبتي ..أو للأسف حبيبته
لاصرتي الصورة .. وجفونه البرواز
وشلون ينسى ؟!
***********
حبيبتي لجل انسى جرحك واستريح .. ببكي
وبعد البكى .. ببكي
وأكيد فيه لحظة بتجي .. وبيجف دمعي
وعندها صورتك اللي في عيوني
بتموت من ظلم العطش ..
بروازها بيصبح نعش
وبتمرني الدمعة الأخيرة ... تاخذ معاها صورتك وتطيح
وكني بالمسافة تطول مابين عيني .. ودمعتي .. وخدي
وكني بقلبي الحاير المسكين
نبضه يقول لا تودع الفرقى .. الدمع مايرقى
وعندها لانزلت الدمعة لمثواها الأخير
وفارقت وجهي
بغمض عيوني .. واكسر البرواز
وانسى

____________________

لـ تحميل القصيدة :: اضغط هنا ::

لـ مشاهدة القصيدة عبر YouTube :: اضغط هنا ::

____________________


الحرامي

احترامي.. للحرامي
صاحب المجد العصامي
صبر مع حنكة وحيطة
وابتدا بسرقة بسيطة
وبعدها سرقة بسيطة
وبعدها تَعدى محيطه
وصار في الصف الأمامي
احترامي.. للحرامي
احترامي.. للحرامي
صاحب المجد العصامي
صاحب النفس العفيفة
صاحب اليد النظيفة
جاب هالثروة المخيفة
من معاشه في الوظيفة
وصار في الصف الأمامي
احترامي.. للحرامي
احترامي.. للحرامي
صاحب المجد العصامي
يولي تطبيق النظام
أولوية واهتمام
ما يقرب للحرام
إلا في جنح الظلام
صار في الصف الأمامي
احترامي.. للحرامي
احترامي.. للحرامي
صاحب المجد العصامي
يسرق بهمة دؤوبة
يكدح ويملي جيوبه
يعرق ويرجي المثوبة
ما يخاف من العقوبة
صار في الصف الأمامي
احترامي.. للحرامي
احترامي.. للحرامي
صاحب المجد العصامي
صار يحكي في الفضا
عن نزاهة ما مضى
وكيف آمن بالقضا
وغير حقه ما ارتضى
صار في الصف الأمامي
احترامي.. للحرامي
احترامي للنكوص
عن قوانين ونصوص
احترامي للفساد
وأكل أموال العباد
والجشع والازدياد
والتحول في البلاد
من عمومي للخصوص
احترامي
للصوص

____________________

لـ تحميل القصيدة :: اضغط هنا ::

لـ مشاهدة القصيدة عبر YouTube :: اضغط هنا ::

____________________


عجب عجاب

عجب عجاب .. طيبة قلبها أبيض سحاب
أخلاقها مامثلها .. أخلاقها
أخلاقها تنتظر عشاقها
ومايجون
ياهي جريحه طيبه .. لكن جريحه
عجب عجاب
وسيم أنيق شاب .. كسبه حلال مشروع ماجرب الجوع
ناجح مركزه مرموق
ورغم هذا الحزن ساكن عيونه
ماتت امه .. وحبيبته كانت
تــخـــونـــه
عجب عجاب كثر الفقر ماله
كلاً يبي قربه ورضاه
رغباته قوانين وزلاته صواب
الناس حوله من شمال ومن يمين
يأمر يــطــاع
الدول تحسب حسابه
والكل يخشاه ويهابه
لاكن مريض ياعذابه
ممنوع يأكل لو أكل جايز يموت
عجب عجاب
مرتاح الضمير لاسرق لاظلم لاحسد
عنده قليل أصحاب
قلبه كبير بيته صغير
والمرض عن صحته بعيد
عنده ثلاث اطفال
أحمد وايمان ويزيد وامهم
وكثر السماء يحبهم
لاكن فقير مالقاء لصوته مسامع
مايملك الا طيبته وملح المدامع
ولو مادفع مبلغ حقير
ينطرد هو والعيال وامهم في الشوارع
عجب عجاب
عبقري في الطب ملحد
عجب عجاب
شاعر عظيم داخله فارغ
عجب عجاب أمير كذاب
عجب عجاب ملايين البشر
تعبد بقر
عجب عجاب
ماتصلي فرضها وتلبس حجاب
ياصاحبي عطني يقينك والظنون
؟..من ودك تكون

____________________

لـ تحميل القصيدة :: اضغط هنا ::

____________________

[/SIZE]

بهو فندق

..بهو فندق
..بلد غربي
..في فصل الصيف
..على ميعاد أو صدفة
..جمع أجناس مختلفة
..ولافيهم أحد وافق
..أحد ثاني
..على تعريف للمنطق
..بهو فندق.. فيه الناس مكتظة
..فخامة تكسي الجنبات
..نادل يحمل الطلبات
..على أواني من فضة
..هنا تجار يحكوا أسهم وسندات
..هنا سمسار
..هنا شاعر.. هنا بنيّات
..هنا فلكي
هنا صاحب سمو حركي
..هنا لاعب كرة بارع
..هنا فنان.. هنا متعهد السهرات
..هنا يحكوا عن الأوضة!.. هنا يحكوا عن الموضة
..!!هنا يحكوا عن السادات
..وبركنٍ ماهو للصفوة
..بجنب الباب
..كرسيين.. حوار يدور بين اثنين
..حيل أصحاب
..ملامحهم تودّي يمّ.. شرق أوسط
..وهيئتهم.. وحالتهم.. بسيطة أو بعد أبسط
شف سايح من اليابان.. يداعب آلة التصوير -
..يغازل آلة التصوير
سايح هذا يا غلبان ؟ -
..هذا السايح البارح
..كانت صورته تحكي
..في صدر الصفحة الأولى
..يقولوا خامس أغنى شخص في العالم
..وأظن أنّه .. وربي وحده العالم
..جمع هالمال والثروة
..من استيراد أو تصدير
..نسى الكاميرا على الكرسي
لا يا شيخ.. مثل هاذول.. ما ينسوا -
صدقني نسى الكاميرا على الكرسي -
..لا والله.. رجع خذها
ظنك وين هو رايح؟ -
..أكيد يزور له متحف
..سخيف
..!هوايته أسخف
..شفه.. مستني يمّ الباب
وش ينظر -
!أظنه ينتظر تكسي
..!ركب تكسي
..أقول عدنان: فاخر حيل هالفنجان
..خذ شايك قبل يبرد
أقول أحمد: هذاك هناك.. هو من هو..؟ -
..أي واحد -
..! هذاك اللي معه واجد -
..تخطرف إنت.. أو عميان
..هذاك فلان
..هذاك اللي كلامه منتهى الحكمة
..وجوده مثل غيث السحب
..هذاك اللي لأجله ترخص أيامك
..وتقضي النحب
هذاك اللي يهينك وانت تتلقى
..إهاناته بصدرٍ رحب
..هذاك اللي شعورك نحوه مبيّن
..مزيج من الولا والحب
..هذاك اللي إذا لا قدّر الله راح
..يغطي حزنك الدنيا
!!......وتهمس.. راح ابن الكلب
كذا يا أحمد..؟
شايفني أنا.. منافق
..أنا مسمح ولا أوافق
..تظن إني بقلب أسود
..كذا يا أحمد-
..لا تزعل.. أنا آسف.. أنا آسف
..ترى الدعوة سوالف
..شف هذا خفيّف دم
..يضحك هذا .. من هذا
..خفيّف دم
..! ويعطونه
يعطونه..؟ -
..يعطونه -
..ويرجع باكر لهذا.. يقطع ذاك
..يشرشح أصله وفصله.. بخفة دم
ويعطونه..؟.. -
..! يعطونه -
..ويرجع بالأخير.. ضاحك على هذا وعلى هذا
أقول أحمد: ظنك هو رصيده كم..؟! -
..دقيقة صمت.. فرضها جيّة النادل
..يشيل الشاي
..!ويقول إنّ العصير.. اللي يبونه لحظتين.. وجاي
..شف الشاعر -
..هذيك الحلوة تضحك له
أي واحد..؟ -
..شفه واقف.. يوقع دفتر لطفلة -
..تخيّل ياخي يقولوا
..بإنه يشتري شعره من الشاعر
..! اللي الشاعر المشهور يكتب له
..ياحظه.. وسيم مشهور
..ياليتي أكون مثله -
..قوم نتصور معه
قوم نتصور معه..؟! -
..ما باقي سوى هاذي
..نكبر راس هالمغرور
..خفيف أنت.. وغبي أحمد
..ودايم فيك هالعلة
..أقول عدنان -
..ترى صاير طويل لسان
..أحمد ياخي لا تزعل.. ترانا اخوان
تعوّذ بس من الشيطان..؟
..وأنا آسف.. وترى الدعوة سوالف
..فخمة حيل هالكيسان
..اشرب.. لا تزودها
..ترى يبيّن عليك تعبان
..شف مو هاذي صاحبتك
..هلا والله.. إلاّ والله صاحبتي
..تدري..؟ تموت هي فيني
..يا رجال.. خليني -
..خادعتك.. تراها والله خادعتك
..أقول أحمد: عشان انسرقت فلوسك-
..من زبيدة
..صرت تشوف كل وحدة
..هي زبيدة
..يا عدنان.. خادعتك -
..أنا قصدي لمصلحتك
..شفها تكلم الرجّال
..أي رجّال.. أخوها ذاك
..يا عدنان.. خادعتك
..أقولك ما تبي غيري
..يا عدنان.. طع شوري -
..مشاعرها.. وهم.. كذبة
..حمد .. احترم نفسك -
..افا عدنان.. تمد يدك علي -
..وهذي السبّة
..صفعه دوّت بركنٍ
..قريبٍ من هل الصفوة
..عراكٍ في بهو فندق
..جمع أجناس مختلفة
..مافيهم أحد وافق. أحد ثاني
..على تعريف للمنطق
خارج صالة الفندق.. شرطيين
..يقودوا بالحديد اثنين
ملامحهم تودّي. يمّ شرق أوسط
..وهيئتهم.. بسيطة أوبعد أبسط
..كانوا أصحاب
..في داخل
..بهو فندق .. بلد غربي
..في فصل الصيف

____________________

لـ تحميل القصيدة :: اضغط هنا ::

لـ مشاهدة القصيدة عبر YouTube :: اضغط هنا ::

____________________


جميل محبط

ارفع حجر تلقى مُغني ... اكتب شطر تصير شاعر
اكسب صحافة .. تصير سيّد للثقافة
جميل هذا الوقت مُحبط

اكتب بما يرضي ضميرك .. تصير حاقد
اشتم بحدة .. تصير ناقد
نافق بشدة .. يصير مستقبلك واعد
جميل هذا الوقت مُحبط

اسرق رغيفين .. تصير المجرم السارق
اسرق ملايين .. تصير الماجد الحاذق
جميل هذا الوقت مُحبط

اشرب على وقت العشا .. كاسة نبيذ
واسمع لشوبان .. وارقص الفالس .. تصير متحضر
اطلق اللحية ورتل القرآن وصل الخمس .. تصير إرهابي
جميل هذا الوقت مُحبط

اجرح يهودي .. تقوم هالدنيا وتقعد
اهتك اعراض .. ثكّل يتامى .. شيل بيت وامحي مسجد ... تنوم هالدنيا وتسكت
جميل هذا الوقت مُحبط

عيش هالعمر الوسيع .. وبعد ماتحياه موت
عيشوا هالعمر الوسيع .. وموتوا
الوعد يوم الوعيد .. يوم تنسى الام الطفل الرضيع
عظيم ذاك الوقت .. منصف

____________________

لـ تحميل القصيدة :: اضغط هنا ::

لـ مشاهدة القصيدة عبر YouTube :: اضغط هنا ::

____________________



تعبت


تعبت أنزف جراحي حبر و أدور للألم أسباب
لاجل أكتب شعر يحكي بعض أصغر معاناتي

قفلت من الأسى بابي وسجنت الكون خلف الباب
وعصتني دمعةٍ فيها سؤال لكل اجاباتي

ملل أخبار حسّادي أحد صادق وأحد كذاب
و أحد ما طال تجريحي و أحد عايش لزلاتي

أنا شاعر رغم أنف الحسد والحقد و الأحباب
وانا ياحاسدي المسكين بعيـــد العيب عن ذاتي

أنا ما زادني شعري ولا زادتني الألقاب
تجي دنياي أو تدبر عزيز فكل حالاتي

أنا فرحي لمِن حولي وأيامي فدى الأصحــــاب
قصيدي بلسم المجروح ونبض الناس أبياتي

كسرني قلبي المكسور نادت دمعي الأهــداب
تعبت أركض ولا أوصل ولاتوصلني غاياتي

أبي ذلٍ يغطي الأرض لك يا رب وهاب
وابي أحيا جبيني فوق ما تملكني رغباتي

من الدنيا أنا مابي سوى عفو العلي التــواب
ويحـــسن خــــاتمة فــعلي ويغــــفر لي ضـلالاتي

أبملا العمر "بالتوبة" و "نوح" و "هود" و "الأحزاب"
متى كانت سنيني عمر انا عمري في ركعاتي

____________________

لـ تحميل القصيدة :: اضغط هنا ::

لـ مشاهدة القصيدة عبر YouTube :: اضغط هنا ::

____________________


مليت

قالت لي مليت..ودي بحد غيرك

جمع جروحك..لملم مشاويرك

واذا قضى صبرك..جرب صبر غيرك

لو اشغلك وعذبك طيفي..ابكي

واذا بكيت اكتب بدمعك شعر اشكي لمراسيلك

وبوعدك اذا صرخ جرحك ونادى..دمعتي تنزل عليك

بضحك على ايامي معك..واخذ على قلبي عهد مايخلص لغيرك

اعذرني..مليت



ماتبيني ملت الصدق المشاعر..يانور ايامي وسنيني اللي مضت

يالظلام اللي بيديني..مابقى فيني بقايا اتركيني

سل الحزن لغدرك خناجر ومالقاني فيني

وجرحي نادى..يامحاجر الدمع مايكفيني

ضاعت بداياتي..بقيت نهاياتي واسأل اجاباتي..هو أنا اخطيت

هو بقى في اللي بيجي ياليت..ماتت اجاباتي

قالت لي..مليت



يا اكثر جروحي الاخيرة..لو عرفتي اليوم قلب ودعك

يا آخر جروحي الكثيرة..ماعرفتي اليوم ما عاد اذكرك

وما اذكر من اللي مضى..الا غرامك والفراق

بعض اللقاء والاشتياق..

وكل الاحاسيس الصغيره

يابرد عمري وياهجيره..تخطين لو يخطر في بالك

انك في بالي كل دقيقة..وانك خيالي والحقيقة

واني احبك مهما كنتي..يابرد عمري وزمهريرة

ان كان قلتي اني فقدتك..ماصدقتي

وان كان قلتي مانسيتك..ماصدقتي

لو عرفتي مااذكر من اللي مضالي الا انتي

وما اذكر من اللي مضى الا انتي

وما اذكر الا اني بكيت

وفي ليلة مافيها وفاء..قلتيلي مليت

يا انتي اخر أولي..لاتصدقي اني نسيت

____________________

لـ تحميل القصيدة :: اضغط هنا ::
____________________


صدّق ، أو لا تصدّق

،،،

صدق أو لا تصدق
كل ما تباعدت المسافة بين الرغيف والجوع ،، تلقى الفرح أصدق
تصدق أو لا تصدق
لامن غدت كل المشاكل جوع الصغار وسقفٍ يداريهم قبل يصحى النهار
تلقى الشعور أعمق
صدق أو لا تصدق
كل ما انقفل درب انفتحت أبواب
صدق أو لا تصدق
لو فيه احد طيب ،، للطيبة أسباب
صدق أو لا تصدق
قليل من يعفي ويسامح ،، كثير وده ينتقم بس ينتظر له وقت سانح
صدق أو لا تصدق
القناعة كنز يفنى
ولو كل من ياخذ قنع أ وكل من ياكل شبع
كان الفرح غطى شوارعنا
صدق أو لا تصدق
كل النهايات البداية ،، وأحلى البدايات النهاية
وكلنا رغم القساوة الظاهرة ،، نبكي قدام المرايه
صدق أو لا تصدق
به مطول لحيته والثوب يلمس ركبته
وما قرا في الشهر آية
صدق ،، ان الشعر صدقه اعذبه
ودي احكي لك حكاية وقبلها ابغى لسؤالي اجوبة
المال هذا هو وسيلة والا غاية ؟!
لو ماهو غاية ،، ليه الحروب ؟
ليه الحسد يملا القلوب ؟؟
ليه السلام اللي تمناه الشعوب ؟


وليه الفقير المعدم الكادح ،، بهجته تملى الملاح
لامن لقى ذاك الثري يعطي هذيك المطرية مليون
وهذا الثري لامن سرى من حفلته ،، و وقفت سيارته عند الاشارة
وجاه شايب يطلبه ،، الهم عاثي في وقاره
دق باصابع متعبه ،، على الشباك
قال :
انا ياسدي مديون وانت الكريم
يحكون عنك في الجرايد ،، وتقال في جودك قصائد
ويقال انك للأرامل واليتامى عون
ما ابغى منك الا حاجة ،، لبس الشتا لاجل العيال
الله يسددلك خطاك اعطني مما عطاك
واعتدل راعي الملايين الكثير في جلسته
وعقد حجاجه ثم قال :
ألا ما اثقلك واغباك ،، ليه يا اخي ما تشتغل
انت كسول ،، ومستغل
وطلّع من المحفظة فكّه ،، رماها وقفل الشباك
ابغى لسؤالي اجوبة
ليه البر والتقوى مليان في جرايدنا ؟!
وليه هموم هالشارع بعيدة عن قصايدنا ؟!
ليه الفساد ،، ليه الكساد ؟!
وليه الحروب ،، وليه الحسد مالي القلوب ؟!
وشهو الجواب ؟!
اتمنى انه مايكون المال هذا هو وسيلة ماهو غاية
هذي الكلمة النبيلة ،، اخترعها أغنيا
لاجل مسكينٍ شقى يرضى بقليلة
وصدق انت او لا تصدق
ماني الشخص المثالي
كل مافي الامر اني شاعرٍ ماهو يبالي
كان صار اللي اقوله علقمٍ او صار حالي
كل مافي الأمر اني استريح ،، لا مشابي مركبي عكس اتجاه الريح
وما ابرّي من الخطى نفسي

واللي اجاهر به مثل همسي
صدق اني ماني الشخص المثالي
كل مافي الأمر اني اجمع احساس الحواري وسط صدري
وانقل الواقع لشعري
كل مافي الامر اني شاعرٍ مطرود من جنة خيالي
صدق اني ما قصدت اني اكون
صوت للي مايبون
صدق اني ماني الشخص المثالي
والا تدري لا تصدق

____________________

لـ تحميل القصيدة :: اضغط هنا ::

لـ مشاهدة القصيدة عبر YouTube :: اضغط هنا ::

____________________

سبتمبر


ما هي حكاية خطبة أو مَنْبَرْ
ولا حكاية مجتمع عَنْه التَّرَف أدبر
ولا حكاية مناهج فجأة اكتشفوا انّها لابد تتغيّر
ما هي حْكاية بطالة ،، ولا هي حْكاية جهالة
ولا هي حْكاية عمالة
ولا هي حكاية كراهية تقادم أو وراثة
ولا هي حكاية صراع بين الثوابت والحداثة
ولا هي حكاية حقد من أصغر على الأكبر
ما هي حكاية وضع بائس
أو شباب مُعْدم ،، ويائس
فارقوا كل المباهج ،، دُرّبُوا في ليل حالك
وخاضوا لامريكا معارك
وبعد ما أدّوا الغرض ،، صاروا مرض
ما كوفِئوا بما يرونه مُسْتَحَق من الثّمن
وبعد فترة من الزمن!!
أصبحوا أعنف وأخطَر
وأصبحوا بالأمر أخبَر
خلّطوا حابل بنابل
وقرّروا يكونوا قنابل
موقوته من ناس آخرين
في وقت يأتي بعد حين
في اللحظة المثلى تُفَجَّرْ
ما هي حكاية صُدَفْ
ولا هي تخطيطٍ مُدَبّر
الحكاية ما هي هذي
الحكاية قد تكون ،، أكبر أو أصغر
لمّا تاريخ الحقائق يطمسوه ،، بالأدلّة والشواهد

لمّا أولى القبلتين يدنسّوه ،، والدنيا تشاهد
لمّا طفل يموت بين أحضان أبوه ،، والدنيا تشاهد
لمّا تنهدّ البيوت ،، فوق روس أصحابها،، والدنيا تشاهد!
لمّا يُقْتَل شخص في مسجد ،، وهو ساجد ،، والدنيا تشاهد !!
لمّا تندكّ الكنائس بالرصاص ،، والدنيا تشاهد!!
لمّا تُفقَد كل آمال الخلاص
وتضرب الحسرات.. في كل الصدور أطنابها
لمّا تفقد أم ،، نصف أطفالها
ويصبح زوجها معوّق
ولا مناص
تصير الكل في الكل
وما في في المنزل أكل
وجيش مدجّج بأعتى السلاح ،، يحاصر بابها
لمّا تصبح كل فكرة للقصاص ،، تُهْمَه !!
والله أكبر تصبح إرهاب
لمّا الفلسطيني تُهَان أخته وأمّه ،، ويلاقوا لهذا أسباب!!
لمّا يومياً تكون المعركة ،، ما بين أطفال بحجارة ،، ودبّابة
لمّا يومياً يمارس هتلر العهد الجديد
حصاره ،، وإرهابه !!
لمّا كل هذا البغي بكل صفاقه يؤيدوه !!
لمّا تاريخ المذابح يطمسوه!!
لمّا أولى القبلتين يدنسّوه!!
لمّا تُصبح سيّدة هذا الزمان !!
أمنّا الغولة ،، كذّابة !!
لمّا تصبح أمّة العُرْب الأشاوس ،، أُمّة ندّابة !!

لمّا كل هذا يصير
ويَحُدث الحدث الكبير
يحدث الأمر المحال
وتصبح إسرائيل
هي بس وحدها
المستفيد الأكبر
ينطرح في كل هالدنيا سؤال
هي حكاية خطبة أو منبر؟
أو حكاية مجتمع.. عَنْه التَّرَف أدبر!؟
أوحكاية مناهج.. لابد تتغيّر!؟
ما ندري ليه ؟؟
جاوب يا سبتمبر !!

____________________

لـ تحميل القصيدة :: اضغط هنا ::

لـ مشاهدة القصيدة عبر YouTube :: اضغط هنا ::

____________________


نـحـــس !!

،،


يوم الاثنين اغتنى
وصار بين الأ غنياء ،، ترتيبه الثالث
يوم الثلاثاء الفجر ،، مات في حادث

فريق كورة ،، دائما ترتيبه في الدوري الاخير
واذا لعبوا واستبسلوا ،، قبل الاخير
وبعد السنين الممحلة ،،
جاهم رئيس ثروته كثر التراب
عيّن مدير ،، عنده من الخبرة كثير
شال الكبار ولعّب شباب
وجاب المدرب اللي له اسمٍ مهاب
واتقدموا ،، وصلوا للدور النهائي
ويوم النهائي ،، قبل المباراة بدقايق
في البلد حصل انقلاب

مسكين !!
شين وفقير
وفي الدراسة حاول انه يستمر ،، ومااستطاع
وضعه صعب ،، أبوه مات وهو صغير
وماترك له الا الفقر ،، وأمه وأخته ، والهم من فوقه وتحته
ومالقى لاجل الهروب من الضياع
الا انه يدور وظيفة ،، أي وظيفة
ولقى من ضيقته مخرج ،، وظيفة دخلها معقول
يمّشي الحال ،، لو اعرج
ومرت سنة وسنين
والمسكين ،، صارت كل آماله زواج
وتزاحمت في داخله الاسئلة
منهي اللي بتقبله ؟
وليه ؟
وفي يوم مامثله ابد
شافها ،، أجمل من أجمل مارأى
وضحكت له
مستحيل !!
ضحكت له
ومشت من أول الحارة ولحقها
ودخلت في بيت جاره
سأل عنها وعرف
قنوعة وأسمها سارة
تصير أخت لمرة جاره
أرسل لها أخته
تجس النبض
جت البشاير
راح لامه ،، وفرحته كبر السما والارض
وافقت
أبشرك يمّه لقيتها يمه
سارة أخت حصة مرت منصور
ابيها وهي تبيني ،، وابغى منك الشور
خلاص يا يمه خلاص
باقول لهمومي الوداع
بقول لهمومي الوداع
قالت له أمه :
يا ولدي بس هذي اختك في الرضاع

____________________

لـ تحميل القصيدة :: اضغط هنا ::

لـ مشاهدة القصيدة عبر YouTube :: اضغط هنا ::

____________________


العادة جرت

،،،


العادة جرت
كل طالب مجتهد ،، دمه ثقيل

العادة جرت
كل مخلص في الهوى ،، حظه قليل

العادة جرت
العطوف اللي كريمٍ في الجرايد
في الأزقة والحواري له عوايد
يصبح القاسي البخيل

العادة جرت
جُل من يصبح ثري ،، يكتب شعر
والقصائد تحتري اغلى سعر
الشعر اصبح مجلة
جلها غث وهزيل

العادة جرت
لمّا نسافر كلنا في الصيف
نمشي مخشبين
كلنا نحكي بفخامة ،، نمشي بفخامة
والابتسامة لما نسّلم
نبتسم كأن فيه مصورين
ورغم اننا نسافر لاجل نلقى بعض
ونعرف بعض
الا اننا لما نتقابل نلتفت متجهمين
ماهو جنون ،، ولا عبط
تظهر أغاني من نمط ،، أربع سنين
نتطالع بالعيون
وفي المواعيد اللي مادري منهو كان العبقري اللي عطاها
نجلس في نفس الاماكن
ننتظر نفس الوجيه
تظهر بكامل بهاها
ويبتدي ذاك الحوار السرمدي :
- شف هذاك شلون لابس ؟؟ ماهو صاحي
- شف هذاك موجود في كل النواحي
- شف هذيك شلون تضحك ؟؟ ياخزياه ياعيباه يالله
- شف هذيك شلون تمشي ؟؟ شف هذاك شلون جالس ؟؟
- شف رفيقك !! ليش عابس ؟؟ خل نروح ونسأله
- لا انتظر هذا ماشي مع هله
وينتهي هذا الحوار السرمدي
فينا نقول : وش هالصخب ؟ هالديرة مليانه عرب !!
كأننا متفاجئين
ولما نرجع بالسلامة

العادة جرت
انا نكون متنكدين
ومافي سبب غير اننا ما كنا حنا
غير اننا لما نسافر دايم نكون ممثلين
ولاجل نطلع من تقمص دورنا لما نرجع
نحتاج نقعد ناطرين أسابيع وأيام
ونظهر من الانفصام

العادة جرت
انّا نجل الأجنبي
ونقصي القريب

العادة جرت
انها الايام تمضي ومسجد الاقصى سليب


العادة جرت
كل ما جو الخليج صفي وراق
يبتدي العم سام
عزف موال العراق

العادة جرت
كل ما اكتب قصيدة ،، اوصف الواقع بها
القى جاهل ما اريده يعتقد انه لها

العادة جرت
كل ما اكتب يقيني أو ظنوني
يكاد المريب يقول خذوني

____________________

لـ تحميل القصيدة :: اضغط هنا ::

لـ مشاهدة القصيدة عبر YouTube :: اضغط هنا ::

____________________



تعاريف


الاقتصاد
ناس تزرع من فجر ربي
إلين الشمس تغرب
وناس تصحى في العشا
تتولى تقسيم الحصاد

بغداد
حضارة شاهقة ،، وأمجاد
أقدار صلفة
وشعب يفاخر بنزفه
وتحتاج الحكاية لص
يصير الأقوى بالصدفة
ويكون القاضي والجلاد



وبحسن إعداد ،، وقدرة فائقة
في البطش والتنظيم
وبداعي خوفه
الأطماع والتقسيم ،، والأنواء
يقسّم شعبه لأجزاء
جزء يعيش في المنفى
وجزء في عيشته منفى
ومواطنين
معززين مكرمين
مقرنين
في الأصفاد
بغداد
خبر لو أنها أنداد
مدينة بائها بوابة التاريخ
ودالها دنيا من الأمجاد
سنين صلفة
وشعب يفاخر بنزفه
وتحتاج الحكاية لص
يصير الأقوى بالصدفة
ويوطد حكمة الأوغاد
بغداد

السجون
هي مكان
لعزل من يخرج على القانون
وان غدا القانون جائر
تصبح القضبان دنيا
تعزل الخارج عن المسجون

النفاق
رغم اختلافك
تبقى آرائك وآراء الذي تخشاه
دايم في اتفاق
أو نقول : هو انتمائك
كل فتره لانتماء
أو نقول : هو ارتماء
أو بمعنى آخر نقول : النفاق
هروله صوب اليهود
وبكى على أطفال العراق

السراب
وهم ما هو ماء
لكن يعطي للظامي أمل
وإحساس مفعم بالرجاء
والسراب ينادي : يا ظامي تعال
ما بقى الا خطوتين
وتنعم برشف الشراب
أو بمعنى آخر
نقول : السراب
الوعود اللي قطعها
المرشح للمرشح في انتخاب

الجزيرة
الجزيرة من قديم الوقت تُعرف :
بالمكان اللي يحيطه ماء من كل الجهات
وفي جديد الوقت دولة
ما عجبها وضعها وسط الخريطة
قالت اتعدى حدودي ..
و اثبت لغيري وجودي .. في الحياة ..
و هكذا نقدر نقول ان الجزيرة :
دولة مغمورة صغيرة ..
كبرت وصارت قنااة


التطبيع
التطبيع ربط المصالح للجميع
يبغى عدوك يشتري
ليه ماتبيع ؟!
ليه مايكون الراعي هو ؟!
ليه ماتصير انت القطيع !
وش يمنع ان الذئب يصبح
حارس الحمل الوديع ؟!


الإرهاب
تدبير إجرامي
قتل مدنيين
ترويع أبريا
تطبيق شرع الغاب
هدم البيوت العامرة
سفك الدماء الطاهرة
قتل الكهل والشاب
وان قلنا اسرائيل تفعل كذا دوما ً !!
تقول أمريكا :
مايعتبر إرهاب !
كي يعتبر إرهاب في شرط إلزامي
يكون إسلامي ومدعوم من أعراب


مؤسسة خيرية
مشروع يعُنى بتخفيف الألم
والمرض
والكمد
يعنى بتعمير المساجد
والمساكن
والمدارس
والمشافي
داخل وخارج البلد
يُعنى بفك الدين
تفريج الكرب
رفع المشقة والكبد
يُعنى بتقريب المسافة للرغد
مؤسسة خيرية
فرقها عن غيرها
كونها سرية
تعطي ولا يعلم أحد
مؤسسة خيرية
عبدالعزيز بن فهد

____________________

لـ تحميل القصيدة :: اضغط هنا ::

لـ مشاهدة القصيدة عبر YouTube :: اضغط هنا ::

____________________


نبض الشوارع


ما غدا للوقت معنى .. مابقى للشعر دافع
ملّت الآمي حروفي .. ومل صدري من iiالضلوع
غصت في أعماق روحي .. خذت نبض من الشوارع
يمكن ألقى أي معنى يوقد لشعري الشموع
صرت اراقب كل ومضة .. وارخي للهمس iiالمسامع
واحتري قلوبٍ تسافر من قساها iiللخشوع
ألتقيت الظلم لذة في البشر والعدل ضايع
وألتقيت من المشاعر كل صنف وكل iiنوع
به قلوبٍ ياهي تشقى لو يبات الحقد iiجايع
وبه قلوبٍ لوهي تقوى مابقى في الدنيا iiجوع
وبه عيون في هدبها تسكن الآم iiومواجع
ومن سواد اليأس فيها ماقوت تذرف iiدموع
به فقر مُدقع يبكي وبه غنا فاحش iiورائع
به بخل ظاهر وشامل به كرم لكن iiقنوع
به بشر ينسى صلفها ان كل من راح iiراجع
وبه بشر تنطر اجلها ترتجي ذاك iiالرجوع
به مسلي طول ليلة كل ما مولاه iiمانع
وبه مصلي ذاب ليله في سجوده iiوالركوع
به كساد و به فساد و به طموح وبه مطامع
به بطالة به سفالة به مخادع iiومخدوع
به اسى غطـّى الحناجر به كدر قضّى iiالمضاجع
به هروبٍ للتطرف والا لغياب iiوهجوع
به دجل يملا الحواري به كذوب ٍ في iiالجوامع
طوّل اللحية لسلطة ماهو سنة والا iiطوع
به نفاق وفاق حده مالقى في الناس iiرادع
به صدق موجود لكن مهمل وماله iiشيوع
به شعوبٍ ضاع املها تكره الفعل iiالمضارع
تلقى في الماضي عزاها اما حاضرها iiيلوع
به تعاسة وانتكاسة به ظلام ٍ iiمايمانع
يقتل اخر ضيّ فينا وشمسنا تنسى iiالطلوع
به كاءابة به سحابة غيثها دم iiومدامع
به مهانة واستكانة به مذلة به خضوع
به ليال ٍ ما تبالي لو تجينا iiبالفواجع
الحزن فيها مثالي واصل ٍ ماهو iiقطوع
وش بقى في العمر معنى وش بقى للشعر دافع
وكل ما سالت حروفي ضاقت بصدري iiالضلوع

____________________

لـ تحميل القصيدة :: اضغط هنا ::

لـ مشاهدة القصيدة عبر YouTube :: اضغط هنا ::

____________________


سألتها

ســـــألـــــتــــــهــــــا ..
لـيــة الـبـحـر سـاكــن عـيـونــك ؟!
جــاوبــتــنــي .. لـــلـــغـــرق
ســـــألـــــتــــــهــــــا ..
لـيـه الـسـواد الـلـي فـــي عـيـونـك ؟!
جــاوبــتــنــي .. لـــــــــلأرق
ســـــألـــــتــــــهــــــا ..
لـــــيـــــه الـــــخـــــدود ؟
قـــــالـــــت .. عـــــبـــــق
ســـــألـــــتــــــهــــــا ..
هـي رقـتـك مـثـل النسـايـم والــورود ؟!
قـالـتــلــي .. لا .. يــمــكـــن أرق
ســـــألـــــتــــــهــــــا ..
عن حسنها كنّه يقول : ما للشعـر فينـي حـدود؟!
قــــالـــــت .. صــــــــــدق
ســـــألـــــتــــــهــــــا ..
يــا اغـلـى الأنــام .. وشـهـو الـغـرام ؟!
قالتلي .. انك ماتنام .. وأوهام .. وتنتظر شمس اللقا
ومـاتــجــي شـــمـــس الــلــقــا
مشوار مايعرف وصول .. ولحظة بها كل الفصـول
وقلـب واحـد يحتـرق .. وبـعـض الـصـدق
وقــتٍ عصـيـب يتبـعـه وقــتٍ عصـيـب
ولــيـــل يـتــعــدى الـصــبــاح ..
وجـــراح تــدمــى لــــو تـطـيــب
وفـــــــــي الأخـــــيـــــر ..
خــــل عــــن خــــل افــتـــرق
فــي الأخـيـر .. كــل النهـايـات الـفـراق
مـــافـــيـــه فــــــــــرص ..
مافيه نهايات بلقـا .. إلا فـي خيـالات القصـص
ســـــألـــــتــــــهــــــا ..
وشــــهـــــو الـــــوفـــــا ؟!
قــــالـــــت .. كــــفـــــى ..
الـنــور مــــن ضــيــي اخـتـفــى
والـلـيـل فــــي عـيـونــي غــفــى
اتـــــرك كـثــيــر الأسـئــلــة ..
اســـأل عــــن عـيـونــي وكــفــى
اسألنـي .. ليـه البـحـر سـاكـن عيـونـك ..
لـيـه الـسـواد الـلــي فـــي عـيـونـك
ســـــألـــــتــــــهــــــا ..
جـاوبـتـنـي .. لـلـغــرق .. لــــلأرق
سألتها عن حسنها كنه يقول : ما للشعر فيني حدود ؟!
قــــالـــــت .. صــــــــــدق

____________________

لـ تحميل القصيدة :: اضغط هنا ::

____________________


مايقول الشعر

مايقول الشعر .. من باله خلي
ومن نساه الهم لايطري القصيد

ماكتبت الشعر قصدي تزعلي
وان فرحتي فيه ما اقصد اكيد

حس يشعرني .. وضيقه تنجلي
ودار تسكني وانا عنها بعيد

واوصف العله لعاشق مبتلي
لاكساه الليل يلقابي عضيد

لالفوك الغيد عني اسئلي
تجري حروفي بهم مجري الوريد

من هوى هذاك وفلان وعلي
الوكاد انه عن اشعاري بعيد

____________________

لـ تحميل القصيدة :: اضغط هنا ::

____________________


تدرين وادري


تدرين وادري بنفترق
تدرين قلبي بيحترق
حنا اتفقنا في كل شي الا الزمن
عيى الزمن لا نتفق
ولاتزعلي لو نفترق
قلبك خلي
وقلبي انا اللي بيحترق

ياوردة في كل الفصول
يافرح عيّى لايطول
قولي واقول
ان كان عندك لي حلول
يافرحة القلب الحزين
الوقت يمر ..
ومالك عذر
كانك تبين ننسى العمر ..
ننسى السنين
وانذوب في حب وحنين
تدرين وش سر الحكاية
الوقت يمر .. ولكل شي لابد نهاية
وحنا قربنا من النهاية
ومالك عذر
يابسمة الثغر الخجول
ان كان عندك لي حلول
وان كان ودك نتفق
والا ترانا بنفترق
ولاتزعلي لو نفترق
قلبك خلي
وقلبي انا اللي بيحترق

ياحب .. يادنيا جديدة
يا احلى ابيات القصيدة
ان كان جرحي ما كفى
انزفلك جروح ٍ جديدة
وان كان شعري ماوفى
انسى الحكي وانسى القصيدة
يا احلى ايام العمر
كثر الحكي وش بيفيد
ومابقى عندي صبر
والجرح في قلبي يزيد
مالك عذر
يابسمة الثغر الخجول
ما اظن عندك لي حلول
وما اظن ودك نتفق
واحنا ترانا بنفترق
ولاتزعلي لو نفترق
قلبك خلي
وقلبي انا اللي بيحترق

____________________

لـ تحميل القصيدة :: اضغط هنا ::

لـ مشاهدة القصيدة عبر YouTube :: اضغط هنا ::

____________________


كباريــــه

فرقة موسيقية
كمنجة بثلاث أوتار .. قيتار .. ثلاث طبالين
اورق .. ناي .. شاي
فٌرقة موسيقية
يجون .. كل ليلة يجون .. ومع أول الصبح يسرون
لجل ثاني ليلة يجون
هم يعزفون .. وما يعزفون في مكان تسمع فيه الناي قانون
ازعاج .. صجة .. دجة
ايقاع خليجي غالبا مقلوب
ايقاع خليجي دائما مطلوب
شباب .. بنات ترقص .. والعطر في اول الرقصة حلو ..
وفي آخر الرقصة هبوب
غناء وطرب .. عرض وطلب
واحد يغني .. بدلته تلمع .. يفترض فنان
ياليلة دانة لدان
قرقعت كيسان .. دخان .. ما اسعد الشيطان
ضوء خافت .. كل شي حلو والضوء خافت
كل شي كذب والضوء خافت

وفي اطرف الصالة .. هناك اثنين
- واحد يقول " شفت هاذيك الطويلة اللي ترقص " ؟
- الثاني " وين؟ "
- " هاذيك اللي مع حسين "
" واعدتها البارحة وجتني .. مالومها حبتني ..اعطيتها ألفين "
" مسكينة هي .. ماودها تجلس في ملهى .. بس انها تساعد اهلها "
الثاني قال : " كل البنات اللي هنا تساعد اهلها "

غسان .. غسان .. مدير هالصالة
ركض غسان .. وصل فلان .. وصل المهاب .. معاه عشر اشخاص
ركض غسان " اهلين وسهلين ..شو هالحلو..يخزي العين "
الفرقة تنهي الأغنية .. وتعزف بسرعة ..
" حمد لله ع السلامة .. ياجاي من السفر "
أحلى طاولة للمهاب .. طاولة على البست
لفلان اللي من اسبوع كان لابس البشت ..
اليوم على البست

غسان قلقان .. مضت ساعة .. ومانقّط أحد
نادى " ياجارسون " وحط يده في جيب البنطلون ..
" خذ هالألفين ..على المغني ارميها .. وشاور على فلان "
ادريس قام " فلان ينقّط وانا لا.. ياللإهانة .. والله لنقّط "
- " يادريس لا .. هذي فلوس التذكرة .. وشلون نرجع .. السفر بكرة "
ادريس قال " بكره اروح لفلان احلف له
( انسرقت فلوسي .. الاوتيل غالي .. وانا معي عيالي ) وارجع انقط "

جارسون هناك يحكي مع زميله
غسان قال " الفواتير ماتنزل الا آخر السهرة "
الحق معه .. بهذا الوقت .. مافيه احد يقرا
جوزيف وين .. اليوم فل .. ودوه للشرطة .. غسان شافه يسرق من النقطة
والكل عارف .. الثلث للفرقة .. والثلث للنمرة .. والثلث للصالة
وكله لغسان

طلعت الشمس .. الساعة ثمان
الكل سكران .. الكل تعبان
ماعدا غسان "قفل الصالة ..الوعد بكرة "

____________________

لـ تحميل القصيدة :: اضغط هنا ::

لـ مشاهدة القصيدة عبر YouTube :: اضغط هنا ::

____________________


فــقــيــر

فقير وعندي المال الكثير ..

فقير وملبسي غالي حرير ..

وياصاحبي الحافي الفقير ..

ابنشدك ابسئلك وشهو الحصير ..

وابسئلك وشلون انا امر وانهي ..

واذا حكيت قبل انتهي من كلمتي ..

يقاللي سم ويصير ..

ولاشكيت من غفلتي طول زمنها ..

يقاللي لاتشتكي ماخلقت الشكوى لأمير ..

وابسئلك وشلون انا مع كل ذا ..

!!!اقول عن نفسي فقير؟؟؟ ..

ياصاحبي لاصار لضحكه ثمن ..

وصارو اصحابي كثيربس بثمن ..

والوفاء مابه وفاء الا بثمن ..

ابسئلك ماني فقير ؟؟؟ ..

ولاصارت اقوالي حكم ..

ولاقالها غيري غدت .. حكي قديم ..

ابسئلك ماني فقير؟؟ ..

ولاصرت انا مانيب انا ..

ولاغلطت قالو صحيح وكل شي اعمله يصبح عظيم ..

ابسئلك ياصاحبي ماني فقير؟ ..

وياصاحبي ابنشدك لمن جفتني دنيتي ..

وابتدا الدرب الطويل الى ابد ماينتهي ..

وانتهي العز القديم وماكنت اظنه ينتهي ..

والموت بدد فرحتي .. وحطوني في قبر صغير ..

وحزنو علي وبكو هلي وناس من ربعي قليل ..

وارتاح من وجهي كثير ..

وبقيت وحدي في حيرتي مابه احد ..

لاطال عمرك ولاتحت امرك ..

ماغير انا وخوف ولحد وحساب قدامي عسير ..

وقتها ذكرت اني من زمان ..

يوم انه امهلني الزمان ..

هذا ظلمت هذا جرحت ياما كذبت ..

وذنوبي ماتحصي كثير ..

وقتها الا ندمت ونفسي كرهت ..

عرفت ان الله كبير وان الهلاك اصبح اكيد ..

واني انا مالي رجاء..ولاهروب من الدجاء ..

من الجحيم الا بأمل عندي وحيد ..

ان الله غفار ورحيم ..

ابسئلك ياصاحبي عني في وقتها ..

ماني فقير؟؟ ..

____________________

لـ تحميل القصيدة :: اضغط هنا ::

لـ مشاهدة القصيدة عبر YouTube :: اضغط هنا ::

____________________



وسلامتكم ..!
اضافة رد مع اقتباس
  #2  
قديم 29/12/2010, 09:30 PM
الصورة الرمزية الخاصة بـ Ahmed.S.Aljuhr
زعيــم نشيــط
تاريخ التسجيل: 03/03/2010
المكان: Jeddah, Saudi Arabia‏
مشاركات: 689
.................................!
اضافة رد مع اقتباس
  #3  
قديم 29/12/2010, 09:35 PM
موقوف
تاريخ التسجيل: 08/12/2010
المكان: حيثُ انا
مشاركات: 206
ليش النفاق يعني انه رئيس نادي الهلال؟؟
بصرآحه قصائده عاديه جدآ
على العموم مشكور اخوي
اضافة رد مع اقتباس
  #4  
قديم 30/12/2010, 02:15 AM
الصورة الرمزية الخاصة بـ @@almoreb@@
زعيــم مميــز
تاريخ التسجيل: 27/08/2007
المكان: بوابة برلين - منطقة البوتسدامر
مشاركات: 3,090
^^^^^^^^^^^^^^^^^^^^^^^^^^^^^^^^^^^^^^^^^^^^^^^^^^
أية نفاق ياخي

الأخ عاجبه شعر الأمير عبد الرحمن وانت جاي تقوله منافق
بعدين انت ادرى باللي في القلوب يا ابني !!!!!!

لا تحكم ع نية أي شخص على كيفك
واذا انت شايفها عادية ففي ناس شايفينها مميزة وحتى لو ما كانو هلاليين



موضوع حلو وفي قصيدة حلوة كمان وهي حقت مجلس الرجال ههههههههه

شكرا اخوي العزيز
اضافة رد مع اقتباس
  #5  
قديم 30/12/2010, 09:23 AM
الصورة الرمزية الخاصة بـ hp_sa
زعيــم مميــز
تاريخ التسجيل: 25/02/2008
المكان: الخبـــر
مشاركات: 2,910
ماشاء الله عليك مجهود رائع منك الله يوفقك
اضافة رد مع اقتباس
  #6  
قديم 01/01/2011, 02:09 AM
الصورة الرمزية الخاصة بـ غصة فراق
زعيــم متواصــل
تاريخ التسجيل: 29/04/2010
المكان: في قلب نجود
مشاركات: 127
وربي رووووعه يكفي انها من شبيه الريح والاخ اللي يقول نفاق وش تقصد
اضافة رد مع اقتباس
  #7  
قديم 01/01/2011, 02:31 AM
الصورة الرمزية الخاصة بـ هلاليتي عذبتهم
زعيــم متألــق
تاريخ التسجيل: 27/10/2010
المكان: حيثٌ تكَوَن الزَعــَـآ’مَـه أكَوونَ
مشاركات: 1,371
مشكوور ع التجميييع ..
وقصائد شبيييه الرييح روووعه ..
وكنت اعرف الامير عبدالرحمن بن مساعد شاعر قبل ماعرفه رئيس الهلال ..
وشعرره يعجبننني ..
لاعدمناااك ..
اضافة رد مع اقتباس
  #8  
قديم 02/01/2011, 10:49 PM
الصورة الرمزية الخاصة بـ FAISAL AL7RBY
زعيــم مميــز
تاريخ التسجيل: 05/04/2010
المكان: عـادة الأيـام تأخـذ ماتعـيـد :: ولابد من وقت يكشـف ماخفـى
مشاركات: 74,127
الله يعطيك الف عافيه

كل اسبوع اسمع بعض قصائد سمو الامير عبدلرحمن

و خصوصا قصيده احترامي للحرامي

تحياتي لك
اضافة رد مع اقتباس
   


إضافة رد

أدوات الموضوع
طريقة عرض الموضوع

قوانين المشاركة
غير مصرّح لك بنشر موضوع جديد
غير مصرّح لك بنشر ردود
غير مصرّح لك برفع مرفقات
غير مصرّح لك بتعديل مشاركاتك

وسوم vB : مسموح
[IMG] كود الـ مسموح
كود الـ HTML غير مسموح
Trackbacks are مسموح
Pingbacks are مسموح
Refbacks are مسموح



الوقت المعتمد في المنتدى بتوقيت جرينتش +3.
الوقت الان » 03:00 AM.

جميع الآراء و المشاركات المنشورة تمثل وجهة نظر كاتبها فقط , و لا تمثل بأي حال من الأحوال وجهة نظر النادي و مسؤوليه ولا إدارة الموقع و مسؤوليه.


Powered by: vBulletin Version 3.8.7
Copyright ©2000 - 2014, Jelsoft Enterprises Ltd

Google Plus   Facebook  twitter  youtube