بسم الله الرحمن الرحيم
هلا و غلا بكل اعضاء هالمنتدى الحلو
الحقيقه انا من الناس الي مو راعين مواضييع لكن الانتقالات الي صايره خلتني اضطر اني اكتب عشان نتناقش في المشكله الي صايره...
من المعروف انه كل ما كثرت الانديه اللمنافسه على لقب الدوري كل مااصبح للدوري طعم ثاني و بالتالي تطور الكره بشكل ملحوظ..
في البدايه راح اسرد الانتقالات اللي كان لها تاثير في مستوى النادي اللي استفاد و ايضا اثر على النادي اللي باع اللاعب..
نبدا في نادي الهلال (خخخ عشان ما يقولون متعصب):
1-عبدالله شريده من نادي القادسية
على مر الاعوام الي فاتت عبدالله كان صمام الامان للدفاع الهلالي..و على ما اعتقد من يوم اعتزل الامبراطور ما شفنا لاعب هلالي سد الثغره مثل شريده..
.طيب نشوف وش صار في حال نادي القادسيه..وجوده في الدرجه الاولى عدة سنوات و دخول 39 هدف في مرماه عام 2000
تثبت ان الفريق عانى و لا يزال يعاني من ضعف الدفاع..
2-احمد خليل من نادي الاتفاق:
صمام دفاع الاتفاق..احضروا شعيب لتغطية مكانه لكن ما فييه فايده...
3-حسين علي من نادي الاتفاق:
مهاجم الاتفاق اللي اول ما برز و ما كان تمر مباراة للاتفاق الا وهو له نصيب له من الاهداف اخذه الهلال و صار هداف السنه الماضيه مع ادميلسون و سيرجيو.
4-احمد ضاري من نادي التعاون:
من ابرز الحراس صراحه و انا من المعجبين فيه..والله يا عالم انه حارس يعطيك الطمأنينه...انتقل مرتين و شوفوا وضع التعاون في الوقت الحالي...
5-عبدالله سليمان من نادي الاهلي:
عبدالله سليمان و ما ادراك ما عبدالله سليمان...يكفي ان الاهلي الا الحين مو قادر يسد مكانه ولا راح يقدر..
6- الخثران من نادي الشباب (سبب كتابة الموضوع):
فنان و اول ما برز و صار في عزه لقطه الهلال..و راح نشوف النتيجه
6-محمد الدعيع من نادي الطائي:
حارس القرن بلا منازع..يعتبر دفاع لحاله ماشالله عليييه...

نادي النصر:
1-فهد المهلل من نادي الشباب:
لاعب قناص ابدع مع الشباب لكن ما توفق مع النصر
2-فؤاد انور, صالح الداوود من نادي الشباب:
واحد لعب فتره بسيطه و الثاني يعتبر المدافع الرئيسي الفتره الحاليه..
الثلاثه الاخيرين يعتبرون اساس الجيل الذهبي لنادي الشباب (بداياتي في متابعة الكوره و انا عمري 14)...يمكن مو السبب الرئيسي في تدهور نادي الشباب لكن من الاسباب الرئيسيه...

نادي الاهلي:
1-عبيد الدوسري من نادي الوحده:
كان نجم نادي الوحده و هدافه الوحيد تقريبا...استفاد الاهلي و الوحدة ضاع و وضعه مزري الوقت الحالي..في الدرجه الاولى و الله العالم وش راح يكون مستقبل هالنادي العريق...
2-خالد الشنيف من نادي الشباب:
تقريبا من الجيل الذهبي..مبدع والان استفاد منه الاهلي استفاده كبيره.
3-تيسير ال نتيف من نادي الاتفاق:
حارس مبدع و شفناه في المباراه الاخيره(صراحه انصب عليكم ما شفته ابسبب وجودي في امريكا بس من الجرايد و التعليقات من المنتديات سمعت انه انقذ اهداف محققه)...
4-عبدالله الواكد من نادي الشباب: لاعب شاب برز من فتره قريبه و عيني عليه بارده ..حمل اول كأس ككبتن..و الجايات اكثر انشالله..

نادي الاتحاد:
1-مرزوق العتيبي من نادي الشباب:
9 مليون تدل على خطورة اللاعب...برز في الفتره اللي سبقت انتقاله..كأس القارات تشهدله...لكن لاسباب ما احب اني اخوض فيها ما قدم اللي كان متوقع منه...
2-سليمان الحديثي من نادي النجمه:
هداف نادي النجمه بلا منازع...كان شايل النجمه على عاتقه مع اسحاق كواكي و كنت اكره وجودهم مع بعض اذا لعبوا قدام الهلال...قدم شي بسيط للاتحاد لكن باعتقادي لنفس الاسباب اللي خلت مرزوق يفشل فشل سليمان.
3-الحسن اليامي من نادي نجران:
طبعا ما يخفى علينا المستوى الي يقدمه الحسن و ابداعه..صحييح ان نادي نجران لكن راح اتكلم عن الحسن في نقطه جايه..
4-حمزه ادريس من نادي احد:
قناص مهما كان نقدر نقول فاد الاتحاد و خسره احد خساره..كان موجود في الدرجه الممتازه لكن بعد الانتقال هبط و لا عاد شفناه...
5-سعود السمار من نادي الشباب:
صحيح انه كان على اخر حياته الرياضيه لكن راح اتكلم عنه في نفس موضوع الحسن اليامي..
6-خميس العويران من نادي الهلال ( اه يا القهر خخخ ):
محور ولا كل المحاور..الله يهنييهم فييه و يستر على عورات المسلميين...توليو و غييره كانوا محاولات هلاليه لتغطية مكانه لكن في رأيي الى الحيين ما لقيينا..
6-حسين الصادق من نادي القادسيه:
حارس فنان و كان مبدع مع القادسيه.

اكثر من 18 لاعب ذكرتهم غير اللي راحوا عن بالي و مالي خلفيه بسبب بعدي عن الدوري ووجودي في
امريكا...اقول اكثر من 18 لاعب توزعوا على 4 فرق بس...والله هذي مشكله بدت تتضح مساوئها في مستوى الدوري عندنا..لازم ندور حل لهذي المشكله لان لو استمرينا على هاالحال راح نخسر كثيير....
============================================
حل المشكله:
وجودي في امريكا و متابعتي للرياضه خلتني اكتشف ان فييه حل واحد ما فيه غييره..راح ابدا بمثال في الدوري الامريكي للمحترفين و بعدها راح اعطيكم سبب الاثاره و قوة الاندية..
.في الدوري هذا اكثر من نادي يعتبر من الفرق القويه...مثلا: LA Lakers, New Jersey Nets, San Antonio Spurs, Sacramento Kings, Orlando Magic, Boston Celtics, Dallas Mavericks, Detroit Pistons, Indiana Pacers, Philly 76ers,
السنوات اللي راحت سيطر LA Lakers على البطوله بعد منافسه مو طبيعيه من Sacramento Kings, Indiana Pacers, Philly 76ers. طبعا بدون تعمق..راح اقولكم بعد كم سطر ليش السيطره على البطولات الثلاث الاخيره..
طبعا ما احد يقدر يقولي هم عندهم القدره الماليه و حنا نحتاج خصخصه..هذا سبب غير معقول و السبب اني اطالب بقوه معقوله ولا اتصور اننا راح ناصل لقوة دوريهم..طيب وش السبب..وش السر في الاثاره عندهم!!!!!!...انا راح اقولكم كييف...في الدوري الامريكي فييه شي اسمه الحد الأعلى لشراء اللاعبيين يسمى Salary Cap
تعريف ال Salary Cap هو ان كل نادي له حد اعلى في شراء اللاعبين..يعني الاتحاد ما يقدر يشتري اللي يبغاه..اذا شرى مرزوق ب9 مليون يمكن ياصل لحد انه ما يقدر يشتري لاعب غيره...نفس الشي الهلال لمن يشتري الدعيع و عبدالله سليمان ما راح يقدر على غيره..الاهلي بعد الشنيف و عبيد خلاص..النصر بعد المهلل و صالح الداود لازم يوقف و مو مسموح يشتري غيرهم ..في هذي الحاله الانديه الثانيه راح تحافظ على لعيبتها و ايضا راح تكون قادره على شراء لاعبين كانت عيونهم عليها لكن المزايده من الانديه الكبيره كانت تمنع...
نرجع لمثال كرة السلة الامريكيه... LA Lakers كان يخطط للمستقبل..عندهم متعهد الصفقات West اللي عنده بعد نظر و حنكه...ببساطه استطاع كسب O’neal و كسب Kobe Bryanat و صاروا ثنائي مو طبيعي يذكرنا ب Jordan و Pippen..الحين LA Lakers ما يقدر يجيب لاعبيين يعتبرون المع نجوم السله ..يعني بالعربي الدعوه مو على كيفه...ما ابغى اطول في هذي النقطه لكن احب اذكركم انه كل فريق في دوريهم عنده نجم او 2 على الاكثر الي شايل الفريق..و هذا اللي مخلي دوريهم نار ...
اعتمادا على هذا القانون ودي اعطيكم فكره على تشكيلة كم فريق بذكر النجوم اللي راح يعتمد عليهم:
الاتفاق:
تيسير ال نتيف, احمد خليل, حسين العلي, على الفهيد, عبدالعزيز الدوسري..
4 لاعبين مع المواهب الشابه اللي قدروا يحققون أول بطولات الموسم غير النجوم اللي ماسكين الفريق الفتره الحاليه...

القادسيه:
حسين الصادق, عبدالله شريده, سعد الشهري, محمد الفرحان...

الشباب:
سعود السمار, فهد المهلل, خالد الشنيف, فؤاد انور, صالح الداود, مرزوق العتيبي, عبدالله الشيحان, عبدالعزيز الخثران, عبدالله الواكد.
لاعبين خبره امثال سعود السمار و فهد و فؤاد كانوا بالامكان انهم يفيدون اللاعبين الشباب امثال الشيحان و الخثران
و مرزوق والواكد اللي بامكانهم نقل الخبره لتكر والمواهب الشابه.

لاعبين بالاعتماد على قانون الSalary Cap ما راح نشوفهم في الانديه الي هم فيها و راح نشوفهم في انديه مثل الشباب او الاتفاق او القادسيه او الرياض:
الحسن اليامي, احمد ضاري, احمد الجري, عبيد الدوسري, حمزه ادريس, محمد الدعيع الخ الخ

خاتمه:
الصراحه ادري اني طولت لكن انتقال الخثران كان مفرحني و مضيق صدري...ادري انه راح يفيد الهلال لكن ما ابغى استمتع ب 5 مباريات في السنه كلها بين الانديه اللي عندها فلوس و تقدر تشتري...
سامحوني اذا كنت ما شملت الموضوع و سامحوني اذا كان مو مرتب.. لكن اول مشاركه لي و انشالله اسمع ارائكم و نناقش الموضوع و ناصل لفايده انشالله تاصل للمسؤلين..و على فكره الاراء صدقوني تاصل و انشاء الله تتطبق عشان نرفع من مستوى دورينا اللي صاير بايخ....
و السلام