15/12/2010, 11:20 AM
|
 | زعيــم فعــال | | تاريخ التسجيل: 03/07/2009 المكان: البلاد الذي يحوي زعيم اسيا
مشاركات: 216
| |
|
الريس وما ادراك ما الريس((ابن مساعد))
الحمد لله رب العالمين , والصلاة والسلام على أشرف الأنبياء والمرسلين , نبينا محمد وعلى آله وصحبه أجمعين ..
السلام عليكم ورحمة الله وبركاته ..هوريو الجميع ؟ ..
إن شاء الله بخير وعافية ..
أول شي .. أحب أقول للجميع حياكم الله في الموضوع ..
وأتمنى ماتوصل المواصيل لمدّة اليد لأني ماحب المشاكل ..
وأنا والله دمي حار .. إذا عصّبت أنجلد .. ماشوف اللي قدامي يومين ..
فاء .. علشان تسذا يعني ..
أنا قررت أصارح أعضاء المنتدى ..
ولا يهون المندسين والمدسوسين والقارئين والتابعين واللي مالهم دخل واللي داخلين بالغلط ..
إن الكيل قد طفح .. والبال ضاق بعد السعادة والفرح .. والشمس ماتنفع تشمّس به لا بشارع ولا بسطح
اختلاف الآراء وارد بكل محل .. هذا يقول زين وهذا يقول شين .. عادي جدا ..
لكن ماتوصل أبدا .. أبدا .. أبدا .. ياولدي ..
إننا ننقسم على أشياء تافهة .. مالنا صلاح فيها .. وكله أمور تزيد الضغط النفسي على النادي ..
أكثر من موضوع أخذ أكبر من حجمه ..
والغريب أن فطاحلة الأعضاء .. اللي هم فطاحلة وزي تسذا .. انساقوا خلف هاللي شسمه ..
دز دز دز .. شي يضيّق الصدر والله ..
بكل شفافية .. خلونا نتصارح ..
الرئيس بكل مكان وكل نادي بالعالم .. رئيس النادي .. وش مهماته ؟ ..
ميخالف .. أبترككم خمس دقايق مع النفس و ( قوقل ) .. وشف لي وش مهمات الرئيس ؟
دام الرئيس يدفع للصفقات .. ويجيب اللاعبين اللي موصى عليهم من المدرب .. ويدفع من جيبه الخاص مهب من استمثار النادي ..
وش الشيء اللي ناقص الرئيس ؟ .. مثلا شرّاب وكنادر عزكم الله ؟ .. وفنيلة وشورت ويمسك هجوم مثلا ؟ ..
والا يلبس كوت مكتوب وراه Al-Hilal Club ويدرّب الفريق بالمباريات المفصلية ؟ ..
والا مثلا يحط ساعة بالاسبوع ما تطلبه الجماهير .. ؟ ..
أو رشّح اللاعب اللي تبيه أو ماتبيه من خلال إرسالك رسالة برمز اللاعب لجوال الرئيس ؟ ..
صدقون لو سواه مايبقى ولا لاعب بالفريق ..
لأن كل واحد من الجمهور له رأي خاص بكل لاعب ..
هل وجود الرئيس وحضوره لأي مباراة شخصيا .. بيخلّي اللاعب يقول .. الللللله شبيه الريح يناظرني ..
وبيطلع للاعب جنحان ويسجل ست أهداف ؟ ..
على كذا المفروض يحطون إبن مساعد على الحدود اليمنية .. علشان الجيش يستفيد من قدراته وإمكانياته ..
اذا كان ابن مساعد بيسوي كل هالأشياء ..
ليش نجيب مدرب ؟ .. وليش نحط إداري ..؟ .. ونائب رئيس ؟ .. وخلافه ..
إذا كان ابن مساعد مسوي مهامه المنوطة به .. وش ذنبه بأخطاء غيره ؟ ..
إذا إني بكل حيادية وبدون تطبيل .. ويشهد الله ماعمري طبّلت لأحد عاطفيا ..
أنا أأول علطول .. حسب ما أشوفه من جهد وعمل .. سواء كان رئيس والا اداري والا لاعب ..
أقول للمحسن أحسنت وللمسيء أسأت .. < واقفة يعني ؟ ..
وش اللي خلانا بالمدرج نختلف ولا نتفق .. على أن مشكلة الهلال في لاعبيه أنفسهم أولا ..
وفي طموح الفرق المقابلة والمنافسة للهلال وجدية تحقيقهم وشغلهم ثانيا ..
ليش ماقلنا إن استهتار اللاعبين .. ونرفزتهم في غالب الأوقات .. وارتباكهم في أحيان أخرى ..
هو السبب في تردي النتايج و الخروج من أهم البطولات ؟ ..
ابن مساعد ما هو إلا إنسان يوقّع على اللي يجيه ويتفق على ما يُجمع عليه أعضاء الشرف والإداريين ..
انسان يوفر المناخ الصحي للاعبين والإداريين مادياً .. ومرجع لهم باللي يختلفون عليه .. ومايتفقون عليه حسب ماصوّتوا عليه ..
انسان .. يكلم اللاعبين بين فترة وفترة .. حاله كحال أي رئيس .. حتى رؤساء الشركات .. ماينشافون الا بالاجتماعات اللي تصير بالسنة ثلاث إلى أربع مرات ..
أما المسائل الفنية .. فهي ترجع بنسبة بسيطة جدا على المدرب .. ونسبة أقل على الإداري المباشر .. ونسبة كبيرة جدا على اللاعبين أنفسهم ..
إذا كان اللاعب منزوع المسؤولية تجاه ( الجماهير ) .. غير قادر على إنه يكرف روحه لآخر نفس داخل الملعب ..
اذا كان اللاعب مهب قادر إنه يلعب بروح قتالية لعيون ملايين المشجعين اللي مأملين عليه ..
وش ذنب الرئيس ؟؟ ..
إذا كان اللاعب مايفكر بعقله.. ويستسلم للإشاعات .. وينضغط نفسيا من جماهير منافسة تعمّدت ضغطه وهو يدري انهم منافسين ولا يتمنون له الخير .. لاعب بدل مايكون نفرفزتهم له من صالحه ومن صالح الفريق بحيث يعطي دبل ماعنده من مجهود وتركيز علشان يرد عليهم .. يجي ويستسلم بكل ضعف لهم
اذا كانت مجموعة من اللاعبين يشوفون 70 ألف متفرج على مسافة أقل من 100 متر يآزرونهم ويشجعونهم .. غير الملايين ورى الشاشات .. ويلعبون بكل برود وكأن هناك إعادة للمباراة أو أن هالمباراة مجرد تمرين لهم .. لاعبين بدل مايخسرون بمستوى .. بدل مايخسرون وحنا نشوفهم تعبانين .. بدل مانقول سوينا كل شي لكن الحظ ماخدمنا .. بدل مانقول ماقصروا تعبوا وكل شي سووه بس الخسارة مكتوبة علينا .. نقول ياليت به لاعبين غير هاللاعبين .. لدرجة إن الجماهير الآن بوده إنه تغير كل أغلبية اللاعبين ..
اذا كان فيه بعض اللاعبين .. يلعبون بعنترية وعربجة .. وينسفون خطة المدرب بلحظة .. يا كرت أحمر .. يا بلنتي .. اذا كانت هالعيّنة من اللاعبين يلعبون من مدة .. ولو تجيب واحد من الجمهور القليل متابعة للكورة .. وتسأله .. هل ممكن الحكم يغيّر قراره ؟ .. بيقولك لأ .. لو تقول هل سمعت بحكم غيّر قرار من قراراته لأن واحد من اللاعبين أخذ بخاطره ؟ .. أو زعل على الحكم ؟ .. أو مثلا الحكم خاف من اللاعب وقال آسف آسف حقك علي .. البلنتي ملغي لعيونك .. ؟ .. بيقول لك لأ ماعمري سمعت ..
مابالك بلاعب .. لاعب يلعب وعارف نظام الكورة .. ؟ .. لاعب يقدر من خلال خمس مباريات فقط يكتسب خبرة بهالنقطة .. ويعرف ان النرفزة مهب من صالحه ولا من صالح فريقه ولا من صالح تركيز الفريق ولا تركيزه ..
اذا كان فيه لاعبين .. يقولون محنب لاعبين لمين نستلم قروشنا .. وبغض النظر عن انه راتب .. أو باقي مقدم عقد .. او مكافأة .. لاعب الفريق محتاجه .. والفريق لو خزينته تسمح كان أعطتك دراهمك .. ومهب قادر يصبر لنصف السنة علشان النادي يستلم أرباح نصف السنة .. لاعب ماعنده مسؤولية ولا حب للفريق ولا إحساس بحاجة الفريق له .. لاعب جايه مقدم عقد ملايين ومهب بحاجة كم ألف حاليا وحقه ماراح يضيع أساسا .. سواء اخذه الحين والا بنصف السنة ماراح تفرق معه ..
مدرب أو لاعب أجنبي .. لا رغبة له بالبقاء .. ولا وده يجلس .. ولو خليته يجلس بالقانون .. راح تخسر ببقاءه أكثر من رحيله .. مدرب أو لاعب أجنبي .. مالك حيلة في رغبته .. ولا تقدر تقول شي سوى إنك تتعلم إنك ماتجيب لاعب أو مدرب من نوعيته الا مركّب عليه شروط .. أو أصلا ماتجيب من نمونته أبد .. لاعب أو مدرب بغض النظر عن التصاريح اللي مانعلم نواياه .. هل هي فعلا مثل مايقول الاعلام الاصفر انه استغفال .. أو انه محاولة لمسك زمام الامور والتروّي به وعدم تفلت اللاعبين لعلمهم برحيله ؟ .. وهل الاعلام الاصفر مرجع نقدر ناخذ منه الحق والباطل ؟ .. أو بس ناخذ الباطل ؟
ماقدرت أفهم وش دخل ابن مساعد بكل هالأمور .. ولا قدرت أعرف طريقة يقدر يسويه ابن مساعد تخلي كل الجماهير راضية ..
ولا أعرف المقصد من الانتقاد من أعضاء معروف عنهم الرزانة والعقلانية والمنطق ..
كلنا نعرف ان فيه خلل .. وهذا شي مايحتاج له دكتور والا عالم فيزياء ..
مستوى ونتايج الفريق تعلمك ان فيه خلل واضح .. لكن ماذنب الريّس ؟ ..
هل الريّس مبسوط ودراهم بالهواء يطيرن ؟ .. دراهم من جيبه دفعهن وراحن كنه صب ماء على رمل ؟
فيه أخطاء للرئيس .. ولكنه أخطاء أقدر أمشيهن .. وأخطاء مالهن علاقة بتردي الفريق ..
اذا انه اخطأ بموضوع المدرب وانتقاله .. فهو لا يعدو كونه تصريح .. راح والا جاء تصريح ..
وحتى لو انه قال كذا تصريح ما أعجبني ولا أعجبكم .. فمازال كلام جرايد .. يقول اللي يقوله ..
أما رحيل لاعب او بقاءه .. أو مدرب .. الرئيس فقط يرجع للمدرب والإداري ..
أنا فقط أتمنى شي واحد .. وجود دكتور نفسي بالنادي ..
بالإضافة لتفعيل دور الإداري وإنه يكون حلقة الوصل بين اللاعبين والرئيس ..
من حيث نقل مشاكلهم الخارجة عن إطار النادي ..
دمتم بود........((م))
محبكم هلالي عاشق سامي9
|
الوضع العادي
