سلام يالربع

صبحكم الله بالخير والعافيه

سبق اني نشرت كذا قصيده لي في المجلس العزيز

وكان هناك انتقادات في كون المشاركات سبق نشرها في بعض المنتديات سابقا

ومطالب اني اكتب شي جديد وانشره في منتدى الزعيم

والحقيقه هذي ابسط حقوقكم

وهذي قصيده قلتها بعد عيد الفطر

كنت في الديره معيد مع الوالده والاهل

وبعد يومين مشيت الرياض عشان العمل

ويوم بكت امي وهي تودعني

كتبت هالابيات في الطريق (طريق بر طبعا ما احب الطيارات )

بسم الله


وداعية انا راحل وقلبي بالغلا زعلان
وداعية وداع الحب وداع الشوق والآخر

وداعية عجزت أضحك وامثل بإنني فرحان
اشوف الدمعة تسبقني وتحرجني وتتناثر

وداعية يا أغلى ام واطهر من سكن نجران
وافى من خلق ربي واقدم من عصر هاجر

وداعية فديت تراب رجلينك مع الحذيان
اعفر فيها هالجبهه واقبلها واتــــــفاخر

اقبلها تقرب لك وتقرب لي وللرحـــــمن
وادور جنتي فيها ولي فيها رضى القادر

طلبتك لا تهلي لدمع تري مو ناقص الاحزان
انا مستودعك قلبي وراحل والزمن كافــــــر

ما يكفي يالغلا باني رغم كبر العمر والشان
بقيت ذاك الطفل يمك أبيك تقول لي شاطر

ابيك تقول لا تسوي كذا وافعل كذا يافلان
ابي تطلبني اتغدى واقول ان توني فاطر

وابي تحلف وتغصبني وتلقمني كما البزران
وكل ما قلت انا كفايه تقول ما عندي لك خاطر؟؟

ادري اني بكيتك برحيلي و القدر له شان
ولكن ودي ارسم لك ضحكه وودي اتنادر

تعالي اسمعي يومي ومعناتي بكل الوان
اطرزها بمزحة وذب واحكيها بشكل ساخر

عليهم حر يايمه غدينا كننا ســــــــودان
وعليهم برد في شتاهم منه العظم تتكاسر

وكل يومين او اسبوع يجيك العج من الصمان
ويلقمنا التراب وحن بني الاقوام ونــــــــــصابر

وحتى في الفجر زحمه وتالي الليل تجي احيان
وفي عز الظهر يمه كأن يوم الحــــــشر حاضر

اوه نسيت ما قلت لك غدى لي صاحبن مليان
فلوسه مثل رمل البيد وواصل طنـــــخته فاخر

يخاويني ويصاحبني وصرنا كأننا اخـــــــوان
ويسهر لي ويتعب لي ويماشيني على الاخر

اشوفه في العروبه يوم ويوم بين الشجر طربان
وفي كل الشوارع له مقام وفوق العرب قـــــاهر

يمه شفيك لا تدعين له بالعز والإمنان
نسيت اقولك يمه اسمه للاسف ساهر

وعلى ضرب البخاري اعيش ويعيش بجوعنا الافغان
نفر ابيض ونفر احمر وعيشة تكسر الــــــــــــخاطر

ومعي موتر على كيفه مزاجي صنعة اليابان
يســــــرني متى ما حب هو يامر وانا حاضر

يمه اضحكي شفيك تريني يالغلا زعلان
ولا تغرك سواليفي حزني ما هو بظاهر

قولي يالغلا امين عسى لك في العمر ازمان
وتشوفيني على ما كان ودك به انا صاير

اقبل جبهتك كل يوم واملا البيت لك بزران
واخليــــــــــهم تحت رجلينك الثنتين تتناثر

وداعيه انا راحل وقلبي يالغلا زعلان
وداعيه وداع الحب وداع الشوق والاخر


وسلامتكم

إقتباس الرسالة الأصلية كتبت بواسطة الطعنة في الظهر توجع سلام يالربع هارد لك التعادل امممممممممممممم سبق نشر هذه القصيده ولكن اعيد نشر بس تسجيلها عشان بعض العرب يقول انها مكسره هذا الرابط: zSHARE - ________ __________.wma

الطعنة

تراك طعنتنا بدخلتك هذي على المنتدى

خف علينا اشعار اللي تحرك احاسيسنا من قوة الالفاظ

فعلا قصيدة مؤثرة جدا يقشعر لها البدن و تخلي اللي مقصر عن والدينه يرجع لهم

تسلم من القلب و لا تحرمنا جديدك يا شاعر المجلس و شاعر الحب و الرومانسية

لو بختار بيت اعجبني فانا راح اختار القصيدة كاملة

و لكني افضل هذا البيت لما فيه من اعجاز شعري كبير.....

إقتباس اقبلها تقرب لك وتقرب لي وللرحـــــمن وادور جنتي فيها ولي فيها رضى القادر

تسلم و لا تحرمنا طلتك الجميلة....

و خل شوي

اخوي الموهوب

اشكرك جدا على طلتك الحلوه

ولا هنت ياذيب

صح لسانك اخوي الطعنة في الظهر توجع
ما شاء الله ابيات جميلة ومشاعر ملتهبة

الله يحفظ لك والدتك وترجع لهم بالسلامة ..
حقيقة يا صديقي تمتلك لغة جميلة وخيال خصب في الشعر ..
وما اجمل ذلك حينما كان لاعظم امرأة في حياة كل انسان ..
اهنيك على ذلك ..

إقتباس وحتى في الفجر زحمه وتالي الليل تجي احيان وفي عز الظهر يمه كأن يوم الحــــــشر حاضر

دمت بحفظ الله ,,,

اخوي ابو مقبل

شاكر لك مشاعرك وكلامك اخوي

ويشرفني فعلا رد امثالك على ابسط ما نقدم للشبكه

لا هنت اخوي

ومنور

وداعية فديت تراب رجلينك مع الحذيان
اعفر فيها هالجبهه واقبلها واتــــــفاخر

اقبلها تقرب لك وتقرب لي وللرحـــــمن
وادور جنتي فيها ولي فيها رضى القادر





الله يجزاك الجنة و السامعين و القارئين !

مشاعر جياشة ملؤها الحزن و الفراق .. فأسأل الله العظيم رب العرش العظيم أن لا يفرق جمعكم !

هنيئاً لإمك بإبنٍ مثلك


أرق التحايا

اهلا بك اخي طعنه في المجلس
كلمات اكثر من رائعه
وما اروع الشعر عندما يكون لشخص غالي بقامه الام
تقبل مروري المتواضع
دحوم

ماشاااء الله شي جمييييل اقصد مشاعرك

صح لسسسسانك

من جد قصيده محبوكه < اقصد يعني ممتازه


ششوكزا مررره والله يحفظ لك والدتك


اختكم ،، ميمي

ماشاء الله عليك
صح لسانك و لاهان راسك
كلمات رائعة خصوصا انها كتبت بأعز شي الأم

الله يخليلنا والدينا و المسلمين

.,
نص رااائع ..
ماشا الله عليك ابدعت بصياغة شعورك ..
.,
قولي يالغلا امين عسى لك في العمر ازمان
وتشوفيني على ما كان ودك به انا صاير

الله يطول بعمر امهاتنا اجمعين .. ويبلغنا حسن رضاهم ياآرب ..
يعطيك العافيه ..