اسمح لي يالغالي, شكلك متابع مباراة ثانيه مب نهائي خليجي 20

أولاً: منتخبنا السعودي كان مسيطر بنسبة 80% على المباراة واسمع تحليل
الكابتن الشنيف وش قال, وشف الجمل التكتيكيه والهجمات الخطيره اللي
سويناها, ولآخر دقيقه منتخينا ما استسلم وتحس كأننا نلعب في بداية المباراة
وكأن النتيجه 0-0 مو 0-1 للكويت.

ثانياً: هدف الكويت جا من غلطة دفاعية
وما في أي تكتيك بتاتا البته في هدف منتخب الكويت.

ثالثاً: الحكم مع احترامي لشخصه الكريم ما عنده ما عند جدتي
اكثر من فاول للكويت تمثيل×تمثيل, ومع الخيل يا شقرا كل ما انسدح
لاعب كويتي طلع كرت أصفر مدري من قايل له فيه مسابقة
اللي يطلع كروت صفر أكثر له بانوراما, ولاعبنا يوم طاح عطاه أحمر
على اساس تمثيل, يعني تحكيم مش حالك كمالة عدد, أشك انه خباز مب حكم
ويحتاج يدرس في معهد تمثيل عشان يعرف من اللي يمثل ومن الصادق.

رابعاً: مدربنا مع احترامي الشديد كمخه, التشكيله حقته تجيب النوم
ما عدا كم لاعب, قال ايش قال نبي منتخب كله شباب, هاه وش رايك في الشباب
الحين يا بيسرو النكبه؟, نجومنا متسدحين في جده, لو انهم في التشكيله
كان الكويتيين للحين يعدون الأهداف اللي سجلناها عليهم, اتوقع كنا بنسوي
نتيجه تاريخيه يسجلها التاريخ الكويتي قبل السعودي.

خامساً: لوتشوف التهزيئ والمصخره اللي جت في حق السعودية و المنتخب السعودي
من قبل بعض الكويتيين اللي ما يستحون, كان اقسم بالله ما تنزل هالموضوع وتبارك
لهم, تطنزوا في المملكة وفي اللعيبه وشتمونا شتم ما اقدر اقوله هنا لان اخلاقي
كـ مسلم وكـ سعودي ما تسمح لي بهالشي, ومستعد اصور لك اللي قالوه, وخصوصا
على موقع تويتر, انا زيك والله قبل المباراة كنت اقول الكويت والسعودية عينين
في راس واحد وكلنا حبايب, لكن يوم شفت هالكلام المحزن واللي متروس حقد
تمنيت ان الارض تنشق وتبلعني قبل ما اشوفه او اقراه, وين الأخوة والمحبة
وخليجنا واحد وشعبنا واحد؟

سادساً: تاريخياً مافيه أي مقارنه بينا وبين منتخب الكويت, الكويت حده كاس
الخليج والدليل فاز فيه 10 مرات, الله يهني سعيد بسعيده, واحنا ان شاء الله
لنا الآسيوية, ويكفينا فخر, ان المنتخب السعودي هو المنتخب الوحيد في
العالم العربي وفي الشرق الأوسط, اللي تأهل لكاس العالم ثلاث مرات
وفي إحداها عام 1994 في أمريكا, وصلنا لدور الـ 16, ولو يفحطون
حبايبنا الكويتيين ما يوصولون هالمواصيل ولو بعد قرن.

والسلام عليكم ورحمة الله وبركاته.

^ ^

هلا بك اخوي ..

فيه اشياء انا معاك بس فيه اشياء
معليش اختلف فيها معاك ..

اولا الاستحواذ على الكرة مو معناته ان
منتخبنا كان جيد .. يعني محد ينكر ان المباراة وبالشوط
الثاني بالتحديد كانت مملة للأسف .. استحواذ بدون
خطورة ..

ثانيا: وهالنقطة اتفق فيها معاك 100% الحكم
كان اقل من مستوى المباراة وكان ع الفاضي والمليان يصفر
ويموت اللعب صح ان مافيه اخطاء غيرت مجرى المباراة
(بما ان الكرت الاحمر جا في الدقايق الاخيره )
بس عموما كان سيء سيء سيء ..


ثالثا: التشكيلة من أول خالصين منهاا ..


رابعا وهو الأهم .. اذا كانوا بعض الكويتيين اللي لقوها
فرصة عشان يسبونا ويسبون منتخبنا وديرتنا مو معناته ان الكويت
كلها كذا ومو لازم ننزل احنا لمستواهم وعقلية المراهقين اللي عندهم
ولاتنسى اخوي ان فيه سعوديين نفس الشي يسبون ويشتمون
في كل مباراة ونفس الشي هذا مو معناته ان كل السعوديين كذا ..
ادري فتحت محاضرة أخلاقية تحملني ,,



شكرا لك


وأنا أخت مو أخ