28/11/2010, 08:03 AM
|
| موقوف | | تاريخ التسجيل: 02/11/2010 المكان: الرياض المتحدة
مشاركات: 366
| |
غرب المقبرة... قصيدة
سلام يالربع
صبحكم الله بالخير والعافيه واللقمة الدافيه (عشان البرد)
هذي ثاني قصيده لي في المجلس الموقر
ونزلتها لانها في نفس موضوع سابقتها
ونفس غرضها الكتابي
اسعدني نقدكم السابق
وحمسني انزلها
ارجو انها تحوز اعجابكم
اخوكم
بسم الله
لفلفوني ياهلي في كفن ابيض حقير
دثروني بالصلاة وزملوني المغـــــــفره
بعد ما كنت القوي (ذلك الرجل الكبـــــــــــير)
ما بقى من هول جسمي غير عظمه وشعره 1
الملامح هي بقايا والبقــــــايا تستجير
والحزن يغشى كياني لين والله كــــفره 2
واحملوني فوق لوح(ن) وافرشوها بالحصير
وسرحوني بالفجر صوب غرب المقــــــــــبره
وادفنوني جنب عمي واحفروا قبري غـــــوير 3
بعدوني عن سماكم قد اقصى المقــــــــدره
وانثروا التربان فوقي وخشنوا بالله الـــــسرير
وضرحوا قبري الوضيع وحســـــنوا من مظهره
انا بارحل عن هواكم واعــــــــــــرج لرب(ن) قدير
وانتو قولوا الله يرحم صاحبنا ويحشـــــــــــــــــره
في ولايه احمد الطاهر الغر الامـــــــــــــــير
يستقي من حوضه الضامي ويشوفه وينظره
والله اني لاشتكيك يوم الحســـــــاب العسير
يوم تصفية الحساب ما اعدل الله وانصــــــــره
دونكم حراس سقر(ن) احشروها في سعير
غللوها في السلاسل وانضجوها بمســـــعره
وان نضج جلده عطوها جلد انعم من حـــــرير
واحرقوا ذيا الحرير ومتــــــــــــــعوني بمنظره
علموها ان الهوى حق والكـــــــــــــافر حقير
علموها اني وفيت يوم كبـــــــــــــــــره غرره
علموها دعوة المظلوم ما تحجــــــــب تسير
وعلموها تالي المظــــــــــلوم لرب(ن) ينصره
علموها اني بكيـــــــــــت لين عزاني الفقير
وقال: (مفطوم الهوى ما اهــــــونه وما افقره)
علموها كانها تدرك دمعات الكــــــــــــــسير
(انها ذنب(ن) من الله ما هقـــــــــيته يغفره) 4
ولا نزلت دموع عينه وصار في فعله اســــير
علموه اني عفيــــــــــت واني بالخير اذكره
علموها اني وفي و في محبتها شـــــــــهير
وعلموها اني قوي في العـــــــسر والميسره
داملي قلب(ن) وروح ودام لي فكرن ينـــــــير
باسمحك في جحدتك والتمس لك معــــــذره
يمكن انها تكون زله ويمكن ان القــــــصد خير
ويا عسى شين كرهته في حياتي ما اخيره
انا لي شايب يوصيني على طهر الضـــــمير
وانا احفظ له وصاته واجله بمفــــــــــــــــخره
وانا من قوم(ن) اذا تقدر تعفوا وتســـــــــتخير
فينا من رحمة محمد وقوه عنتـــــــــــــــــــره
وفينا من عزة كليــــــــــــــب ومن نصرة الزير
وفينا من ثارات تغلب وكل شين نخبــــــــــره
وفينا اسباب البلاغه وفينا من منشد زهـــــير 5
وفينا الفاظ الفصاحه وشوفي مثلي ما اشعره
وفينا شين خاص فينا رزق من الله وفــــــــير
نملك الدنيا هنا وكل شـــــــــــــــــــين نقهره
نكرم الجار المجاور ونطعم الجمع الغـــــــــفير
ونوفي العهد الموثق ما نتــــــــــــغابى وننكره
ونقتل القوم بشجاعه ونرحم الجندي الاسير
ونغزي اطراف البلاد ونطلــــــــــب الله ونذكره
وقد ذكرت الله فيكم وجيته بذله حـــــــــــقير
واستخرته في فعالك وهاك سمهي ابصــــره
خار لي ربي فراقك وانا اسمعه له واصــــــــير
ما بعد شعرى (رجوع) وافهــــــــــــميها يامره
وسلامتكم
1:الهاء في عظمه وشعره ضمير غايب يعود للجسم وليست هاء افراد مؤنثه.
2:كفره يعني غطاه وسمي الكافر بكافر لانه يغطي الحق بالباطل.
3:غوير تعني عميق.
4:الشطر مقتبس من قصيده للشاعر ضيدان بن قضعان العجمي في قصيده الذنوب لرحمة الله ...في بيته وانتي ذنبين ما غفره الله ومالي عنه توبه).
5:زهير هو زهير بن ابي سلمى الشاهر الجاهلي المعروف والد الشاعر كعب بن زهير صاحب قصيده البرده في النبي عليه الصلاة والسلام.
|
![الصورة الرمزية الخاصة بـ HILALYA ]~](images2/images14/images/avatars/hilal/47.png)
!
الوضع العادي
