عفوا" عزيزي المقيم......جحا اولى بلحم ثوره

وقفت مره في اشاره من الاشارات وقعدت اتلفت يمين وشمال لقيت انه 90% من اللي حواليني من ركاب السيارات اجانب. شويه رحت البنك وقعدت انتظر دوري وبرضه لقيت اللي حواليني معظمه مبرضه اجانب يستنوا دورهم.وعلى كده نفس الحال في البقاله والسوق والبحر والمسجد الخ. ساعتها حسيت انه لازم نزود على اسم البلد كلمه ونخليها المملكه العربيه السعوديه السبيل!!! والسبيل كلمه نقولها على الشي المفتوح للكل زي مصدر المويه المجاني او الاكل المجاني......ايوه سبيل!!!!

ايش كمية الاجانب اللي في البلد هادي؟؟؟والله العظيم كتير كتير!!في كل مكان تلاقي اجنبي كانها مهي بلدنا وكانها بلادهم دخلوا في كل شي عندنا,وظائف اخدوها كلها, مزاحميننا في الشوارع وفي السكن وفي الفسح وفي كل شي ما بقي شي غير دخلوا فيه وشويه شويه يطلعونا بره البلد ويسكنوا فيها؟؟

ليش الدوله ما تفرض عليهم ضرايب؟؟؟ زيينا زييهم مهو لما بنروح بلادهم بيدفعوا الواحد على كل حاجه حتى نفسهم يدفعونا قيمة الهوا! ليش ما نعاملهم بالمثل وليش نسوي الكرم كله؟؟خلاص ايام الطفره روحت واحنا بنعيش ايام صعبه والفلوس بح خلاص!! لا وفي بعضهم عايشين هنا احسن من عيال البلد لا ويتحكموا في عيال البلد كمان!وكل واحد عايش عيشه في بلده ما يحلم بيها لا وكمان يسبوا ويلعنوا فينا وفي البلد وهادا اللي يقهر!!

اصحاب الشركات اللي هم من افرازات الطفره واللي معناها صار فجأه رجل اعمال بعد ما كان كحيان قبل الطفره يجيبوا شويه اجانب او لبنانيين اوفلسطينيين وغربيين ويمسكوهم الشغل وهو صاحب الشركه مسوي نفسه رئيس مجلس اداره وهدول يلعبو ويسرقو في فلوسه وهو زي اللوح فرحان!! لا ويعطيهم رواتب عاليه وفلل وشبحات وتذاكر ومكافات ولو كان اللوح جاب ووظف واحد سعودي واعطاله ربع اللي يديهم وكريسيدا يدل الشبح تلاقيه يشتغل زي المكينه. لكن الاجانب اعطوا صوره لاصحاب الفلوس انه السعودي لعاب وما يشتغل ويغيب ويسوي السبعه وذمتها كانهم هم الملايكه واحنا الشياطين!!!

نوع تاني من السعوديين اللي يبغالهم عقاب يسووا شي تاني, يروح الاخ يفتح مطعم او محل تجاري او موسسه للاجنبي ويخليه يشتغل فيها وياخد الاجنبي كل الارباح ويعطي اللوح فتافيت!!طبعا صاحبنا يفرح بالفتافيت هادي والاجنبي شغال بالاكوام ويعبي البنك فلوس لا وكلها راح يحولها بره يعني البلد ما حتستفيد شي

وفي نوع اخطر واغبي اللي يبيع التاشيرات للاجانب ويجيبهم البلد يشتغلوا ويسوا اللي يبغوا وهو فرحان,طبعا لما يبيع التاشيره ب 5000 ريال وهدا اقل سعر يحسب نفسه شاطر بس ما يدري انه بيخسر البلد ملايين وبيعرض امن البلد لخطر الاجنبي لو بده يسوي اي حاجه لا سمح الله

اخر مره صارت حمله تبرعات للفلسطينيين في التلفزيون السعودي 99% من اللي اتبرعوا سعوديين والاخوان الفلسطينيين اصحاب الفلل والعمائر والشركات والاموال ما دفعوا ولا قرش!!!

يمكن يرد واحد على كلامي ويقول خليهم يشتغلوا ويكسبوا انت ليش حاسدهم؟؟ياعمي لا حاسدهم ولا شي بس المفروض انه الاجنبي يحترم نفسه في هدي البلد اللي اعطته كل شي وهو ما اعطاها ولا حيعطيها حاجه, والله العظيم انهم بيسبوا فينا السعوديين وفي بلدنا ونفسهم يتخلصوا منا في اقرب فرصه يعني شحات وعينه قويه!!! وبعدين الاجنبي حتى لو جلس في البلد 100 سنه طالما انه ما اخد الجنسيه فهو راجع لبلده راجع وحياخد كل فلوسه معاه وهناك حيسب فينا وفي البلد كانه ماصار بني ادم من خير البلد!!!

يا جماعة الخير في احصائيه بتقول انه عدد السكان السعوديين عام 2021 حيصير 60 مليون سعودي!! يعني ال20 مليون سعودي حيتضاعف 3 مرات عارفين معناها ايش؟؟؟معناها انه الواحد لو لقى وظيفة كناس ب 1000 ريال يبوس يده لازم من الان نحسن وضعنا ونعمل حسابنا

الحل يبدا بالضرائب على الاجانب بس ولاحظو انه هذا نظام عالمي ولازم نكشف كل اللي يتستر على اجنبي ويخليه يشتغل لحسابه ونركز ونشدد على السعوده في وظائف القطاعين الحكومي والخاص والتاشيرات اللي يبيعها يدخل السجن كعقاب واكيد في حلول كتيره نقدر بيها نحسن وضع البلد الاقتصادي بس انا مش خبير فيها وعلى راي المثل:جحا اولى بلحم توره

ردو عليا ياا خوان!!