بسم الله الرحمن الرحيم

الكلام إللي بقوله ( وجهة نظر خاصة فيني )

ياناس البرتغالي بسيرو على أي أساس أختير لتدريب المنتخب
تاريخه..
سجله..
بطولاته إللي حققها..

ولا شي من إللي ذكرته صح ؟؟

والله لاخطه لا تكتيك لا مستوى فني لا تشكيله و لا و لا ولا و....

العتب ع الإتحاد السعودي ياناس استعينوا بخبرات لاختيار مدربين عندكم سامي الجابر خالد الشنيف عادل البطي وغيرهم
وخاصه الكابتن سامي ويشهد الله مو عشان هلاليتي وحبي للجابر لكن خلونا نتكلم للي فيه مصلحة الأخضر
انظروا للجابر كيف مع الهلال يجيب مدرب ويروح (( طبعا يروح غصبن ع الإدارة )) ويجي اللي أحسن منه
وعلى فكره حتى لمن كان سامي لاعب كان يستعان فيه لأمور مثل هذه ..

ليه نضحي ببطوله وبطولات عشان نجرب مدرب ونقول نعطيه فرصه خليه يثبت وجوده وهو ماعندك أحد
ضيعنا التأهل لكأس العالم 2010 بسبب تخبطات بسيرو واللوم ع الإتحاد السعودي
تقولولي ماكان فيه مدربين وقتها أقولكم ليه ما عملتوا لهذا الشي من وقت خروجنا من كأس العالم 2006
المشكله احنا مانوقع عقد مع المدربين 5 - 10 سنوات كل عقودنا لنهاية الموسم شوفوا فيرجسون مع اليونايتد تقريبا 25 سنه معاهم مع العلم ان بداياته لم تكن جيده جدا لكن تم التجديد معه لمده طويله لأن كانت بصمته واضحه على الفريق وعلى فكره مدرب عمان والله ماني متذكر اسمه المهم إنه طلب من الإتحاد السعودي توقيع عقد لمدة عشر سنوات ووعدهم بالتأهل لأدوار نهائيه في بطولات كاس العالم القادمه لكن الرد ما عندنا صبر البحاره
تقولولي بيسوون كذا مع بيسرو أقولكم بسيرو مدرب فااااشل ماراح يغير شي بالمنتخب
أمس مستبعد 11 لاعب من المعسكر ومن أبرزهم الهوساوي ومناف وعبده واحمد عطيف ونايف هزازي ووليد عبدالله
وهم نجوم المنتخب مع احترامي للباقين
والله ماقلت هذا الكلام إلا لحبي وعشقي للمنتخب مع طموحي العالي فيه

بصراحه عندنا لاعبين يمتلكون مواصفات لا يمتلكها إلا أمثال ميسي وكرستيانو وكاكا وماريا وغيرهم من نجوم العالم
مثل نواف العابد عبدالعزيز الدوسري خالد الزيلعي عبده عطيف يحيى الشهري حمد الحمد وغيرهم
تقولولي إيش هي المواصفات أقولكم السرعه والمهاره والمراوغه والتحرك بكره وبدون كره والتهديف والتصويب بقوه وبدقه وصناعة الأهداف كل هذه المواصفات موجوده عندهم وعندنا ماعدا البنيه الجسمانيه وغالبا ماتكون ربانيه وهي ماتفرق مره والدليل ميسي وماريا مع العلم بأن وجه الشبه الأكبر إللي بينهم إنهم جميعهم يلعبون في خانة الوسط وهي أهم خانه قي الفريق إللي من خلالها تبان قوة الفريق
وإللي أبى أوصله إن لو فيه مدرب كبير وعنده خط وسط مثل هذا بيكون منتخبنا قوي وصعب والدليل إن كل بطوله يشارك فيها الأخضر (( باستثناء كأس العالم لأن له عمالقته )) يكون مرشح قوي لنيل البطوله ..

وصلى الله وسلم على سيدنا محمد ..

تذكروا إني أنا قلت في البدايه إنها وجهة نظر خاصه فيني ولكم التعليق ..

إن أصبت فتوفيق من الله وإن أخطأت فمني ومن الشيطان ..

تقبلوا تحياتي ...