ســـمــعـــنـــا صــــوتـــــك - نادي الهلال السعودي - شبكة الزعيم

صدى الامس · #1 06/11/2010, 09:59 PM

السلام عليكم ورحمة الله وبركاته

قبل كم يوم اقلب بالقنوات من الطفش ابي اشوف لي اي شي اتابعه .. وانا اتمشى بهالقنوات شف لي مذيعة مزيونه

قلت خل نشوف وش عندها .. والا معها عجوزن تحوم الكبد لا شفت خشتها .. ومعهم مذيعة ثانية مهيب مزيونة مثل الاولى لكن ما عليها .. جلست اشوف وش قصتهم .. الا يتصل واحد ويرحبون فيه ويهلون .. انا يوم شفت هالترحيب بغيت اتصل كود اني اخليهم يخقون على صوتي

.. الا اسمع المتصل يقول ودي اعرف عن مستقبلي من ناحية العاظفة ومن الناحية المادية ..!!

للامانة العلمية الورق كان شكله غير كذا

..

الا شوي تقول المذيعة الثانية اللي مهيب حليوه

.. تكلم عن نفسك عشان هالعجيز تسمع صوتك اكثر .. قال عمري 44 ومن هالكلام .. شوي الا العجيز قدامها كومة ورق .. من كثرتها شكيت انهم جايبين هالورق عشان يلعبون كنكان

..

شكلها مشروع كبوت دام هذا الورق اللي معه هههههههههههههههههههههههههه

الا العجوز قامت وصفت لها كم ورقة قدامها .. وقالت هو يبي يعرف من ناحية العاطفة .. وتفتح لها كم ورقة وتصفها قدامها قالت من الواضح انك توك طالعة من علاقة عاظفية مؤخراً .. وللحين البنت في قلبك وعجزت تنساها ( ياعيني اثره الولد يحب

) بس لازم تنساها لان العلاقة اصلاً ما كانت تصلح بينكم .. حاول انك تطلعها من قلبك لانها ما تستاهلك ( طيب يالشينة يا عجوز قريح وش يدريتس يمكن هو اللي لاعب بذيله ههههههههه ) يا حب العجز للتفلسف هههههههههههه .. وتبي تطيح لك بوحدة تحبها وتحبك .. لكن فيه وحده تبي تطامر وراك وهي كبيرة بالعمر وتنشب لك .. وتبي تسبب لك مشاكل .. لكن من الاحسن انك ما تعطيها وجه لانك تبي تبلش بها ..

عقبها شالت الورق اللي قدامها وقالت هذا من الناحية العاطفية .. اما من الناحية المادية .. فلت ورق قدامها مرتن ثانية بس غير الورق الاول .. وقالت يبي يتحسن وضعك من الناحية المادية من خلال شغلك .. ويبي يصير لك شغل يا بفرنسا او مع ناس من فرنسا .. وبتكون نقلة كبيرة بحياتك .. ومن خلال هالشي تبي تتعرف على اللي قلت لك قبل وتحبها .. بس انتبه من العجوز اللي تطامر وراك ..

اللي يبي يعرف عن مستقبله يرسل لي صوته بالخاص ههههههههههههههههههههههه
جايب لكم ورق هلالي بعد وش تبون اكثر من كذا ههههههههههههههههههههه

انا يوم شفت الدعوة كذا حامت كبدي وغيرت القناة .. الحمدلله والشكر على نعمة الاسلام .. اذا الواحد شاف هالاشكال واللي يقتنعون فيه .. يقول العقل نعمه .. ولو ان ابليس الملعون حاول يغريني بمشروع يبي يدر علي ذهب .. كل اللي مطلوب اسويه اطق لي من اقرب بقالة كم ورقة .. ومذيعة مزيونة وعجوزن تخبص وقضينا

المشروع كان بيكتمل لكن نقطة وحدة هي اللي خربت كل شي .. المذيعة المزيونة مدري من وين اجيبها هههههههههه !!

الشرك بدعوى علم الغيب، أو باعتقاد أن غير الله تعالى يعلم الغيب ..
كما قال تعالى: { قُل لاَّ يَعْلَمُ مَن فِي السَّمَاوَاتِ وَالأَرْضِ الْغَيْبَ إلَّا اللهُ } [النمل: 65] ..
وقال جل شأنه: {إِنَّمَا الْغَيْبُ لِلّهِ} [يونس: 20] ..
وقال سبحانه وتعالى: {وَعِندَهُ مَفَاتِحُ الْغَيْبِ لاَ يَعْلَمُهَا إِلاَّ هُوَ} [الأنعام: 59] ..
وقال لنبيه محمد صلى الله عليه وسلم: {قُل لاَّ أَمْلِكُ لِنَفْسِي نَفْعًا وَلاَ ضَرًّا إِلاَّ مَا شَاء اللّهُ وَلَوْ كُنتُ أَعْلَمُ الْغَيْبَ لاَسْتَكْثَرْتُ مِنَ الْخَيْرِ وَمَا مَسَّنِيَ السُّوءُ} [الأعراف: 188]
وقال لنبيه صلى الله عليه وسلم أيضاً: {قُل لاَّ أَقُولُ لَكُمْ عِندِي خَزَآئِنُ اللّهِ وَلا أَعْلَمُ الْغَيْبَ} [الأنعام: 50]