مسائك سعيد ايها العالم الثالث.. استودعك الله في طريقي للمخملية - نادي الهلال السعودي - شبكة الزعيم

Fahad Al Sudais · #1 04/11/2010, 02:36 PM

حيــــــــــاكم

مزبن

ألا تلك عزة قد اصبحت...
تقلب للهجر طرفاً غضيضاً

تقول مرضنا فما عدتنا ؟
فقلت لها : لا اطيق النهوضا !

كلانا مريضان في بلدة...
وكيف يعود مريض مريضاً ؟

كثيّر

ثااااااااااانكس

سو ناااااااااايس

صرت حافظ الوضع ( صَم ) ومستعد اسمّع عند اطلق هيئة محلّفين

المواقع الاخبارية والصحف الالكترونية.. كل موضوع يحمل خبر ( فضائحي ) والردود المضحكة

والله ما انسى خبر في احدى الصحف الالكترونية المحجوبة حالياً << ( مايقصد الوئام

)

كان يتكلم عن اول فريق كرة قدم ( نسائي ) في جدة.. وتعال شف التعليقات والضحك والهسترة

او خبر ( جنائي ) والردود كلها ( السيف الاملح يابومتعب .. السيف الاملح)

بس ترى فيه شعب منتهي.. صاروا الحين يقولون ( السيف الاجرب يابومتعب )

يقول لك خلنا نحلل قروش هالسيف << انواع الذب على الحكومة

شعب فاقد

او موضوع ليبرالي لواحد من طبقة ( المطخطخين ) المخملية حقون جلسات فندق ماريوت مع قهوة الصباح

يتكم فيه عن الآثار السيّئة للانهزاميين الظلامين الصحويين.. اتباع الفاشيّة المعاصرة

ودورهم في ايقاف عجلة النمو وتدمير البنى التحتية << مساك الله بالخير يامرسال

لكن بكل امانة وبكل صراحة وبكل عنفوان اقولها بالفم المليان

اطلق واحلى ردود توسع صدري .. ردود المنتديات إيّاها

حقون التوبيكات والتصاميم والتواقيع والحب والغرام وكل عضو تحت يوزره ثلاث اوسمة من البنتاغون

ادخل أي موضوع حق توبيك مسن واوسع صدري شوي بالردود الفخمة :

وااااااااااو

سو ناااااااااااااايس

تسلم لي عنونك قلبو

ثاااااااااانكس

مرررررره شكراً

بيني وبينكم كلام كبييييييير

تحس بانتعاش عاطفي ( كوستنائي ) على قولة مشرفنا Rossi 999

هو طبعاً صحيح ان الامر ومافيه شغل مجاملة رقيقة.. لكن احسن من جلافتنا يالتماسيح

.

انا مليونير و كاش

خلاص انا قررت اسحب على الطبقة المتوسطة.. لأنها اقرب شي للكادحة

ونويت اصير مليونير.. ماسكة معي العب بالدراهم لعب

من اليوم رايح مافيه الا نظام ( شد المئزر ) واربط البوك بمغاط

الوضع القادم لايبشر بالخير.. مع ان التفاؤل مطلوب وسنة حميدة لكن الواقع غير

الوضع كل ماله ويدحدر

وكل شي ( تفل بوجيهنا ) يالمواطنين.. حتى الطماط ما حقر نفسه واستنذل علينا كم يوم

والله انا خايف من قارورة المنهل ترفع خشمها بعد وتقول انا بـ 10 وتصير اغلى من السفن أب

تصدقون ماعاد احرص اني اقلّط احد واقول له تفضل نقهويك ؟؟

بعذري.. الهيل كان الكيلو بـ 40ريـال والحين بـ 85

القهوة الهرريه كان الكيلو بـ 25 ريـال والحين بـ 60

ولما اقول ( كان ) اقصد قبل سنة او سنتين بالكثير.. مانيب اتكلم عن سنة الطفرة وعهد الملك خالد

ولو الضيف جلس عندك بعد صلاة العشاء وعجزت تصرفه

وصرت مضطر انك تطمر للرومانسية تجيب له عشاء

نفر اللحم كان بـ 30 ريـال والحين بـ 45

ياسااااتر وكلها ثلاث قطع وماتسوّي شي

مجبور تجيب نفرين بـ 90 ريـال وتحط جنبهن نص دجاجة تسليك

وقل له ( انا ما آكل اللحم

)

يا جماعة الوضع صار صعب.. والله العظيم صعب وكل ماله ويزداد صعوبة

وانا مثل ماقلت لكم صكيت بابي وربطت بوكي واللي يبي يقلط على فطيرة لوزين وسن توب الله يحيّيه

مدفن

دعيني للغنى أسعى فإنّي
رأيت الناس شرهم الفقير

وأبعدهم وأهونهم عليهم

وإن أمسى له حسب وخير

عروة