السلام على الكرام
دايم احب ادخل بالموضوع بدون صف كلام منمق وملمع ممزوج بيعنني اعرف اكتب وتراي مثقف لان هالمواضيع اعتقد ما تصلح تكون بالكوره واتوقع انها ما توصل لفكر المتلقي بسهوله المهم اقولكم الله على ايام الهلال قبل 20 و 15 سنه يوم كانوا اللاعبين اذا دخلوا الملعب تلقاء الجمهور كله واقف ويصفق لكل الفريق مهوب زي الحين ناس يصفقلهم وناس ود بعض الجمهور يصفقهم لانهم ما يحبونهم لان اللوك حقهم قروي ولا مشوا مع الموضه ( يا خوي وراك عصبت ؟! ما قلت اني اقصدك ) اعوذ بالله بعض الناس ما ودك تحسي ( تحكي ) عنده عن لاعب معين يحبه لانه قد جاب هدف دبل كيك على النصر قبل 3 سنين ويعجبه الى الحين وهو حتى بعيد عن مستواه وماخذ حقه كامل يعني ما احد قصر معه لا اداره ولا مدرب ولا جمهور وتقوله ياخي الهلال مثل ما يعطي يبي ياخذ واللاعب زي الموظف ما فيه شي اسمه حبيب الجمهور والا حبيب الاداره والا قد جاب هدف بركبته على الاتحاد قبل 10 سنين يعني بالعربي الهلال ما يوقف على لاعبين متميزين ( وساعدوا مع باقي زملائهم ) بجلب البطولات انهم يستمرون اذا كانوا بعيدين عن مستوياتهم ويزعلون اذا احد قالهم راجعوا انفسكم واللي يقهرك جمهورهم الخاص انهم يزعلون قبلهم ويردون عليك اذا اعطيت مجرد ملاحظه بطريقه حضاريه فتجيك الردود والقصف العشوائي وكأنك سبيت احد من والديهم ....

ارجع واقول ذيك الايام ايام ابوفهد وابطال الروح وليس ابطال المال كما هو مع بعض اللاعبين الان ( تراي قلت بعض مهوب الكل ) يتأثر عند نقص او تأخر او عدم اعطاءه قيمة العقد المطلوب منه ويتناسون ان الزعيم من اعطاهم الهيبه والقيمه الكرويه بعد توفيق الله ...
من يذكر النعيمه وشارة الكابتنيه اللي مزينها هو بقوة شخصيته ولا اعتقد احد لحق على جيله انه ينسى كيف كان يوجه ويزعل ويتفاعل مع كل خطأ يصير ولا احد كان يقدر يقوله ( ثلث الثلاثه كم ) يعني شخصيه قائد وهي على فكره شخصيه جايه معه بالفطره وجزء منها مكتسب مع سير الحياة وما احد ينسى كيف كان الدفاع معه الحبشي والبيشي والتخيفي ويا ويله لو احد جاب العيد مثل ما زعل مره على البيشي وشوي بغى يطرده من الملعب قدام النصر ( ما انسى كيف كان الجمهور شوي ويصيح في مباراة الرائد 1410 8/0 وكانوا طول المباراة وهم يرددون * لا تعتزل يابوفهد لا لا * ) ....

ارجع للروح وكيف اذا حضرت وخير من يمثلها ولا جاء احد بعده مع الاسف وهو سامي ... الله على ذيك الايام ناس تحرث حرث تبي بطوله تبي ترضي جمهورها اللي ما يشبع لان الفريق كل شي موفر له والباقي عليه بعد توفيق الله .... طبعا سامي مهوب لحاله عشان ما احد يقول انت خليته هو البطل وغيره كومبارس لا لا لا سامي كان معه ابطال مثله بس القصد انه كان يشحذهم ويرفع معنوياتهم وهو عليه يريحهم ويريحنا بالفوز .........
ايام اول ما كان فيه شوفوا اللوك حقي وشوفوا الناس تقلدني مره قزع ومره كدش مره اسواره سودا ومره زرقا ومره ربطه ومره لزقه ومره سكسوكه ومره ومره ومره وصار بعض اللاعبين يناظر شكله اكثر من انه يناظر وش قدم ووين وصل مستواه والمشكله اكثرهم من الجيل الجديد اللي الى الحين ما قال بسم الله .....

ما يستفاد من السواليف اعلاه

## الهلال لم ولن وليس ولا واذا حجت البقر على قرونه (واما عاد) ( وتولم) (وفل حجرك) وكل ادوات النفي اللغويه والعاميه ( ان الهلال لا يقف على لاعبين معينين)

## يجب تقبل الراي والراي الاخر ولا يصير الواحد متحجر ماله الا رايه والباقين ما يفهمون كوره مثله .

## اذا كان بعض الجمهور يكفيه ان لاعبه المفضل جاب هدف خرافي قبل كم سنه بعدها ووقف فانا اطالب بعودة سامي للعب لانه لعب 4 مرات بكاس العالم وسجل اهداف وصف الخرافي ما يكفيها واطالب بالثنيان لانه جاب اهداف الى الحين عجزنا نعرف كيف جابها واطالب بسعود الحماد لانه جاب هداف الدوري حتى من المبالغه شات فاول براسه بس على فكره هذا مهوب عيب فيه زي ما يقول بعض الناس فهو يطبق مقوله اللي تكسبه العبه وطبقها ونجح ويوم شاف نفسه انه بعد كذا ماااش اخذها من قاصرها ومسك الباب يعني كل هاللاعبين اللي كانوا مميزين ابيهم يرجعون يلعبون بحجه انهم كانوا مميزين مثل مايردد البعض الان ...

## نبي وما نبي غير الروح وتقدير الشعار الهلالي وان كل لاعب يتذكر ان لعبه للهلال يتمناه جميع لاعبي المملكه واولهم لاعبي النصر والاتحاد واعتقد ما فيه عاقل ينكر هالشي يعني انت لاعب وش تبي قلي وش تبي ؟!! عقد محترم وراتب صح واداره ملكيه واعضاء شرف ذهب وجمهور واااه منكم انتم اذا مليتوا الملعب وش تسووووون بس اااااااااه من بعض اللاعبين اللي ما يقدرون واذا احبطونا قالوا نعدكم بالتعويض ياخي لاتعوض بس العب بروح وحنا ابد لو ما فزتوا نبي ندور لكم اعذار .....

## ياجمهور يا حبايب يا احلى واقوى واكثر واجمل واعقل ووووو كل صفات الجمال والقوه خلوا تصنيف اللاعبين وهذا سجل وهذا سوا وهذا حط ولاعب يجوز عليه الزعل والثاني ياويل من قال عنه شي لا لا لااااااا كلهم ما داموا لابسين شعار الزعيم فهم واحد والتمييز يكون بالمثاليه والعطاء والروح والاخلاق داخل وخارج الملعب ....

## الكابتنيه بالعربي ما تصلح مع اساااااااااامه لانه حياوي وبصراحه اشغلته عن شغله الاساسي واتمنى اشوفها مع احد غيره حتى لو رجعت لياسر لعلها تعطيه دافع ومعنويات جديده للامام ....

## اتمنى اللاعبين يبعدون عن الاشياء الدخيله علينا مثل الاساور حتى لو كانت ربطات من قماش وغيره لانها بصراحه انتشرت انتشار غريب حتى بين الجماهير ..

******************************************************************************

بالنسبه لمباراة الامس مع القادسيه !!!!!

## ذكرني ويلي ونيفيز والشلهوب بالرجال لا تقابلوا عند مدخل والا باب كل واحد يحلف على الثاني انه يدخل قبله وهذا اللي صار البارح يتعازمون على الشوت لين قطعت المركى من التشويت من كثر مارفع ضغطي ويلي( انا الان خارج الرياض ويعلم الله اغلب المباريات احضرها عشان ما حد يقول وانت ليش ما حضرت وقعدت بالبيت تقطع المركى)... ياخي كل لاعب شاف الباب واضح وهو قريب ويقدر يشوت يجرب حظه يمكن هدف ويمكن ترتد وتجي من لاعب ثاني هدف بس انت جرب ( محمد نور يقول كان حمزه يقولهم انتو شوتوا وما عليكم من الباقي وفعلا كثير من اهدافه صدها الحارس وكملها هدف لانه يتمركز صح ) ....

## مسكين يا نجعي اجل امس اسد بلاه الذيابه نايمين البارح وما جاء اللي يشخفك بمزعه تنسيك الساعه كم .... اجل اسد ....

## اعتقد متى ما دخلت الحرمه بموضوع وانت تحبها ووجهات النظر بين الاثنين مختلفه فالنتيجه ( فاين ) للي ما نساها بالرياضيات حق المتوسط

## ما زلت اقول ان المحياني يهوجس كثير اثناء اللعب ...

## الدوسري جاك يالمرشدي انتبه لنفسك والبقاء للافضل ...

## منهو المدرب البارح سامي او ستامب اعتقد كلهم والسفينه ما يقودها ربانين ...

## نبي مهاجم يدل الباب يجيب هدف بأي شكل ما يهم سينمائي كرنفالي خرافي انبطاحي انزلاقي صدفه حظ طقها والحقها ما علينا المهم الحكم يحسبها هدف لان النتيجه تحسب للفريق وجمال الهدف للاعب ....

## اعتقد ما زال اللاعبون يتناقلون الكره بشكل ممل وطويل حتى تبدأ بالصراخ عليهم ياخي العبوا وخاصه اذا كانت بين المدافعين وهي ثقه سيئه....

## الهلال ما زال سيء باستغلال الفاولات الكثيره القريبه وما جاء اللي يحرك الجمود والتنفيذ الكلاسيكي يا شوت يا دقها للي بجنبك وهو يتصرف ....
يعني وش اللي يمنع ما يحاولون يسوون زي اللقطات الموجوده بالمقطع المرفق ادناه هل هم مثلا من كوكب اخر لهم قدرات عجيبه ؟؟؟!!!
شوفوا واحكموا هل من الممكن تتنفذ او لا ؟؟؟

http://www.youtube.com/watch?v=ipC449zxNcE
للاحاطه يوجد موسيقى برجاء كتم الصوت

### ادري طولت عليكم بس عاد سامحوني هي سواليف وخواطر تقبلوها بصدر رحب فأنتم زعماء وكرماء
اذا ما اعجبك موضوعي قلي واذا اعجبك قلي بس عبر لي عن رايك لانه يهمني

ملاحظه / ودي ادارة المنتدى تقلع صورة حسن عسيري اللي فوق بدعاية موبايلي هو وقماش الستاره اللي لابسه والا يخلون يده بس لانها علامة مسجله للزعيم ويشيلون وجهه

اشكر من رفع الموضوع
تحياتي لمن يقرأ ويعجبه ما كتبت ومن ساءه ذلك اعده بالافضل مستقبلا ان شاء الله

يعطيك العافيه يالغلا

ولي رجعه بعد التأمل في الموضوع

يعطيك العافيه على الموضوع
لاعبي الهلال تنقصهم الروح ماعدا لاعب واحد هو رادوي

يعطيك العافيه يالغلا

ولي باااااااااااااااااكـ بعد التأمل في الموضوع

الروح وبس وياليت يشوفون كابتن غير هوساوي

ونسيت حاجه ابي اقولها فكونا من العلمانين حسن عسيري

يعطيك العافية الفريق ينقص لــــ

مهااااجم اجنبي

صانع لعب بدلاً عن نيفيز يجيد تنفيذ الكرات الثابته

اعطاء اشارة الكابتنيه للاعب ياسر القحطاني بدلاً ان هوساوي اللي نزل مستواه بعدهااا

وهذاااااا كله مايتوفر الإ بوجــــود مدرب صارم وانظباطي والضاهر ان موضوع المدرب مطووول..................

هههههههههههه موضوع مظحك وفي نفس الوقت مفيد للهلال ولاعبيه

اشكر للجميع مرورهم الكريم وان شاء الله اكون خفيف ظل عليهم
ترى الدعوى سعة صدر ولا تصيرون دايم شايلين هم الزعيم والمكتوب يبي يصير

يعطيك العاااااااااااااافيه
بس عندي حاسه مليون تقول انك تدخلت بشي شخصي يعني اللوك وتشجيع لاعب معين كلنااااااااااااااااااا
نحب الهلال بس ماتوقع فيهاااااااشي يكون لنااااااا شي خااااااااااص فينا وعاجبناااا
ولك احترمي وتحياتي لك

إقتباس الرسالة الأصلية كتبت بواسطة ابو سااالم حلوو جات منك هالجملة عشان اكمل ردي اممم مدري ليييه مااوافقك فمعظم اللي كتبته انتقدت بعض الجماهير وانتقدت بعض اللاعبين حتى سامي وستامب انتقدتهم ههههههه الظاهر من كلامك تقصد لاعب معين او شي بس تعال ترى فكل فريق يكون فييه نجوم شايلين الفريق ونجوم مكملين لهم حتى الماضي الجميل اللي عاجبك احسن من اللحين ولكن كان الجمهور يميز بين اللي يستاهل التكريم اكثر من غيره نقطة ثانيه انت تقول الكبتنيه ماتصلح لاسامه طيب لو اخذوها منه اللحين واعطوها للاعب غيره ومايكون حياوي على قولتك هذا ماراح يأثر على اساااامه؟؟!! واذا ع القصات والربطات ترى ذاك زمن وذا زمن ومااعتقد فيها شي لانها حرية شخصيه وفالاخير يعطييك الف الف عافيه على موضوعك وماقصرت

هلا بك اخوي
الجمله اللي كتبتها انا باحترام الاراء وتعتقد انك تبدأ منها بتصغيير موضوعي وافحامي كما جاء بضحكتك بدايه الرد فأقولك بالعكس انا اقول رأيي واحترم رأيك ما دمنا في حلقه نقاش خاليه من التجريح والتقليل من الاشخاص

اما بالنسبه لسامي وستامب اعتقد من وجهه نظري انه حصل ازدواجيه باتخاذ القرار وهذي وجهه نظر شخصيه وانا ما انتقد هنا وكلامي هذا عن مباراة القادسيه فقط
اما الجمهور ما اعتقد اني اخطيت يوم قلت بعضهم وليس الكل اذا حب لاعب وهذا راجع له يستمر بالدفاع عنه حتى لو استمر بالتقصير
وعلى فكره الله يرضى عليك لا تسوي اسقاطات علي وتقول اني اقصد لاعب معين فوالله الذي لا اله الا هو اني اعمم على اللاعبين بأن الهلال اكبر منهم وهو من صنعهم بعد توفيق الله واذا كنت تتوقع اني اقصد ياسر فتوقعك خاطئ لاني طلبت ان تعاد له الكابتنيه ..
طيب نجي للكابتنيه ليش ما دافعت يوم اخذوها من ياسر وانها يمكن تسبب له هبوط ومشكله نفسيه يا حبيبي اقولك الهلال اكبر وانا والله احب اسامه بس شوفت عينك ما يوجه وشخصيته مع اللاعبين عاديه

اما القصات اقولك عاداتنا وتقاليدنا عمرها ما ارتبطت بالزمن ولا نصير منجرفين اذا اللاعبين ما لقوا يقلدون الغرب الا بهذي فالاولى انهم يبدون بتطبيق اصول الاحتراف على انفسهم وبالنسبه لي انا والله اخجل اني البس اسواره او اسوي قصه شعر غريبه يعني انا كتبت على اساس ديني والعادات والتقاليد اللي انبنت على الدين ومن كلامك يعني انك ممكن تخاطب رعايه الشباب للسماح بالقزع
اشكر مداخلتك ووالله انا احترم كل الاراء لكن لو تمعنت مره ثانيه بالموضوع راح تستخلص اني اطالب بروح الفريق الواحد واستدلالي بالماضي ليس فقط اعجاب بل انهم لا يملكون الدخل المادي الحاصل الان ومع ذلك الجيل الحالي عجز عن مجاراتهم

تقبلني بصدر رحب يازعيم