لعيونك يازعيم جاي من استراليا + سبب اللي خلاني احظر,, تم حجز تذاكر الطيران واخيرا
سلام عليكم
اخباركم يا زعماء ؟؟
ندخل في الموضوع سيده ,,,
بعد جهد كبير لاقناع دكتورنا لكي يعطيني الضوء الاخضر في السفرة تحققت امانيي
و وافق و بيني وبينكم ( قايله ان فيه عرس اخوي ولازم اجلس معه يومين )
انا جاي من استراليا علشان بس بس المباراة ,, الصراحة حرام على سكان الرياض وما جاورها انهم ما يحظرون
نبي خمسه وستين الف مشجع يهز الدره ويرعبهم يزلزل الايرانيين واولهم مدربهم
اللي جنا على نفسه يوم قال الجمهور ما يلعب اللي يلعب 11 لاعب ضد 11
شكله ما يعرف من هو جن الملاعب هاه ؟؟
صجنا الله يصجه قابلت بيروزي والاستقلال ولا ظرني جمهورهم
بس ياحبيبي تراك ما قابلت جمهور الزعيم
اول شى انا شبه متأكد ان الجمهور راح يغطي الملعب كله بس اللي انا منب متاكد منه
هو التفاعل نبي تفاعل من اول ما يلمس واحد من لاعبين ارضية الملعب لين الحكم يصفر ,, نبي نغمض عيونا عن ساعة الملعب ولا نبي نشوف النتيجه نبي بس نشوف الازرق يلعب والعب يا الازرق
تبون الصدق ؟
انا ما كنت ابي احظر المباراة لان
راح تروح على 3 ايام من دراستي + بعد المكان عني
بس اول شى يجي في بالي اذا راودتني هذي الاشياء اشغل هذا المقطع
YouTube - مشتاقين يا آسيا - موعدنا 6/10 - شبكـة الهلال
صدقوني اللي ما كان وده يحظر بيحظر من اللحين بيسنتر في الملعب اهم شى اذا شغلت المقطع انعزل عن العالم الخارجي وخلك مندمج مع المقطع 100% وقلي وش تغير فيك بعد المقطع
حنا كـ جمهور الزعيم همنا الاول ترتيب وضعنا في المدرج لان اللي في المستطيل رجال ويعرفون وش يسوون والاولهم الاسطورة
بس يعني ما يظر اننا بعد ما نناقش استعدداتنا اننا نناقش في التشكيلة
افظل تشكيلة عندي هذي :
العتيبي ,, الزوري ,,المرشدي ,, هوساوي ,, لي ,, رادوري ,, الغنام او الفريدي ,, الشلهوب ,, نيفز ,, ويلي ,, عيسى
وعندنا 4 اوراق هجومية في الدكه وهم :
ياسر ,, وليد ,, عزوز ,, العابد
يعني اذا احد من لاعبين الاساسين ما وفقه الله او جته اصابه لا سمح الله عندنا لعيبه اكفاء في الاحتياط بالمركز الاساسي
وعندنا ورقتين دفاعية في حال نريد تامين النتيجه وهذا ان شاء الله ما سيحدث :
البرقان ,, الفرج او عبدالله الدوسري
تبون الصراحة ؟؟
انا اتوقع تنتهي النتيجه 2-1 للهلال الله لايقوله بس هذا توقعي
يجي واحد ويقول ما دامك منتب متوقع الهلال يتاهل وشوله تحظر من مكان بعيد
اقوله انا ما همني توقعي او توقع الناس كلهم وعملي الاول والاخير اهتف لفريقي وهم عليهم بـ الباقي ولو اني ابحظر بس علشاني اتوقع ان الهلال بيفوز ما اصيرمشجع الهلال اصير اشجع الفوز صح ولا لا ؟؟
اللحين اذا تابعتم مباريات من الدوري الاسباني كـ مثال ما تشوفون جمهور مثلا راسينغ سانتاندير يحظرون في مواجهتهم مع برشلون في الكامب نو
او في مواجهتهم لريال مدريد في البرنابيو هل هم يتوقعون الفوز لفريقهم ؟؟
اجزم ان 95% منهم يتوقعون خسارة كبيره و 95% يتمنون خسارة بفارق هدفين او ثلاث ,, اذا ليش يحظرون ؟؟ لانهم يحبون فريقهم وهمهم الاول الحظور والباقي على الاعبين
المهم نبي تفاعل يا اخوااان في الملعب نبي اجن الليله لجن الملاعب منذ تأسيس الهلال
نبي نقول لشيابنا اللي كانوا يحظرون المباريات اول ويهتفون للهلال ويقولون العبارة الشهيرة : ( يا هلال عزك عزنا ) وتفاعلهم الكبير نبي اضعاف اضعافه وانتم كفو بالمسوؤلية ولاترجعوني لدراستي ونا متضايق من تفاعلكم
خارج الموضوع : ( ابوصل قبل المباراة بـ 6 ساعات فقط ودايركت من المطار للغداء ثمن لدره دايركت مين بيسبقني ؟؟ )
(تم حجز الطيران واللي اقلقني كثير الى ما جاء شخص الله يجزاه خير وضبط حجوزاتي تم الحجز عن طريق الخطوط الاماراتيه ومالقيت ولا رحلة توصل لرياض قبل المباراة ,, لقيت رحلة على الاماراتية من سيدني لدبي ومن دبي لا سلام اباد ومن اسلام اباد لرياض ,, والعودة رياض ’’ اسلام اباد ,, سيدني
الوصول لرياض الساعة 2:30 ظهر لرياض يوم الاربعاء
والاقلاع الساعه 4:00 فجرية الجمعه )
وابشركم شريت كرتون بايسون علشان يعطيني جوانح واكمل الرحلة
والمشكلة اخوياي يوم دروا اني بجي كل واحد ويعزم الا تغدا عندي يوم الخميس الا تعشى عندي الله يجزاهم خير بس شكلي ابروحلهم وانا مدروخ
واحب اقول مره ثانيه الله يجزاه اللي دبرني في التذاكر
دمتم بـ عافيه ,, دمتم بحب وعشق الزعيم
الوضع العادي
