الحراثة العجيبة بسم الله الرحمن الرحيم
أبو حمزة شخص سبيكة ,, و اخوياه سبايك ,, اللهم لك الحمد ,, عنده مزرعة ,, دايم يجتمع فيها هو واخوياه ,, علماً بان اخوياه كلهم عندهم مزارع لكن مدري وش اللي مخليهم يجتمعون في مزرعة ابو حمزة بس ,, ومثل العادة .. بعد صلاة العصر يشغل أبو حمزة سيارته ويتجه لمزرعته . وهناك يجتمع مع شلّته الموقرة . وبرضوه مثل العادة دايم سواليفهم زي وجيهم . سواليف تسد النفس وما غير حش في خلق الله وفلان سوا و فلان ما سوا واذا اذن المغرب تفرقوا . علماً بانهم فيهم خير .. أبشركم تراهم يصلون . لكن ذاك اليوم غير . وفيه حدث غريب صار هو اللي خلاني أسرده لكم اليوم . في يوم من الايام وبينما أبو حمزة و اخوياه يحشون خلق الله . دخل عليهم واحد متزكرت ولابسن كرفتة وداهن شعره بـ ثلاث غراش ( علب ) زيت وريحته ريحة أي هندي تشوفونه في الشوارع . جا أبو الشباب وسلم على الشلة وجلس وهو يهز دمجته . أبو حمزة طبعاً بحكم أنه ملك القعدة وعقب ما قهواه سأله : ( خير .. وش عندك يا صديق ؟ ) الهندي خوينا الكشخة .. رد وبكل أدب : ( انا مندوب مبيعات لشركة - بنو الأصفر - وعندي لكم إختراع يحبه قلوبكم ) . طبعاً هالمندوب جا عند ناس فاضية ومن المؤكد أنهم راح يفصفصون إختراعات هالهندي الصتيمة كلها ,, الزبدة ,, أنهم طلبوا منه يعرض عليهم البضاعة ,, كمل المندوب كلامه : ( الله يسلمكم ,, بأسم شركة بنو الاصفر ,, اهنيكم بحكم أن الأختيار وقع عليكم ,, وراح اعرض عليكم إختراعنا اللي ما بعد احد شافه في هالدنيا كلها ,, ومن حسن حظكم أني طحت عليكم ) طبعاً ربعنا ,, طاحت سعابيلهم وصدقوا ,, واسترسل خوينا في الحديث .. قائلاً : ( إختراعنا الله يطول باعماركم هو حراثة ) ,, وعقب ما قال حراثة ,, كل هالسبايك فطسوا ضحك عليه ,, وبعد ما سكتوا قال أبو حمزة : ( والله ياهو إختراع ,, ياخي رح ورا ذاك الجدار بتلقى خمسين حراثة ,, أقول قم قم الله يصلحك ,, الشرهة على اللي يقهويك وعادك رجال ) ,, مندوبنا قال : ( يا اخوان اصبروا وراكم مستعجلين ,, ؟ هذي حراثة نسميها حنا الحراثة العجيبة ,, تبوني أعلمكم وش مزاياها ؟ ) ,, ربعنا ,, كل واحد منهم عدل جلسته ثم طلبوا منه أنه يعطيهم مزايا هالحراثة ,, وطبعاً كلهم راعين مزارع ويهتمون بهالامور ,, كمل المندوب : ( هالحراثة يا اخوان ,, أول حراثة في العالم تتكلم ,, تخيلوا ,, حراثة تتكلم ,, والجميل في الموضوع ,, انكم أنتم أول ناس راح تمتلكها ,, يالله من قدكم ,, عندكم حراثة تحتسي ) ,, هالشلة طبعاً سبايك ,, لكن والشهادة لله ,, أبو حمزة هو اللي تقريبا أقدر أقول عنه اتكنهم ,, يعني ,, هو أعقلهم ,, وتقريبا هو المتحدث الرسمي بأسم الشلة ,, بعد ما سمع ابو حمزه كلام المندوب ,, سوا فيها ,, أنه الشخص العاقل الهادي اللي ما ينلعب عليه والذهانة لاعبتن فيه لعب ,, وهو طبعا من جنبها ,, رد أبو حمزة قائلاً : ( والله شف ,, انت رجال ونعم ,, وما أشكك في كلامك وعيب(ن) علي أكذبك ,, وش يقولون عني العرب ؟ لذلك ,, اللي أبيه منك هو أنك تورينا هالحراثة اللي تحتسي ) ,, أبتسم المندوب ثم قال : ( أكيد أكيد ,, من حقكم يا عزيزي ) , ويطلع جواله ويكلم اخوياه ,, ويخليهم يدخلون الحراثة العجيبة للمزرعة ,, المهم ,, هذي الحراثة ,, وهذولي الشلة الموقرة ,, وهذا المندوب واقف ,, يقول : ( هاااااااه أخليها تحتسي ؟ ) ,, وهالسبايك يردون : ( أيه أيه أيه ,, خلها تحتسي تكفى ) ,, قال ,, ( طيب يا شباب قبل ما اخليها تتكلم ,, التفتوا هناك عند شحنة الرمل ,, وش تشوفون ؟ ) ,, ألتفتوا على كلامه ,, لكن للأسف ما شافو شي ,, وقال أبو حمزة : ( يا صديق ,, ما فيه شي هناك ,, يالله بس خلها تحتسي هالحراثة تراك شوقتنا ) ,, المندوب ,, طاح على الأرض من الضحك ,, وفيه رواية تقول ( انه اغمى عليه لمدة ربع ساعة ) و يوم انه صحى ,, قال : ( يا دلوووخ ,, معكم الكاميرا الخفية ,, وهناك الكاميرا شوفوها هناك عند شحنة الرمل ,, أجل فيه حراثة تحتسي يالتنك ) ,, طبعاً هم قفلت معهم ,, وجلدوا مندوبنا لين داخ ,, انتهت السالفة الشاهد ,, أن أبو حمزة ,, وشلته الموقرة ,, يذكروني بـ جماهير الأصفرين ,, أي واحد يطلع في التلفزيون ومسكر القلاب ,, ويعلن صفراويته ولا يخشى في الله لومة لائم ,, يقدسونه و يحطونه المرجع الأساسي اللي ما مثله ,, وأي كلام يقوله هو الصح ,, والله لو يقول لهم ,, انا عندي حراثة زي حقت المندوب ,, أتوقع يصدقونه ,, الزبدة ,, أنهم يصدقون أشياء عجيبة ما تصدق ,, لكن التعصب يمكن اعماهم ,, أجل متفلتين علينا في التلفزيونات ويقولون أن الإتحاد السعودي ,, يدعم الهلال ,, ومنتدياتهم متفاعلة مع الموضوع ,, نعنبوا بليسكم ,, العام ,, ما راح اقول قبل عشرين سنة ,, العام ,, الاتحاد السعودي واقف مع نادي الاتحاد واللي يمثل الوطن ,, والاتحاد السعودي له وقفاته مع النصر وغيره ,, ويوم دعم الهلال ,, سويتوا زحمة ,, اقول اركدوا لا تفضحونا عند العالم ,, @ قطرات @
- الشخص اللطيف ,, متعب حاله ومتصل على البرنامج ويقول : ذيك السنة ,, رجعنا من الجزائر وطلبنا تأجيل مباراتنا مع الهلال ,, والاتحاد السعودي رفض ,, و بعد فترة بسيطة ,, يتصل شبيه الريح لـ يرد قائلاً : قبل ما تروح للجزائر يا صديقي ,, الإتحاد السعودي قدم مباراتكم مع الفيصلي بدون مشاورتهم ,, صدز ,, اللي اختشوا ماتوا ,,
تعرفون ,, ذاك المقطع ( بلوتوث ) واللي فيه واحد عنده مجموعة من الدجاج ويقولهم : ( قر قر قر قر ) والدجاج يردون بعده بأصوات جماعية ,, ويعيد عليهم : ( قر قر قر قر ) ,, وبرضوه هالدجاج يردون ,, مدري ليه تذكرت ذاك المقطع وانا اكتب هالموضوع ,,
- الهلال والشباب ,, يمثلون السعودية ,, ومساعدتهم أقل ما يقال عنها ( واجب ) يقدمه الاتحاد السعودي لهم , وخلونا نقول ,, وبإذن الله ,, تقابلوا ( الهلال والشباب ) على النهائي ,, السؤال المهم ,, من المستفيد الاول في هالامر إن صار ؟ أكيد ( الرياضة السعودية ) كلها تستفيد ,, وتستعيد هيمنتها المسلوبة ,, لكن ... !! ما أقول الا الله يهديهم ,,
جيرتس أخطأ في مباراة الغرافة وما فيه مجال أننا نرقع له وبأي حال من الاحوال ,, لابد تتم مسائلته عن خطأه الفادح في مباراة الغرافة وهو لعبه بمحور واحد ,, ما راح ادخل في الأمور الفنية واتفلسف عليكم ,, لكن ,, المباريات الجاية حساسة والخطأ فيها غير مقبول ,, المهم ,, أننا نستفيد فعلياً من اخطاء الغرافة لا اننا نتحسر على ذيك الاخطاء ,,
- ( الإدارة الهلالية أخطأت في بقاء جيرتس ) جملة ,, سمعتها أكثر من خمسين ألف مرة من النقاد ,, وحاولت أحصيها لكني فشلت في هالمهمة ,, عاد تصدقون ,, وانا اجزم لكم ,, اذا الهلال بإذن الله ,, خذ الاسيوية ,, هاللي يقولون ان الادارة اخطأت ببقاء جيرتس ,, اتحداكم اذا نسبوا الفضل بعد الله لـ جيرتس ,, راح يقولون ( الجمهور , الإدارة , اللاعبين ) , في بعض الاوقات ,, عندنا ناس اذا قالوا راي ,, لازم يتمسكون فيه حتى لو ثبت نقيضه , بعدين وش يضرك اذا سكت ألحين ,, واعلنت ارائك تجاه هالقضية بعد الاسيوية دعماً وحباً لمصلحة الهلال ,, الإدارة قررت وانتهى الامر وما فيه مجال للتغيير ,,
أكيد الكثير منكم راح لشارع السويلم ,, وشاف البضايع هناك ,, فيه ( القطاعة العجيبة ) و ( السكينة العجيبة ) وألحين صار كل شي ينقال عنه ( عجيب ) حتى حراثتنا في هالموضوع صارت عجيبة وطبعاً سموها عجيبه كون فيها شي جديد ,, الشاهد ,, أنا ,, أنادي واصرخ : يا بو عتب العجيب ,, اللي اخترعت حركة جديدة في عالم الحراسة ,, وهي المشاركة العجيبة والقفزة العجيبة في عرضية الغرافة ,, واللي جاب منها يونس هدف ,, ياخوك اركد ,, وتراني احبك ,, واملي بعد الله فيك ,, وتراني من الناس اللي ما تحسفوا على اعتزال الدعيع ,, بس شد حيلك تكفى ,,
محاتسيكم من خلف الكيبورد : أبو قطرة
اخر تعديل كان بواسطة » لا تستهن بالقطرة في يوم » 25/09/2010 عند الساعة » 06:41 PM |