23/09/2010, 03:37 AM
|
| زعيــم متألــق | | تاريخ التسجيل: 06/03/2008 المكان: ஜਊ قــلـــب الــوالــدهـ ਊஜ
مشاركات: 1,136
| |
سبب الفوز ، تحذيرات سابقه ، اخطاء بدائيه ، العقدهـ وتأثيراتها النفسيه ، طلب للجمهور
السلام عليكم ورحمه الله وبركاته
الحمد لله والف الف الف مبروك حققنا التأهل لدور الاربعه بشق الانفس وبكل صراحه تعبنا احنا الجمهور اكثر من اللاعبين تعبونا والله تعبونا ،،، فريق ينتصر بثلاث اهداف في ارضه ويلعب الاياب بكل برود واستهزاء وعدم إحترام الخصم وبروح اقدر اسميها روح انهزاميه غريبه لدرجه انهم جابوا ثلاث اهداف في شوط واحد من زمان الهلال لم يلج في مرماه ثلاث اهداف في شوط واحد ؟ مالسبب ياترى ؟
البعض يلوم جريتس وصب جام غضبه على جريتس ولو فاز الهلال بثلاثه او اربعه لقال المحنك جريتس والداهيه جريتس ؟ طيب ناخذها بمنطق وعقلانيه ؟ لو نرجع لتشكيلة الذهاب نلاحظ تغير بسيط ،،، اضاف لخط الوسط ولم يهاجم بأثنين راس حربه ادخل بولهامسون بديلاً للمحياني ؟
والصراحه انا توقعت التشكيله نفس ماهي ؟ وارجعو لموضوعي السابق ؟
ஐ◄ نقاط مهمه وتشكيلة لمباراه الهلال والغرافه في لقاء الاياب والمباراهـ صعبه ►ஐ
صراحه المفروض والعتب الوحيد اللي اعتب عليه على جريتس عدم اشراكه البرقان في الربع الساعه الاولى ؟ خلاص المفروض شاهد الضغط يطلع الفريدي يدخل البرقان محور ثابت مع الغنام !! البعض الآن راح يقرأ هالكلام ويقول هذا يناقض نفسه ؟ لا ما اناقض نفسي ؟ طيب ليش مايكون جريتس اعطى توصيات للفريدي بأن يكون محور متقدم لكنه لم يطبق التكتيك اللي طلبه منه المدرب وبذلك قام بإخراجه واستبداله !!
البعض ذكر بأنه ينبغي على المدرب ان يقوم بإخراج ولهامسون ؟ وهذا خطأ مع احترامي للي ذكرو هالكلام ؟ المدرب اتوقع فكر تفكير صح ؟
بأن ولهامسون راح يفيدهـ بالشوط الثاني وإذا استمرت المباراه للأشواط الاضافيه لأن ولهامسون لديه لياقه ممتازه وفعلا شاهدنا كيف فادنا نوعا ما ولهامسون بالاشواط الاضافيه من خلال الانطلاقات .
الهدف الاول مين يتحمله جريتس يعني ؟ يدخل ويعلم اللاعب كيف يناول صح وكيف يستخلص صح ؟ انا اتمنى امنيه ادخلوا على رابط موضوعي اعلاه ،،، انا حذرت من هذي النقطه وراح تستمر إذا ماتم علاجها بالشكل المطلوب ؟ اللي هي عدم التركيز في التمرير من الخلف وايضا بناء الهجمه من الخلف ضعيف والفلسفه الزايدهـ في الدفاع ...!!
الهدف الثالث للغرافه الفاول صحيح خطأ من الحكم لكن احلفلكم بالله العظيم انه من قبل مايصفر الحكم قلت انه هذا الفاول هدف ليش ؟ اتمنى ترجعون وتشوفون حائط الصد ؟
وقوف خاطئ للحائط وزاويه مفتوحه وواضحه !! يعني استغرب من الكابتن حسن العتيبي عدم تنبيه الحائط بهذه النقطه بأن الزاويه مكشوفه للاعب ..!!
حسن العتيبي انقذ المرمى من هجمات خطيره لكن عتبي عليه الهدف الثاني والاكثر عتبا الثالث وسوء ترتيب حائط الصد .
الهدف الرابع اللي قصم ظهر كل هلالي واولهم انا ؟ لاعب يمشي سبرنت طويل من غير اعتراض لاي مدافع عليه ؟ طيب ياهوساوي او خيرات الاقرب منكم يروح للاعب من النص إهجم عليه ؟ صحيح عندكم مهاجمين وتراقبونهم وصعب انكم تقومون بتركهم لكن التردد هذا هوو اللي ماعجبني ابد في الدفاع يعني اروح والا ماروح ؟
ياجماعه هل جريتس مسؤول عن استهتار اللاعب في الهجوم ؟ فرص سهله وبدائيه تضيع ؟ فرصه ياسر امام المرمى تضيع هذي ؟ فرصه الطامه الكبرى العابد تضيع هذي ؟
والشي الاخر اللي لاحظته هو برود اعصاب اللاعبين وعدم احساسهم بالمسؤوليه اطلاقا ؟ اقولكم كيف ؟ لاعب من الغرافه يقطع الكوره من لاعبي الوسط ايّن كان اللاعب ؟ لأنه اغلب لاعبي الوسط لاحظت فيهم هذهـ النقطه السلبيه وهي تحصل لاعبنا يمشي جنبه ومايحاول يستخلص الكوره منه ؟ يمشي شوي بعدين يوقف وبصراحه انا بإعتقادي انه بينه وبين نفسه اللاعب تحصله يقول خلي الغنام يقطعها خلي هوساوي يقطعها ؟ يعني بإختصاراسميها ( إتكاليه ) .
ايضا سجلت ملاحظه غريبه على اللاعبين اليوم ؟ ضعف باللياقه بشكل غير طبيعي ؟ اللاعب الهلالي اليوم ثقيل بالحركه مادري ماهو السبب بالضبط ؟ هل الرطوبه لها دور ؟ ام وقت المباراهـ ؟ مادري بالضبط ماهو السبب الحقيقي ؟
عيسى المحياني صحيح غير مجرى المباراه وحرك اللاعبين واعطى الحيويه في خط المقدمه وبصراحه هو الوحيد اللي بذل مجهود جيد من بينهم ؟ لكن وبكل صراحه السر الحقيقي في تأهلنا بعد توفيق الله عز وجل هم ( الجمهور ) فقط ؟ يؤازر وهو مهزوم بثلاثه ويؤازر لآخر رمق بالمباراهـ ؟ هذا هو سر تأهل اليوم الحقيقي ....
بعد الهدف الثاني للهلال عشت لحظه بكاء غريبه ؟ مادري كيف اوصفها ؟ اتوقع بأنه تعب المباراهـ هو سبب ذلك مخلوطا بالفرحه ؟
على العموم اللي حبيت اوصله سبب الهزيمه اليوم مشترك مو فقط السبب جريتس ؟ الكل لديه نسبه ؟ لاعبين ، إداره ، مدرب ،، والنسبه الاكبر اللاعبين ...
هذا درس قوي للهلال لاعبين إداره مدرب ولنا كجمهور بإعطاء اهميه للمباراه وللاعبين بإحترام الخصم واللعب بحماس وقوهـ ..
هذا درس للاعبين بعدم إضاعه الفرص السهله كما حصل بالذهاب ...؟ لأنه يجي الوقت اللي تحتاج فيه هدف واحد لأنه راح ينفعك كثير بالاياب ؟
واعيد واكرر اتمنى وضع حد لهذا الاستهتار امام المرمى واضاعه الفرص السهله جدا ...
الواضح ان بعض اللاعبين لايستوعب او بمعنى اصح ليس لديه احترافيه الذهاب والاياب لذلك يجب ان تصحح بعض المفاهيم لديهم !!
احب اوضح معلومه اخيره بأن الاعلام المرئي والصحف المقروءه والالكترونيه والمنتديات الرياضيه جميعهم يذكرون بأن الهلال عقدته آسيا والادوار المتقدمه وللأسف انتقلت هذه العبارات الى بعض من جماهيرنا ؟ الكلام هذا غير صحيح والبطوله ليست عقدهـ لنا ؟ اكثر فريق حقق بطولات آسيا نحن الهلال ؟ من فريق القرن بآسيا اليس الهلال ؟ العقده تكون للفريق الذي لم يحقق بطوله ما ؟ ويعجز على تحقيقها ؟ للأسف انتقل تأثير كلمه عقدهـ إلى بعض الصحفيين الهلاليين ؟
صحيح لم نحصل عليها بنسختها الجديده لكن لا تصل لكلمه انها تمثل عقدهـ لنا ؟ ترى كلمه عقدهـ ترجع بآثارها على الفريق مما تجعله ينضغط نفسيا وبدنيا في الادوار المتقدمه من البطوله مما تجعله يفقدها كما فقدها بالبطولات السابقه من فرق اقل مايقال عنها فرق متوسطه وليست بمستوى الهلال .
انا ماطرحت هالموضوع إلا والله حبا في الهلال ككيان !! الحمد لله لم اجرح بأحد انما هي انتقادات بنائه لبعض اللاعبين اتمنى انها تصحح منهم المباريات القادمه إن شاء الله ... وهذا ايضا من حبي لهم كلاعبين اتمنى يشدون حيلهم ويرفعون راسنا إن شاء الله بالمحافل الدوليه والمحليه كما عودونا فهم ابطال دائما ....
رجاء خاص وامنيه من الاعضاء عدم التجريح لا بلاعب ولا مدرب ولا إدارهـ لأن هذا وقتنا بأن نقف معهم ؟ لأني بصراحه شفت كتابات ماعجبتني ابد ؟ اللي يقول بيعو ونسقو واعاره ؟ وتجريح بالمدرب ؟
ماينفع ارجوكم هالكلام ؟ صحيح نعتب ، ننتقد نقد بناء ، لكن ماتاصل المسأله بالتجريح بالاعب وتحطيمه ؟
ارجوكم يجب ان نكون يد واحدهـ ؟ نكون خير عون للفريق ونشد من ازرهـ ونرفع الهمم مو العكس !!
بالتوفيق للزعيم إن شاء الله بالدوري وبالمراحل المتقدمه من دوري ابطال آسيا .....
اخر تعديل كان بواسطة » الامــبــراطــورKSA في يوم » 23/09/2010 عند الساعة » 08:25 AM |
الوضع العادي
