بسم الله الرحمن الرحيم
ما ادري ايش اقول او من وين ابدأ لكن بالفعل انا انتهيت ورب البيت انتهيت
الدنيا قفلت كل شي في وجهي
كل ماجيتها من جهه قفلت في وجهي زياده ,, طيب ليش ,, والله حرااام اللي جالس يصير تراني في النهاية انسان احس مثل الناس
كل ماقلت ان شاء الله بكرة احسن اتفاجئ بالواقع واحس اني اضحك على نفسي
خلاص مليت... ملييييت كل ماافرح لازم ازعل اصلاً ماعاد افرح ماعاد احس بأي سعاده
لا وظيفة ولا مصدر دخل ولا زواج ولا في احد راضي يقبل بشهادتي طيب ايش ذنبي اذا اني درست في الجامعه اربع سنوات وتخرجت شايل معاي شهادة بكالوريوس علم نفس
كل امنياتي اني اتزوج واعف نفسي واجيب لي ولد اشيله يبدي قدام الناس واقول هذا ولدي
كل طموحي اسمع كلمة بابا
كل اللي اعرفهم وفي عمري تزوجوا واللي عنده 2 واللي عنده 3 ما شاء الله تبارك الله أسأل الله سبحانه ان يحفظهم لهم الا انا جالس انتظر الفرج واتحسر على حالي ونفسي
ماخليت مكان ماقدمت فيه والجواب نفس الجواب شهادتك ما تناسبنا , والله حاس اني خريج رابع ابتدائي ليلي مو بكالوريوس
يعني وش اسوي ؟؟؟ اشحد عشان اتزوج ولا اروح واسرق ولا انتحر وارتاح ؟؟
الزواج اقل شي يبيله 150 الف من وين الواحد يجيبها
يعني مثلي لا وظيفة ولا مصدر دخل والوالد مديون بأكثر من 260,000 ريال لانه جالس يعمر ولا يقدر يساعدني بريال واحد وش يسوي !!!
يعني حتى لو بأشتغل بالسيارة الانظمه ما تسمح ,, اعطيكم مثال يوم صحيت من النوم والحاله ( طفران جداً ) قلت بآخذ لفه بالسيارة احصل لي 5 ريال اروح اشتري بها فطور , تفاجئت بعسكري مايخاف الله
اعطاني قسيمه تحميل ركاب حاولت فيه قلت له يا ابن الحلال ما اشتغلت كل اللي ابيه اني اشتري فطور بحق المشوار هذا فكان رده اني اذا حملت ركاب اقطع رزق اصحاب التكاااسي
عجيب !!! يعني الحين اذا العبد الفقير اللي مو قادر يشتري فطورة اذا اشتغل بالسيارة يقطع رزق اصحاب الليموزينات بالفعل شر البلية ما يضحك
اذا كلمت الوالده وقلت لها راح العمر قالت اصبر ان شاء الله يجي الفرج لين متى اصبر ياخوفي نهاية ها الصبر يودي للقبر
نفسيتي زي الزفت وابي اعف نفسي , امنيتي اصير أب , كل امنياتي اني اسمع كلمة بابا , سلكت جميع الطرق المشروعه اللي تساعدني في تحقيق حلمي وأملي في الزواج لكن بدون نتيجه
طيب ايش اسوي بالله دلوني اروح انحرف ؟ اعوذ بالله ! وان شاء الله ماهي من ثوبي
والله تعبت تعبت تعبت يارب رحماااااااااااك من ها الدنيا
ياخوفي بعد فترة احس ان حياتي ومماتي زي بعض
والله اني اضحك وفي عيني الف دمعه , اجامل الناس بابتسامتي وفي صدري ناااار تكويني في داخلي كلاام كثييير ودي اقوله لكن الكلام مامنه أي فايده ,
في النهاية اتمنى من المشرفين عدم نقل او حذف الموضوع لاني مانزلته الا وعندي امل اني احصل حل لمشكلتي لاني بكل امانه متفائل برجاحة عقول الاخوان والاخوات اللي في المنتدى وودي استانس بـ ارائهم
طيب مآحآولت تروح تدور لو إي وظيفه لو إن شششآءالله وش تكون ! الششغل مو عيب !
بس لأتيأس ووحآول تدور وتدور ! وذل نفسك اكثر عشششآن تكسب وظيفه وتسسآعدك عالزوآإج !
والأفضل انك تمسسسك القرآن كل ليله وتقرآإ وتدعي ربك كل ليله وانت سسآجد ان يلبي لك الللي تبيه وينفرج همك !
ترآآ بهالاموور محد نآفعك غير ربك ! ميخآلف اصبر واصبر ! بعد فتررره اكيد ربك بيحققهآإ لك !
طيب حآول تقوول لأخويآك يدبر لك أي شي او احد من معآرفك ! أهم ششي تشتغل ولآ تجلس كذآ !
أنآإ مآإلي إلآ اني ادعي لك ان ربي يفرج همك وتتحقق أمنيتك !
موفق أخووي !
إن ششآءالله تجينآإ هنآ وتبششرنآإ بالوظيفه و الزوآإإج !
شف اخوي الله يفرجها عليك اللهم امين
انصحك بالاستغفار الكثير يوميا اخوي والله انه يجيب العجايب سبحان الله و الدعاء لنفسك باخلاص وقيام الليل و ايضا اطلب من امك تدعي لك وتكثر من الدعاء ودعاء الام لايرد
بس بشير عليك بشور اعرف كثيرين من الزملاء والقرايب مثلك
وماشاء الله سنعوا انفسهم دور لك زوجة تكون مدرسة رسمية بس انها فايته قطار الزواج شوي
يعني يصير عمرها بأول الثلاثينات واخلاقها زينة
لاتقول كيف بصرف عليها التفاهم بينكم زين إلين تتوظف ويرزقك الله
وكثيرات المدرسات اللي ماتزوجن لاتقول مافيه ( وترى الخطابات كثيرات ويعرفن حريم واجد خل الوالدة تسأل عن الخطابة قبل وهل هي امينة مع الناس او لا )
وتشرح لها كل وضعك وش هي شروطك ولاتدقق في الشروط عاد وهي عاد تشوف لك بنت الحلال اللي تناسبك ان شاء الله مثل ماقلت لك اخوي البنات كثيرات بالبيوت مالقن لهن رجال والرسميات اللي ماتزوجن برضو كثيرات
وصدقني اخوي اذا انت رجل واخلاقك زينة بيعطونك الناس والبنات ما راح يعافونك بالعكس الحين الناس يدورون اللي يستر على بناتهم حتى لو ماعنده وظيفه والله يا اختي اننا زوجناها بمهر 30 الف بس لكننا شارين الرجال شرى وراتب رجله الى يومك هذا الف ونص بس المرة العاقلة تبي تراعي ظروف زوجها
ان شاء الله تمشي الحياة وهذا اللي عندي لك اخوي
وتستر على نفسك وتمشي امورك ويعينك ربك
بس بسألك اخوي كم عمرك الحقيقي ؟؟ ومن اي مدينة انت ؟؟ وهل انت قبيلي او غير قبيلي ؟؟
هالاسئلة ذي ياخوي ماهي لقافة بس بشوف يمكن اقدر أساعدك باللي عندي أذا ماودك تجاوب على راحتك اخوي
دعواتي لك بالتوفيق وتيسير كل الامور
الح ـــين أخووي لييش اليآأآس كذآ
لآزم يكوون لو شي بسسيط من الأمل ع الأقل لو عندك ذرة أمل بـ أي شي تتمنآه مآكآن هذآ حآلك
يعني مآرآح تنتهي الح ــياة وله ينقص شي من عمرك أذآ مآتوظفت أو شي من اللي تبيه
صدقني اللي ربي كآتبه لك خو اللي بيصير لك ( وَعَسَى أَنْ تَكْرَهُوا شَيْئًا وَهُوَ خَيْرٌ لَكُمْ وَعَسَى أَنْ تُحِبُّوا شَيْئًا وَهُوَ شَرٌّ لَكُمْ وَاللَّهُ يَعْلَمُ وَأَنْتُمْ لَا تَعْلَمُونَ ) ..
أصبر وبع ــد كل صبر أكييد رآح يجيك الفرج من ربك
نصيح ــه كثر من صلآة الليل والدعآء والأستغفآر ثم الأستغفآر
ورآح يتغير حآلك بآذن الله بس خل أملك بربك كبير لآتيآس
لاإله إلاالله
اسمع ونا اختك باشور عليك بشورمادرى هو قانونى ولا لا
طلع فيزه كم وحده إلى تجيب سيارة تاكسى وشتغل عليها وربك كريم
والدى يقول الحمدالله انى بنت ولا صارت اعلوم
تدرى وش حلمى اسرق بنك
الله يوفقك ويرزقك ويعطيك من خيره ويبعدك عن عيال الحرام
اسأل الله العظيم رب العرش العظيم ان يزيل همومك ويرزقك من حيث لا تحتسب
الاعضاء كفو ووفو بس اهم شي ياخوي الدعاء والاستغفاار ولا تيأس عمر اليأس ماجاب نتيجه . . امم وغير كذا روح مثلاً لسدير او الخرج او المجمعه دور هناك ممكن تلقى . .
ان تقفلت عليك ابواب الرزق وضاقت دنيا من وراك ومن امامك ومن يمينك ومن شمالك
ارفع يدك فووووووووووووق الله والله لني يخيب رجائك انشالله
تذكر ربك فوق ورفع يدك له وادعي والله يفتح لك ابواب الرزق يارب
والله ياخوي اني مريت بلمرحله الي انت مريت فيها
وشتغلت اشغال صح مرتبها مو عالي لكن عل اقل يكون عندك راتب
بقولك على شركه
والله ان هل كلام صحيح .. شركه بميناء متعاقده مع ارامكو شركه ايطاليه اسمها سايبم وتقدر تبحث عنها بقوقل
وترسل لهم فاكس او ايميل وحط كل شهايده
ووللمعلومه الشركه تبي كادر سعودي فقط والله وتقبل الشهاده الكفاءة المتوسطه وتقبل الابتدائيه والثانويه العامه
والله تدرس عندهم يعطونك مكافئه 3500 ريال ثلاث الاف وخمس مية ريال
بعد دراسه وتخرج تستلم راتب شهري قدره 4700 ريال
بعده بخمس شهور تستلم راتب 5000 ريال
تكمل سنه وتنضبط بلعمل تستلم 7000 الاف ريال والله هل كلام صحيح
وتاخذ قرض من اي بنك تريده لنه شركه معتمده متعاقده مع ارامكو شركه ايطاليه
سايبم والله روح لها او ارسل او اتصل عليهم والله راح تستفيد كثير انشالله والله يرزقك ويرزقنا ويرزق كل شباب المنتدى
رجال ونساء
لا إله إلا الله يفتح لها سبعين باب كل باب فاح من عودها وأطيابها ولا إله إلا الله لو نُزّلت في الصخر ذاب ... فوّض أمرك للمهيمن يفتّح بابها ...
* هلالي هذا وإنت علم نفس ومتعمق بـ دراسة النفس البشرية وتقول هـ الكلام وإنت عارف إن تحطيم الذات عمل جداً سيء ,, وش خليت لـ اللي لا هم دارسين ولا متعلمين ولا عندهم شهادات ؟
كلنا تصير لنا مشاكل أهو انا عندك المشاكل شغالة معاي من بداية السنة وماأدري اش نهاية 2010 ؟ ومع هذا ماحاولت احطم نفسي واضر ذاتي ,, بالعكس دوم أردد بيني وبين نفسي : سـأانجح لأني استحق النجاح ,, إن شاء الله ,, ويارب مايخيب رجاي ولا رجا كل مجتهد,,
بدل ماتقول انتهيت قول ابتدى المشوار ,, من بعد التخرج ,,
ارسل السيرة تبعك لكذا شركة حتى لو حددوا تخصص غير تخصصك ماعليك منهم ,,
* دورة الحاسب icdl درستها بالجامعة كمادة أساسية حلوة لكن متوقفة حالياً لو موجودة قلت خذها ,, بس في بديل لكن مو نفس المستوى أقل : إدخال البيانات --> ماراح تكلفك آلالآف , حدود الـ 1500 ريال تقريباَ وحولها ,,
قلت هالدورة لان إذا تخصصك غير مرغوب مره لدى الشركات يكون عندك حجة دورات الحاسب ,,
* إذا عـ العمر والزواج تطمن كثير من البنات يفضلون اللي أكبر من 25 يعني ماراح العمر عليك لان تكون الوحده متطمنة إنه نضج حسيت إنكم فواكة على كلمة نضج طبعاً بعضهم لو يتعدى الخمسين مافي امل لـ النضوج
* فكرة لما تعقد على بنت الناس اطلب من أهل الزوجة يكتبون بـ العقد المهر 20 ألف حتى لو هي طلبت أكثر لان اللي سمعت فيه لما يكون مكتوب 20 ألف بنك التسليف يساعدونك ,,
وعادي بعدها تعطي بنت الناس مهرها حتى لو كانت طالبة أكثر مو مشكلة ,,
إذا عندي فكرة ثانية برجع ,,
يارب ياكريم ماتخلص هالسنة إلا إنت متوظف ولكل العايزين و تجي تبشرنا ,, وبالتوفيق للجميع,,
!
!
!
ومتعمق بـ دراسة النفس البشرية وتقول هـ الكلام 
,,
الوضع العادي
