السلام عليكم ورحمة الله وبركاته


كيفكم ان شاءالله طيبين

يايه اليوم بأكثر من شطحه قبل العيد وان شاءاالله تتقبلونها بصدر رحب



مره ابوي كان بالدوانيه ومافي الا عمامي وعيالهم ودخل عليهم ابو بيت جيرانه
يقول قعد يسوولف شووي ولا يقوول شلون بناتك ويقول اسامينه

ابووي يقول لو ماتعوذت من الشيطان قمت دفنته في واحد يقول اسامي بنات داخل
الديوانيه !! ..قاله عيب تقول اسامي بنات بالدوانيه انت في ديوانيه محترمه

المهم انه هزأه على خفيف

في بعض الشباب يزعل لو قلتله شلون امك ؟ يقوول عالاقل قول شلون الوالده مع اني ماعرف
شنو الفرق بينهم تخيل واحد يسألك شلون امك او خواتك شنو بيكون موقفك !!

يعني ممكن لو هو حريص بزياده على حالكم يقول اخبار الاهل وبس كافي ليش يحدد يعني !!

اقوولكم مثال ثاني لنفسه بيت جيرانه اللي ابوي يمووت فيه

ابوي يقول من يدخل الدوانيه يسولف بصوت عالي ويقول اسم بناته وزوجته عااادي والحياة
بسيطه عنده اوكي ممكن اقرب اصحابك بيعرف اسامي اهلك بالصدفه او بدون صدفه
ممكن انت تقووله لكن ليش بصووت عالي والكل يعرف !!

شرايكم باللي يسولف بصوت عالي باسامي اهله ؟!!

انا مااقول حرام احد يعرف اسم خواتك او امك عادي مو حرام لكن فكرة انك تسولف عنهم بصوت
عالي !! اكيد اغلب الشباب مايقولون اسامي اهلهم بصووت عالي لكن في فئه من الناس يقولون .


انا مو ضد فكرة ان مثلا بيت جيرانه عيالهم يعرفون اسامينه او اي كان الموضوع عن التكلم

باسامي البنات بالمجالس بصوت عالي !!

بمجتمعاتنه الخليجيه في تحفظ شديد على اسم الام واسم الاخت وتكوون مصيبه لو احد عرف باساميهم !!
تشوفه يدخل المستشفى ولا الجوازات ولا اي مكان وهو مغطي اسم امه او اخته وكأنه حرام

مع ان الرسول عليه الصلاة والسلام كان يتفاخر باسماء زوجاته وبناته


عليه الصلاة والسلام خير قدوة لنا


الدين الاسلامي دين الوسطيه لاتكوون متحرر بزياده ولا متشدد بزياده

لاتقول اسامي اهلك بصووت عالي لكن لو احد عرف مافي مشكله


( العرب قديماً وحديثاً لا يأنفون من ذكر اسم المرأة فالله عزَّ وجلَّ ذكر مريم عليها السلام باسمها والرسول
صلى الله عليه وسلم ذكر أسماء نسائه ودونت في الكتب أسماء بناته وكانوا يخاطبوهن بأسمائهن ).


البعض من الرجال تعود على ان ينادي زوجته بألقاب (الأهل)، أو (الجماعة)، أو (أم العيال) .!!

لدررجه انه يتعود حتى داخل البيت يناديها بأم فلان !!



رأيكم بهذه الحاله بمجتماعتنا ؟!

سببها ؟! وهل تؤيدها او تعارضها ؟!






شطحه ثانيه



هذا اخر رمضان اصوومه وانا ببيتي هذا اللي انولدت فيه وتربيت فيه وعشت فيه كل مراحل عمرري

كل يووم احس وانا قاعده على الفطوور بغصه بس ماابينها لاهلي واحس عيني بتدمع

كل يووم لما نقووم من على الفطوور اقولهم بقى اسبوعين , اسبووع , 3 ايام , يومين

اسوأ احساس بالدنيا تترك مكان لك فيه ذكرياات مو ذكريات يوم ولا يوومين لا ذكريات عمرر الله يصبررني بس

مرات افكر افكار مالها داعي اقول معروف دايما اللي يغير بيته اما تنقلب حياته للأحسن او للأسوأ واخاف
تنقلب حيانتا للأسوأ مع انه تفكير غلط وخطرر افكر جذي كل شي بيد الله لكن شسوي الشيطان يلعب براسي

ماودي اترك هالبيت وذاك اليووم قلت حق امي اللي شرا بيتنا ماعندهم ولد
كبير يبي يتزووج ياخذني وارجع اعيش معاه بهالبيت


الله يجعله منزل خير وبركه وعسى الله يطرد هذه الافكار الشيطانيه من راسي




آخر شطحه


رمضان هذه السنه انجزت انجااز بيني وبين ربي ماابي اقووله لكن كل سنه احاول اسوويه
ولا اقدر اتعيجز واتكاسل ولا اقدر اسويه وكل سنه اقول رمضان السنه اليايه بسوويه !!

لكن هذه السنه لله الحمد سويته واحس اني انجززت اللهم لك الحمد

كلنا نحزن على فراق رمضان لكن اللي يفارقه بتعب العباده والقيام والسهر يحس باحساس
غير لانه انجز شي لربه وآخرته

اللي ماقدر يسوي شي رمضان هذه السنه ينوي من الحين لرمضان السنه القادمه ويدعي
ربه يعينه على عبادته والله بيوفقه ان شاءالله المهم النيَه والله بيوفقك لهذا الامر ان شاءالله

وعساه ينعاد عليكم بصحه وعافيه يارب وعيدكم مباارك

هلا وغلا هلاليه

يسعدلي هالتواجد

لا خليها بيني وبين ربي أحسن وترى لو كنت مكانج بعد بحس بنفس احساسج وابي اعرف شنو هالشي


حياج حبيبتي ونوورتي

ياحي الله عبدالعزيز


ماشاءالله عليك وعلى أخلاقك الله يحفظك ان شاءالله


انا بخير وانت ماقصرت بالسؤال

اكيد يهمني رايك عزوز وبانتظار رجعتك ورايك بالشطحات


حياك ربي نوورت

يالبى رووحج انتي

لا ياام متعب مو الكل لاتجمعين والدليل شوفي الاعضاء ردوا وقالوا انه عادي

ذكرتيني لازم اصوور للذكرى


منه ومنج يارب حياج ام متعب نوورتي